- كل ما يخص السنة التحضيرية و أنظمتها -

[Seroon]

السلام عليكم ورحمة الله وبركاته

.

.

لكل طلاب وطالبات #تحضيري_15

مبروك قبولكم .. ويا رب تكون أيامكم جميلة في الجامعة ..

أنا طالبة من دفعة #تحضيري _14 .. درست في الفرع الرئيسي ( السليمانية )

الحمد لله خلصت السنه التحضيرية وكانت سنة جميلة

وحبيت أقولكم على أنظمة الجامعة والتحضيري وكل شي ما كنت فاهمته لما كنت بمكانكم

الكلام مره كثير بس شامل لكل شي تقريبا

و يارب تستفيدوا

..

[Seroon]

بسم الله نبدأ

حتكلم عن كل ما يخص الدرجات والاختبارات :

- الدرجات :

التقسيم
a+ من ٩٥ الى ١٠٠
a من ٩٠ الى ٩٤
b+ من ٨٥ الى ٨٩
b من ٨٠ الى ٨٤
c+ من ٧٥ الى ٧٩
c من ٧٠ الى ٧٤
d+ من ٦٥ الى ٦٩
d من ٦٠ الى ٦٤
f اقل من ٦٠ ( رسوب )

- كل ماده من ١٠٠ وكله يعتمد على درجاتك في الاختبارات في كل المواد ما عدا مهارات الاتصال والانجليزي .

هذا تقسيم الدرجات كل المواد :
دوري اول ٣٠ درجه
دوري ثاني ٣٠ درجه
نهائي ٤٠ درجه

ما عدا مهارات الاتصال تقسيمها غير
٣٠ اعمال السنه ( حشرحها لكم مع المواد )
مافي دوري اول حتختبروا اختبار واحد مع الدوري الثاني عليه ٣٠ درجه
وفاينال ٤٠ درجه

والحاسب في كل فتره حتختبروا عملي ونظري ، العملي الدوري الاول والثاني عليه ٢٥ و النظري ١٠
والفاينال العملي ١٥ والنظري ١٥
طبعا الحاسب النظري كل سؤال عليه نص درجه ، يعني الاختبار اللي عليه ١٠ درجات يكون ٢٠ سؤال وكذا ...
والعملي يختلف تقسيم الدرجات حسب السؤال .

- وفي بعض المواد فيها بونس ( او زي درجات التحسين في الثانوي )
الاحياء و الرياضيات والفيزيا فيها ١٠ درجات بونس مقسمه ٣ دوري اول و٣ دوري ثاني و ٤ فاينال
يعني الاختبار الاول يجيك ٣٣ سؤال وكذا
الدرجه اساسا من ٣٠ بس ال٣ تنفعك عشان لو نقصتي في اختبار غيره تعوضي بالدرجات البونس اللي جبتيها ..
والحاسب فيه ٥ بونس يحطوها مع الاختبار النهائي ولازم تنتبهولها
لأنها تجي بورقه لحالها واحيانا الدكتورات ينسوا ينبهوا البنات انها بونس ويخلص الوقت عليهم وما يحلوها .
والكيمياء ماكان فيه بونس بس نهاية السنه حطوا 5 مع الفاينال .

- وفي كيرف اب :
هذا بعد ما تختبروا وتخلصوا فاينال وكل شي يشوفوا مستوى الدفعه
لو الدرجات مره نازله وفي رسوب وكذا يرفعوا الدفعه نسبه ثابته تختلف من ماده للثانيه ومن دفعه لدفعه
بس غالبا يكون حول الـ5 او ٦ درجات ممكن اكثر ممكن اقل ..

- واخر شي في نظام انو لو جبتي مثلا ٨٤ ( b ) ترفعك الدكتوره درجة عشان تصيري 85 ( b+ )
ولو جبتي ٩٣ ترفعك درجتين عشان توصلي a+
ما تزيد عن درجتين ، والهدف انها ترفعك للتقسيم اللي بعد يعني منb+ لـ a وكذا ...
اما لو جبتي فوق ٩٥ ما ترفعك لانو خلاص مافي شي بعد a+

هذا النظام وحده من الدكاتره الله يسعدها قالت انو من حق الطالبه ولازم يتنفذ في كل المواد
بس صراحه ما افتكر اذا هما فعلا نفذوها ف كل المواد ولالا

نجي للاختبارات :

- كل المواد حتكون اختباراتها الكترونيه يعني كل وحده تجلس على كمبيوتر وتختبر عليه مافي ورق
وكلها اختيار من متعدد mcq
٤ اجوبه وتختاري منها ، واحيانا صح وخطأ

- في الاختبار ممنوع تلبسي عباية واحيانا اللاب يكون بارد الافضل تلبسوا كويس عشان ما تتشتتوا وقت الاختبار

- في اختبار الرياضيات الحاسبه ممنوعه .

- في اختبار الاحصاء حتدخلي معاك ورقه فيها بعض القوانين الموجوده في الكتاب
الورقه تجي مع الكتاب لما تشتريه او تقدري تصوريها من البنات لو مو عندك ، بس انتبهوا مو كل القوانين فيها

- في الاختبارات اللي تحتاج حل زي الرياضيات والفيزيا يعطوكم ورق فاضي تحلوا فيه وتجيبوا اقلامكم معاكم
بس انتبهوا لا تاخذوا راحتكم بزياده في الورقه وتاخذوا مساحات كبيره
لانو احيانا لو تعبّت ورقتك وطلبتي ورقه ثانيه وما كان في حتضطري تنتظري الين يجيبوا ورق ويروح وقت الاختبار .

- الاختبار وقته يختلف من ماده للثانيه ما اتذكرها كلها بس عموما في ساعه ونص ، ساعتين ، ثلاثه على حسب الماده .
تقدري تقعدي لنهايه الوقت وتقدري تطلعي لما تخلصي
بس لو انتهى وقت الاختبار وانتي لسا ما سويتي انهاء للاختبار هوا حيقفل لحاله ويحسب لك بس اللي حليتيه خلاص .
والعداد حيكون قدامك لازم تنتبهي له كل فتره ..

- كل المواد ما تطلع درجاتها لما تقفلي الاختبار الا مهارات الاتصال اول ما تحطي انهاء تطلعلك درجتك

- الدرجات غالبا ينزلوها الدكتورات في صفحاتهم حقت للجامعه يحطوا الرقم الجامعي و الدرجه قدامه
بس في مواد زي الاحياء تطبع الدكتوره الدرجات وتعلقها في مبنى العلوم وكل وحده تروح تشوف درجتها .

هذا كل شي بخصوص الدرجات والاختبارات

[Seroon]

- المواد :

.
.

اول شي كلكم حتنقسموا لخطتين ؛ خطة أ وخطة ب

- خطة ألف تبدا بالرياضيات والفيزيا و مهارات الاتصال والحاسب الترم الاول ، والترم الثاني احياء وكيمياء واحصاء

- خطة باء العكس تبدا بالاحياء والكيمياء والاحصاء والترم الثاني رياضيات وفيزيا ومهارات اتصال وحاسب ..

والانجليزي موجود في الترمين لكل الخطتين حسب المستوى ..

والخطة اللي تنزلك في الاودس يبقى اسمها ما يتغير يعني لو نزلك ( خطة ب ) مثلا حيبقى اسمها خطة ب حتى في الترم الثاني .

حكتب لكم تجربتي مع كل ماده ؛

- هذي تجربتي الشخصية والدكاترة اللي حضرت لهم أو أعرفهم , والناس تختلف مو شرط كل الدفعه تتفق على شي واحد -

• الاحياء :

مادة حلوه وسهلة وتجيبي فيها درجات بسهوله .. بس بشرط !!

تذاكري من قبل الاختبار بفتره ، يعني مذاكره قبل الاختبار بيوم يومين ما تنفع!

اما لو ذاكرتي من بدري وبتركيز اضمني ال١٠٠ لأن الأسئلة مباشرة وما فيها لف و دوران هذا غير البونس ،

واغلب البنات جابوا فل مارك الدوري الاول ودرجات حلوه عموما في الماده

حتذاكروها من السلايدات ( عروض بوربوينت ) وما تحتاجوا الكتاب ابدا

المنهج والاختبار بالانجليزي بس السلايدات مترجمه وذا الشي حيساعدك في المذاكره بشكل كبير

والحلو في الاحياء انو اللي تختبريه في الدوري الاول والثاني ما يدخل في الفاينال !

وبالنسبه للدكاتره افضل شي حنان الشاذلي ، في كمان دكتورات كويسين بس ما اعرفهم .

• الكيمياء :

نفس الكيمياء حق الثانوي تقريبا بس بشكل مبسط اكثر!

تتذكروا الالكينات والأشياء ذي ؟ اخذناها في الثانوي بتعممقق ، في الجامعه موجوده بس بشكل ابسط يعني بس الاساسيات ..

حلو وتقدروا تجيبوا فيه درجات ..

وحيكون سهل لكم لأنكم درستوا الثانوي بالمناهج المطوره , يعني احنا أهون من اللي درسوا مناهج قديمة

اساسا مافيه بونس بس في الفاينال حطوا ٥ ، ما اعرف دفعتكم ايش يصير ..

ما حتحتاجوا الكتاب ابدا ، تذاكروا من السلايدات .

افضل الدكاتره اللي اعرفهم نهى وزان وليلى الحربي .

• الاحصاء :

الاحصصااااااء الاحصصصااء ، الماده اللي ما اعرف كيف اصنفها .

حلوه وبسيطة كأنها العاب والغاز ، لكن لو ما ركزتي وفهمتي مزبوط تجيبي العييد !! وهذا اللي سويته انا :(

كنت مع دكتوره مع الاسف ما افهم منها مزبوط وماكنت اذاكر ،

جا وقت الاختبار وانصدمت اني مو فاهمه شي ومو عارفه كيف اذاكر اصلا !

بس بعدين بديت انتبه على حالتي وحولت لدكتوره كويسه وتحسنت الحمدلله ،

الاحصاء ضروري تحضري محاضراته وتكتبي الملاحظات مع الدكتوره ، احيانا تطلع لك الـkey word ،

يعني تقولك اذا جاتك هذي الكلمه في السؤال اعرفي انك حتحلي بهذي الطريقه ، وتعطيك طرق عشان تفرقي بين الاسئلة ،

هذي الاشياء ضرورري تكتبوها مره مره حتفيدكم !!

الاحصاء في ناس كثثثير جابت فيه A+ ماشاء الله وناس ثانيه خبصت ونزل معدلها ،

كله يعتمد على فهمك فحاولي تستغلي الماده وترفعي معدلك فيها ، وخذيها على انها الغاز وتسليه وحتنبسطي

حتحتاجوا كتاب حتقولكم عليه الدكتوره اول السنه . وترى الكتاب مرره ثقيييل وكبير ، تقدروا تروحوا المكتبه وتخلوهم يجزؤولكم الكتاب ،

يحطوا بس الشباتر اللي حتدرسوها مع بعض ، والشباتر الباقيه مع بعض ، تصير كأنها كتابين ..

لأنه مره حيتعببكم اكبر كتااب ..

و افضل الدكاتره سمماح سندي ودعاء بوقري وريما العمودي ..

• الرياضيات :

الماده اللي اغلب البنات خايفين منها .. بس صراحه يعتبر مستواها متوسط

يعني لو فهمتي مع الدكتوره وتدربتي على مسائل حيجي الاختبار وانتي امورك تمام

اما لو راكمتيها حتتعبك مرررره وقت الاختبار لأن اختبار الرياضيات مليان قوانين ، صح اغلبها سهله بس كثييره لو ما ذاكرتي من بدري حتلخبطك!

لأنو في الاختبار ممنوعه الحاسبه فتحتاجوا تحفظوا القوانين ..

الدرس الاخير من الشابتر الاول + كل الشابتر الثاني مررررره مهمين وتحتاجيهم طول الترم!

الدوري الاول الحمدلله حليت وجبت درجه حلوه بس الدوري الثاني خبصت ! ليش؟

لأنو جاني كم سؤال معتمد عالدوري الاول وانا كنت ناسيتها على اساس خلاص بس حيجي من الشباتر اللي ذاكرتها !

فراجعوا الشابتر الثاني والدرس الاخير من الشابتر الاول كويس لأنها مهممة وأساسية في الماده ،

وسسههله كمان لو ذاكرتيها بالطريقه الصح

حتحتاجوا كتاب ..

افضل الدكتورات اللي اعرفهم اسيا الزقزوق ونهله الدواليبي , وفي غيرهم بس ما اعرفهم

• الفيزياء :

الماده مرره سهله بس اعرفي من فين تذاكريها ..

انا صراحه ما كنت مره افهم مع الاستاذه ، او بالعربي ماكنت اركز - وطبعا كنت غلطانه -

بس قبل الاختبارات بفتره كنت اشوف فيديوهات يوسف زويل ، بطللللة بطلة بطلةةة !!!

فيها كككل شي بالتفصيل وشرحه مره مرره حححللو ويفهم !!

بس كان قبل الاختبارات يحذف فيدوهاته من النت ويخليها في موقعه بفلوس

فلو ماهي عندك لا تعتمدي عليها الين ما تنزليها على لابتوبك ! اما لو في اليوتيوب احتمال اي وقت تنحذف!

وترى الماده فيها اشياء متشابهه يعني لازم تذاكريها من بدري عشان يكون عندك وقت تستوعبي المعلومات وتراجعيها عشان ما تتلخبطي ،

بس عموما سهله وكثير جابوا درجات عالية

غالبا ما تحتاجوا الكتاب الا عشان الاسئله ، كل دكتوره تعتمد شي ،

دكاتره يعتمدوا عالكتاب ودكاتره عندهم سلايدات ، بس لو شفتي فيديوهات زويل حتكفيك

وصراحه ماعندي خلفيه مين الدكاتره الكويسين لأني ماجربت ، بس سمعت عن سناء اباظة وريم الوافي وهناء فرحان ..

• الحاسب :

الحاسب ومهارات الاتصال يسموها مواد المعدل ، ترفعلك معدلك لأنها مره سهههللله !!

كلها بور بوينت و برامج الاوفيس ، بس نصيييحه لا تسحبوا عالمحاضرات اذا تبغوا تجيبوا درجات

لأنو في اشياء احيانا تكون موجوده في الكتاب بس ما تفهميها مزبوط زي مع الاستاذه !

وكمان مره يفيدك وقت المذاكره تتذكري كل شي من المحاضره ، ججد ابدا ما انصحكم تفوتوا المحاضرات!

المذاكره حتكون من الكتاب والسلايدات .

السلايدات اعم وفيها اشياء مو في الكتاب وضروري تذاكروها بالذات في العملي لأنو يجي منها،

وانتبهوا للشرح احيانا الدكتوره تشرح شي ويمكن ما يكون موجود في السلايدات احتمال يجي

صارت لنا مره وحده بس في سؤال واحد ، بس الاغلب يكون موجود في السلايدات .

والحلو انو زي الاحياء اللي نختبره في الدوري ما يدخل في النهائي ..

درستني استاذه ساره نصيف ربي يسعدها مررره شرحها كويس وطيبة وتحب تفهم البنات وتعييد لهم

• مهارات الاتصال :

مادة احسها تعتمد عالدكتوره بشكل كبيير حبييييتها حبييتها من دكتورتها

المادة اغلبها اشياء معروفه حتى من غير مذاكره ، بس في اشياء لازم تنحفظ طبعا ..

كنت لما اذاكر اتذكر كل كلام الاستاذه فالحمدلله مره ماكنت اتعب لأني كنت فاهمه كل شي ،

لدرجه جاني سؤال في الاختبار ماذاكرته وتذكرت الجواب من شرحها !

فحاولوا تدوروا على دكتوره كويسه عشان تجيبوا درجه في الماده ..

* هي المادة الوحيدة اللي فيها درجات بيد الدكتوره على اعمالك *

٣٠ درجه مقسمه على :

١٠ درجات على تقديم عرض ؛ حتطبقوا مهارات الالقاء اللي حتاخذوها وتسووا عرض بوربوينت وكل شي من شغلكم ،

تحديد الموضوع يعتمد ع الدكتوره احنا خلته مفتوح واحنا نختار .

١٠ درجات على مهارة القراءة ؛ حتعطيكم مقالة بسيطة من صفحه وحده تقريها وبعدين تجاوبي عالأسئلة اللي بعدها .

وكمان على مهاره الانصات ؛ حتشغل لكم فيديو او مقطع صوت تسمعوه وتجاوبوا عالأسئلة .

١٠ درجات على كتابه السيرة الذاتيه و خطاب التقديم للعمل

( مو متأكده ١٠٠٪ من التقسيم بس عموما اعمالك عليها ٣٠ درجه )

كلها سهله والأغلب جابو ٣٠

حتحتاجوا كتاب ..

درستني استاذه اميره النمر ربي يسعدها وين ما راحت

احتمال هذي السنه ما تكون موجوده تقاعدت اتوقع بس لو كانت لسا موجوده هي الافضل بالنسبة ليا

• الانجليزي :

الانجليزي دوامه اطول شي بس لو البنات والدكتورة كويسين ما حتحسي بالوقت حيمشي بسرعه

يا إنك تبدي من الصباح لقبل الظهر ، او تبدي من ١١ ل ١٢ وتكملي من ١ ل ٤ بعد البريك ،

بس غالبا الدكاتره يخلصوا ٣ ويطلعوا البنات بدري ،

في بنات يحضروا من ١١ ل ١٢ وما يرجعوا بعد البريك لأن الدكتوره تكون قد حضّرت ،

اللي ما يعرفوه انها ترجع تحضر مره ثانيه بعد البريك واللي ما تجي حسبها غياب ! فلا تسحبوا ..

المذاكره من الكتابين ويعطوكم اوراق كمان

وبالنسبه للدكاتره ما اتوقع تقدروا تغيروهم مو متأكده ..

درستني عبير فريد مره طيبة

• لا تشتروا الكتب قبل ما تقول لكم الدكتوره عليها لأنو احيانا تتغير من سنه للثانيه

وبس هذا اللي اتذكره

لاحد يرد

[Seroon]

الحرمان او dn

.

.

هو انك تنحرمين من دخول الاختبار النهائي

وبالتالي رسوب في الماده وتاخذيها صيفي ..

سببه انو عدد مرات غيابك تجاوز العدد المسموح

لو تجاوزتي ٢٥٪ من العدد الكلي للايام يجيك حرمان

غالبا اكثر المواد ماتقدري تغيبي اكثر من ٦ مرات

* مو متأكدة من العدد تأكدوا من الدكاتره *

سمعنا كلام كثييير ناس تقول انها تعطي حرمان وناس تقول انو التحضيري عموما ما ياخذوا حرمان

بس صراحه مو متأكده فالأفضل لا تتعدوا الـ٤

بالنسبه للحضور اغلب الدكاتره ياخذوا الحضور كل محاضره وقليل منهم ما يحضروا

في دكاتره ينادوا الاسماء بنفسهم وفي دكاتره يعطوا البنات الورقه وهما يحضروا نفسهم

[Seroon]

التحويل من شعبة لشعبة ثانيه

لما ماتفهمي كويس على دكتورتك او يكون الوقت ما يناسبك او تبغي دكتوره معينه ، افضل حل لك هوا التحويل ..

التحويل الرسمي ممنوع في التحضيري ، يعني شعبتك واستاذتك اللي ينزل اسمها في الاودس ما تتغير

بس في شي اسمه تحويل ودي

يعني تروحي لدكتورتك الاساسيه والدكتوره اللي تبغي تحوليلها

ولو الاثنين وافقوا خلاص ينكتب اسمك عند الدكتوره الجديدة وحضورك يصير عندها

بس درجات اختبارك تطلع مع شعبتك الأساسية .

واحيانا لازم كمان تاخذي موافقه منسقة المادة .. في بعضهم يطلبوا توقيع دكتورتك والدكتورة الجديدة وبعضهم لا

واذا دكتورتك ماوافقت تقدري تحضري اضافي مع الدكتوره اللي تبغيها لو عندك بريك وقت محاضرتها

يعني تحضري محاضرتين وحده عند دكتورتك الاساسيه ووحده عند اللي تبغيها

ولو استاذتك الاساسيه تحضّر ضروري تحضريلها عشان ما يجيك حرمان !!

اهم شي لو تبغوا تحولوا روحوا من بدررييي لأن الدكاتره الكويسين معروفين ومن بدري تتعبا كلاساتهم ومايقبلوا التحويل خلاص

كل استاذه غالبا لها اكثر من شعبه بأوقات مختلفه وايام مختلفه شوفوا اللي يناسبكم

والشعبه ماتستوعب اكثر من٦٠ طالبه

.

.

بالنسبه لأوقات المحاضرات

يا إنك تاخذي الماده احد وثلوث وخميس كل يوم محاضره مدتها ٥٠ دقيقه

او تاخذيها يومين اثنين وربوع مده المحاضره ساعه و وعشرين دقيقه ( ساعه وثلث )

طبعا هذا الشي هما يسوولك اياه مو انتي ، جدولك يكون ثابت بس زي ما قلت تقدروا تحولوا ..

انا مثلا الترم الثاني ماكان عندي انجليزي ونزلت لي كل المواد احد وثلوث وخميس

وبقيلي الحاسب بس لحاله اثنين وربوع ! يعني اداوم يومين على مادة وحده!

قمت كلمت نفس دكتورتي وقلت لها ابغا احضر معاك احد وثلوث وخميس ووافقت واخترت الوقت اللي يناسبني

وصار الاثنين والاربعاء اوف

[Seroon]

هذي نصايح عامة مره مهمة !

.
.

اول شي قبل الاختبارات ؛

بعد كل شابتر يسوولكم "سكشن"

السكشن كلاس تحل فيه الدكتوره جزء من الاسئلة الموجوده في نهايه الشابتر ،

ودايما يكون وقت بريك الصلاة ( من الساعه ١٢ لـ ١ )

غالبا ما ياخذوا البريك كامل بس جزء منه .

الحضور مو اجباري و ما عليه تحضير بس مره حيفيدكم في المذاكره .

ومن قبل ما يخلصوا الشابتر الدكاتره ينزلوا جدول للسكشن كل دكتوره متى يومها وفي أي كلاس .. ومو الكل يعطوا سكشن ..

وقت المذاكره ؛

ذاكروا الكتاب او السلايدات مزبوط ، وبعد ما تخلصوها افتحوا مواقع دكتوراتكم وبتلقوا فيها نماذج للاختبارات ،

و "التست بانك" يحطوا فيه اسئلة منوعه ويجيبوا منها كثيييير بالذات الكيمياء والاحصاء .. اتذكر الكيميا كان نص الاختبار من التست بانك !!

وذاكروا اللي كتبتوه في السكشن مع الدكتوره ، وباذن الله فل مارك

وقت الاختبار ؛

لا تلبسوا اشياء خفيفه لأنو غالبا اللابات تكون باردة .. وجيبوا معاكم اقلام عشان تحلوا ،

وفي الاختبار ممنوع لبس العبايه

وانتبهوا للوقت عشان ما يقفل عليكم الاختبار وانتو لسا ماخلصتوا

حاولوا تخلوا الاسئلة اللي ما عرفتوها للنهاية عشان ما تعطلكم

بعد الاختبار ؛

لو حصل وغلطتي في الاخبار ، حيسوولكم الدكتورات جدول مراجعه الأخطاء ..

يحددوا دكتوره او دكتورتين تروحولهم ويشرحولكم في ايش غلطتوا

ضرووري تروحوا عشان ماتعيدوا نفس الغلط مره ثانيه في الفاينال !

ونصيحه اخيره ؛

الأفضضل انكم تذاكروا اول بأول

لكن لو صار وما ذاكرتوا ابدوا من قبل الاختبارت بأسبوع أققل شي !! والأفضل من قبل عشان ما تضغطوا على نفسكم

[Seroon]

الحمد لله بكذا أكون خلصت

الموضوع كله اجتهاد شخصي ونتايج تجربتي والاشياء اللي تعلمتها في السنه التحضيرية

واللي كنت ابغا اعرفها لما كنت بمكانكم

و كتبته للبنات لأني ما اعرف كيف انظمة الأولاد بس أكيد في أشياء مشتركة تستفيدوا منها

لو غلطت بشي أعتذر منكم

و ربي يوفقكم كلكم ويكتب لكم أمنياتكم ويفرحكم بالدرجات العالية وقبولكم في التخصصات اللي تتمنوها

أي استفسار تفضلوا اسألوني هنا

[Dr.Ethar]

يعطيك العافية يارب

[JudaA7mad]

يعطيكي العافية 😍😘.

[فاتحة]

👍👍👍👍👍👍👍👍👍👍😍😍😍😍😍😍😍😍😍😍