مهرك يا بنت ، و ادفع يا بوي ، (اتحفوني برأيكم)

[RHF]

السلام عليكم

ممم من الفضاوة اللي فيا جا على بالي الموضوع دا ،،

المهور ،، ومين يزيد !!!

يعني العيال الود ودهم ما يكون في مهر خير شر هههههههه يبو يتجوزو و خلاص !!

والبنت تحلم يكون مهرها كتير ،، تدبش لنفسها ،، تزبط نفسها ،، تشتري كل شي ،، !!

يعني كلنا عندنا احلام وردية ، وكلنا نحلم ،،

لاكن في النهاية يحكمنا المنطق ،، !


ـــــــــــــــــــــــــــــــــــــــــــــــــ


طبعن في حالات مجازفة و عندي انا اعتبرها بلاها ،، لمن مسلن :

يقول الرجال للولد ، حط 10 ريال و خد البنت معاك بيتك !! ( اقصد المهر 10 ريال )

ولا قصة البيبسي ، الي قالو البنت بعلبة ببسسي !!

او قصة انو الرجال بيورينا انو مهر بنتو قليل ، يقولو حط مبلغ بسيط


ـــــــــــــــــــــــــــــــــــــــــــــــــ


الصراحة مالو داعي البنت تطلب مهر و قدره ، و تخلي خطيبها ولا الولد عمومن ، ممكن يوصل انو يتدين او ياخد قرض و يتسلف من فلان و علان ويعيش عمرو يسدد المبلغ !!



وما ابغا اقول كمان اللي ما عندوش ما يلزموش < حيقتلوني البويز

مممممممم


في مهور منطقية ،، 20 / 30 / 40 / 50 ألف

يعني العملات اختلفت زمان اول عن دحين والاشياء اختلفت اسعارها و و و

كل واحد و اللي عندو ، كل واحد ومقدرتو

لاكن الغريب بعض القبايل ، تطلب مهر 200 ألف // 500 ألف ،، و ممكن توصل المليون


ـــــــــــــــــــــــــــــــــــــــــــــــــ


باتكلم عن تجربة شخصية ، صاحبتي ، طلبت مهر 200 ألف ( ماشاء الله) ، وكانت معصبة و تصرخ و تقولك لييييييييه انا قيمتي 200 ألف ؟؟ انا استاهل اكتر من كدا بكتيييييييييييير ،، يحمد ربو اني بوافق عليه وهو دافع الشي دا بس

وفوق كدا اعطاها قطعة ارض ، واشترا اشياء لامها و اخواتها و ابوها و اخوانها ،، وكان عليه البيت والزواج وطبعن شهر العسل ،،

والغريب اكتر ، ان البنت ما رضيت تشتري بال 200 الف شي ؟؟

خلتها على قلبها ، لدرجة كمان انها ما زبطت نفسها ، وما اشترت الا اشياء اساسية ما يوصل سعرها ال 10 ألااف من ال 200 ألف دي ،،

قالت / لمن اتجوزو هو يشتريلي كل شي !!

طبعن الولد مستواه المادي عادي جدا ، و دا كلو كان قروض و سلف من فلان و علان !!!

طيب ليه ؟

ليه انا ارضا على زوجي يتدين و ياخد قروض و يتسلف ؟؟ ونعيش حياتنا في قلق ؟؟

ما توصل لدي الدرجة !!!


ـــــــــــــــــــــــــــــــــــــــــــــــــ


اوفففف كتبت كتاب كامل شكلي ههههههههه

والله الكلام بيطلع من قلبي ، انا فعلن مستغربة لحالة البنات !! و كمان البويز !!

البنات يشطحو و العيال ينطحو ههههه

ـــــــــــــــــــــــــــــــــــــــــــــــــ

عمومن يا بنات ،، انتو ايش رايكم ؟؟
ويابويز انتو ايش رايكم ؟؟




( بغض النظر الموضوع مكرر أو لا ،، ايش رايكم انتو )


ابغاكم تاخدو راحتكم في التعبير زي حالتي هههههه

رهف