للمستجدين والمستجدات, كل ما تحتاجون معرفته عن السنة الأولى + معلومات أخرى*

[M7mmd.Y]

السلام عليكم ورحمة الله وبركاته ..



كيف حالكم جميعاً؟ إن شاء الله بكل خير وصحة وسلامة

الشباب ماشاء الله خلال الـ كم يوم اللي راحو لقيتهم شارحين المواد وكل شي

ماقصروا الله يجزاهم كل خير ..

لكن انا ما رح اتعمق في شرح المواد ذات الأسلوب التقليدي زي الماث والفيزياء بس بعطيكم فكرة عنها

لكن المواد الجديدة عليكم اللي اسلوبها مختلف رح يتم شرحها بإذن الله وبذكر بعض المواقف اللي صارتلي معاها

انا زي الشيبان ممكن في نص الكلام تلاقوني شطحت وحكيت لكم قصة.. لا تدققو




فهرس الموضوع:

#1 اسماء مواد الخطة الأولى ومستوى صعوبتها وشرح لأهمها

#2 متطلبات بعض المواد

#3 اصعب مواد الخطة وتوزيعها على الجدول وبعض النصائح

#4 اليوم الهندسي + خبرات "اجدادنا" المهندسين عن تخصصاتهم

#5 جامعة الملك عبدالله للعلوم والتقنية – كاوست





1# اسماء مواد الخطة الأولى ومستوى صعوبتها وشرح لأهمها:



1.1) IE201

التصميم الهندسي 1

المادة مو صعبة بحد ذاتها لكن كل الصعوبة تكمن في كمية الكرف اللي يكرفه الطالب, فيه موضوع لعضو من الأعضاء

شرح نظامها بالتفصيل, الله يجزاه الجنة

اخذتها عند احمد زكريا, الدكتور بحر من العلم, إنسان رائع يحسسك انك مهندس من جد

تعامله طيب واخلاق والكل يمدح فيه الا البعض عاد

غالبا طلابه – المجموعات تبعه – ياخذو المراكز الأولى في مشاريع المادة

الدكتور محمد ريحان , معروف كيف يكرف الطلاب وفي نفس الوقت فعلا هو مكروف معاهم زي ما قال احد الأعضاء

يعلمك انك تكون جاد وحريص ويدقق على اقل شي في شغلك , لكن .. لو رحتله مكتبه ووريته شغلك قبل المحاضرة

ينبهك على اخطاء وما يحاسبك .. واصلا اسلوب تعامله يتغير =)

الدكتور طيب وكريف وكل شي لكن والله يدف طلابه دف ويساعدهم

هذا اللي اعرفه عن الدكاترة ..

بالنسبة للمادة ونظامها

http://www.skaau.com/vb/showthread.php?t=445170

الموضوع فيه كل الشرح اللي تحتاجوه

اصلا نظام المادة غير اي مادة في الحياه.. يقعدو اول اسبوع يفهموكم النظام وما يحاسبو على شيء لكن بعدها..

هذي تعتبر اكرف مادة في تخصص الهندسة .. فيه مستوى ثاني منها لكن يقولو اسهل منها والله اعلم




1.2) IE200

ناسي اسمها بالأنجليزي .. اعتقد كان

“ Engineering Communication Skills “

اسمها الشائع مادة البحث العلمي

هدف المادة.. تحسين استخدامك للغة الأنجليزية وزيادة من مهارة التواصل عندك

اول اسبوع بيعطوكم السيلابوس اول الكورس آوت لاين وفيه كل شي بتسووه خلال الترم بالمواعيد

مواعيد كتابة جزئيات البحث ومواعيد التسليم و و

صورة للـ سيلابوس

اول اسبوع " المفروض " يسوولكم كويز من درجتين بونس.. وكل دكتور وطريقته

دكتورنا جاب الكويز كأنه كلمات متقاطعه

الأسبوع اللي بعدو رح يعطوكم امثلة لبحوث سابقة..

بيعطيكم ملف كبير مليااااان اوراق .. في البداية رح تنفجعو ودا شيء طبيعي جداً

افتكر انا واللي جنبي قلنا مستحييييل ولو اييش اننا نسوي زي كدا ..

انا حاط لكم موضوع بحثي الخاص في المرفقات .. ولو تبغو الملفات كاملة قولو




بعدها بيعطوكم اسبوع كامل تجيبو افكار .. انا من دحين اقلكم فكرو في الموضوع من بدري

ويكون موضوع جاااد

من الأفكار الجهنمية حقتنا اللي اقترحناها على الدكتور وعصب مننا

واحد بيتكلم عن البيك

وانا كنت ابغا اتكلم عن سيكولوجيَّة الأحلام والتفسير النفسي لها .. وكنت متحمس للفكرة لأني حاب الموضوع

اتفاجأت بالرفض من الدكتور,

انا كنت فاهم الموضوع غلط كنت احسب الموضوع زي التعبير .. جيب اي موضوع واتكلم عنه

ففهمني وقلي فيه شروط للبحث .. انه يكون شي في المجتمع سواء شيء سلبي تنبه الناس عليه او شي ايجابي تحثهم اكثر عليه

عشان فيه استبيان رح توزعه.. وتشوف ايش النتائج من كلامهم وتجيب مراجع عشان تقوي بحثك

انا بعد ما قلي كذا قلت اروح احذف المادة اصرفلي

الاسبوع اللي بعدو قلي طلع ورقة واكتبلي كل المواضيع اللي في بالك ..

كتبت كم واحد .. وعجبو موضوع كنت بتكلم فيه عن وضع الطلاب الحالي انه صارت دراستنا كلها عشان الدرجات والنجاح

اكثر من اننا ندرس عشان نتعلم

قلي تمام .. وقلي اكتب عن الموضوع مقدمة بسيطة وروح للمقيم

انا قلت بسسسس .. جبت الموضوع اللي حـ يخلي المقيم " يندهش " منه

ههههههههههههه طلعت من عند المقيم وانا كاره ام المادة اكتر

دققلي على كل شي وقلي خلي موضوعك اكثر دقة ولا يكون عام كذا

المهم اني عدلت في الموضوع لين طفشت واخيرا صار: اسباب تدني مستوى دافعية طلاب الجامعة

والحمدلله كان موضوع تمام

معليش طولت في القصة .. بس إن شاء الله تكونو فهمتو نوعية المواضيع اللي تتجنبوها

-

دحين المادة رح تكون على جزئيات اولا تكتبو المقدمة ..

ونصيييييحة كثرو من المراجع.. يعني الاقتباسات من النت او الكتب مع ذكر المصادر " رح يفهموكم كيف "

بعد ما تكتبها وتتقيم .. بيكون فيه

Oral presentation

بسيط تطلع زي ما طلعت في انجليزي التحضيري.. بس هنا رح تكون عارف عن ايش تتكلم وفاهم

كم دقيقة وتتقيم من 5 درجات

دحين في المقدمة .. بعد ما تكتبها رح تحط 3 او 4 اسئلة وهي خلاصة البحث حقك

يعني هذا البحث كلو صار عشان يجاوب على الاسئلة هذي

ونصيييحة في هذي الجزئية لا تجيب اسئلة صعبة لأن وقت ما تجي تكتب الاستنتاج بتتعبك

فيه طلاب حشرو نفسهم بأسئلة.. ما قدرو يجاوبوها بعدين

بعدها حيعلموكم الأساليب اللي تجيب بيها المعلومات " استبيانات مطبوعة – او على النت – المقابلات الشخصية "

انتا تختار اللي تبغاه .. لكن المطبوعة اساسية

وتسوي الاستبيان حقك .. بما لا يقل عن 9 اسئلة ترد على الاسئلة الرئيسية لموضوعك

تكون اسئلة متنوعة .. اختبارات - فراغات ... إلخ

مو مشكلة تحط اسئلة عامة زي : كم عمرك – تخصصك – الجنس .. لكن لا تكثر منها

-

بعد التوزيع وكل شي .. يجي وقت شي اسمو

Methodology and Results

هنا رح تكتب عن الطريقة اللي استخدمتها في جمع المعلومات .. وبتكتب النتائج اللي لقيتها

هنا يجي اصعب جزء في المادة.. جزء متعب وهو انك رح تسوي ملف اكسل فيه كل شي

ومنه تطلع النتايج اللي حتستخدمها

عارف ان الموضوع شكلو صعب ومررة مخيف بس كل اللي قلته هذا رح يوروكم كيف خطوة بخطوة

حتى الاكسل رجعو يعلمونا الدروس اللي اخذناها في الحاسب

وبين كل جزئية وجزئية فترة كويسة من الوقت .. يعني تقريبا اسبوعين واحيانا اكثر

فلا تخافو

-

آخر شي في الكتابة

Discussion and Conclusion

المناقشة والأستنتاج

هنا بتتكلم عن النتائج اللي طلعتلك وتناقش كل استنتاج جزئية جزئية

وترد على اسئلة البحث الرئيسية اللي كتبتها .. وتختتم باقتراحات شخصية منك



-

ختام المادة

Oral PowerPoint Presentation

بتسوي بريزينتايشن بالباور بوينت فيه خلاصة بحثك

طبعا كل شي بالأنجليزي

يكون كم سلايد .. ورح يعلموكم الترتيب حقها كيف ..

وفي الملفات المرفقة موجود الملف تبعي

اهم شي لا تحشو السلايدات كلام .. يكون بس جمل قصيرة ..

رح تتكلم النتائج اللي طلعتلك واللي استفدته من البحث وممكن تقول اقتراحاتك

فيه شي اسمو فاينال ديفينس.. المقيم اللي جالس قدامك رح يسألك كم سؤال

مو تحشير لا تخافو اسئلة سهله.. بس عشان يعرف انك فاهم واتعلمت شي فعلا ولا لأ

-

كذا انتا خلصت المادة بس تروح تسلم ملفك ويقيموك عليه

وفالكم الأمتياز





1.3) Math202

المادة هذي ما يحتاجلها شرح .. كلها تكامل وتفاضل وتعتبر من اصعب مناهج الماث

فلازم متابعة يومية ولازم تحل اسئلة الكتاب وتهتم بالمادة لأنو مافيها لا دف ولا اي شي

يفيدكم موضوع اخوي هم وانطوى

http://www.skaau.com/vb/showthread.php?t=593091





1.4) Phys202

الفيزياء الكهربائية

مادة مختصة بدراسة الشحنات والمجال الكهربي والمغناطيسي والطاقة الكهربائية الكامنة

مادة يحتاجلها مجهود.. ومتابعة يومية لأن قوانينها كثييييييرة جداً ومستحيل في يوم وليلة تحفظها

تقسيم الدرجات فيها شوية مختلف عشان المعمل

مقسمة نظري:

5 كويزات
15 اختبار دوري اول
15 اختبار دوري ثاني
40 اختبار نهائي

عملي:

10 درجات تقارير المعمل
10 اختبار عملي
5 اختبار نظري

-

دحين جزئية التقارير لا تخافو منها.. الدكتور بيقلكم كل شي بالتفصيل وايش تكتبو

-

نجي للـ 15 درجة الثانية والتجارب

المعمل يوم واحد في الاسبوع ولـ 3 ساعات

لما يبدأ المعمل الدكتور بيشرحلكم شوية حاجات تعتبر اساسيات في الكهرباء

ويجي وقت التجربة .. الدكتور بيوصل الدائرة الكهربائية " التجربة " وانتو تتفرجو ايش بيسوي

واهم شي في دا الوقت ركزو في طريقة التصوير حتى لو تبغا تطلع جوالك تصور عادي ما يقلك شي

وبعدها يقلكم الهدف من التجربة ورح تسوو كل شي بنفسكم بعدها

بعدها – في بعض التجارب – رح تطبق التجربة حسابياً وتطلع نسبة الخطأ بين الناتج النظري والناتج العملي

ممكن ما تكونو فاهمين دحين لكن الدكتور ري يشرحلكم كل شي بالتفصيل

* نصيحة مهمة: ممكن تجيك اوقات تحس انك مو عارف ايش قاعد تسوي وجالس تطبخ

في هذا الوقت روح للدكتور واسأله عن اي شي تبغاه لا تسكت لأن التجربة هذي ممكن تجيك في الاختبار ووقتها رح تحووس

الأختبار النظري في المعمل عليه 5 درجات واحيانا يخلوها 4 درجات

ويكون عبارة عن اسئلة اختيارات .. الدكاترة طوال الترم بيقعدو يغششوكم هيا لا تخافو





1.5) IE255

Engineering Economics

الاقتصاد الهندسي مادة ممتعة.. الحلو فيها انك ما يحتاج تحفظ لا قانون ولا اي شي تتدخل بكتاب فيه كل شي تحتاجه

المادة مختلفة من نوعها عن اي مادة قد اخذتها عشان نظامها حل/كتابة..

اهم شي في المادة هذي اول 3 شباتر .. لو فهمتها ان شاء الله اللي بعدو سهل لكن لو ضعت فيها وما رجعت لدكتورك

فـ الله يستر عليك

رأيي الشخصي .. شابتر 3 مهم جدا جدا جدا لأنه في جزئية الطلاب يضيعو فيها

انتبهو وقت الشرح واسألو الدكاترة لو فيه شي مو مفهوم

المادة عيبها اختبارات الميجور اللي فيها

20 ميجور اول
25 ميجور ثاني
40 نهائي
10 مشروع
5 كويز

الميجورات انتبهو منها يجيبلك ممكن 3 او 4 اسئلة

سؤال منها يكون فكرته صعبة .. بس دا مو معناه انو الاسئلة الباقية مباشرة

الميجور الأول طلعت من الاختبار مصدع واصحابي يقولو جبنا العيد وما حلينا اي شي

واتوقعنا انو درجاتنا 10 من 20 او اقل .. اتفاجأنا انو الدرجات فوق الـ 15 .. لأنهم يصححو على الخطوات حقت الحل

لو الناتج غلط تنقص نقطة . يعني ممكن نص درجة

-

إن شاء الله نص الترم الجي ممكن انزلكم شرح مبسط عن شابتر 3 .. لأن من جد الطلاب كانو حايسيين فيه





1.6) Math203

اسهل مناهج الماث.. لكن يعيبها طول المنهج وكثرة قوانينها .. طبعا مو زي الفيزياء202 لكن برضو قوانين كثير

لازم تذاكرو يوميا او شبه يوميا عشان لا تضيعو فيها

منهجها يتكلم بداية عن القطوع, المتجهات... يعني اجزاء سهله من الماث لكنها تلخبط





1.7) EE201

Matlab

المادة مضمونها سهل لكن الدكاترة مو كويسين + النظام فيها سيء جدا

في المرفقات ملف فيه سلايدات لها .. خذو فكرة سريعة تلاقو المادة سهله

لكن فيها شباتر قدام يبغالها فهم تمااام .. لأن .. وللأسف يعني .. الاختبار يقلك اكتب برنامج او طلع غلط في برنامج

انا مني فاهم كيف تطبق الكلام هذا على ورق

يعني مثال.. لو سويت برنامج طويل عرييض >> وكذا تكون الاختبارات.. كم سؤال عليه درجات كثير

وبعد ما تكتب وتخلص وبس يكون عندك غلط بسيط في جزئية .. لو نسيت هذي العلامة مثلا (") في بعض الجزئيات

بيكون البرنامج غلط .. انا مني فاهم كيف مادة برمجة للمبتدئين تبغونا نطبق برنامج كامل على ورق

المهم المادة الحمدلله عدت على خير :|

المادة فيها معمل اعتقد 3 ساعات اسبوعياً .. تطبق فيه اللي اتعلمته في النظري

على المعمل اعتقد كان 20 درجة

في كويز من الكويزات.. انا كنت عند مهندس شديد شوية وجابينا كويز لزيز كدا..

كم طالب جاب صفر واللي جاب درجتين واحسن واحد جاب 3.5/5

يعني انتبهو المادة هذي لازملها تدريب في البيت .. لا تهملوها لأنها غثيثة شوية ولازم تعطيها اهتمام لأن فيها نسبة رسوب





1.8) Meng102

الرسم الهندسي

زيها زي الماتلاب من ناحية انو لااااازم تدريب في البيت ..

لأن بداية من ثالث اسبوع رح يكون فيه كويز اسبوعي

تقسيم درجاتها

10 كويزات
20 كلاس وورك
30 اختبارين ميجور
10 مشروع
30 نهائي


-

البرنامج هوا سوليد ووركس

SolidWorks

حق تاخذو في البرنامج كلو اربع اوامر رئيسية

Extrude
Revolve
Loft
Sweep


بس هذي الأوامر .. والترم كلو تدريب عليها ... في المرفقات ملف بأسم المادة , حطيت لكم بعض من التدريبات

-

المادة حلوة وممتعة لكن تتطلب التدريب, لأن في اسبوع رح تاخذ امر .. الأسبوع اللي بعدو بتاخذ حاجات كثير تعتمد

على هذا الأمر فلازم تكون متابع وفاهم

-

الكويزات كانو يجيبو من رسمة .. كل كويز يختلف عدد الرسمات اللي فيه

مثلا يجيبو 3 رسمات بالمقاسات وكل شي .. رسمتين ترسمهم عادي بس الثالثة يكون فيها فلم

يعني الكويزات تبدأ سهلة .. على آخر اسابيع بتشوفو حاجات غريبة

اما الميجور والفاينل كان جداً سهل ... للي متدرب كويس

آخر جزئيات في المادة بيكون فيه جزئية تعتمد على مخيلتك بشكل رئيسي

يعني مثال " قبل كل شي .. اي رسمة لازم يكون لها 3 ابعاد.. بعد امامي وجانبي وعلوي "

مثلا يجيبلك الشكل ويعطيك البعد العلوي والامامي ويقلك ارسم الشكل

تحتاج مخيلتك عشان تفهم الشكل كيف جاي من الجنب .. اللي بيقول سهله يصبر اول

مارح يجيبولكم فيها مكعبات وحاجات عارفينها يعني

بيجيبو اجزاء ميكانيكية .. يعني مو انك ترسم اي شي

-

بالنسبة للمشروع ..

كان تيم بروجكت .. وياكرهي لشغل التيمات خصوصا لما اكون مع غير اصحابي

التيم مكون من 3 .. تختارو اي شيء مكون من 15 قطعة مثلا وتوروه المهندس

لو وافقلكم تقسمو الشغل بينكم .. وتبدأو

انا زبطت تيم من اول الترم .. وجا وقت المشروع

اتفقنا على المشروع وكل شي .. كان بيلدوزر " شيوال"

انتظرت التيم ليييين آخر لحظة وانا اكلمهم اننا نتجمع عند المهندس عشان نوزع الشغل

لطعوني لين آخر اسبوع قبل آخر موعد لتسليم فكرة المشروع .. وحضرو

وزعنا الشغل والحمدلله اني اخترت موديل سهل مافيه تعقيد لأني تقريباً سويته لوحدي

واحد من الطالبين هذولا اختفى خلاص .. كلمت المهندس قلي سوي اللي تقدر عليه انتا وصاحبك

سويت اكثر الأجزاء واللي معايا سوا جزئين .. وانا سويتهم مرة ثانية لأنو سوا مقاسات غلط

وبعدها اختفى الطالب هذا ... !!

كلمت الوكيل – منسق المادة – قلي مالك علاقة فيهم قدم اللي سويته ولك درجتك.. وبس الحمدلله الله ستر

القصة هذي كلها عشان لما تنزلو المادة اختارو مين معاكم .. شوفو المهتميين بالمادة مو شرط يكونو دوافير يعني

ومن بدري ابدأو في المشروع لا تسوي زي ما سويت انا






1.9) Chem281 + Phys281

المعامل هذي حلاوة الترم خصوصا الكيمياء

هذا شرحهم من موضوع

-

Chem281

هذي المادة صراحة حقت وناسة احسها ..

تسوي تجارب بنفسك وتشوف التفاعلات والألوان وفلللة

اخر كم تجربة ركز فيها .. فيها خطوات كثير, برضو نفس نظام معمل فيزياء 281 ..

عليها ساعة واحدة في المعدل لكنها 3 ساعات مرة في الاسبوع

هي والفيزياء سهلة ولكن هذي اسهل كمان

رح تحتاج دفتر تكتب فيه لأنك بتسلمه في الأخير .. بدل التقارير

* لا تستهينو بسهولة المادة هذي .. آخر تجارب لازم لازم تكتب الخطوات في الدفتر عشان لا تنسى

لأن فيها اختبارين واحد مررة سهل على اول جزئيات .. واختبار نهائي فيه كم تجربة تلخبط

انا كان اكبر غلط سويته اني ما كنت اكتب الخطوات وجيت في الأخير كنت نااااسي

لولا ستر الله لكنت جبت العيد .. جتني اسهههههههل تجربة

-

Phys281

هذي معمل فيزياء حق 101 , رح تطبق اللي درستو فيها بس عملي

سهلة مافيها شيء , عليها ساعة واحدة مكتوبة في الجدول

لكن الحقيقة انها مرة في الاسبوع بس محاضرة 3 ساعات.. لكن طبعا يطلعوكم قبل

انتبه للتجارب وسجل الخطوات واكتب التقارير اول بأول

وزي الكيمياء





1.10) Arab101 + Isls101

العربي والثقافة خصوصا اول مستويات يحتاجلها شوية اهتمام

لكن اخص الثقافة بالكلام لأن كلها دَش .. وينكبوك في الاختبار انهم يقولولك في السؤال

" اجب بما ورد في المقرر "

يعني ممكن يجيبلك سؤال وتكون كل الاجابات صح .. لكن يبغا الموجودة في المقرر

وهنا كانت النكبة .. فلا تأجلو مذاكرتها لآخر يوم لأنها كم كبير

العربي كمان تطفش -.- .. فيها كم وِحدة كلااام كثير .. واكبر وحدة فيها "الكتاب بكبره" عن الأعراب

بعد هذولا المستويين العربي والثقافة يكونو اسهل بمراااااحل






#2 متطلبات بعض المواد



2.1) IE201

يطلبوك كتابين

Introduction to Engineering Design

Strategies for Creative Problem Solving

هذا الشيء الأساسي الباقي مذكور في الموضوع اللي حطيت رابطه في الجزئية السابقة






2.2) IE200

رح تحتاج كتاب

Face To Face

بيكون فيه كل شيء نصائح وامثلة وخطوات .. مهم انكم تمشي على الخطوات المذكورة فيه

وبتحتاجو ملف كبير ابيض عشان بتحطو فيه كل اوراقكم

وعشان تقسمو الملف تحتاجو

dividers

مدري ايش اسمها " مقسمات " .. لأن ملف بيتكون من كم قسم

كل قسم مختص بجزيئات محددة

نفس الشي في التصميم الهندسي





2.3) Phys202

في العملي تحتاجو :

ورق رسم بياني .. 1 سم

مسطرة مايلة " موجودة في جرير " .. ومسطرة قابلة للطي وآله حاسبه

وكتاب المعمل موجود في دار حافظ اللي قدام الهندسة اسمو

Experiments in Electricity and Magnetism

هذي اهم حاجات لازم تكون معاك





2.4) IE255

لا تشترو الكتاب لأنو غالي .. وما اعرف هل رح تحتاجوه مستقبلا في الصناعية ولا لا

لكن تقدرو تجيبوه مصور اعتقد من الشقري وانا موجود عندي

حطيتو لكم في المرفقات بأسم المادة

تحتاج دفتر اخضر موجود في خوارزم واعتقد في الشقري كمان فيه كل القوانين

وفيه جداول مهمة جداً كلها ارقام .. في البداية ما حتفهم ايش هذا

بس تقريباً شي يشبه اللي اخذتوه اخر شي في الاحصاء





2.5) Meng102

تحتاج ملف عشان تحط فيه شغلك طوال الترم .. وتحط فيه الواجبات وكل شي

وتحتاج يو اس بي عشان المشروع.. هذا اللي قالوه لنا في البداية بعدين قالولنا لأ حطو المشاريع على سي دي

وكمان كتاب الرسم الهندسي .. كتاب كبير كذا مليان تدريبات

اول ما تفكو كذا تحس انك مهندس وتتحمس له ... وبعدين على آخر الترم رح تحرقو





2.6) Chem281 + Phys281

الكيمياء بتحتاج دفتر عشانها ونظارة وبالطو

نفس الشي للفيزياء لكن فيها تقارير عاد

اعيد واكرر في الدفتر سوو جزئية تكتبو فيها الخطوات حقت التجربة لأنها مرة مهمة عشان لا تنسوها





#3 اصعب مواد الخطة وتوزيعها على الجدول وبعض النصائح


دايما في هذي الجزئية يكون فيه خلاف بين الطلاب .. يعني فيه طلاب

يشوفو بعض المواد صعبة وغيرهم يشوفوها سهله

لكن نقدر نتفق على انو اصعب مواد الخطة الأولى " حالياً "

واقصد بالصعوبة انو يحتاجلها مجهود اكثر من غيرها من المواد بس مافي شيء صعب ما ينفهم مثلا

1/ IE201
2/ Math202
3/Phys202
4/ IE200
5/ Meng102
6/ EE201 Matlab

الرسم الهندسي بالنسبة لي هو والبحث ما كانو صعبين, لكن هذا اللي عموم الطلاب متفقين عليه

دحين لو الجداول تنزلت لكم جاهزة خلاص, بس لو ما نزلت يصير تحاولو تتبعو هذا الأسلوب

1) قَسِّم اصعب المواد على ترمين.. ولو حسيت انها صعبة عليك حطها ضمن الصيفي

حاول ان جدولك يكون مو كله مواد سهله ومو كله مواد صعبة .. لأن فيه طلاب يقولولي " نبغا نخلص " :|

2) فيه مواد دوامها طويل جداً حاول لا تحطهم مع بعض

زي مثلا الرسم الهندسي والفيزياء " معملها " والماتلاب " معملها "

واحد من اصحابي كان منزلهم سوا.. كان يرجع بيته ميت

يداوم من 7 ويرجع 6 أو احيانا 7 .. يعني اسوأ من الطب

صح المعامل والرسم يوم في الاسبوع لكن الرسم ياخد يوم والماتلاب ياخد يوم وكدا ...

3) لا تحاول انك تحط المعامل كلها سوا الفيزياء 202 و 281 والكيمياء 281

رح تتلخبط وتتعب

4) يستحسن ما تحط العربي والثقافة مع بعض لأنهم كم كبير والفرق بين اختباراتهم 10 دقايق

5) لا تخلي جدولك مليان بريكات,, حاول يكون بين كل محاضرة والثانية 10 دقايق او اكثر قد ما تقدر

لكن نصيحتي الشخصية سويلك بريك واحد بس..

-

دحين هذا كان جدولي.. اتنكبت فيه شوية

" لا تكون قوي وتسوي زيي ترا اكلت على راسي "

Math202
Meng102
IE200
Isls101
IE255
IE201


واللي قبلو كان بقية المواد من دون الـ فيزياء202


الجداول اللي اقترحها عليكم/




جدول – 1

ترم اول – 13 ساعة

Math203
Meng102
IE200
Isls101
Phys281
EE201

ترم ثاني – 13 ساعة " لاحظ ما حطيت الفيزياء202 عشان التصميم الهندسي يبغالها رواقة "

Math202
IE201
ARAB101
Chem281
IE255


صيفي – 6 ساعات

Phys202
ISLS201

* لو ما تبغا صيفي تضطر تختار ترم تحط الفيزياء فيه .. لا تأجلها خصوصا هي

ارشح لك الترم الثاني .. رح يكون ضغط فلازم تشد حيلك


-

جدول – 2 بدون صيفي

ترم اول – 15 ساعة

Phys202
Math202
Arab101
Chem281
IE200
EE201

ترم ثاني – 15 ساعة

Math203
IE201
ISLS101
Phys281
Meng102
IE255

-

حاول انك تمشي على النمط هذا لو بتغير شيء ... صراحة ارشحلكم الجدول الأول

ولو ماكان فيه صيفي – لأنو هذا اللي نسمعو دحين – ممكن تأجل مادة للسنة اللي بعدها

لو انك ما تبغا تضغط نفسك ولكن .. شوف ايش بتتخصص واختار مادة ما تفكلك شي في تخصصك

وأجلها .. يعني لو داخل كهرباء الرسم الهندسي ما رح يفرق معاك .. لأنه يفك مادة اسمها الورش ومو مقررة على بعض الاقسام

لكن لا تفكر انك تأجل الفيزياء لأنها تفكلك البيسك وهي مادة اساسية ومهمة لكل الاقسام

وكمان التصميم الهندسي خذها قبل عشان لا تضغطك وانتا متخصص


* امثلة لـ جداول لاااا تحاول حتى انك تفكر تسوي زيها نهائياًاااا وابداًااا


Math202
Phys202
Meng102
IE201
EE201
ISLS101

ما يحتاج اكتب الستمستر الثاني لأنو انتا تقريباً خلصت الخطة خلاص

أو

Math202
Phys281
Chem281
Phys202
EE201
Meng102


الجدول اللي كله معامل متعب جداً


* مو معنى انو محد يقدر يحط الجداول هذي ويعدي .. لا بس هذا من منظوري الشخصي

ومنظور اغلب الطلاب

وممكن غيري يخالفني الرأي لأن لكل شخص مقدرته الخاصة بخلاف غيره





شوية نصائح من أخ يهمه امركم " ممكن يتكرر كلامي مع اللي فوق " :

1) بداية الترم بتحس نفسك متحمس وما عندك مشكلة تاخذ 18 ساعة .. انتبه من الحماس دا , وامشي زي ما قلتلك فوق

2) التحضيري كان شي ثاااااني , كان تمهيدي مقارنة بالـ هندسة .. واعتقد حسيتو كذا من كل كلامي اللي فوق

فـ انتبه انتبه من الغياب والتأخر لأن فيه دكاترة والله اعطو طلاب دي ان من دون تردد والطلاب كانو شطار

3) كل مادة لها كتاب ولكن اخصص بالكلام مادة الفيزياء202 والماث بمناهجه .. الدكاترة في البداية رح يعطوكم

سيلابوس فيه التمارين كلها .. هذي الاختبارات ما تطلع منها .. ولا تهملو

4) الماتلاب والرسم الهندسي والتصميم الهندسي والبحث العلمي .. هذولا الاربعة خصوصا سوي شغلك فيهم اول بأول

لأنه تجي اسابيع ضغط مو طبيعي .. واكرر , اتدرب على برنامج الماتلاب والسوليد ووركس طوال الوقت لا تهمل

5) معامل الكيمياء والفيزياء جيبو دفتر خاص بكم غير المقرر واكتبو فيه ملاحظاتكم وخطوات التجربة

بالعامي .. لا تتعب وانتا تحاول تجيب الكلام بالعربية الفصحى

بتضيع الوقت والمعلومات كلها <<< اكتر واحد يسوي كدا

6) فيه مواد فيها توتوريال .. وهي محاضرة زائدة يتم فيها حل تمارين الكتاب, في دكاترة ما يعتمدوها

لو دكتورك اعتمدها لا تفكر تغيب عنها لأنها مهمة.. وفي اللي يحاسب على الغياب فيها وفيه اللي لأ

7) في الرسم الهندسي زبط مجموعتك من بدري.. واختبار الطلاب المهمتين بالمادة .. ولو دوافير مو مشكلة

جيبو الفكرة من بدري واقترحوها على المهندس .. اول بأول عشان لا تنحشرو في النهاية

8) مواد زي العربي والثقافة لا تأجلو مذاكرتها لآخر يوم .. المواد شكلها سهل بس لا تغرك

يعني ما اقصد يبغالها مذاكرة يومية.. بس بالقليل اسبوعيا اقرا اللي اخذتو وحدد على المهم

9) احيانا تجي اوقات ضغط والنفسية تنعدم .. وتحس ان كل شي صعب واختيارك للهندسة غلط ومدري كيف ..

وتفكر انك تعتذر عن الترم, هذي بداية تجي من اختيار جدول خاطىء

وتزيد لما – لا قدر الله – تخبص في مادة من المواد.. وخصوصا انو الاعتذار هنا يكون الترم اللي انتا فيه بس

وكل شي ينحذف ترجع من اول وجديد.. نصيييحة لوجه الله لا تفكر فيها.. كثير من اصحابي دحين ياخذو اصعب

مواد في الصيف بسبب انهم اجلو ترم

10) وقت اختيار التخصص لا تفكر في التخصص الي " تسمع " ان مستقبله ممتاز

الحمدلله التخصصات الهندسية كلها ممتازة ولكن بعضها وظائفها اقل من الأخرى

اقرا عن التخصصات وإن شاء الله رح اجيبلكم بعدين كتاب يتكلم عن التخصصات الهندسية بالتفصيل عشان تفهمو

11) ابعد كل البعد عن كلمة " يقولو " هي اللي جابت الطلاب ورا .. شد حيلك واعتمد على الله ثم القدرات اللي اعطاها لك

يعني طلاب كثير " يقولو " ان مادة البحث مستحيل تجيب فيها درجة عالية , وكذلك الاقتصاد و و و

كثير مواد سمعت الطلاب مرعوبين منها.. وفي الأخير تلاقي انهم مكبرين الموضوع

نفس الشي في " يقولو التخصص هذا احسن " روح ورا رغبتك انت.. كل التخصصات الهندسية ممتازة

أو " يقولو التخصص صعب مررة .. " والله مافي شي تعطيه اهتمام وتشد حيلك فيه إلا ويسهل .. والله المسهل


12) خلي اول خطة معيار لك لأختيار التخصص الهندسي..

بمعنى.. لو تبغا تدخل كهرباء, خصوصا الكترونيات او قوى شوف قدراتك في الفيزياء والماث

وانتا تعرف هل هو مناسب لك ولا لأ, والصناعية مثلا في منها 3 مواد من الخطة ..

صح ان المواد التخصصية مو تماما زيها لا في الكهرباء ولا في الصناعية .. بس شوف نفسك لأيش تميل وقتها

عاد الكيمياء مالها للأسف مادة تمثلها في الخطة الأولى وتعطيك فكرة عنها





وهذا الشي اللي اتمناه من الجامعة , انها تسوي يوم غير اليوم الهندسي .. يوم يجيبو مثلا طلاب من هندسة الكيمياء ودكاترة

ويشرحلو لنا التخصص .. بالعامي مو زي شرح ويكيبيديا مثلا يكون اسبوع كامل فيه كل التخصصات

يشرحو ويفهمو الطلاب بالتفصيل ايش رح يدرسو .. وقت الوظيفية ايش رح تسوو ..

مو بس عروض وظيفية.. ولو الطلاب بنفسهم يسوو كذا وتساعدهم الأدارة.. زي الطب مثلا

لأن صراحة طلاب كثير اتخصصو اعرفهم دخلو التخصص عشان الكلام اللي يسمعوه ومو عارفين اي شي

وفيه اللي ندم على اختياره لتخصص ما

واصلا هذا كلو يكون احسن واحسن لو كان لطلاب التحضيري .. عشان يفهمو ايش هي تخصصات الجامعة مو بس مجرد اسماء







#4 اليوم الهندسي + خبرات "اجدادنا" المهندسين عن تخصصاتهم


هو يوم يقام سنوياً تستضيف فيه الجامعة عدد من كبرى الشركات: ارامكو – سابك ...

فيه تتكلم الشركات عن التخصصات الهندسية.. والمهمة بالنسبة لديها

اليوم الهندسي اللي فات خربتها الشركات.. طلعو قالو اهم مهندسين عندنا مهندسين الكيمياء

كان الطلاب طوال السنة يقولو كهرباء.. بعد هذاك اليوم كلهم حوَّلو كيمياء :\

هذا شرح لمشرفنا الغالي

http://www.skaau.com/vb/showthread.php?p=4036258




خبرات "اجدادنا" المهندسين في التخصصات الهندسية

هذا موضوع فيه خبرات الشباب في تخصصاتهم .. مو كلهم اجداد عاد

بس اكبر جدين هنا مديرنا يلدرم والمشرف بوليمر

وفيه الأخ

AhmadASG

يتكلم عن تخصص الحاسبات , رده بيكون مفيد للبنات اللي ناويين لهذا التخصص

http://www.skaau.com/vb/showthread.php?t=57460






#5 جامعة الملك عبدالله للعلوم والتقنية – كاوست






http://www.kaust.edu.sa/

جامعة راقية, للدراسات العليا .. مهتمه بالعديد من التخصصات منها التخصصات الهندسية بكافة انواعها

كانو حاطين عندنا اعلان انه المتخرجين من الهندسة بمعدل

4.5 بياخذوه عندهم

فـ انا قلت بس صعبة 4.5 .. خريجين قليل بهذا المعدل .. وفعلا هم ما يبغو الا المميزين بنات واولاد

فـ سألت واحد من اصحابي له معرفه بواحد يدرس هناك

قلّو انهم اللي قبل اللي راحت قبلو طلاب من 4.3 .. وهم كاتبين في موقعهم انه مافي معدل معين للقبول

ولكن آخر دفعة انقبلت كان اقل واحد بمعدل 4.6 ... > دواافير ماشاء الله

فـ إذا معدلك عالي .. وخليه كطموح لك

الجامعة هذي راقية جداً ومافيها الا المميزين, فرصة انك تكمل دراسات هناك صراحة غَلَبَت فكرة السفر برا

رحيمي يشتغل في ارامكو, صاحبه مهندس كيمياء وطلب منهم انه يدرس في كاوست .. يقلي والله انهم

سهلوا له كل شي عشان ينقبل ويكمل دراسات فيها .. لأن اصلا ارامكو هي اللي بَنَت هذي الجامعة وشغلتها اول 3 سنين

والآدمي ماشاء الله متهني فيها





شدو حيلكم وخلو طموحكم عالية

صح كـ مهندس تلاقي وظيفية حتى لو معدلك 3 .. ممكن تتعب شوية لكن في الأخير بتلاقي وظايف حلوة

بس خلو طموحكم انكم تتخرجو بما لا يقل عن 4

بترتاحو بإذن الله

فيه كم خريج هنا في المنتدى قال ان المهندس بمعدل 3.5 مرغوب جدا من الشركات فما بالكم باللي فوق





وبكذا يكون موضوعي انتهى.

فإن أصبت فبتوفيق من الله سبحانه و إن أخطأت فمن نفسي و الشيطان

إن شاء الله اكون وفقت في الاجابة على استفساراتكم ... ولو اني اتكلمت عن حاجات مرة كتير غيرها

بس لما دخلت الهندسة كان نفسي احد يقولي الكلام هذا

ياخوفي بعد كل هذا يجوني الطلاب tl;dr






في الأخير ما اطلب منكم إلا دعوة في ظهر الغيب .. تعني لي الشي الكثير

اسأل الله التوفيق لكم , ولي

-

فيه مشكلة في إرفاق الملفات في المنتدى.. في الوقت الحالي رح ارفع الملفات على الميديا فاير

My Files


بكرة بإذن الله برفع لكم ملفات الفيزياء202 ولو بقي اي ملفات ثانية...