ملخص لمادة الاحصاء 111 من مجهودي المتواضع

[فرحة]

هذا المثال مرا حيفهمكم معامل ارتباط الرتب ل سبيرمان
مثال رقم 4-4 صفحه 125



لدراسة علاقه ارتباط تقديرات الطلاب في مادة الاحصاء ..... الخ


اعطاكم جدول حلو وجميل فيه رتب
قلنا رتب يعني تقديرات
الخانه الاولي تقديرات الاحصاء x
الخانه الثانيه تقديرات الرياضيات y


الحل :

لازم نحول من تقديرات الي رتب
يعني نحول الي ارقام لازم في المعامل الرتب نحول الي رتب الي ارقام




نمسك خانه الاكس التي بالجدول وهي خانه تقديرات الاحصاء
نرتب من الاصغر الي الاكبر زي ما علمتكم
او نرتب من الاكبر للاصغر علي حسب المسأله

هنا المسأله الاسهل اني ارتب من الاكبر للاصغر
اكبر علامة هي a اذن ال a =5
الي بعدها b اذن b=4
الي بعدها c اذن c=3
الي بعدها d اذن d=2
بعدها f اذن f=1


نمسكهم بالترتيب a b c d f




طيب الحل :
اعملو خانه x
اكتبولي فيها التقديرات الي حولتوها من خانه تقديرات الاحصاء يعني اكس نحولها على رتب اكس


ثم نعمل خانه رتب ال y من خانه تقديرات الرياضيات y نحول كل خانه من رمز الي رقم
ونسمي الخانه رتب y



خلاص عرفتو من فين نجيب خانه رتب الاكس وخانه رتب واي


الان خانه ال d هي عباره عن رتب اكس ناقص رتب واي
والطرح بالترتيب يعني مثلا في الخانه الاولي اتب 1-2 عادي نطرح حتي لو الواحد اصغر لاننا لازم نطرح الاكس من الواي حتي لو كانت الاكس اصغر من الواي



ثم اجيب خانه الدي تربيع وهي عباره عن كل خانه في الدي اربعها واكتب الناتج



الان اكتب القانون واعوض فيه والناتج الي يطلع هو 0.6 ارجو للجدول شوفو الاعلاقه ايش نوعها وقولولي
وهذا راح يكون واجب

[فرحة]

معامل الارتباط الفاي شوفو رمزه من الكتاب لاني مااقدر اكتب رمزه هنا
صفحة 128 فيه قانون للفاي رقم القانون هو 4-4 شايفين كاتب جمب حرف ال r دائره وعلهيا خط هذا رمز الفاي



اسهل شي في كل الاحصاء الفاي اكثر شي ممتع حل مثال لمعامل الاقتران فاي لانو مرا سهل
يسمي معامل الاقتران


اول شي ابغاكم صفحة 128 شوفو في جدول لونو اخضر موجود بتعريف رقم 4-3-4
احفظو التعريف لانو مهم
راح اكتب التعريف هنا باختصار هو متغير اسمه فاي رمزه دائره عليها خط يكون بين متغيرين هكذا
( , ) ( , ) زوج وزوج هذا معني الاقواس
(ذكر ,انثي)(مصاب بالسرطان , غير مصاب بالسرطان)



طيب شايفين الجدول الاخضر ابغاكم تركزولي عليه قراءه فقط






الان مثال علي معامل الاقتران الي مرا احبو وحتحبو مرا معايا لانو جدا سهل
مثال 4-7 صفحة 128

اوجد قيمة معامل الاقتران بين النوع ..... الخ

شايفين المسأله قال اوجد قيمة معامل الاقتران وسكت ما قال اسمو عشان كدا انبه تاني مرا احفظو كل معامل مع اسمو ورمزو




البيانات كاتبها هو في الجدول الزوج الاول (ذكر ,انثي) الزوج الثاني ( مصاب ,غير مصاب)
طبعا المقصود بمصاب وغير مصاب اي بمرض الاكتئاب لانو مكتوب على جمب في الجدول مرض اكتئاب الله يبعدو عننا




روحو على الحل على طول
الحل:
اكتبولي بقلك يكونو لونو لحمر جمب عدد 12 اكتبو حرف a
جمب عدد 8 اكتبو حرف b شايفين خانه المجموع فيها رقم 20 اكتبولي جمبها a+b

معناها اننا جبنا ناتج 20 من جمع الخانه a التي هث 12 + الخانه b التي هي 8
اذن a+b = عشرين 20
12+8 = عشرين 20





طيب الان نمسك الخانه الي بعدها خانه الانثي جمب رقم 4 اكتبولي c
جمب رقم 6 اكتبولي d
جمب رقم 10 اكتبولي c+d
وطبعا فهمتو حتجيبوها كيف
نجمع ال c الي هو 4 + ال d الي هو 6 والناتج حيكون 10 وهو خانه ال c+d


طيب حتقولولي نجمع على طول من غير ما نعمل حروف حقلكم انتظرو عليا شويا الحروف مهمه لشي تاني





الان اجمعولي a+c يطلع الناتج 16 شايفين بنجمع بس بالطول او كنا نجمع بالعرض جمب ال 16 ضروري تكتبولي a+c


جمب ال 14 اكتبولي b+d
وعرفنا من فين جات الحروف




الان اضربولي a×d ووصلولي خط بين الحرفين هدول يعني خط بين الحرفين a و d
وناتج الضرب اكتبولي هو على جمب
واكتبو حاصل ضرب a×d





طيب الان اضربولي 8× 4والناتج الي يطلع اكتبولي جمبو حاصل ضرب b ×c

ووصلولي خط بين حرفي ال b و ال c





لما وصلنا خط بين حرفي الاي و الدي
ووصلنا خط بين حرفي البي والسي
طلع عندنا خطين زي اشارة الضرب صح اذن نحفظ كل شي بالجدول يجمع الا هذول الي عملنالهم اشره زي المقص او الي وصلناهم ببعض وصار عندنا اشارة ضرب كبيره هما فقط الي ينضربو


يارب تكونو فهمتو قصدي






الان اكتب القانون وياريت تكتبوه من صفحة القوانين عشان تتعودو علي شكلها
ثم اعوض في القانون
الناتج طلع عندي 0.18 والناتج الي في الكتاب 0.19

اذن الحل حقي صحيح بس قلتلكم اختلاف رقم واحد مو مهم ما يفرق رقم واحد بس لما يكون الاختلاف في رقمين او اكثر بيفرق اوكي


طيب اذن الرقم الي عندي 0.19 اذن ما نوع العلاقه نرجع للجدول والجدول لازم نحفظو لانهم ماراح يجيبوه لنا
علاقه طرديه ضعيفه





ابغاكم تركزون معي على شي مهم جدا
وهو هذا الرقم 0.06 معناه سته مو ستين لاء يقرء سته



اتمني تكونو شفتوها سهله وممتعه زيي

[فرحة]

انتهينا خلاص من معاملات الارتباط
فاضل في الباب همسه صغيره وننتهي منو

[جميلة2010]

شكرااااا

[فرحة]

الانحدار الخطي البسيط
مو هو اسمو بسيط وشرحو بسيط زي اسمو واكيد طبعا فهمو بسيط زي اسمو

بس احب اقلكم انو الاختبار مرا بيجي كتير منو






طيب نبدء بسم الله الرحمن الرحيم
ركزو معايا يبغاله تركيز شويتين
الان الانحدار الخطي البسيط
هو تقدير القيمة المستقبليه لمتغير واحد بناء على معرفه قيم متغير اخر

ومن الممكن استخدام مفهوم عمليه الارتباط في عمليه التنبؤ


يعني نقدر اذا الانسان اتزوج وكان عنده مشاكل في حياته الزوجيه هنا يحدث طلاق
القيمه الاولي هي الانسان الي عندو مشاكل زوجيه كثيره هذه القيمه الاولي هذا المتغير الاول
المتغير الثاني انا الي اجيبو وهو الطلاق ويسمي هذا التنبؤ





اذن تقدير قيمة مستقبليه لمتغير بناء على قيمة المتغير الاخر وتسمي هذه العمليه التنبؤ





مثال صفحة 132 مثال رقم 4-8



لدراسة علاقه الاستهلاك المحلي y بالانتاج x لمادة الاسفلت بالمليون برميل خلال عدة سنوات اخذنا عشر قراءات كما يلي



كاتب في الجدول اول خانه x
تاني خانه y

الحل :
الاستهلاك المحلي y
الانتاج هو x

لازم اول ما تشوفو مسأله انحدار خطي بسيط على طول تحددو بالقلم فين الاكس وفين الواي عشان حنحتاجهم في التعويض حق القانون حقهم





الان نعمل الجدول نعمل خانه اكس ضرب واي
ونضرب الاكس في الواي


والخانه الي بعدها نعمل خانه اكس تربيع ونربع خانه الاكس
يعني 10 تربيعها 100 وهكذا كل خانه في الاكس نربعها ونكتب ناتجها في خانه الاكس تربيع





الان بعد ما عملنا الجدول صار عندي
مجموع الاكس = 90
مجموع الواي = 56
مجموع اكس واي = 632 يعني مجموع الاكس ضرب الواي
مجموع الاكس تربيع =942





طيب عشان نوجد معادله الانحدار لخطي زي ماهو طالب مننا
نعمل ثلاث خطوات سهله ان شاء الله

اول شي لازم تحفظو معادله الانحدار الخطي صم لانهم ممكن ما يكتبوها لنا وهي y=a+bx
شرح المعاديه هو a ثابت
و b معامل الانحدار


الخطوه الاولي افتحو الكتب صفحة 282
معادله الانحدار الخطي البسيط اول خطوه اكتبولي القانون الي رمزه b
وعوضولي فيه


ثاني خطوه اكتبولي القانو الي رمزه a وعوضولي فيه


عارفين ال a هذا عباره عن الa التي بالقانون حق معادله الانحدار والقانون هو y=a+bx
وال b كمان هو من القانون





اخر خطوه نكتب المعادله حقتنا الي هي معادله الانحدار الخطي وهي
y=a+bx
واكبولي مكان ال a قيمتها الي طلعت يعني الناتج الي طلع راح يكون الناتج هو 3.26
ومكان ال b اكتبولي الناتج الي طلع وهو 0.36
اما بخصوص الاكس والواي فيفضلو اكس وواي زي ماهما ما يتغيرو
يعني يصير كذا
y=3.26+0.36x

شايفين الاكس والواي فضلو اكس وواي زي ماهما


انتهت المسأله او انتهينا من المطلوب الاول من المسأله






طالب مني شي تاني وهو توقع قيمة الاستهلاك المحلي عندما يصل انتاج 11000000 برميل
قيمة الاستهلاك المحلي هي y
والانتاج هو x هذا من البدايه هو في رأس السؤال قالي هما عرفني مين الاكس ومين الواي
طيب
اذن نكتب قانون كمعادله الانحدار الخطي البسيط
y=a+bx
فاكرين فوق لما قلتلكم حلو المسأله وجيبو ال b
بعدين جيبو ال a
بعدين عوضولي والقوانين كتبناها وطلع النهايه النتيجه زي كذا

y=3.26+0.36x

قلتلكم وقتها سيبولي الاكس لا تكتبولي مكانها شي
الان بما انو طلب توقع قيمة الاستهلاك المحلي عندما يصل انتاج 11000000 برميل
اذن هو طالب منك انك تجيب قيمة الاكس
اها اذن نكتب القانون تاني لكن تكتبوه كذا

y=3.26+0.36x
ومكان الاكس اكتبو 11 لا تكتبو 11000000 يعني بس ناخذ ال 11 ونكتبها بدون الاصفار اوكي

تصير كذ

(11)y=3.26+0.36
ا




شايفين مكان الاكس حطيت اقواس وكتبت داخلها قيمة الاكس وهي قيمة الانتاج الي هو طالب مني اجيبو وهو 11مليون وقلنا نكتب 11 بدون اصفار
طيب يا شطار اكتبولي هي في الاله الحاسبه انتبهو زي ماهي يعني حتي رقم 11 يكتب داخل اقواس لازم عشان يطلع الناتج صحيح
زي ماهي كذا تكتب
بيطلع الناتح 7.22


اي ان الاستهلاك المحلي يصل الي 7.22 مليون برميل اي ما يعادل 7.220000 برميل خلال السنه عندما يصل الانتاج الي 11 مليون برميل

طبعا المسأله جدا سهله
الله يسعدكم خليكم قريب بشرح عشانكم واي سؤال الرجاء بلغوني اي نقد انا اتقبلو بصدر رحب

[فرحة]

المشاركة الأصلية كتبت بواسطة العبادي شكرا لك على مجهودك بس تابعه للاحصاء سنه تحضيريه خطة (ب) وهل الملخصات الموجوده في المكتبات لاني لم اشتر الكتب فقط الملخصات الراجاء افادتي ,,, وشكرا....

اشتري الكتاب بسرعه لانو ماباقي وقت وعشان تفهم على شرحي لازم يكون الكتاب معاك
الله يسعدك لا تتأخر

[ابوشوق0554]

الله يعطيك العافيه ونطالبك يااستاذه فرحه بالاستمرار وانا معك في المذاكره الله يسعدك
الرجاء المسارعه في الشرح خلاص ماعاد بقى شيىء على الامتحان والمنهج باقي الدسم قدام اللي راح كله سهل

[فرحة]

ابو ليونه احلام المها منوليتا
الله يسعدكم خليكم دائما قريب
اي استفسار اي شرح اي شي مو فاهمينو قولولي وانا راح اعيد شرح على طول الموضوع علي شانكم




ابو ليونه كتبتلك اجابه على سؤالك معامل الالتواء هل شرحي كان مفهوم ولا اعيد

[فرحة]

المشاركة الأصلية كتبت بواسطة ابوشوق0554 الله يعطيك العافيه ونطالبك يااستاذه فرحه بالاستمرار وانا معك في المذاكره الله يسعدك الرجاء المسارعه في الشرح خلاص ماعاد بقى شيىء على الامتحان والمنهج باقي الدسم قدام اللي راح كله سهل

لا تخوفهم ي ابو شوق انا اختلف معاك وبقوه
الي راح هو الصعب الباقي هو السهل
وعقبال مااصير عن جد استاذه يا ابو شوق

[فرحة]

الان راح اروح اطبخ الساعد 2 ان شاء الله ارجع اكمل شرح احل اسئلة الاختبار الذاتي للباب الرابع
مع شرح للباب الخامس ان شاء الله