طريقك للحصول على a+ في eli 104

[د/ حلمنتيشي]

السلام عليكم
اولا انا مالي في تنسيق المواضيع والحركات دي
ححاول اعطيكم الزبدة لانو دا الشي الي حيفيدكم

انا خلصت الانقليزي ليفل 4 النصف الاول من الترم دا والحمد لله حصلت على a+
وحبيت افيدكم عشان لا تنصدمو فيه لانه طريقه مذاكرته احس تختلف شوية عن الي فاتو
وهوا إن شاء الله سهل بس يبغاله شوية تركيز

طبعا الملف والكتابة والتحدث دي عليكم واحس تعتمد كثير عالاستاذ الي بيجيكم
اذا دربكم كثير على الكتابة والتحدث حتجيبو درجات حلوة وانتو كونو اطلبو منو تدريبات
وعموما الكتابة مواضيع محدده جدا واسهل من ليفل 3 لانه مواضيع محصورة

ثاني شي والمهم هوا الاختبارين النصفي والنهائي وطريقتهم زي بعض
اهممممممم شي يا شباب انكم قبل الاختبار تمسكو الوحدات كلها الي معاكم
وتقروها وتكونو فاهمين كلللللل كلمه فيها
يعني تكون فاهم كل كلمة في الوحدات الي معاكم صدقوني دي اهم نقطه
من القطع ومن المصطلحات ومن EVERYDAY ENGLISH ومن كل تدريب
لانه راح يعتمد عليها الاستماع والمصطلحات في الاختبار
وترى المصطلحات تجي من الكلمات الصعبه في الكتاب الي ما تتوقعها
صدقوني ادا ما سويتو كذا راح تنصدمو في النصفي وتروح عليكم درجات كثير
حتى الاستماع يعتمد على الكلمات وبعطيكم مثال
مثلا تجي تسمع القطعه يقلك Did you phone your father?
والخيارات تكون تعتمد على المصطلحات الي موجوده في الكتاب ويكون الجواب كذا
No ,the line was engaged
طبعا اذا ما كنت تعرف معنى engaged ما حتجاوب وهي معناها مشغول
وكلمة engaged دي مووجوده في مكان متخبي من الكتاب حتى ما مريت عليه
يعني عمرهم ما راح يخرجو بكلمة وحده عن اليونيتات في الاستماع والمصطلحات

كدا باقيلكم القواعد ودي تعتمد على الفهم وعلى الاستاذ ايضا وعلى فهمكم وتكون سهله للي يتقنها
والقراءة ايضا سهل وعن نفسي حسيتو اسهل من المستوى الثالث بكثير


نصيحه في الاخير لي الي يبغى يحسن الاستماع : اطلبو سي دي الاستماع الي يشغلو في المحاضرة من الاستاذ واكثرهم ما يمانعو خليه ينسخو لكم وما اتوقع يرفض
وكونو اسمعوه وترى يجي منهم كمان وحاولو تطورو استماعكم من خلالو

في الاخير انا عن نفسي ما انصحكم في الورك بوك لانه ما فادني ابدا وكان بس يضيع وقت وتمريناتو ما يجي منها ومستواها صعب بس ممكن تستفيدو منو لو تبغو تطورو لغتكم وطبعا دا بعد ما تخلصو من الانقليزي وتجيبو درجه حلوة بس في الاختبار ما انصح فيه

وبالتوفيق للجميع
وعفوا على سوء التنسيق