اللي تسكنو علوم ويبو يحولو لكليات صحية .. تفضلو افيدكم :)

[dr.imey]

المشاركة الأصلية كتبت بواسطة doodle يعني الحين يحسبو نسبه التخصص + نسبة التحضيري كمان !!!!!! مو بس السنه الثانيه لحالها ؟؟؟

نظام الجامعة زي المدرسة تراكمي

معدلك التراكمي حق التحضيري حيزيدو عليه معدل التخصص

مايطالعو في النسبة الموزونة

فهمتي علي ..؟

يعني يعتمدو على المعدل التراكمي حق سنة ثانية في العلوم

[doodle]

لا بنات احد يرد عليا مررره انقهرت احسب بسالمعدل حق هذي السنه بدون التحضيري !!!!!

ومن الفلاحه خليت بس 5 مواد هذا الترم 11 ساعه بس طيب ايش اسوي الحيين :((((( وانا جبت 4 بالتحضيري يعني خلاااص ماعندي اي اامل ؟؟؟؟

[doodle]

اااسفه جددداااا بس اخر استفسار ابن سينا تدي منحات داخليه لعبدالعزيز صح ؟؟ يعني اسير طالبه عاديه بجامعة الملك عبدالعزيز زي طالبة انتظام ؟ وهل في للصيدله لاني ابغى صيدله

[dr.imey]

المشاركة الأصلية كتبت بواسطة doodle اااسفه جددداااا بس اخر استفسار ابن سينا تدي منحات داخليه لعبدالعزيز صح ؟؟ يعني اسير طالبه عاديه بجامعة الملك عبدالعزيز زي طالبة انتظام ؟ وهل في للصيدله لاني ابغى صيدله

اول مرا اسمع دا الكلام

اللي اعرفو ومتاكدة منو

منحة الملك الداخلية تدخلك اي كلية اهلية زي ابن سينا

ماتوديكي جامعة الملك عبد العزيز لانها حكومية

[jorey2009]

doodle
البنات يقصدوا اخر معدل تركيبي حق التحضيري والسنة هذه
بالتوفيق

[جنون ورده]

معليه بس انا عندي اسنفسار
انا نفسي ادخل كليه العلوم الطبيه التطبيقيه
وظروفي ماسمحت لي اجيب معدل زي الناس بس جبت 3.065 ونسبتي الموزونه 75
وانقبلت احياء
وابغى احول وهذي اول سنه لي واخذت السمستر 7 مواد
ثقافه اسلاميه وعربي واحياء عامه ومعمل احياء وكيمياء عضويه لغير طلاب الكيمياء
ومعمل كيمياء وامن مختبرات وسلامه
يعني مشيت على الخطه حقتهم

وابي اجيب معدل هالمواد بتنفعني
هل هي بتكون سهله علي واقدر اجيب معدل
ابي نصيحتك بالله

[Nr.E]

والله ي عسل الصراحة محيمديكي بسنة ترفعيه إلى 4.5

من سابع المستحيلات

أنا كان 4.17 وفي سنة يادوب اترفع إلى 4.5 بالمضاربة وصل

فانا اقلك يا أرضي بتخصصك الحالي

ي لاتضيعي سنة من عمرك

وقدمي منحة داخلية على ابن سينا

ادخلي تمريض والا طب

المنح او الموارد البشرية يعتمدو على معدل الثانوي والتحصيلي والقدرات
ولمن تروحي هناك حيعادلولك مواد التحضيري كمان

والله يسهلك

[دروووووووب]

السلام عليكم


بنات انا ابغ اقول حاجه ,, ابدااااااااا م تحطيم بس هدا اللي يحصل بالغالب

اكثر البنات اللي يتسكنو بالعلوم يقولولك ما نبغ ونبغ نحول ومن دا الكلام لكن صدقيني بمجرد تتعودي على كليتكي وصديقاتك وتدرسي سنه وتجتهديتشيلي فكرة التحويل من راسك ,, يعني ما ادري ليش اغلب صديقاتي اللي معايا في الكيمياء حيوية كانو يقولو نبغ نحول ومندا الكلام وما ياخدو مواد كثير وفي النهاية يتوهقون اللي راح عليها ترم بثلاثة مواد واالي ما اخدت مواد تخصص ابدا


وفي النهابية ماخرجو من العلوم


مختصر الكلام خلي جدولك وسط لاهو خفيف بزيادة ولا هو خالي من مواد التخصص لاءنك ماتضمني يحولوكي يعني لو ما حولتي تكوني تاخرتي عن الخططة كثييييير ,, عشان كدا انصحكم تحطو ببالكم انه احتمال تفضلي بكليتك عشان ما تنصدمي انه ما حولوكي

الله يكتب لكم اللي فيه الخير

[lujaina85]

لو سمحتي انا معدلي في التحضيري 2.902 .. انقبلت في قسم الاحياء و ابغا احول لتمريض بعد سنة, ممكن اعرف ايش المواد اللي المفروض اخدها واللي حترفعلي معدلي في سنة
المواد اللي نزلتلي في الجدول ( ثقافة السلامية - احياء عامة 2 - احياء عامة 2 - أمن و سلامة مختبرات - معمل احياء عامة ) و شكراً :)

[Nr.E]

صراحة ي اختي

مستحيل توصلي ل 4.5