ممكن تدخلي.. (استفسار عن الجدول وماده مبادئ محاسبه)

[سوسو دلع]

طيب حبايبي كم ماده نزلت في جداولكم ؟؟؟

[رفيف الروح]

تسلمو وما تقصروا

بس كنت حابه اغير موعد الاقتصاد الجزئي وشفت فيه شعب كثيره مفتوحه بس لمن حذفتها من الجدول

وجيت اضيفها من المواد المتاحه ما لقيتها اصلا (مو مافي شعب) في اقتصاد جزئي بس انو 101 لكن
107 مااافي من الخيارات

ان شاء الله بكرا حراجعهم واشوف ...بس ياريت اللي سارلها زيي تبلغني وتقلي اش سوت؟؟

ولكم جزيل الشكر

[رفيف الروح]

سوسو دلع حبيبتي انا نزلتلي 5 مواد
بس حسيتها قليله فاضفت ثقافه عشان اقدر على الاقل امشي على الخطه

[none55]

المشاركة الأصلية كتبت بواسطة رفيف الروح تسلمو وما تقصروا بس كنت حابه اغير موعد الاقتصاد الجزئي وشفت فيه شعب كثيره مفتوحه بس لمن حذفتها من الجدول وجيت اضيفها من المواد المتاحه ما لقيتها اصلا (مو مافي شعب) في اقتصاد جزئي بس انو 101 لكن 107 مااافي من الخيارات ان شاء الله بكرا حراجعهم واشوف ...بس ياريت اللي سارلها زيي تبلغني وتقلي اش سوت؟؟ ولكم جزيل الشكر

انا قولتلك لاتحذفي عشان محتلاقيها في المواد المتاحة مرا اخرى

وعلى فكرا هما قالوا كل وحدا تحمد ربها انو لقيتلها شعبة

قالوا كدا

الله يعينك
انا اقولك خلاص ترا الي حذفتي خلاص محريجع

الا لو تبغي تشوفي الجامعة ان شا الله يرجعو مع اني مااعتقد

ضيفي بدالو عربي او ثقافة
او الاتنين

[رفيف الروح]

يسلمو نوني على ردك

بس انا حضرت يوم السبت وما سمعتها قالت لا تضيفوا ولا تحذفوا
صحيح قالت انو الجداول حتنزل جاهزه بس ما فهمت من كلامها انو ما تحذفوا ولا تضيفوا

وانا ما كنت بغير توقيت الماده الا لمن سالت وحده وردتلي انو في ورقه قراتها انو عادي تغيري الشعب تبع المواد بس المهم انو تاخدي المواد اللي نزلولك هيا

وعالعموم ان شاء الله بكرا حروح واشوف وربي ييسرويكتب اللي فيه الخير
ويسلمو مره ثانيه على ردك

[سوسو دلع]

المشاركة الأصلية كتبت بواسطة رفيف الروح سوسو دلع حبيبتي انا نزلتلي 5 مواد بس حسيتها قليله فاضفت ثقافه عشان اقدر على الاقل امشي على الخطه

طيب كويس 5 بس الافضل تكون 6 مواد Good Luck
ونزلتلك فيزياء او كيمياء مع الخمسه المواد بالبدايه ؟؟؟

[رفيف الروح]

المشاركة الأصلية كتبت بواسطة سوسو دلع طيب كويس 5 بس الافضل تكون 6 مواد good luck ونزلتلك فيزياء او كيمياء مع الخمسه المواد بالبدايه ؟؟؟

يب 5 مواد مع الفيزياء.. وبالثقافه يسير 6

[سوسو دلع]

المشاركة الأصلية كتبت بواسطة رفيف الروح يب 5 مواد مع الفيزياء.. وبالثقافه يسير 6

اوك ثانكس قلبو

[لينداااا]

المشاركة الأصلية كتبت بواسطة مجهول و بس . . ! انا تخصص محاسبة , و زي ما قالوا لكي الصبايا

لو سمحت ممكن تقولي ايش المواد الي في جدولك الي هتدرسها

[رفيف الروح]

موادي اللي نزلت بالجدول// مبادئ محاسبه ـ عربي ـ انجليزي ـ فيزياء ـ اقتصاد جزئي

وانا اضفت عليهم ثقافه

والاقتصاد الجزئي لمن حذفتو ما قدرت ارجعو فسارو 5 مواد اللي هيا//
مبادئ محاسبه ـ عربي ـ انجليزي ـ فيزياء ـ ثقافه