تنبيه لطلاب دفعة 09 بخصوص المواد الحرة والأختيارية وعدد ساعات التخرج ( بالصور )

[أبو فاتن]

المشاركة الأصلية كتبت بواسطة d7om_1 حلو الكلام لكن يجول بخاطري سؤال عادي أرسل إي أحد بجده ولا لازم أسوي له ورقة مني أو وكالة , يعني ما يسألونه وش دخلك أنت ؟؟؟

هلابك أبو مشعل


والله وأنا أخوك تروح وتجي على أسلوب الشخص اللي بترسله يقدر يسويها بدون تفويض


لكن بالنظام لازم التفويض هذا في حال تغيير الحالة أما في طباعة الخطة فقط مو ضروري كلمتين معسولة وأسلوب إقناع يمش الحال لأن أغلبهم شباب طيبين

ومتفاهمين ماغير واحد أو ثنين الله لايوريك

[أبو فاتن]

المشاركة الأصلية كتبت بواسطة d7om_1 سؤال أخير شباب أنا مخلص 96 ساعه وللحين ماغيّرت حالتي إلى متوقع تخرجة عن طريق الأودس لأني ما خلصت عدد الساعات المسموح بعدها تغيير الحاله هل أقدر أطلب من ابو طالب يعتمد عدد ساعات التخرج 128 ساعة وأنا للحين ما خلصت إلا 96 ساعه ياليت أحد يسعفنا بأجابة مشكورين

تامر أمر يابو مشعل


تغيير الحالة الله يسلمك يستوجب عليك إنك تكون معدي 105 ساعة مكتسبة وتخاف أنهم يقولون لك الشباب في قسم إدخال البيانات إن النظام مايقبل


لكن هذا ما يمنع إنك تجرب وتشوف رأي المحترم أبو طالب ما أنت بخسران



لا تستغرب شي ترى ممكن اللي مايصر يصير

[mare5421]

أولاً : لك الحمد حتى ترضى ولك الحمد إذا رضيت ولك الحمد بعد الرضى
مساء الخير على الجميع وألف ميرووووووووك لإخواني عوبد99 وpiik وخويه ولا انسى نفسي انا بعد والأخ Raul على ما من الله علينا من بركته ورضوانه من حذف ثلاث ساعات من مادة اختياريه او حرة والله يجزء اخونا البطل والكينج ابو فاتن اللي نورنا وسهل علينا الطريق بعد الله عزوجل ويجعل ما قام به في ميزان حسناته والله يجزاء الأستاذ القدير ابوطالب عنى خير الجزاء على ما قام به من تفهم الوضع اللي اقحمنا به من غير ذنب,,,,
والله يشباب هذا اللي اطمع له دعوات من ظهر غيب ولا اريد شي إلا الله يوفقنا ويسهل امورنا ويخارجنا من هالجامعة بخير.
طبعاً ياشباب صار اليوم بعض الإكشنات اللي فعلا ودي احكيها لكم من يوم ركب الطياره وانا رايح جدة حتى رجعتي للرياض وأنا في مطار جده طبعا الموضوع طويل شوي وشكل إدارة المنتدى لما تشوف الموضوع موب راح تقفل اليوزر حقي يمكن تمحطبه في الشارع مره وحدة طبعا ركبنا الطياره وكان الإقلاع الساعة ثمان الصباح وبعد ماركبنا بقي واحد متأخر ( شكله كان نايم ابو الشباب ) المهم جى وركبوه اول مادخل الطياره شكله ضيع مقعده او فيه شي غلط قامت المضيفة المسكينه تشيك على بعض الركاب اللي قدامي يمكن منهم اربعة بس اللي شيكت البوردينج حقهم في واحد كنه ما عجبه الوضع بعد ما قعدو خوينا النايم قام يزاعق على المضيفة المسكينة حتى الظاهر برج المراقبة سمعوه( رحمتها) شوي وجى السوبر فايزر حق الرحلة وقام يهدي فيه وأبو الشباب مستلم المضيفة توه شكله متعلمله كلمتين انجليزي وقال خلني اجرب نفسي انفع ازاعق بالإنجليزي ولا ما عرف المهم قامت المضيفة تصيح ( ذكرتني بشغالتنا يوم جت تبي تسافر) قلت في نفسي يالله صباح خير شكل الموضوع راح يطول ونتأخر على ابو طالب المهم كن الأمور هدت بس نكد علينا الله ينكد عليه المهم مالكم باطويلة وصلنا جدة والحمدلله وانا اللي القط موتر وعينك ما تشوف الا النور ماسك الكتف الأيسر (الخط الأصفر يعني) كني إسعاف قلت عشان اخلص الموضوع بدري على الأقل قبل الظهر ( بعدين اقولكم ليش كنت مستعجل) والظاهر الموضوع يابو فاتن خذا ( إدارة عمليات وبحوث عمليات ومحاسبة بعد) المهم وصلت الجامعة بالسلامة ودخلت مبنى تطوير إدارة اعمال اللي فيه ابو طالب الله يسعده المهم اول ما دخلت قمت اناظر اول مكتب على اليسار على وصف الشباب ليقيته مقفل اللي مكتب ابو طالب قلت لنفسي اهااا شكل القرادة بدت المهم قلت خلني على الأقل اطبع الخطط ثم اسأل على ابوطالب وألقى كونتر في بهو المبنى ما فيه احد قلت وش ذا الحظ اثاري الموضوع فيه كونتر ثاني داخلي ما دريت عنه سألت شباب قلتلهم كيف اطبع خطة قالولي من الكونتر بس هذا يوم اني اشوف من ورى القزاز والباب حقه مقفل قالولي كلهم في اجتماع ما فيه احد (لابالله الاجراد في جراد )الحظ متنوكس من اولها ويوم أشوف باب يدخلون طلاب ويطلعون منه طلاب قلت ياولد خلني اجرب حظي وأشوف والله وفعلا قريت على بابه مشرف الخدمات الأكاديميه قلت يمكن عنده علم سلام عليكم وعليكم السلام شرحتله الوضع قال اطبع الخطة ياولدي وبعدين تعال (يوم قال ولدي اعطاني روح معنويه الظاهر انه ما دقق في (الشيب اللي في السكسوكة) قلته ابشر ياعم طبعاً هذا دكتور وأتذكرته مره راقب علينا والله وأقعد لي ابو نص ساعة وإلا باب الكونتر يفتح قلت الحمدلله وأطبع الخطط وأرجعله ثاني قلت أبعطيه خططتي اول اشوف وش علمه المهم قام يحسب ويطرح ويظرب اول ما كتب على خطتي 3 ساعات وكتب جنبها اختيارية جاني احباط ( كنك يابو زيد ماغزيت) ايوه وكتب تحتها 15 ساعة اساسيه توني بأشرحله الوضع قال ياولدي اسمع كلامي خذ الزيادة ولا النقصان قلته طيب كيف بعض الشباب شالو عليه الزيادة قال خذ كلامي واتوكل على الله وغنشالله تتخرج وانت مبسوط كنه يقول شفت الباب هذا وريني كيف تخرج منه المهم يوم شفت ما عنده علم رجعت للشباب اللي عالكونتر سالت عن ابو طالب ثانيه قالو كان في اجتماع معنا في نفس المبني ثم راح لإجتماع ثاني في مبنى الشؤون التعليميه قلت في نفسي ايوووه لابالله الا رحنا فيها المهم قلتهم متى يرجع قالو مادري الا واحد من اللي عالكونتر الظاهر انه صديقه الأنتيم قالي امر وش تبي فيه شرحتله الوضع قالي ياحبيبي ما عليك لا تضيف الا 15 ساعة وتوطل على الله قلته كيف قال ما عليك قلته يعني اعتمدعلى الله ثم عليك قال ما عليك طبعا قلته سم ابشر ( لازم اعطيه جووه عشان يحس انه مسؤل ) المهم قلته عطني خطة ثانيه بدل حقي اللي شخبط فيها ابو الشباب الاول طبعا مستحيل اني بعتمد كلامه لأن الموضوع ما فيه شي رسمي عموما قعد انتظر ابو طالب الين اذن الظهر وصلينا وقمت ادعي ربي ان الله يسهل امورنا ولا يردنا خايبين ويرجع ابو طالب لمكتبه سالم غانم والله ألطع الين الساعة وحدة وربع تقريباً الا هذا واحد جى يفتح مكتب ابو طالب لقاه مقفل وأول مالقاه مقفل (حرك الجوال ودور علومه) قل يالله انه يعطينا بصيص امل انه كلمه ويوم كلمه الا وهذا ابو طالب جى بعد تقريبا 10 دقايق بعد المكالمه شكله دكتور اللي كلمه واضح عليه وأول طبعا انا مامعي وقت لازم اكون في المطار الساعة 2 ونص البوردينع في جيبي واثق اني بخلص بدري شوي وإلا هذا الدكتور جلس جنبه قاعد يظبط وضع طالب (ياحظه)مشالله المهم طبعا هو مكامة في مكالمة وانا ابي اخلص خلاص مليت المهم اول ما خذى الخطط مني كانت خطتي اول خطة يوم قام يظرب اخماس في اسداس شوي يوم كتب اللي باقي 15 ساعة كنهم وقتها بشروني بولد والله ما تتخيلون يشباب كيف كنت في قمة السعادة باذات يوم خذف على الشباب بعد قلت الحمدلله تعبنا ماراح بلوشي المشكله انه سأني قال وين الشباب اللي معك قلته والله ما قدرو يجون عندهم ضروف ووكلوني بالمهمه قام الدكتور اللي جنبه الله يهديه ملقوف قال وين الوكاله قلت ها وكاله شفويه كن ابو طالب يقلبها في راسه قال تدري هو لازم يكونو موجودين يمكن يكون فيهم احد ما يبغى اوشي قلته يابن الحلال لو حصلهم حذفو الترم بكبره كان حذفوه طبعا اقولها في نفسي (طبعا من باب الميانة يشباب) والله الحمدلله انجزنا المهمة طبعا خرب على ابوطالب الله يهديه لأني كنت مخطط اخلص منهم بدري واروح العمادة عشان اعطيهم صورة الجواز وبعد كذا اطير على (البيك بعد الظهر) الحين عرفتو ليه كنت ماسك الكتف الايسر عشان يكون عندي وقت( للبيك) بس الظاهر ان وجهي وجه فطيرة لوزين المهم اول ما طلعت من الجامعة واطير على المطار قلت الحق اتغدى هناك ويوم اني قاعد اتغدى الا وهذا (راس حميدة) قدامي طبعا عرفتوه اكيد (اخونا في الله اللي تطاق مع المضيفة ولا ومعه واحد بعد) المهم قلت اللهم جعله خير يارب وتجيب العواقب سليمه والحمدالله انه ماكان معي في رحلتي (وهذي كل السالفة ) انا داري اني طولت عليكم بس بصراحة احداث حبيت اني ارويها لكم. وبالتوفيق للجميع

[bandarman]

الله يعطيك العافيه قصه شيقه والحمدلله على السلامه والف مبروك التخرج مقدما ان شاءالله.

[RAUL 7]

ماتقصر والله يا ابو سعود ،،،،،


والله يجزاك الف خير ،،،


وش صار على استفساري ،، سألت ابو طالب مثل ماوصيتك؟؟

[mare5421]

المشاركة الأصلية كتبت بواسطة bandarman الله يعطيك العافيه قصه شيقه والحمدلله على السلامه والف مبروك التخرج مقدما ان شاءالله.

الله يسلمك اخوي بندر وقبالك

[mare5421]

المشاركة الأصلية كتبت بواسطة raul 7 ماتقصر والله يا ابو سعود ،،،،، والله يجزاك الف خير ،،، وش صار على استفساري ،، سألت ابو طالب مثل ماوصيتك؟؟

اي والله سألته قالي عادي اهم شي ما تكون اساسية يعني تحذف حره أو اختيارية كله واحد على حسب المتبقي للطالب

[mare5421]

بس فيه شي مهم أحب أوضحه لكم لو فيه أحد يبغى يغير الوضع لربعه او شي وهو من خارج جده يحاول يأخذ معه تفويض على الأقل لأن شكل الموضوع راح يكثر على ابوطالب وهذا اللي انا حسيته اليوم منه فقط للتنويه

[d7om_1]

المشاركة الأصلية كتبت بواسطة أبو فاتن تامر أمر يابو مشعل تغيير الحالة الله يسلمك يستوجب عليك إنك تكون معدي 105 ساعة مكتسبة وتخاف أنهم يقولون لك الشباب في قسم إدخال البيانات إن النظام مايقبل لكن هذا ما يمنع إنك تجرب وتشوف رأي المحترم أبو طالب ما أنت بخسران لا تستغرب شي ترى ممكن اللي مايصر يصير

ما يآمر عليك عدو يابو فاتن
أستفدنا من موضوعك ونورتنا على شيء محتاجين له
فالشكر لله أولاً ثم لسموّكم ولكل من شارك بالموضوع
بالنسبه لي بغير الحالة الترم الثاني وبطلب الخطه على 128 ساعه ومنها تخرج أن شاء الله
أحسنتم

[أبو فاتن]

هلابك أخوي أبوسعود وألف الحمدلله على السلامة وبيض الله وجهك والله لايضيع لك تعب ويوفقك

والظاهر الموضوع يابو فاتن خذا ( إدارة عمليات وبحوث عمليات ومحاسبة بعد)

ههههههههههه المعذرة نسيت أقولك عن وقت تواجد الأستاذ أبو طالب لأنه يتواجد من الساعة 8 تقريباً الى الساعة 11 بعدين يطلع ويجي على الساعة وحدة ونص

اثاري الموضوع فيه كونتر ثاني داخلي

مافيه غير كونتر واحد الله يسلمك اللي هو أول ماتدخل المبنى يكون بوجهك على طول

ويوم أشوف باب يدخلون طلاب ويطلعون منه طلاب قلت ياولد خلني اجرب حظي وأشوف والله وفعلا قريت على بابه مشرف الخدمات الأكاديميه

حذااااااااااااااري من هالباب واللي ورى هالباب أكبر غلط غلطته إنك رحت له ,, قسم بالله هذا إن ماشاف توقيع العميد المشاط الله يطول بعمره مايمشيك لو تفحط ولا أبشرك حتى لو شاف التوقيع يحاول يجيب لك أي عقدة وخصوصاً لو شاف هيئتك إنك من أصول بدوية ( المعذرة على هالكلمة والله ماقصدي شي بس لازم يكون هناك تنبيه على هالشغلة ولازم العالم تعرف إنه باقي فيه ناس تفكر وتتعامل بهالشكل وبهالمنطق الله يسامح الجميع )

توني بأشرحله الوضع قال ياولدي اسمع كلامي خذ الزيادة ولا النقصان قلته طيب كيف بعض الشباب شالو عليه الزيادة قال خذ كلامي واتوكل على الله وغنشالله تتخرج وانت مبسوط كنه يقول شفت الباب هذا وريني كيف تخرج منه

شفت شلون .. معلمك

أحمد ربك إن الله أنقذك بأبو طالب والا كان رحت ملح

انا داري اني طولت عليكم بس بصراحة احداث حبيت اني ارويها لكم. وبالتوفيق للجميع

خذ راحتك فديتك وكنا مستانسين وحنا نقرأ ونضحك على هالفلم الهندي اللي بالنهاية طلعنا منه بفائدة لنا وللأخوان


بس أنا عندي شوي أستفسارات الله يسلمك ( وإن شفت إنها تضايقك أو تحس إنها تدخل بشؤونك فأنت معفي من الإجابة ) ياليت توضحها للي حاب يستفيد مستقبلاً


أولاً : أنت كيف كان وضعك الأكاديمي قبل التغير من حيث عدد الساعات ونوعية المواد قبل تروح لأبو طالب وكيف صارت بعد أبو طالب

ثانياً : نبي نعرف على أي أساس تم التعديل وليه ؟ ( يمكن أنت فهمت أفضل مني لأني للحين أنا رغم إني عدلت الوضع مو فاهم )

ثالثاً : رحت العمادة وغيرت الحالة أو لا ؟

إذا كانت الإجابة نعم فماهي الإجراءات ( لتعم الفائدة )


رابعاً : ماهي التوصيات كان فيه توصيات تحب تقولها لأخوانك قبل يتعبون ويتعنون ويرحون ؟



هذا ورحم الله والديك ووالدين كل من يقرأ هذه الكلمات وجزاك الله ألف خير وبيض الله وجهك