درجة الرياضيات سيئه جدًا .. اتمنى تساعدوني!

[Undercover]

السلام عليكم ورحمة الله وبركاته


أنا طالبة تحضيري علمي خطه " أ "
طبعًا أختبارت الميد تيرم وخلصت ليڤل 3 بالإنجليزي واختبرت دوري الحاسب والمهارات
والحمدلله كلها جبت العلامه الكامله فيها

لكن الصدمه لمن اختبرت ميد الرياضيات وطلعت النتيجه جبت 17 من 30 !!
لمن شفتها انصدمت مره وحرفيًا انهرت ما اتوقعت ابدًا انها تطلع كدا
لو اني ما ذاكرت ما كنت بزعل بس انا ذاكرت قبل الاختبار بأسبوعين
ذاكرت من ملزمة أشرف بركات ومن الكتاب بس لمن دخلت الاختبار وجيت بحل كل شيء ذاكرته نسيته!
بس قعدت احاول احل وما تركت ولا سؤال الا وحاولت أحله وقلت ان بنقص ما راح انزل عن الـ 25 لان عارفه ان غلطت بكم سؤال
بس 17! صدمتني ما اتوقعتها ابدا يعني هذي درجة وحده ما ذاكرت ولا فتحت الكتاب

دحين سرت شايله هم درجة الفيزياء مع اني متأكده حليت كويس بس من بعد الرياضيات خفت مره
ومو عارفه اذا بقدر أعوض الرياضيات ولا لأ!

سمعت ان الاختبار الدوري الثاني حق الرياضيات اصعب صح الكلام دا؟
يعني عشان أعوض لازم اجيب العلامه الكامله بالدوري والنهائي مع البونس
اذا عندكم نصائح للمذاكرة اتمنى تفيدوني

انا بدأت اذاكر من دحين الدوري الثاني وان شاء الله اقدر أعوض

بس ابغى اعرف اذا جبت b+ او b في الرياضيات وباقي المواد a+
اقدر ادخل كلية العلوم الطبيه التطبيقيه؟
لان مره نفسي ادخل تقنية المختبرات ):

[3bdoz]

ليش التحطيم النفسي دا
شدي حيلك و تقدري تجيبي الي تبغيه

أنا في الرياضيات الدوري الأول جبت 10 من 30 لكن شديت حيلي بعدها و الحمدلله نجحت ب 75 من 100 انصحك تشوفي فيديوهات أبو جبل و لو في مراجعات تقدري تحضريها روحي حتستفيدي كثير , وبعد ما تخلصي مذاكرة , شوفي الاختبارات السابقة تفيد بشكل كبير
وبالنسبة لكلية العلوم التطبيقة ما اتوقع طالببين رياضيات ف ان شاء الله تقدري لو حققتي النسبة المطلوبة , و بالتوفيق

[فارس الزهرانيي]

ههه ياما جبنا العيد ... لما تتخصصين كل هذا الكلام راح تنسينه .. ليس من باب التحطيم.. بالعكس اتمنى لك كل خير .. لكن لاتتحطمين من اول محطة واول مرة .. حاولي بكل ماتستطيعين ولا تشككين في قدرات نفسك ابدا.. اذا شكيتي في قدرات نفسك راح تتعبين طول سنوات التخصص .. اهم شيئ لاتنزلين عن b+في المواد كلها .. عشان تنقبلين في اي مكان تبغينه ان شاء الله .. انا جبت العيد ولكن الحمدلله الان انا في كلية الهندسة ما شاء الله هذا بفضل ربي وفي الدوري الاول اتذكر اني جبت 18 بس ماتحطمت .. بالعكس هذا كان بمثابة حافز لي عشان اتقدم.. بالتوفيق