لو تبغى تعرف قيمة اختك اسأل إلي ما عندو اخت!!

[BaN BaN al sini]

(BeNoO)

بسم الله الرحمن الرحيم

مدري كيف ابدأ موضوعي صراحتاً

بس في قلبي شي ابغى اقولو لكل إلي عندو اخوات

انا عن نفسي ما عندي اخوات غير وحده عمرها دحينا 8سنين(ربي يشفيها)

المهم

انا ما ادري ليش بس طوول عمري اتمنيت إنو تكون عندي اخت اكبر مني

من وانا صغير

بس عرفت إنو مستحيل يسير الشي دا لأنو خلاص مقدر ومكتوب ليا إنو ما يكون عندي غير اخوان الله يخليهم ليا

المهم

انا زيي زي اي مراهق يتعرف على بنات عالنت وكدا

بس انا لمن اتعرف على اي بنت

ما ابدأ معاها إنو والله حب وروميو وجولييت ومن الكلام دا

احب اكون الاذن الصاغيه لأي انسان محتاج للشي دا

انا من طبعي احب اسمع لمشاكل الناس واخفف عنهم

يعني اكون اخ لم تلده امهم

فبدايتي دايمن إنو إلي بيننا يا بنت الناس اخوه

وكتير من اخواتي إلي لم تلدهم امي لمن اعرفهم اكتشف إنو عندهم اخوان !!

بس إنو الاخ هادا إلي اسمو اخوها ومسوي رجال اخ بالإسم بس

يعني لا يكلمها ولا ينصحها ولا ولا ولا ولا اي شي

قولي يا اخ انتا يا رجال البيت إلي بس فالح تسب في اختك وتتامر عليها كأنها شغاله عندك

متى اخر مرة قلت لأختك احبك؟؟

متى اخر مرة ضميتها من قلبك واديتها بوسه على جبينها ؟؟

جاوب بينك وبين نفسك!!

من زماااااااان صح

او ما تدكر

طيب متى اخر مرة جبت لأختك هديه لو من ابو ريالين؟؟

برضو شكلك عمرك ما جبت لها هديه

طيب بس اسألك

البنات إلي تعرفهم وكل يوم تكلمهم سواءً عالنت ولا عالجوال

كم كلمة حب قلتها لهم؟

وكم كلمة غزل نطقتها؟؟

وكم هديه جبتها؟؟

ما افتكرت اختك بكلمة حلوة ولا اي شي

ياخي اجلس مع اختك بس لو ساعه عالاقل

اسألها كيفك ؟ وكيف يومك كان ؟ وإيش إلي مزعلك ومضايقك يا اختي يا حبيبتي يا حياتي يا عيوني إنتي ؟؟ << مت دحينا لو قلت كدا ؟ نقص منك شي؟؟

ولا حاجه كولها كم ساعه جلست مع اختك فيها

ولمن اختك تطلبك شي إنو تجيب لها من البقاله شيبس ولا جالكسي ولا حلاوة ولا حتى ايس كريم من باسكن

تغلى على اختك الحاجات دي؟؟

مو داخل كل يوم البقالة تشتري دخان ولا بيبسي ولا اي شي لا وتعزم على اصحابك كمان

واختك في البيت مستنيه احد يحن عليها بكلمة حلوة بس

وكمان بقولك على شي

ما تفكر كدا لو مرة في الشهر تخرج إنتا واختك لوحدكم كدا وتمشيها وتخليها تغير جو

خدها لو بالسيارة بس لفه عالبحر

خدها واشتريلها ايس كريم ولفه كدا وبعدين رجعها البيت

صدقني اللفه دي واللهي معاك بالدنيا وما فيها

اختك لو عدلت نفسك معاها وغيرت من معاملتك معاها

صدقني اختك ما راح تدور عالحنان عند ناس تانيين

وخلي في بالك

كما تدين تدان<<حط تحتها الف خط

بقولك قصه وفيها مثل:(دقة بدقة ولو زدت لزاد السقا)<<إيش هرجة المثل دا

اقولك انا:

((كان في راجل كبير له ولد وبنت وولدو كان مسافر لبلاد برا

المهم

الاب بيوصي ولدو على حاجات كدا ومن ضمن الوصيه إنو يا ولدي انتبي على اختك واحفظها في سفرك

الولد استغرب إنو إيشبو ابويه خرف ولا إيش اختي جالسه عندو ويقولي انتبي عليها ومدري إيش

المهم

الولد سافر وهوا برا لعب شويه من هنا ومن هنا واختو كانت ترعى الغنم وكان في دا الي يسقي الغنم باس اختو<<اداها قبله يعني

وحكت ابوها وكدا

ولمن رجع الولد الاب مسكو وقلو انا ما قلت لك احفظ اختك إلا قلو دقة بدقه ولو زدت لزاد السقا))<<للناس إلي مخهم تقيل إنو الولد برا باس وكدا واختو انباست هنا

يعني كما تدين تدااااااااان

لا تنسى الشي دا

انا بتكلم من واقع انا عايشو

انا ما عندي اخوات

ويا ريت تكون عندي اخت

ما كان خليتها تحتاج لأحد ولا لأي شي في الدنيا دي

ابغى اي واحد دحين عندو اخوات

يقوم يمسكهم وحده وحده ويضمهم ويبوسهم ويقولهم احبكـ

ولمن تخرج افتكرهم بهدايه ولا بشي حلو ما راح ينقص منك اي شي صدقني

وبس دا إلي في قلبي

الله يحفظ اخواتكم وجميع بنات المسلمين

ولو تبغى تعرف قيمة اختكـ اسأل إلي ما عندو اختـ

وسامحوني عالإطاله

(BeNoO)