محاضرات سنترا + الملخصات النهائية للمستوى السادس (تسويق) - انتساب

[حسان السراقبي]

السلام عليكم ورحمة الله وبركاته

في البداية أحب أقولكم ليييييييييييييييييييييكم وحشه

واعذروني على التقصير يالي بدر مني في الاونه الاخيرة بسبب ضغوط العمل وضيق الوقت يالي ما يساعد أبدا اني اكون متواجد معاكم

وعلشان لا أطول عليكم , هذا مختصر الدورة التأهيلية السنترا يالي انتهت قبل اسبوعين

بشكل عام , مواد التخصص مكررة بشكل كبير من مادة مبادئ التسويق ومبادئ إدارة الأعمال , والمواد العامة مافيها صعوبة إلا في مادة إدارة الأعمال الدولية , بصراحه المادة يبغالها كرف شويه

منتم بحاجة لشراء كتب , الملخصات والعروض والمحاضرات شامله وكافيه ووافيه وما حيخرج الاختبار منها , وهي موجودة في المنتدى من أول بعد ما تعب عليها سبأ الجهني وسند العتيبي الله يعطيهم ألف عافية , وكل يالي أنا سويته أني جمعتلكم هيا في ملف واحد علشان لا تلفو عليها في كل مكان , ومحاضرات السنترا يالي حتحملوها الان كاااامله وواضحه وجودتها كويسه , حتى في محاضرات النظام ما سجلها علشان مشاكل صارت أنا سجلتها لكم وموجودة على الروابط تحت

بالنسبة لمادة خدمات تسويقية , فالمطلوب منا هو إلى نهاية الفصل الخامس

المادة السهله وواضحه , والدكتور عدنان وعد بأسئلة سهله إن شاء الله

وهذه هي محاضرات السنترا حقت المادة موجودة على ملف واحد

محاضرات خدمات تسويقية

بالنسبة للمادتين تسويق الأعمال وإدارة المبيعات , كمان المادتين سهله ومعلوماتها مكررة

والمطلوب منا في المادتين لين الفصل الثامن فقط , وصدقوني المادتين ما تحتاج جهد كبير في الدراسة , خصوصا أنو اسئلة الدكتور شاكر كانت حلوة المستوى يالي راح

وهذه هي محاضرات السنترا حقتها

محاضرات تسويق الأعمال

محاضرات إدارة المبيعات

بالنسبة لمادة الاقتصاد الكلي للاستاذ عبد اللطيف صابر , ما حيجينا في الاختبار رسمات , والمعادلات والقوانين المطلوبة موجودة في المحاضرة الثانية والثالثة فقط , يعني بالعربي احضروها علشان تفهمو كيف حلها وعلشان تعرفوا ايش المطلوب بالضبط , وباقي الكلام الدش يالي فيها سهل بإذن الله

وأبغاكم تنتبهو على حاجة , عليكم متابعة لموقع الاستاذ عبد اللطيف لأنه وعد ببنك أسئلة حيعطينا اياه , وحيكون نسبة كبيرة في الاختبار جايه منها

وهذه هي محاضرات السنترا حقتها

محاضرات الاقتصاد الكلي

بالنسبة لمادة مقدمة في إدارة الأعمال الدولية , فعلى الرغم من أن المادة حلووووة وممتعه , إلا أنها دسسسسسسسمه لأبعد حد , وفيها تعاريف كثيرة وتعدادات يبغالها تركيز , يعني حتتعبو فيها شويتين المادة هذه , وأنصح الجميع أنو يبدأ بمذاكرتها قبل أي مادة ثانية , في اشياء كثيرة غير مطالبين فيها بشكل كامل , حملو المفردات من موقع الدكتور علشان تتأكدو أكثر منها

وهذه محاضرات المادة كاملة (في محاضرات لم يسجلها النظام تم تسجليها لكم هنا)

محاضرات مقدمة في إدارة الأعمال الدولية

أما بالنسبة لمادة مفاهيم حديثة في نظم المعلومات الإدارية , المادة ممتعه وسهله , ومعلوماتها مكرره بشكل كبير عن مادة نظم معلومات وعن مادة مبادئ الحاسب الالي , وملخصها حلو وخفيف وصدقوني المادة يكفيها يومين فقط مذاكره , احضرو المحاضرات علشان في كم نقطه نبهنا عليها الدكتور ركزوا فيها لأنها جايه في الاختبار

وهذه كمان المحاضرات في ملف واحد علشان تحملوها

محاضرات مفاهيم حديثة في نظم المعلومات

وعلى هذا الرابط ملخصات كل المواد السته يالي ذكرتها لكم النهائية يالي تعبو عليها الشباب الللللللله يعطيهم ألف عافية , ومن جد أحلى شباب في الدفعة

ملخصات مواد المستوى السادس

باقي شهر على الاختبارات , ابدأو مذاكرة , وشدو الهمة , وارفعو المعدل الترم هذا لأنه في إمكانية كبيرة لهذا الشيء

ولو في أي استفسار أو سؤال اتفضلوا حطوه وحجاوبكم عليه بأقرب وقت إن شاء الله

تحياتي للجميع
وربي يوفقكم

أخوكم
حسان السراقبي
^_^

ملاحظة هامة
أتمنى من كل شخص حيسرق موضوعي لمنتديات ثانية يذكر مصدرها باسمي