تجارب الطالبات (مواد+ أستاذات)

[همسات دافئة]

والله فكره حلوووووة الموضووع هذا ..


ياريت يتثبت كمااااااااان يكوون احسن ..


ان شاء الله ليا رجعه بس دحين مستعجله خخخ


سي يو ليتر ...

[د.محمد صالح الغامدي]

تحياتي. وين باقي الطالبات اللي يشتكون من التعسف في شطر الطالبات والظلم والرسوب.... واضح ان الأستاذات شغلهم مرتب. عموما تمنياتي بالتوفيق

[Claymore]

السلام عليكم ورحمة الله وبركاته

بتكلم عن الاستاذات الي درسوني من واقع تجربتي الشخصية فقط وليس من منطلق " سمعت فلانة قالت "

د.أفنان فطاني : انسانة في غاية الاحترام والتعاون وشرحها رائع ... سريعة في الشرع وتتوه الطالبة ... نظام تصحيحها غريب لكن اسئلتها ممتازه

د. امل شعيب : دائما اكرر " ليت من هالانسانه اثنين " مثال للاستاذه الراقيه ... تعاملها رائع وتنصح الطالبات وتوجههم والاهم شرحها رائع يعني " من قلب " اسئلتها باختصار " ذاكري زين تاخذين A بالراحة

أ. الاء المحمدي : مثل الدكتورة امل شرح رائع واسئلتها حلوه

د. نهى شرفة : ماشاء الله واصلة لدرجة عالية من العلم اتمنى اوصل لدرجتها العلمية يوم من الايام ... للاسف اسئلة الاختبارات 25 % فقط من الكتاب والباقي من حيث لا اعلم ... وغيابها كثير جدا

أ. ايمان حمزه : تبغانا نكون بيرفكت ... انا اخذت معاها كورسين ونجحت بـ A + مو لان اسئلتها سهلة لكن لان معاها اول بأول وحسسيها انك حابة المادة و حضري ... تحب التحضير :)

أ. ليلى هاشم : عفوا ما اتذكر انها درست ابلايد ... انا لي 3 سنوات بالجامعه وماتدرس من مواد اللغويات الا Linguistics و مره وحده اعتقد phonetics ... غيابها كثير وشرحها لا بأس فيه .. اسئلتها صعبة جدا

د. منال التاودي : شرحها عبارة عن قراءة يعني تقرا من الكتاب و ثلاث ارباع الكورس باللهجة المصرية استخدام اللغة الانجليزية نادر جدا ... اسئلتها ماشي الحال ... المشكله الي واجهتها هي الاكسنت مو مره تمام ... وماتسمح لك تشوفين اوراقك وتصحيحها اشك في عدالته

أ. منى البلوي : شرحها راااائع واسئلتها بعد ... اخذت معاها كورس واحد وكان جدا رائع

أ. ناريمان : يالبي قلبها ... طيبه وتعاملها حلو وشرحها رائع واسئلتها احلى

د. مأثر الراوي : مرة محترمة وتعاملها حلو ... الشرح مو مره بس احفظي كل شي صم حتى لو مافهمتي تاخذين درجة حلوه

[an A student]

السلام عليكم ورحمة الله وبركاته

اول شي حابه اشكرك اختي على فكرة الموضوع وعلى تعاون الاخوات واتمنى من البنات يكونون متوازنين في ردودهم ويبتعدون عن المبالغه والمسائل الشخصيه(يعني تكلمي عن الكلاس ككل وانتي بينهم) ويكونون واضحين عشان الكل يستفيد..


إيمان حمزة oral+writing2

والله استاذه ايمان من النوع اللي اذا فتحتي مخك ومشيتي معها صح تمشي معك تمام , حتى تراعي ظروفك اذا شافتك مجتهده, بس تكره الالحاح وتحب اذا قالت الشي تفهمينه وتنفذينه, اخذت في المادتين A الحمدلله , لكن كمستوى تدريس عالي واستخدام اللغه الانجليزيه بشكل متواصل في الكلاس للاسف ينقصها هذا الشيء


د.منال التاودي phonology+writing1
د.منال صراحة وصلت لمرحلة اني اتساءل عن مصداقية الشهاده اللي تحملها , اولا استخدام قليل جدا للغة الانجليزيه في الشرح هذا اذا اعتبرنا القراءه من كتاب شرح, وهذا شي مستغرب على انها دكتوره كمان, ظلم في وضع الدرجات, ما اقول ترسب ولكن ظلم, اخذت معها B في الرايتنق رغم اني واثقه تمام الثقه اني استحق الـA , وانا جنبت نفسي السعي في موضوع المسائله لان الراسبين ما لقو من يسمع لهم فما بالك بوحده ماخذه B اللي في اعتبار ناس كثير" احمددددي ربك!"طيب حامده ربي وشاكرته على كل حال ولكن الظلم ظلم!وصحبتي يوم راحت تقولها بشوف ورقتي قالت لها بالحرف الواحد"روحي غني ظلموه!":: د. محمد , هل هذا الرد رد وحده عندها درجة اكاديميه عاليه؟للاسف اضطريت آخذ معها ماده ثانيه ونفس الوضع ماتغير,, كنت اكرف واحفظ واحل زين وبالاخير بالعافيه B...وبالمناسبه هذا الوضع ينطبق على كل البنات..ما اقول انها تستقصد.. تصلح للي تفكر بالنجاح بس

اتفق مع Claymore مية بالميه في رأيها عن د.مآثر .. شرح انسي بس احفظي .. وكمان أ.ناريمان و د.أمل شعيب ميتين بالميه وكمان احنا اخذنا الكورسات سووا خخخخ


لي رجعه بإذن الله مع باقي الاستاذات

[Jasmine Al-Qahtani]

مــســاء الـورد لطالبات احلى قسم بالدنيا

مملكة عمري مشكورة عزيزتي عالموضوع الحلو والمرتب كلّك ذوق

بالنسبة لـي ومن خلال تجربتي

نبدأ بسم الله

المحـاضِرة	المادة	من واقـع التجربـة
د.مائسة الصبيحي	Intro.to litrature	منهجها قصائد مشتركة بينا وبين الاستاذات لكن المميز الدراما والفكشن خاص فينا وبلغة بسيطة لانها من القرن العشرين ..اسلوبها حلو ومشجّع جداً القصائد في نفس الكلاس تناقشها معانا وتعلمنا طريقة تحليل اي قصيدة يعني مو هي تشرح لوحدها واحنا نتلقّى ل في ابداع ومشاركة.. طبعا هي دقيقة بالمواعيد ابداً ما تقبل واجبات متأخرة لو ايش عذرك واش كماان ايوا حاولي ما تفوتي اي كلاس معاها لانها تنتبه للي يحضرو مع انها ما تحضّر ابداً..طريقة المادة انو الدراما والفكشن تقريها في البيت وتجهّزي الفكرة الرئيسية لكل عمل سواء قصة او مسرحية وتكتبي الافكار الرئيسية وتختاري اقتباسات تدعم الفكرة اللي توصلتيلها وفي الكلاس تناقشك في الاشياء اللي اخترتيها وتبيّن لك هل ادلتك واقتباساتك وافكارك اللي فهمتيها صح او غلط ..صراحه الكلاس معها ابدااع وما احب افوته واسلوبها في التعامل بسيط جددن وغير متكلف يعني ماتحسي برهبة الدكتورة وغير كذا لما اسلوبها في المناقشة يشجع على التفكيربعمق ومن جوانب كثيرة للموضوع اختباراتها اسئلة قصيرة وصح وخطأ تكوني ركزتي معاها في الكلاس واختياري طبعن صحيحه وتختاري الاصح وبرضو تكوني ركزتي معاها في الكلاس والمنهج احيان اسألة من الهوامش ما تنتبهيلها بس هي ما تفوتها
د.ابتسام فكهاني	Reading 2	منهجها عبارة عن كتاب كلمات504 وهو اختيااري يعني بتذاكريه فلنفسك ماراح تمتحني فيه وكتاب ثاني مقرر خلال الترم كتاب من جرير تختاره وكلاس بعد كلاس تناقشك في اللي قرأتيه واش اكثر الجمل اعجبتك من خلال قراءتك مرة كانت كلااسات المناقشة حلوة تقري الكتاب كأنك تتفرجي فيلم وبعدين في الكلاس تحكين الشي اللي عجبك واللي قرأتيه وايضا تكليفين قصتين لأجاثا كرستي لبّى قلبها احب قصصها بالعربي وانصدمت فيها بالانجلش خخخ الموهم تقرأينها الثنتين وتكون ارسلك على الايميل فورمه تعبين فيها بيانات عن القصة ومخلص لها + في كل يوم نص ساعه قراءة تكتبي بعدها احاسيسك واي شي ودك تقولينه بعد ما قرأتي في النص ساعه اليومية كذا تسلمي التكليف وعدد كبير من الاوراق ومن هذي الناحية هي صادت عصفورين بحجر مهارة القراءة والكتابة الموهم بالنسبة للدكتورة ابتسام انك تشيكي عالايميل يوميا بعد الساعه 10 تكون ارسلت اي مستجد عن الماده او تكون ارسلت تكليف تجيبيه في الكلاس والى الان ما انسى الكورس المميز هذاك لان الدكتورة عسل ومتفانية في الماده تخليك تعشقين القراءة وتعلمك مهارات مرة حلوة وتستفيدي منها حتى بعد الكورس
أ.ايمان حمزة	Oral 1	منهجها عبارة عن كتاب موزايك 1 + برزنتيشن وطريقتها في الاختبارات تجيب قطع فهم وعليها صح وخطأ واسئلة + مررة تحب القطع اللي في اخر الكتاب وفقرة هل تعلم اللي في بداية كل شابتر تموت على شي اسمه صح وخطأ فيهم وباقي الاختبارات طبعن الاشياء الموجودة في الكتاب خاصة التعبيرات تجيبها اكملي الجمل او صلي بين التعبيرات وعناوينها او اوقات استخدامها لما تشرح القطع اللي ورا الكتاب سجلي معاها الافكار الرئيسية اللي تقولها لانها هي الصح وخطا اللي بالاختبار وحاولي تحضري كثير لانها تهتم بالتحضير وصراحه مسز ايمان تعجبني فلسفتها ونظرتها الادبية حابة الادب ومتغلغله بين سطوره<<متعوب عالجملة
أ.الآء المحمدي	Oral 2+ Writing 1	في الاورال تصم اذانها لو سمعت عربي ماتقبل الا انجلش وتخليك تقربعين في الكلام وعادي تنتظرك لو طولتي ما جبتي الكلمة المناسبة يعني اسلوبها حلو يجي نص التيرم وانتي متحسنة في السبيكنج منهجها موزايك 2 + كتاب ثاني مرة حلو استفدت منو حتى في الرايتنج+ 2 برزنتيشن الى الان ما انساهم اسألتها الاشياء اللي في الكتاب ماتهتم في فقرة( هل تعلم) مجرد معلومات في الكلاس وتجيب شريط تسمعيه وتحلين اسئلة بعده والبرزنتيشن عندها ورقة بجدول موزعه فيه العلامات يعني تقييمها لكل طالبة وفق معايير موجوده عنها مافي اي مجال للظلم واذا سألتيها تقولك نقاط الضعف عشان تتلافيها وتحسنيها أمماا الرايتنج وهل يخفى القمر !! اكيد المنهج موحد والكل يعرف عن الرايتنج الغثيث لكن بالنسبة لتجربتي صعوبة المادة تخففت مع مس الاء اسلوبها حلو ومشجّع تعطيك توبيكات وانتي حكيمة نفسك ما كتبتي انتي المتضررة واذا تكتبي تصحح لك وتعلمك وتبين لك اخطاءك وتنصحك على كتب تعليمية تصلح الجانب الضعيف في كتابتك بالنسبة للدرجات الكتابة خلال الترم هي تمرين لك ماعليها درجات الدرجات موزعه على امتحان قرمر اول الترم وثلاثة امتحانات مختلفه خلال الترم مس الآء رائعه ومنظمة جددن ودقيقة في المواعيد ماشاء الله ونااااادر تنكسل كلاساتها ومتواجدة في ساعاتها المكتبية ويمكن التواصل معها خلال الايميل سريعه ماتتباطأ في التصحيح وتقدري تراجعي معاها ورقة اختبارك عشان تعرفي اخطاءك وتتلافيها مستقبلاً
أ.ليلى هـاشـم	Intro.to linguistics +Phonetics	البنات سببولي ازمة عشانها وصورولي ياها فيلم رعب بس لما اخذت معاها الكورسين اكتشفت انو المعلومات اللي وصلتني غلط في غلط بالعكس طريقتها رائعه جداً صحيح تراديشنال يعني لا داتا شو ولا يحزنون بس تشرح لك المهم وتدخلك جو مع اللغويات وتربطها بالدين والواقع يعني تخرجي من الكلاس خاصة اللنجوستكس وانتي متمتعه بالمادة وفاهمة دقائقها وعندها القدرة على توصيل المعلومة وطريقتها مافي تكاليف وبالنسبة للاختبارات انو ركزي بالكلام اللي تقوله بالكلاس وتكتبه عالبورد لانه هو المهم وعلى قولها ما تصمي الكتاب وتكعيه في الاختبار لام تتبعي معاها وتكتبي الكلام اللي تشرحه جنب كل نقطة في الكتاب بصراحة ياليتها تدرس مواد لغويات ثانية الترم الجاي كان اخذ معاها وانا مغمضّه ومن تجربة البنات انو لاتاخذي مواد مبتدئة معاها رايتنج او ريدنج لا بس لغويات لانه تخصصها مسز ليلى عندها قدرة على التفهيم والشرح وماتمل من كثرة السؤال اذا مافهمتي تعيده لو الف مرة بدون تذمر وكمان فيها روح مرحه تعمل ريفرش في الكلاس والكلاس يمر معاها خفيف لانها تكثر من ذكر الله وبالنسبة للتصحيح سريعه ماشاء الله وتتقبل مراجعة الورقة او تصحيح الدرجة اذا معاك حق
د.مآثر الراوي	Morphology	منهجها مبسط مميز خاص بها ومرتب جددن طريقتها تشرح بالداتا شو كل محاضرة وتكون موزعتها او منزلتها على موقعها الشخصي والمذكرات مرتتبة ومنظمة وكل شي بمثاله بشكل واضح اسألتها مقالية ومن نفس المحاضرات اللي تعطيها سريعه في التصحيح والدرجات تنزلها بانتظام على موقع الجامعه ماعندها تكاليف مجرد اختبارات من خمس درجات عبارة عن تطبيقات تكون حاله شبيهة لها معانا بالكلاس واختبارات مقالية من عشرة درجات وصراحه الدكتورة مآثر ذوق واخلاق وتعامل راقي وابتسامة حلوة وتقدّر ظروف الطالبات وتهتم بالتحضيـر

يمكن اكون كثّرت حكي لكن حبيت اكتب كل المعلومات اللي ممكن تفيد الطالبات يارب تستفيدو

ويارب توفقنا جميع لكل خير يااااارب

اختكم

[مملكة عمري]

أشكر الجميع على تفاعلهم

د. محمد الغامدي مانذكره لاينفي وجود تعسف أو ظلم أو حتى صعوبة
وكمية الرسوب عالية جدا
---------
الأخت Claymore أ رجو منك وضع اسماء المواد أو رموزها

-----------
بقي أن أضيف احدى ابدعات قسم اللغات الأوروبية بل ابداااع الجامعة بما فيها
الدكتورة صباح صافي
حقيقة لو كتبت عنها صفحات قد لايفي بحقها, أتمنى عودتها فهي مكسب للقسم

د. صباح صافي	Lane 333	قمة في الشرح- مهارة عالية في ايصال المعلومة -أغلب الأسئلة موضوعيه (صح وخطأ) يوجد مقالية لكن في الحالتين تحتاج فهم للمادة فحلها ليس بتلك السهولة (اللي يحضر معاها أول بأول وينتبه لكل اللي تقوله يفهم ويحل ,خلال الكورس كله ماأذكر ولا كلمة قالتها بدون مانستفيد منها) مع العلم هي ماتحضر ولا يهمها مين حضر بس والله الأغلبية يحرص على محاضرتها أكثر من أي محاضرة

اللهم بارك لها وأحفظها

تقبلوا تحياااااتي جميعا

[Jasmine Al-Qahtani]

صبااح الخير

صباح صافي سمعت عنها كثير

نفسي اشوفها مرة ما اعرف شكلها ولاقد شفتها بس ماشاء الله ملازمها الى الان نتناقلها ونستفيد منها جزاها الله خير

وكمان في استاذة قديرة روعه تقاعدت خلاص ياخسارة الديبارتمنت كله

اسمها وديعة وفـا

راااااائعه وحبيت اذكر اسمها تقدير لجهودها وحبي لها الله يوفقها وين ماكانت الحين

[Dido]

للاسف اغلب الطالبات ما يضيفو المادة لو كانت عند د. صباح افتكر المورفولجي ما كا في الشعبة الا 20 طالبة تقريبا و الشعبة التانية ماليانة. وفي شعبة لها اتقفلت عشان مافي بنات!!! شي غريب جدا. دكتورة رائعة و تدّرس في اكسفورد اكيد حتاثر في حياة اي طالبة تدرس عندها. اسئلتها صح و خطأ.و مقالية بعض احيان.

ما انسى د. وديعة وفا معى انها ما درستني بس كانت مرشدتي و استفدت منها كتير.

د. مايسة صبيحي: علمتنا كيف نفكر و انو الدراسة مش كلها درجات و بس. تعبت معاها بس استمتعت و استفدت. اسئلتها كانت اختاري الاجابة الاصح.

د. احلام علاقي: منقطعة عن الجامعة من فترة. درستني قرامر الي هوا رايتنق الان. بفضل الله ثم بفضلها اتحسنت
كتابتي لابعد حد. و جربت الكتابة الابداعية الاول مرة.

د. نهى الشرفا: لم استفد منها الكثير!! ممكن لانها بدأت معانا متاخرة و الكتاب كان جديد و صعب. السينتاكس هو موطن ضعفي في اللنقوستك. ولكنها انسانة خلوقة و رائعة تحب الطالبات زي بناتها. بس توزيع الدرجات ظالم و ممكن تجيب شي من برة ما قد احد سمع عنو.

د. رابعة الخطيب: ما اعرف ايش اقول. انسانة راقية و كلاس لابعد حد تفرض احترامها من غير ما تزعق او تهزء. كل الطالبات من غير استثناء يحبوها.Shakespeare becomes alive during her class. تذاكري تاخذي درجة كويسة. اهم شي ما تعملي كوبي اند بيست من المواقع حتاخدي زيرو على طول.

د. افنان فطاني: شرحها حلو بس سريعة جدا. الكلاس الوحيد الي كونت احس اني ابغى انام بعدين افتكر اسئلتها اصحصح تاني. اسئلتها متنوعة و طويلة. مستحيل تلاقي و قت تراجعي. نهائي الفنتكس كان 10 صفحات!!!

أ. سهام فطاني: رائعة. حتى الي ما يحب الادب يستمتع بالكلاس. باذات الشعر. الله يديها الصحة و يوفقها.
اسئلتها مو سهلة ابدا و طويلة.الاسئلة منوعة. ما تخليكي تشوفي الورقة. بس اغلب الطالبات راضيين عن دراجاتهم.

هدا كل الي عندي. على فكرة انا خريجة السنة الماضية. يعني ممكن طرق الاستاذات اتغيرت الان.

بالتوفيق للجميع!!!!

[smile]

السلام عليكم يا حلويين بغيت اسال مين تقترحولي من الأستاذات اخد معاها seminar?
ومشكورة:)
وخصوصا اني ناوية أخدهافي الصيف حاليا وبرضو اسماء الاستاذات لسسسسسة ما نزلت والله يعين....محناعارفين متى حتنزل؟؟؟

[زيـــنـــة]

عادة د.نهى الشرفا هيا اللي تدي المادة دي ، 424 ، لكن الصيف دا ما أعرف ، لأن في بنات يقولوا كانت الترم الماضي مع د.مآثر ، الله أعلم مين حيدرّسها الصيف دا ,,,