عندي لكم هدية ...

[TCHECO]

عندي لكم هدية...

أبغاكم تقبلونها و تتذكروني بها ..

و هي عبارة عن ( نصيحة ) بس مُش أي نصيحة !!

بس خلوني أبربر قبل ما أمحط بنصيحتي الكويسة ..

تخيلوا يا أحبابي ( يعني غمّضوا عيونكم ) و تخيلوا إن اليوم العصر يجي في التلفزيون " خبر عاجل " ..

و يقولون فيه :

إن الملك عبد الله بن عبد العزيز قد وضع مسابقة لكافة الشعب السعودي ،، و لها جائزة مالية قدرها ( 100 مليون ريال ) !!!!!

أما طريقة المسابقة فهي كما يلي :

يوجد كتاب يضم أجمل قصائد الشعراء العرب باللغة العربية الفصحى ،، و عدد صفحات الكتاب ( 800 صفحة ) ..

و المطلوب من المتسابقين ( حفظ هذا الكتاب ) عن ظهر قلب ..

و كل متسابق يتمكن من حفظه سيحصل على ( 100 مليون ريال ) ..

انتهى ..

( خلاص لا عاد تتخيلون ) ..

السؤال :

هل ستحفظون هذا الكتاب ؟

أنا أقول :

أن الكثير منكم و بدون أي تردد بيعتزل الناس و بيعتزل كل شي في الدنيا و يتفرّغ لحفظ هذا الكتاب ؛

لأن هذي 100 مليووووون ماهي لعبة ..

يعني تكفيكم أنتم و أولادكم و أحفادكم ههههههههههه

عاد طبعاً بيصير جدول الواحد منكم 24 ساعة مقابل هالكتاب ،، و حتى و هو نايم بيصير يردد القصايد إللي فيه .. هههههههههههه

و أما أنا بيني و بينكم .. لو يعطوني مليون واحد ما عندي مشكلة ،، قسم بالله لأحفظ ^_^

أما 100 مليون .. يمين بالله لأحفظ بعنف ههههههههه
يعني يمكن أتم حفظ الكتاب في شهر و إلا شهرين ..


و الآن :

تعالوا نفكّر بعقولنا ولو لمرّة واحدة <<< بدا يدخل في الموضوع

و هنا عندي سؤال يمردغ نفسه أيما تمردغ ..

(( ليش ما نحفظ القرآن الكريم ؟ ))

تدرون إن مجرّد المقارنة بين جائزة ( الـ 100 مليون ريال ) و بين جائزة ( من يحفظ القرآن ) ..

مجرّد المقارنة بين الجائزتين يُعتبر ( غباء بلا حدود ) ..

لأن الـ 100 مليون متعتها راح تنتهي بالكثير بالكثير بعد 100 سنة .. عاد إذا وصلنا لهالسن يا بنكون مخرّفين أو بنكون مخرّفين .. هههههههههههه

و تأملوا في المدة ( أقل من 100 سنة فقط ) ..

بينما جائزة ( حفظ القرآن ) ..

فهذي أولاً ماهي من عند الملك عبد الله ..

لا هذي من عند ملك الملوك سبحانه و تعالى ..

و ثانياً متعتها ما تنقطع .. يعني فالدنيا بتكون مستمتع بها .. و في القبر بتكون مستمتع و سعيد بها أكثر و أكثر ،، عاد في الآخرة يكون اسمك ( أهل الله و خاصته ) .. تخيّل بالله .. أنت أنت اسمك ( أهل الله و خاصته ) يعني كيف بيكون حالك ؟

الشاهد :

إن المقارنة بين جائزة ( الـ 100 مليون ريال ) أو خلونا نقول ( أموال الدنيا كلها ) و بين جائزة ( حفظ القرآن ) يعتبر فعلاً أمر غبي و مستحيل ..

،
،
،
،
،
،

و بعد كل هذا :

،
،
،
،
،
،
،


ليش ما نحفظ القرآن ؟

يعني 600 صفحة فوق طاقتنا ؟

طيب ليش نشوف أطفال أعمارهم 7 سنوات و 9 سنوات و 10 سنوات يحفظون القرآن ؟

هذا يعني إن الأمر بسيط .. يعني أقل شيء ما يحتاج نسوي اختراع ،،، أبد ما غير نقرا و نحفظ ..

حتى لو نموت و حنا نحاول إننا نحفظ بإذن الله ينطبق علينا الحديث إللي يقول ( إنما الأعمال بالنيّات ) .. و أصلاً إحنا وش بنخسر لو قعدنا نحفظ طول حياتنا ؟
بالعكس إحنا نكسب كنوز ما يعلم بها إلا الله .. فإذا كان الحرف بحسنة و إذا كانت تلاوة القرآن من أجل العبادات ،، كيف نقول عن هذي خسارة ؟!!!


ألحين يمكن أحد فيكم يقول :
( طيب أنا ماني مطوّع يعني هي موقّفة على حفظ القرآن ،، و أنا ليلياً داخل جو مع آمال ماهر و ماجد المهندس و عبد الرب إدريس << قديم ..
و أنا إللي طايح غزل في الأسواق و أنا إللي صلاتي من جنبها و أنا و أنا و أنا ...... )

عاد إللي يجلس يقول كذا فهو من وجهة نظري ( حمار ) .. مع عدم احترامي .. و حتى الحمار يمكن يكون أحسن منه على الأقل ما معه عقل يعني عنده عذر ،، بس هو وش نقول عنه ؟


المهم يا رفاقة :

ورد عن النبي صلى الله عليه وسلم في فضل من يحفظ القرآن أحاديث كثيرة ،، تحصلونها في قوقل ..

أنا حبيت أكون بسيط في طرح الموضوع ؛ لأني أتمنى إن الفكرة تصل بالشكل المطلوب .. و إن شاء الله تجيب نتيجه ..