رد على رسالة أكاديمية وصلتني بخصوص تخصص اداره سكن و مؤسسات :) ..

[Twix~}..]

مسي مسي // صبح صبح ع الجميع ..

أول شي : سوري ياالغلا يلي ارسلتي ليا الرسالة ما قدرت أرد عليكي الا بدي الطريقة لأنه عدد مشاركتي ما يسمح اني ارسلك ...

وغير كدا انا شوفت استفسارتك انو ممكن كتير يستفيدو منها فعشان كدا نزلتها على شكل موضوع ...

وان شاء الله ما تأخذي على خاطرك مني :) ..

بسم الله الرحمن الرحيم

تويكس,, أتمنى أن تكوني في تمام الصحة والعافية

الحمد الله انا كويسآآ وفي اكوس حال

عفواً,, أريد استشارتك ورأيك في تخصص

" ادارة سكن ومؤسسات"

لأني فـكّرت أدخله وبعدها ترددت من الكلام عنه وعن مستقبله ! ...الخ

لكنني .. استخرت وارتحت للقسم ولله الحمد! ..

سؤالي :

أولا:ايش انطباعك عن القسم وتحسي انك مستفيده مرتاحه فيه ؟؟

مرتاااااااااحه لدرجة ما تتصورينها رغم اني لما اقول لأحد نوعية تخصصي يقولي ايش دا ولما اشرحلهم هو يقتنعو فيه ويقولولي واااا قسم مرا حلو وجيد ..من ناحية الاستفاده فدي خذها من عندي انو حتى لو ما اتوظفتي في المستقبل لا قدر الله انتي راح تستفيدي من التخصص بشكل كبيررر .. واصلا المواد الي بندرسها حلوه وممتعه وربي بدون مبالغه ودا راي الشخصي انا وراي صحباتي الي معايا ..

انا اقلك بعض مواد التخصص الي نأخذها نأخذ ادوات واجهزة منزلية تتعلمي كيف تتختاري الجهاز كيف تعتني فيه .. ناخذ إدارة موارد اسرية 1 و 2 مادة حلوه وسهلة مرا .. تتعلمي منها التخطيط , التنظيم , تحديد الاهداف , الميزانية , ادارة الوقت , تبسيط الاعمال , الدخل المالي ..

من مواد التخصص برضو مادة صيانه تشمل السباكة والبويات تتعلمي كيف تعملي بوية وكيف تصلحي شي خرب :) ترآآ مادة حلوة البنات قالولي انا باقي ما اخذتها ..

وغيرهم مواد كتير ..

ثانياً:كيف أوقات الدوام متعبه ولاّ عادي

ليه الى 5 العصر ؟!!

الدوام مرآآ عادي والاوقات عادية أنا أول سميستر ليا كنت اخرج 11 من الجامعه كل ايام الاسبوع .. بس على حسب المواد والشعب الي تكون موجودة في المادة الي منزلتها .. وانتي الي ترتبي جدولك مع المرشدة الي حتكون متخصصة لكي .. الدوام يكون لما خمسة لما تأخذي مادة عملي زي سكن وتأثيثة .. تنسيق زهور .. اداراة حفلات .. البيت التدريبي .. وليش يطولو الدوام لانها تكون يوم واحد في الاسبوع بس وما تاخذي معاها مواد تانيه باقي المواد تتوزع على احد وثلوث او اثنين وربوع .. وعلى حسب الدكتوره احيانا الدكتوره تخرجك بدري من 2 ونص او 3 او 4 واحيانا تكون رزلة وتخليكي لما 6 يعني هيا حظوظ وعلى فكرة ما تحسسسسي بالوقت مرآآآ لانك بتشتغلي ..

واذا تحوبي اشرحلك طبيعة كل مادة مستعدة بس اقدر افيدك في المواد الي درستها ..

يآليت تطرحيلي ردك لاني طالبة تحضيري وأبغى أفهم التخصص وأقـرر..

وسلامتــكـ

الله يسلمك يا عسسسل واي استفسار انا تحت امررركـ اسالي الي تبغي .. مريت بالشعور الي انتي بتمري فيه دحين ..