~~ شــــــتــــــات ~~ ♥ مُصرهـ علـى قــراري ♥..

[مصره على قراري]

مالكم امان

[مصره على قراري]

شتات .,

جزء من روحي هنا !

[مصره على قراري]

يوم عادي واشوفه الاجمل من بدايته
بعد شهر من المرض ., بداية هالشهر 16 بالعنايه المركزه
مع صدمات انعاش بين فتره والثانيه وعمليات مفاجئه نوقع على اوراقها بعد ماتخرج
من كثر العجله والخوف من التأخير

كنا نتابع مباراه للهلال وكانت هلاليه صميم ., ومتحلفه بخواني انو الفوز للهلال وبكتساح
وكان لها الي تبيه ( ما اذكر مع مين كنا نلعب بالضبط بس اذكر انا منظرين هالمباراه من مده )

خلصت المباراه بفوز الزعيم
وفرحت كثير واتصلت على اخوانها تستفزهم :)

وكلمت محمد تطمن عليه ( كان رايح لرالي حايل)

تعشينا ., ومن السوالف مع اخواني بدل ما اخذ عصيري اخذت عصيرها
وضحكت وقالت .. عقلك وين ياماما ..

وجبنالها عصير غيره

بعد العشاء قالت يلا اذلفوا غرفكم بنام ( تمزح)

رحنا غرفنا وسواليف وحش انا وخواتي
ونغير لبس ونحفت وتخنتي وكلام البنات ذا

والساعه وحده

نادت خلود اختي وبصوت مسموع مع غرفتها

وقالت ( صحوا اسماء انا تعبانه وابيها تروح معي المستشفى)

وقتها اسماء نايمه

قالتلها خلود: انا اروح معك وبخلي بنتي عند مريم

مارضت قالت ابي اسماء ( ولليوم مانعرف السبب )

مع انو معزتنا وحده وخلود اقربلها من حيث الخرجات والدخلات والضيوف
دوم معها.,

راحت وكانت حاسه انها مابترجع

واخر كلمه سمعتها منها (ابوك لا..... مريم)

وكنا نقلها حاضر حاضر بس اذكري الله

كان نفسها ضيق وبالقوه تمشي

ماعرفت ان الروح تنزع من القدم الا بعد وفاتها

راحت وانا حاسه انها بترجع
وظليت اصلي وادعي

وعلى قلق خلود اختي

الا اني كنت متأكده انها راجعه

والساعه سته رجعوا

بس بدونها .,!

كل الي قلته وقتها

( تنومت مره ثانيه ؟؟)

واسماء ماترد علي

وانا من ذيك اللحظه ماقدرت انطق بحرف
ولا اعبر حتى بالدموع

لحد ماشفت ابوي وجدتي ( امها) بوجهي

طلعت كل الي كان بخاطري من سنين
وقلت تفاصيل ماكان يعرفها الا انا وهي

كأني كنت ابي اطلع الي بخاطرها .,!

بس راحت

عمري ماتخيلت اني بهالقوه

على قد ماكنت انا اضعف وحده بخواتي واكثر وحده محتاجه لها

الا اني كنت اكثر وحده مطمنه انها راحت لدار احسن من دارها (بأذن الله)

وراحت بعزها وبصحتها

تعافت شهر واستقبلت كل احبابها وزارتهم

مابقي احد من احبابها ماشافته

وكانت بين بناتها وعيالها واحفاده

ومطمنه عليهم كلهم


سلمت الامانه , وراحت



هذي امي .,


اشتقتلها كثير

حسيت بعد وفاتها انو مالي ظهر رغم ان ابوي موجود واخواني الله يحفظهم

حتى الاخطاء الطبيعيه الي يتعلم منها الشخص

اخاف ارتكبها

قبل كان فيه السند الي مهما اغلط ارجعله وينصفني حتى بعقابه

بس الحين لا

بوفاتها حسيت اني بصحراء مو قادره اكمل بدونها
ولا قادره اوقف عشان ما اموت بهالصحراء


الله يرحمك يا امي ., 3 سنوات من وفاتها
ومازال عندي احساس انها مسافره وبرجع

وهاليوم العادي الي كان الاجمل في بدايته ., انتهى بوفاتها

[مصره على قراري]

ان انجزت شي بعد وفاتها كله عشان استاهل اكون بنت لهالانسانه .,

تعبت كثير وتحملت ظلم محد بالكون يتصوره ., عشاني بس

الله يرحمها وبغفرلها

كثر ما ادعيلها كثر ما اخاف انو دعوتي ما توصلها لاني مو بالصلاح الكافي ., الي اشترط بنص الحديث ( وولد صالح بدعوا له )

واي سعي للأصلاح من نفسي كله عشان توصلها دعوتي .,


ما ادري ليه اليوم بالذات تجاوزت كل الكلام الي ممكن اضحك على نفسي فيه
واكتبه هنا عشان احسن انو هالشي مو ببالي ولازم اكون قويه واعيش وكتبت عنها

بس ماقدرت .,

الله يرحمها ويغفرلها وجزاها الجنه على كل ظلم تحملته عشاني ..

[مصره على قراري]

للي سأل عن قصة البنت الي بصفحات المدونه الاولى ., اي هذي انا

[مصره على قراري]

يظل القصور احد اهم صفات ., البشر

[مصره على قراري]

الحمد لله .,


وعد اخوي محمد بحتفال ونفذ وعده .,

[مصره على قراري]

إن المراجعة والنقد الذاتي يسببان آلاما ولكنهما يمثلان الخطوة الأولى على طريق إيقاف التدهور

عبد الكريم بكار

[مصره على قراري]

هناك من يختار الفاظه وتوجهاته على مقياس

( إثارت حافز المتلقي ) فحسب .,!!!

[مصره على قراري]

القضاء فالسعوديه .,!

محور نقاش اخذ مني قرابة الثلاث ايام

بين ادانه وانصاف ..

لكن ...,

تظل نظرتي محدوده لاني لم اسمع الا من اطراف
تحابي للجانبين .,

اريد ان اعرف اكثر
!!