خ َـواطر ッ

[M7mmd.Y]

[M7mmd.Y]

وبعد ما كنت منزل مادتين شبه سهله، جا قرار من سعادة رئيس القسم الموقر بتعديل خطة مشروع التخرج

وصار عندي 3 مواد، 2 منهم من اصعب مواد الخطة .. واحدة فيهم من صعوبتها سمعتها واصلة الاقسام الثانية + مادة عامة...

حتى بالمضاربة اضفتها، ولا ما كانو راضيين اضيف اي مادة عامة

وبعد ما كان دوامي يومين وكنت كاره نفسي... صار 5 ايام + محاضرتين توتوريال بالـ 3 ساعات الواحدة

يلا... اصلًا الاجازة مملة والنوم الكثير مو كويس

ابغى ابكييييييييييي :'/

[M7mmd.Y]

،
،

(( رب ضارة نافعة ))

قبل يومين، سويت Script بسيط جدًا، فكرته انه يسوي لك ريفريش للصفحة اللي عندك كل عدد معين من الثواني

والكلية العزيزة، اعلنو قبل امس انو بعد صلاة التراويح رح يبدأ تسجيل المواد.. طبعا انا لي تجارب مع رئيس القسم تبعي

لما تروح عليا مواد واحتاج اضيفها، اضطر اروح له عشان اطلبه يوسع الشُعب .. والموضوع جدًا متعب لأني احيانا استناه بالساعات والأيام

وتطير عليا محاضرات اول اسبوع، واتغيب وانا موجود في الجامعة .. واصلا رئيس القسم مو دايمًا يوافق

فـ اختصارًا لكل هذا، قلت اسوي اسكربت، واشغله في صفحة الأودس عند تسجيل المواد، عشان يجلس يسوي ريفريش ووقت ما يفتح التسجيل، علطول الحق مقعدي...

والمشكلة.... انو ما فتح التسجيل، والاسكربت ظل شغال طوال الوقت من الفجر لحد ما رجعت من الدوام.. حدود 11 ساعة

فـ لقيت رسالة خطأ اني حاولت اسجل كثير، ولازم اراجع القبول والتسجيل،

فـ رحت اليوم... قلت مشكلتي لمسؤول الخدمات الالكترونية.. وسألني كم مرة سجلت، فقلت له كثير

قام فك السيستم عندو ولقي اني مسجل 5000 مرة! طبعًا انفجع الآدمي من العدد هذا

فـ قلت له: "الموضوع مو جنون.. هذا اسكربت سويته"، وشرحت له،،، فـ بعدها قلي ترى انت انشهرت وهنا قاعدين يتكلمو عنك >> اكيد طبعًا مو جالسين يمدحوني xDD

المهم بعد ما فك النظام عشان يشوف مشكلتي، سمع صوت المدير برى جالس يتكلم... قام الموظف فتح الباب، وكان فيه مجموعة موظفين بينهم مدير القسم

قالهم ايش رأيكم نسوي حد لعدد المحاولات للتسجيل، فـ المدير قاله لازم نسوي حد بعد اللي صار قبل امس..

فـ لقيت الموظف يأشر عليا، ويقول هذا هوا... جا المدير سألني" انت طالب الهندسة اللي سجل 5000 مرة!!"

والموظف يضحك يقولي لي "أي شي يصير في الاودس دحين ترى حـ نلبسها فيك"

انا انفجعت،، بس طلع يمزح الحمدلله

المهم بعد دا كلو.. انا شلت الهم انو لو فتح التسجيل وانا عندي المشكلة كل شي رح يطير مني، وسبحان الله، الاسكربت كان سبب اني اروح للموظف هذا

وبعد ما صلح المشكلة، قلي ايش المواد اللي تبغى تضيفها؟ طبعا ما صدقت واعطيته كل الارقام المرجعية

وسجلني في المواد بدون اي مشاكل ولا تعارضات..

يارب لك الحمد، كنت شايل الهم، وطلع اني رحت هناك عشان اسجل جدولي بالكامل ^^

اللهم لك الحمد

[M7mmd.Y]

غبار

من الصيف اللي فات ما دخلت المنتدى. أشياء كثير اتغيرت... سواء في حياتي أو في المنتدى، ومع هذا مازال حب الخير بداخل بعض الاعضاء لغيرهم زي ما هو 3>

قررت ارجع عشان افي بوعد وعدته في السنة التحضيرية، كان زمان طلاب الهندسة ساحبين علينا ووقتها كنت اقول لما انقبل هندسة ان شاء الله ح اساعد الكل وخصوصا التحضيري مو زي ما انسحب علينا

طبعا واضح ايش صار بعد ما انقبلت...... صراحة والله الهندسة تشغل xDDD

لكن وقتها شفت انو فيه ناس غيري ما قصرو مع الطلاب الجدد، ف ما حسيت لي لزمة.. بس قررت اساعد كمان حتى انا

مريت بـ منتدى التحضيري واتذكرت ايام... أيام السيل اللي صار وراحت سيارتي فيه، أيام كنت اخرج بعد كل اختبار واعد الأيام قد ايش بقي واخلص من سنة الـ "هَم" ( طبعا ما كنت داري ايش ينتظرني بعدها)

أيام الحيرة في الخصص،، على قد ما اني كنت احلم بالهندسة من صغري، لكن لاااازم يجوك اصحابك الطيبين يلعبو براسك xD

اتذكر مرة في الانجليزي 4، (بدأنا فيه علطول بعد تحديد المستوى) كنت مع ادفر طلاب وضمنهم اصحابي، اتذكر الدكتور سألهم عن التخصصات اللي يبغوها مستقبلًا

تقريبًا الكل قال طب ما عدا انا وواحد، وفعلا ماشاء الله تبارك الله كلهم ما عدا ممكن 2 اللي ما انقبلو بالطب وجو عندنا الهندسة، فيه اللي سحب وفيه اللي كمل ولسه معايا

حاجات كثير صارت في التحضيري، وكثير ما يجيني حنين لأيامها، لأنها كانت بمعنى الكلمة سههههلة، وكنت مع كل اصحابي من المدرسة

حتى احداث صارت آخر السنة، ما زلت افكر فيها، وادعُ كثيرًا بصدق لصاحبها بالسعادة والهناء والتوفيق في الدنيا والآخرة ^^

[M7mmd.Y]

أدعو*

نسينا العربي