كيف اقدر اختبر وانا في استراليا

[HAYAT]

اخوي Alaska

هلابك
ماجد رد على استفسارك يعطيه العافيه

[ماجـmajed04ـد]

حــياة
أنا فكرت أنك موجوده في أستراليا...يعني مابعد رحتي
أنا كنت هناك قبل أختبارات الفصل الأول بس رجعت الرياض عشان أكمل شغلي ودراستي في السعوديه
عمومآ الأسعار شي يروع..البيبسي..أهم شي بالنسبه لي... هناك بـ9ريال تقريبآ..الأيجار يكون بالأسبوع ومتوسط الأيجار ب380دولار...الدولار=3ريال و21هلله تقريبآ يعني يطلع لك الشهر بحدود 5000ريال أيجار بس ..الأكل في الجامعه برضه مرتفع مثلآ القهوة=12ريال ...بصراحه أسعار مرتفعه في كل شي..الكتب ,أدوات المكتب,الملابس,الخدمات,.....بس أسعار السيارات والمواصلات عندهم معقوله..راح تحصلي سعر السيارة بنفس سعرها في المملكه أو أرخص شوي{{السيارات الأمريكيه}} وبنفس الوقت المواصلات عندهم سهله ورخيصه ومريحه مثل الباصات,القطارات,الترام....بس باقي الأشياء مرتفعه وبشكل خيالي ...تخيلي واحد من الشباب أضطر يشتري مخدة نوم<وسادة>عاديه مره....أخذها بما يقارب 500ريال
يعني سافري وأخذي كل شي...بس ترى الجمارك حقتهم ترفض المأكولات والأشياء المجففه,السجاير,الأدوية,السوائل...لأ وتخالف عليها بعد بمبالغ كبيره

[HAYAT]

ماجد انا سمعت ان الاسعار مرتفعه
معقوله لهالدرجه..لو الواحد رايح اجازه عادي ..بس معيشه كم سنه..صعبه..
ترى هم شعب فيه طبقات ومستويات اكيد..واغلبهم طبقه متوسطه..الاسعار هاذي اتوقع يبيلها طبقه اعلى من المتوسطه عندهم عشان يعيشو كل حياتهم بهالاسعار..ههههههههههه الله لايبلانا
اما البيبسي الوحده ب9 ريال ..انا مدمنة باور هورس..على كذا الحبه بخمسين ريال عندهم

الله يطمن ههههههههههه
بالنسبه للسكن ايه عندي خلفيه بسيطه عنه انه بالاسبوع..والافضل ناخذ بيت من الاكواخ الاستراليه احلى وافضل بحديقتك وكل شىء...
ايش كمان لاحظتعندهم شىء يفرق عن عندنا
المطاعم مثل ماكدونالدز..كنتاكي..اسعارهم مثل عندنا ولا زيادة بسيطه ولا اربع اضعاف؟
شرايح الجوال؟كروت شحن؟ولافواتير؟وكيف طبيعة اسعار المكالمات

سوررري تعبتك معي

[ماجـmajed04ـد]

أولآ.. ماعندهم باور هورس..لاتروحي أستراليا
بس يمكن يكون عندهم ريدبول..أسوةً بدول الشرق..
وأسعار البيوت أنا كنت أتكلملك عن نظام الأكواخ..على قولتك..وبعد برا المدينه..يعني في الضواحي ..بس في ضواحي ملبورن
أما بالنسبه للطبقه الوسطى..ما أدري شقولك الناس هناك كلهم نفس اللبس نفس السكن ..مايعرفوا أيش يعني معنى حمام أو نظافه..الله يعينك على هالنقطه..لأن الصراحه تحس كل الأستراليين مايتنظفوا ولا تعرفي مين طبقه وسطى ومين طبقه بطيخ..لبسهم أي كلام وأي للون وأي شي
أسعار مكدونالدز ..ماأعرف فيها إلا سعر وجبة السمك..بخمسه أو سبعه دولار
أم كنتاكي أو غيره صراحه ماأدري لأني أتجنب اللحم والدجاج(عشان الذبح مو أسلامي)وأنصحك ماتأكلي لحوم أو دحاج من أي مكان عشان الذبح غير أسلامي
أنا كنت أخذ وجبة (فيجي)من الصب واي بحدود 7دولار أو راح تحصلي محلات تبيع البيتزا بالقطعه بحدود 3دولار للقطعه..طبعآ بيتزا خضروات...أشتغلتهم هناك كل ماأجي محل أقول أنا نباتي مع أني أكبر عميل لماما نوره في الرياض ومشخول وجان برجر في جدة
بالنسبه للأتصالات كل النوعين متوفره سواءً ثابت أو موبايل وتقدري تأخذي الشريحه من أي سوبرماركت وتشغليها عن طريق النت..أسعار المكالمات الدوليه ماأدري..ماكان أحد يسأل عني هناك...
بس المكالمات الداخليه حسيت أنها رخيصه...يعني أنا شحنت بـ30دولار كفاني فترة طويله
وفيه أكثر من وسيله للموبايل مثلآ شحن أو فاتورة وفيه أكثر من شركه....شركتي أنا أسمهاoptus

[ماجـmajed04ـد]

يعني الأتصالات ماراح تكون مشكله حتى النت فيه أشتراك يوصلوه لبيتك أو عن طريق الوصله(زي كونيكت) ومثل ماقلت لك فيه أكثر من شركه أتصالات بس أختاري شركتي ..تراها حليوه
بس أيجار البيت هو اللي مشكله ..أول شي تروحي لمكتب عقار بعدين يعطيك موعد تشوفي العروض المتوفره وأذا عجبك شي منهم...تعبئي طلب أيجار وتنتظري الرد بالموافقه على قبولك والرد أقل شي بعد 15يوم أذا الأخوان تنازلوا يأجروك بيتهم...أعتقد وجود أطفال وعدد الأسرة يفرق في الموافقه
كلام أستراليا كثير والمساحه ماتكفي.. بس لا تتعقدي ترى فيه مزايا بعد..يكفي الشهاده اللي هناك تستاهل التعب
أما باور هورس ..لازم تعالجي أدمانك منه قبل لا تروحي....بالتوفيق

[HAYAT]

ماجد هههههههههههههههههه

بحاول اتخلص من ادماني قبل اسافر

الله يعين

ابشرك القبول جا لااختي في ولاية تزمانيا...مااتوقعنا ابدا يكون فيها القبول..تمنيت ملبورن او..برزبن...بس الحمدلله يقولو الطبيعه روعه بهالبلد...وشفت صورها رووووووعه
شكلي بسافر مع اختي وارجع السعوديه اختبر كل سمستر وامري لله
صحيح ماجد انا الان باقيلي سنه بالجامعه واخلص ان شاء الله
حابه بنفس الوقت اخذ لغه هناك بما اني انتساب بجده...عشان اول مااخلص البكالريوس اكون خلصت اللغه وادخل ماستر على طول اول مااستلم الشهاده تتوقع ينفع تخطيطي؟
افكر ادرس اللغه على حسابي واول مااخلص سنة اللغه وبكالريوسي بجده اجيب قبول من الملحقيه بعثه للماستر ينفع ولالا؟
وهل يعطوني اجازه وانا بالمعهد اسبوعين كل سمستراسافر السعوديه اختبر وارجع ولا؟

طولت بــ اسئلتي عليك
سووري

[Bent KSA]

السلام عليكم

اول شي الله يوفق الجميع .. انا مااقدر اجاوبك على استفسارك لانو ماعندي خبر ..

بس ابي اعرف وين الجامعات الي في استراليا ممكن اكمل فيها ماستر من جامعتنا ؟؟ يعني اي مدينة وزي كذا .. وبعدين احنا انتساب نقدر نكمل عادي ؟؟

يعطيكم العافية .. :)

[HAYAT]

وعليكم السلام

اختي نقدري تكملي عادي ان شاءالله

بس تخلصي بكالوريوس

وقدمي على جامعات ماستر ويجي معاها لغه

في مكاتب ووكالات استراليه كثيره تجيب لك قبول في الجامعات وتخلص لك امورك من فيزا وكل شيء

هو الفرق اذا على حسابك الخاص او بعثه من الوزارة

ربي يوفقك

[ماجـmajed04ـد]

أهلين حيـــاة ..يسعد صباحك
ماعليه تأخرت بالرد .. توي جاي من العمل
أما بالنسبه لخطتك ..والله *خطة معلم*و بقوة أعجبتني..يابنت أنت تخصصك -تخطيط
وأنا اللي أعرفه أنه المرافق له حق يدرس ع حساب الدولة..بس لما يكون الزوجه أو الأبن ..مــاأعرف لما تكون بنت ترافق أختها..ياليت تسألي أدارة الأبتعاث وتبلغيني ...إلا أذا مهتوية تدفعي
وبالنسبه لأجازة الأسبوعين ..أذا كانت الدراسه ع حسابك ماأعتقد عندهم مشكله...وحتى لو درستي على حساب الدوله {كمرافقه}أتصور لما ترتبي مع المدرس أو المدرسه أو الأداره ماراح يمانعون..وخصوصآ أن أجازاتهم بالكيلو..يعني أنشالله تصادف فترة الأختبارات الجامعيه هنا فترة أجازة علم أو أجازة الأم أو حتى أجازة بنت النور عندهم...وع فكره نظام دراسة الأنجلش أنه كل 3أسابيع بعدهم أختبار وبعده أجازه أسبوع..يالله أنبسطي..يعني كل 3أسابيع عندك أجازه أسبوع ومرات أسبوعين تقدري توصلي ياشيخه شارع المكرونه وترجعي
بصراحة تخطيطك عجبني.. ولا حتى فكرت فيه... لأنه كذا الطالب في سنه يخلص جامعه وأنجلش ويدخل ع طول في التخصص...حسافه رجعت...خصوصآأنا مابقى إلا سمستر صيفي أنشالله وأتخرج
...أما عن سؤال بنت المملكه..هذا الرابط حق وزارة التعليم العالي ..عشان تتأكد بالأول من الجامعات المعترف فيها... وبعداللي فيها أمكانية قبول ماستر..كخطوة أولى مهمه قبل أي شيhttp://www.kas.mohe.gov.sa
تحـــياتي للكم ُُُُُ

[HAYAT]

ماجد
الله يبشرك بالخير

حركااااات اجازات بالهبل عندهم....يارب يسهلها...
يلا شد حيلك وكمل ماستر.
الا صح انت ايش تخصصك.
ورحت استراليا بعثه ولا مرافق مع زوجتك او اختك ولا على حسابك ولا سياحه ولا ايش؟