تجمع طالبات التاريخ

[جداوية شقية]

المشاركة الأصلية كتبت بواسطة سوسن الحربي جزاكي الله خير يا جداويه وياريت كمان تقوليلنا على الاستاذات المميزات في المواد الي درستيها .

استاذات التاريخ معروفين من بين الأقسام بنشاطهم وهما الأوائل في النشاطات الامنهجية بجد متعاونين عكس ما اشوف الأقسام التانيه مو مدح لهم لأنهم اساتذتي لا وربي شاهد على كلامي وراح احددلك من اروع الإستاذات النشيطين

الدكتورة آمال عبد حافظ :: ما اقدر اوفي قدرها الصراحة امينه بشكل ما تتخيلوه مع انها كانت تعبانه الله يحفظها بس كانت توقف على رجلها وتشرح لنا نقطه نقطه تخصص اوروبا عصور وسطى وبيزنطه
واحيان تعطي الطالبات ملخص المحاضرة الجايه يحضروها والمحاضرة اللي بعدها تجي تسأل عشان تثبت المعلومه والصراحة طريقتها كانت مثمره

الدكتورة اميرة مصطفى :: تخصصها بيزنطه بس اعطتني سيرة نبويه و مناهج البحث التاريخي بس مشاءالله مشاءالله عليها تعطيكي شرح للسيرة النبوية وتحسي نفسك وسط المعكره تحسيها تشرحلك وكأنها كانت معاكم عليها اسلوب لا يعلى عليه الله يعطيها العافيه وما تقصر في شرح ابدا بالعكس تشرح لأخر دقيقة في المحاضرة هذي ميزة كل استاذاتنا لأخر دقيقه وهما يشرحوا

الدكتورة الهام الدجاني :: تخصصها الأندلس الإسلامي :: اعطتي تاريخ المغرب الإسلامي و تاريخ انتشار الإسلام في آسيا : طبعا شرحها مره سلس تكتبي معاها النقاط المهمه وتتأكدي انها محا تجيب الا منها الا احيان واحيان اسئلتها تنبع عن ذكاء يعني شوية تركيز و ربنا يسهلها


الدكتورة ابتسام مندورة :: تخصصها عباسي :: اعطتني خلفاء راشدين :: طريقتها حلوة في الشرح واسئلتها جدا واضحه مافيها لا لف ولا دوران تحب الأسئلة تكون مقاليه و موضوعيه في الدوري عشان تشوف تفوق الطالبه لأنو زي ما تعرفو الموضوع ما يحدد مستوى كلها صح خطأ او اختياري

الدكتورة بلقيس اعطتني تاريخ علوم العرب :: تسترجعي ايام المدرسة في محاضرتها اسلوبها مره حلو كل ما تخلصو جزئية ترجع تسألكم فيها وبكدا ما يحتاج ترجعي البيت الا تسوي ملخص لنفسك اذا حابه

اللي ذكرتهم عموما دكاتره لتاريخ العصور الوسطى

وفي دكاترة ما حصل واعطوني شي بس استناهم يدرسوني منهم دكتورة موضي الكريديس تخصصها عصور وسطى باين عليها مره عسل وكثير يمدحوها


وبالنسبه لطالبات الدفعة الجديده اللي خلصو تحضيري اكيد بتبدأو من عصور قديمه

ومن اللي يعطو عصور قديمه
استاذة عائشة الرفاعي : شرق ادنى قديم
دكتورة فتحيه عقاب يقولو راحت ومحا ترجع الله اعلم : اليونان والرومان القديم
دكتورة هالة يوسف : شبه الجزيرة العربيه : دكتورة هاله امينه بشكل ما تتخيلوه تعطيكي حقك زي ماهوا وتحاول تساعدك هيا ملتزمة


وان شاءالله اختي لما تدخلي حتشوفي بنفسك


بالتوفيق

[جداوية شقية]

المشاركة الأصلية كتبت بواسطة سوسن الحربي شكرا يا بنوته دلع على هادي المعلومات المهمه . وابغى رايكم في تخصص التاريخ ايش مميزاته وعيوبه ؟؟

مميزات التاريخ :: مافي شي محدد يكفيكي انك عرفتي تاريخ اجدادك اللقداما و حضارات الأمم السابقة تاريخ موطنك واذا كنتي صاحبة خيال واسع راح تستمتعي في كل مادة تاخديها لأنك راح تتخيلي الأوضاع بالذات في اول محاضرة للشرق الأدنى بدايه خلق الإنسان والعصور الحجرية كيف اطورو حبه حبه الحجار بعدين النار بعدين النحاس بعدين اكتشفوا الزراعه اشياء كثير حلوة بالتاريخ
بس لا تقولي التاريخ حفظ لا تكوني غلطانه مافي احد يحفظ شي الا اذا فهموا فأنتي ان شاءالله راح تحضري اول بأول وتفهمي وان شاءالله ما تحتاجي اساسا انك ترجعي تحفظي

عيب التاريخ الوحيد الوضع اللي حكون فيه .. لأنو التاريخ احداث
انا اخدت السيرة النبوية في سمستر
والسمستر اللي بعدو خلفاء
واللي بعدو اموي
الين دحين مافي عيب
بس اللخبطة السمستر الجاي لما اخد عباسي اول وتاني و كمان عثماني
يعني ممكن تداخل عليكي الأسماء الأحداث مو التاريخ طبعا التاريخ عارفين نهايه وبدايه كل دولة بس المشكلة في الأحداث والأسماء و كثرة المعارك
بس ان شاءالله نتوكل على ربنا ونشد حيلنا وكل شي يصير سهاله

بالتوفيق للجميع

[جداوية شقية]

ملاحظة مهمه

اي طالبة تدرسها الإستاذة عائشة الرفاعي مو تخويف ولا شي بس تحرص بعد كل محاضرة تسوي ملخص بنقاط شامله من الكتاب من نفس الجزأية وترجع تعيدها بعرض باور بوينت على ايامنا كانت علىاخر السنة تطلب عرض للمنهج كلو وكانت تطلب ملخص بعد كل محاضرة مو عشان تتسلي وتقرى فيه
عشان تحفظكم المادة فأنا قلتلكم من دحين وحتقولو جداوية قالت :: اهم شي النقاط شاملة في ورق مرتب
والعرض يكون شامل مو اي كلام وعموما انا عندي مقرر تاريخ اليونان والرومان كلو بس تعرفو التلخيص يختلف من شخص لتاني اتمنى انكم تجتهدوا
وعلى فكره لما تحفظكم المنهج يحق لها لأنو اسئلتها مقاليه تكلمي على طول والتاريخ القديم شوي صعب بالنسبه للعصور الباقيه لأنو اشياء ما قد شفناها ولا نقدر نتخيلها فاهمين عليا اكيد ياريت تسوي واجباتكم اول بأول وبكدا تنجحوا

بالتوفيق

[بسمة جوري]

استاذة عائشة الرفاعي : شرق ادنى قديم
دكتورة هالة يوسف : شبه الجزيرة العربيه : دكتورة هاله امينه بشكل ما تتخيلوه تعطيكي حقك زي ماهوا وتحاول تساعدك هيا ملتزمة
ياحبي لهم تصدقو الى الحين امر عليهم واسلم مع اني حولت لقسم ثاني

ماينفع النوم عندهم ابد لازن تذاكرو زين وتكونو صاحين وتلبو طلباتهم بالانشطة
بس والله طيبين الله يسعدهم بس انا درست سنة وحولت لاني داخله على اساس اني احول

[سوسن الحربي]

شكرا يا جداوية شقيه يسلمك ربي ويوفقك على المجهود الي عملتيه حلو انك تفيدي غيرك وان شاء الله تتخرجي بتفوق وانا بأذن الله حاسوي الجدول وادرس مع الاستاذات الي مدحتيهم , جزاكي الله خير يا عسل .

[سوسن الحربي]

صح كلامك يا بسمه التاريخ يبغاله تركيز لانه كله احداث وتواريخ ربنا يساعدنا ويكون سهل ان شاء الله .

[جداوية شقية]

راجعو الأدويس

المواد انحطت بكيفهم وبس 3 مواد اتنين قد درستهم ووحده لا

شيكو على جداولكم

شوفو التخاريف




التسجيل المادة أسم المادة الوحدات الأيام الوقت المبنى الغرفة النوع
25/09/2009 hist 223 fa مناهج البحث العلمي في التاريخ 3 .s.t... 11.00 12.20 01d 206a l
25/09/2009 hist 225 da المغرب والأندلس 3 .s.t... 9.30 10.50 01d 207a l
25/09/2009 hist 341 ga الدولة العثمانية 3 s.m.w.. 11.00 11.50 01c 205a l
عدد الساعات الفعلية ========> 9

شوفو المواد اللي حطوها بالجدول و قارنوها بالخطة الدراسية للقسم اللي هيا المستوى الخامس

[بنوتهـ دلع]

جداويه نفس جدولي

حاطين الجدول على كيفهم ولا يقولون أنتظروا الجداول حتى تختاروا المواد على كيفكم صدق مهزله

نصوم ثم نفطر على بصل

[بنوتهـ دلع]

جداويه وحده من صاحباتي 4مواد في الجدول
زيادة علينا في المشرق العربي

[جداوية شقية]

ليش ضمونا للجامعه ماتدري بس هجولة بالفاضي و لخبطه الله يخارجنا بس

يمكن تحت التعديل ولا يفكرونا نظام قديم او حتى شكلهم يفكرو يضمونا قديم ولا جديد ما استبعد شي