لاصرت بايعني..

[ذكرى مؤلمة]

لاصرت بايعني أشوفك على خير,,,
مع السلامة دام مابه سلامة.

قلت انتهينا قلت لك خير ياطير,,,
ماني بأول شخص يخسر غرامة.

محذرك من قبلها الف تحذير,,,
اذا عفتني بيعيف قلبي هيامة.

ماني بميت لا.. ولا احتاج تبرير,,,
صح الله لسانك ووفر كلامة.

بسمعك حبكة وفكرة وتصوير,,,
وافهم عدل يا مدعي بالفهامة.

وجه الشعر ابيض ويحتاج تغيير,,,
ودي تزين هالقصيدة علامة.

ماضيك الاسود بذكرة دون تقصير,,,
كذا بيكون بــخد هالشعر شامة.

يصدق معي تعبير ويخون تعبير,,,
يا ضيعة الشاعر بوقت انسجامة.

يمكن خطاء ادونك بالشعر مير,,,
لو ما احترمتك للغرام احترامة.

" ماكان حبك غير بس طعنتك غير,,,
علمتني معنى الندم والندامة ".

ماجاك مني اي زلة وتقصير,,,
كل ما اخطيت اعاتبك بإبتسامة.

حسبي على الذكرى اذا هبت عصير,,,
ما عاد تنفع شرهتي والملامة.

البال ظامي وقتها والحزن بير,,,
خسرتك والله إن كسبت اهتمامة.

الليل فازع لك كذا جاني مغير,,,
ظلمتني واكثر ظلمني ظلامة.

لأقبل علي اوحيت صوت المسايير,,,
وفزيت كل ضيف اقوم بمقامة.

واذا عزم هالليل ضيقة وتفكير,,,
قلي بربك كيف باقدر انامة.

" مافية داعي للعتب والمعاذير,,,
الغدر خال الجرح واطيب اعمامة ".

اما يجيب الله مطر تالي وخير,,,
والا السلامة ماش ما من سلامة.

راقت لي.. وأتمنى ان تنال اعجاب الجميع..
للشاعر المبدع/
محمد بن جارالله السهلي