محاسبة acct 101 اي شرح اي مساعدة تعالي ولا تستني

[bent oo bas]

اليوم قالت الدكتوره كل اللي مشروح في الورق هوه اللي معانا غير كده لا ومن الكتاب اذا تبغي تحفظي المصطلحات من الكتاب بس المصطلحات اللي في الورق
والفصل الاول نظري وكلام انتي تزاكريها لوحدك احنا حنبدا من الفصل الثاني

[bent oo bas]

السلام عليكم
الفصل الثاني
معادلة المحاسبة وتحليل العمليات المالية

اول شي معادلة الميزانية
ما للمنشأة (( من ممتلكات ، اراضي- مال - عقار - سيارات )) = ماعلى المنشأة من ديون وغيرها

ترجمتها في المحاسبه معادلة الميزانية
الاصول = الالتزامات او خصوم - نفس المعنى - ( ديون ) + حقوق ملكية

حقوق الملكية حاجتين لازم تحفظها ::::- راس المال ، صافي ارباح العام

طبعا تقدر نعكس اي عباره رياضية
الخصوم = الاصول - حقوق الملكية
حقوق الملكية = الاصول - الخصوم

طيب الميزانية ليها جدول
والجدول لي اسم غير اسم :صورة الميزانية
الاسم : قائمة المركز المالي
ننتبه في الاختبار ممكن تقولك اعدي البيانات التالية في قائمة المركز المالي يعني هادا الجدول
كيف الجدول هادا قسمين
اللي على اليمين اصول
اللي على اليسار خصوم وحقوق ملكية
هادي الاقسام الاساسيه
والاقسام الفرعيه
الاصول تقسم لي قسمين
اصول متداولة :: نقتنيها لقصد البيع ،، وكمان تتحول لسيوله في اقل من سنة مثل الاسهم اوراق القبض مخزون
الاصول الثابتة :: تقتنيها لقصد الاستخدام ،، وكمان ما تتحول لسيوله بسهوله اكثر من سنة
ومنها نوعين ::ـ ملموسه / اثاث سيارات اجهزة
غير ملموسه / براءة الاختراع - شهرة المحل
الالتزامات او الخصوم تنقسم كمان قسمين
التزامات قصيرة الاجل : لازم تتسدد في اقل من سنة
والتزامات طويلة الاجل اكثر من سنة
وحقوق الملكية زي ماقلنا اول
راس مال ، صافي ارباح العام
شكل الجدول مرسوم في الفصل الثاني صـ2

هادي كانت اول نقطة في الفصل

دحين 2 نقطة
اثر عمليات المالية على معادلة الميزانية
* عمليات مالية يعني دخول او خروج اي اموال في الشركة
دحين معادلة الميزانيه فيها طرفين
الاصول والخصوم+حقوق الملكيه
ممكن تتاثر هادي الطرفين بزيادة او نقصان
اذا اتاثر الطرفين لازم يكوم زي بعض اذا زاد واحد لازم يزيد الثاني
لكن اذا اتاثر طرف واحد بس لازم يكون في نفس الطرف شي يزيد وشي ينقص عكس بعض
عشان نحااااااافظ على توازن المعادلة
مرررة مهمه هادي النقطة عشان نحل صح من غير لخبطه

دحين احنا عرفنا ايش الاصول وايش حقوق الملكيه وايش الالتزامات
وليها جدول اسمو جدول المعادلة الميزانية وجدول قائمة المركز المالي
كيف نرسمو خانه للتاريخ والاصول جنبو ونقسم الاصول لفروع صغيره لانها كثير منها صندوق وبنك وسيارة واثاث على حسب السؤال
وبعدين خانه جنبها للخصوم وخانه جنبها لحقوق الملكيه
حنبدا اول مثال ولازم قبل اي شي قبل ما تحلي اول ما تشوفي المثال تفصليه

في 1431/1/1 بدأت منشأة عصام أعمالها برأس مال قدره 100,000 ريال تم ايداعه في الصندوق
هادا السؤال دحين نفصل
رأس المال ايش ؟؟ ----> راس المال حقوق ملكيه وزاد ( ليش زاد عشان ماكان عندنا راس مال كان صفر وسار 100,000) هادا الطرف زاد
الصندوق ---> اصل وكمان زاد لانو ماكان عندنا فلوس وسار عندنا100,000 ريال
كده المعادلة اتاثر طرفينها لازم يكون التاثير متسااااوي
يسير نرسم الجدول حقنا
في الاصول تحت الصندوق نكتب الرقم وفي حقوق الملكية نكتب الرقم
** لازم يساوي بعض في كل رقمين كتبيهم

عرفنا نحل هادا المثال كل الامثل اللي زي نعرف نحلها بنفس الطريقة نحلل ونفصل وبعدين نفرغ الحل

طيب هادي اذا اتاثر الطرفين لكن اذا اتاثر الطرف الواحد كيف وايش نسوي
مثال :: في 17/1 اشترت منشأة عصام التجارية أثاث بمبلغ 5000 ريال نقدا
اول شي نفصل
الاثاث ايش أصل وزاد لانو اشتريناه
و (( نقدا يعني صندوق )) ونقص منو لاني اشتريت منو اخدت قيمة الاثاث منو
ايش سار طرف الاصل اتاثر بس ايش سار الاثاث زاد والصندوق نقص
نكتب في الجدول تحت الاثاث + 5000 ريال
وتحت الصندوق -5000 ريال
لازم متساويييين

ونكتبها على شكل الجدول قائمة المركز المالي اللي وصفناه فوق في صـ2
هادي النقطة الثانية

جينا عند النقطه الثالثه ايش سار حسو انو هادي الطريقه صعبه على المحاسب لانو حيكووون في اشياء كثير ومهي دقيقه
قام طلعو طريقه ثانية اسمهااا نظرية القيد المزدوج
هادي النظريه ادق حبه في شي زايد
ايش هو كلمتين جديده
كلمة مدين وايش يعني مدين يعني ( ادين مني ، اخد مني ) هادي على اليمين دايما في اي جدول
كلمة دائن ( اعطاني دين ، مطلوب له ) هادي على اليسار دايما في اي جدول

في شي 2 متى نعرف انو مدين ومتى نعرف انو دائن
الاصول لمن + مدين
ولمن - دائن
الخصوح وحقوق الملكيه العكس + دائن
ولمن - مدين
لازم تحفظيها تربطيها باي شي اهم شي ما تلخبطيهااااااااااااااا
ولازم تعرفي ايش الاصول وايش الخصول وحقوق الملكية
ولازم يكون واحد مدين وواحد دائن
وطبعا ماننسى طرفين المعادلة لازم متسااااااااوي ولا ماتسير معادله

مثال :::- في 1431/1/1 بدأت منشأة خالد برأس مال قدرة 500,000 ريال تم ايداعه في البنك
اول شي نفصل ونحلل
رأس مال حقوق ملكية زاد لانو كان ماعندنا شي صفر اذا زادت حقوق الملكية اصبح دائن
البنك اصل وزاد لانو كان صفر واذا الاصول زادت يصبح مدين

(( مافي سؤال يجي كده بس هادا توضيح للاشياء الجيه))

خلصنا الفصل الثاني خطوة خطوة لازم نزاكر اول باول عشان نفهم اتمنى اللي بيزاكر من شرحي لا يدخل الفصل الثالث الا وهو فاهم وحافظ الكلام هادا
عشان ما يتلخبط وعشان يمشي حبه حبه وتثبت بفهم

واتمنى اكون شرحت ووضحت واي سؤال اي شي مو مفهم اشرحو مرة ثانيه بطريقة ثانية
وانتظروني وان شاء الله قريب الفصل الثالث

[bent oo bas]

السلام عليكم
الفصل الثالث
النظام المحاسبي
طبعا تعاريف معانا
مقومات النظام المحاسبي:: (( كيف تكوني نظام محاسبي في شركة )) 3 اشياء مهمه مافي شركة من غيرها
مستندات ، الدفاتر ، التقارير المالية

اول شي ::- المستندات ، المستند هو اثبات واضح للشركة انها اشترت او باعت زي الفواتير الايصالات
ومنو انواع شي للمنشأة وشي على المنشأة
الا لشركة داخل الشركة وهي في صورة فواتير بيع - يعني الشركة باعت
والا على الشركة خارج الشركة وهي في صورة فواتير شراء - يعني الشركة اشترت
* وهادي المستندات يتك استخدامها في عملية مراجعة الحسابات

ثاني شي ::- الدفاتر ، ليها نوعين
1- دفتر اليومية ::هادا الدفتر ليه نظام ويمشي
على نظام القيد المزدوج ( مدين ودائن ) وينكتب في كل الاحداث اليوميه
وعلى خطوات معينه ::
- كتابة التاريخ
- كتابة اسم الحساب ورقم المبلغ على اليمين اذا مدين
- وعلى اليسار اذا دائن
- تشرحي شرح بسيط ومختصر
- تسيبي سطر بين كل عملية وعملية عشان مايسير لخبطه
- تتاكدي انو المبلغ في المدين = الدائن
انا عن نفسي احب احط رقم القيد عشان اتاكد في الاخير اني كتبت كل العمليات ومانسيت شي
على كيفك الدكتورة قالت اهم شي المبلغ والبيان والتاريخ

الامثله مرفقه
في اختصار لمدين ( منه ) زي ما قلنا اول اخدت منه فلوس
اختصار لدائن ( له) له فلوس عندي
قبل اي كلمة احنا نقول على اي بند في المحاسبه حساب
واختصارها حـ/ لانو صعب تكتب قبل كل لكمة في الجدول حساب
والمدين دائما قبل الدائن والمدين نقول من حـ/ .... الى نبعدها شويه عن اول السطر
ال حـ/ ........ والسطر اللي تحتو شرح كلمتين بس توضحي اي عملية وما تنسي التاريخ
لازم نحلل السؤال قبل اي شي نفهم لوحدنا ونكتب عليها وبعدين نفرغها في الجدول
عشان تكون افكارك مرتبه وماتتعبي ويطلع صح ان شاء الله


في القيود اللي في الجدول في نوعين
قيد بسيط :: يطلع من والى واحد شي بس
وفي قيد مركب : يطلع مثلا من شين الى واحد او من اكثر من شي الى اكثر من شي
على حسب لكن في القيد المركب ماتكتبي من حـ/ ... ومن حـ/.... لا تكتب
من مذكورين وتحت نحط الحسابات من غير من بس حـ على طول

[bent oo bas]

تابع الفصل الثالث
الدفتر الثاني وهو دفتر الاستاذ
وهو عبارة عن ترحيل كل المعلومات في دفتر اليوميه الى هادا الدفتر
ويكون اخر السنة
ولكن بطريقة مختلفه
كيف طريقة الجدول ؟؟
وكيف تعبي الجدول ؟؟
الجدول عبارة عن كل حساب وليه جدول البنك الصندوق السيارة الاثاث كل واحد جدول
الجدول عبارة عن 6 خانات 3 مع بعض و3 زيهم مع بعض
3 خانات للمدين و3 خانات لدائن
يسمو جدول t
لانو زي التي جانبين زي بعض وبينهم فاصل
كيف تعبي
نجي لجدول البنك نرسمو ونروح على جدول اليوميه
كل شي في بنك نوقف
نشوف البنك مدين ولا دائن اذا مدين نروح عند الجزء المدين من جدول الاستاذ
حساب البنك نكتبو الرقم اللي قدام البنك ونشوف الى ايش نكتب اسم الدائن
لازم تعرفي في الجدول الاستاذ ماتاخدي اي شي مايخص البنك اللي الاسم بس
المبلغ لازم يكون حق البنك
بعد ماتفرغي كل البنك اللي في اليوميه
شي مدين وشي دائن تروحي على جدول الاستاذ
تسوي في اخر الجدول خطين عشان نقفل حساب البنك وتشوف هو مدين ولا دائن
تجمعي كل خانات المدين وتجمعي كل خانات الدائن
تشوفي مين اكثر تكتبيه بين السطرين اللي رسمتها
وتشوفي الخانه الثانية كم باقيلها عشان تسير قد اختها
تكتبها فوق الخانه اللي انتي سويتها عشان يسير كانو مجموعهم كلها يساوي الرقم اللي قفلتي بيه
تكتبي جنبو رصيد مرحل يعني ايش يعني مرحل السنه الجيه ولازم يكون التاريخ 30/12 اخر السنة
وتكتبي نفس الرقم في القسم الثاني تحت الخانه اللي قفلتي بيها الجدول
وتكتبي رصيد منقول ولازم تاريخو 1/1/السنة اللي بعدها
كده انتي قفلتي وخلصتي جدول الاستاذ وطبعا الجدول مرفق

[bent oo bas]

بعدين مصطلحات زاكريها عشان ممكن تجي صح وخطأ
تجي لاخر شي في الافتر
ميزانية المراجعة
هيا المرحلة اللي بعد الاستاذ تتفرغ فيها كل بيانات الاستاذ
في طريقتين
ميزان المراجعه بالمجاميع --> هادا معانا بس تعريفو
ميزان المراجعة بالارصدة --> وهادا معانا تعريف وعملي

وفي مثال كامل في الملزمة الفصل الثالث صـ6 - 7 - 8 -9
والمصطلحات انتي زاكريهااا

في صـ 9 في مثال مو محلو انا ابغاكم تحلو حاكتبو وحارفق الجدول بس اتمنى تحلي لوحدك
عشان ممكن يجيكي شي ماتعرفي وتتعلميه

انا حاسميه مثال 90 عشان لمن ارفق الحل حاكتب حل مثال 90
المثال 90 :: فيما يلي بعض العمليات التي تمت في منشأة الوفاء خلال شهر محمرم 1431هـ
- في 1/1 بدأت منشأة الوفاء برأس مال قدره 60,000 ريال ممثلا في الاتي
5,000 ريال اثاث ، 10,000 ريال سيارة ، 30,000 ريال صندوق ، 15,000 ريال بنك
- في 2/1 أشترت سيارة من محلات سعيد على الحساب بمبلغ 20,000 ريال
- في3/1 تم بيع جزء من الأثاث بمبلغ 3,000 ريال نقدا
- في 15/1 اشترت اراضي قيمتها 30,000 ريال نقدا
- في 21/1 باعت اراضي بمبلغ 10,000 ريال الى محلات وجد على الحساب
- في 24/1 سددت مبلغ 10,000 ريال لمحلات سعيد بشيك
- في 27/1 حصلت قيمة نصف الاراضي المباعة لمحلات وجد نقدا

[لندنية]

الله يجزاكي خير ومااره شكرا
بس دحين المذاكره من الكتاب او فيه ملزمه معينة
لان الكتاب شكلوا

[bent oo bas]

المشاركة الأصلية كتبت بواسطة لندنية الله يجزاكي خير ومااره شكرا بس دحين المذاكره من الكتاب او فيه ملزمه معينة لان الكتاب شكلوا

ياحلوة زاكر الملزمة اول شي وافهمي فيها كل شي
بعدين حلي اسالت الكتاب واذا في شي جديد في الاسئلة ازاكريه


هادي جداول فاضيه عشان اي احد يبغى يحل فيها

[bent oo bas]

السلام عليكم
الفصل الرابع
عمليات متنوعة

اولا شي حنتكلم عن راس المال ::
اول شي راس المال في حالة التاسيس دايما دائن
ممكن نقدم راس المال عن طريقين نقدا او اصول ثابته
اذا كان نقدا زي ما تشوف دايما عادي دائن وكده

لكن في حالة اصول ثابته تجمعي الاصول وهو هادا راس المال

- لكن احيانا يكون اصول والتزامات لازم تشوفي مزبووووط وتتاكدي لانو لو اصول والتزامات
حتجمعي الاصول وتطرحي الالتزامات
هادي في حالات التاسيس

لكن في شين غير التاسيس
- بس احيانا يحب صاحب المنشأة يزيد راس المال ((طبعا في حقوق الملكية اي شي يزيد دائن))
تكون نفس طريقة التاسيس عادي تزودي المبلغ في الصندوق او البنك او اي مكان

- والشي 2 تخيفض راس المال ((هنا نقص مدين )) الحاله الوحيده اللي يكون فيها راس المال مدين برضو بطريقتنا العادي تنقصي من الصندوق او البنك بس النقطة المهمه هنا انو مدين

2 – عمليات متعلقة بشراء وبيع الاصول الثابته
في شي في المحاسبة لمن يقولك تكلفة الاصل يعني ايش
يعني ثمن الشراء + ( اي مصروفات تتعلق بيه : تركيب فك رسوم جمرك نقل تامين )
يعني كل شي دفعتو عشان يكون الاصل الثابت جاااااهز للاستخدام (لانها اصول ثابته)

مثال ::
اشترت المنشاة الآت بمبلغ 180,000 ريال على الحساب من محلات السلام ، ودفعت نقدا مصاريف النقل والتامين مبلغ 10,000 ريال ، وتكاليف التركيب والتوصيلات الكهربائية اللازمة للتشغيل 10,000 ريال، وتكاليف عمل قاعدة خشبية وحواجز تمنع اهتزازات مبلغ 5000 ريال...
اول شي احسب تكاليف الآلات = 180,000 + 10,000 + 10,000 + 5000 =
205,000 ريال
205,000 من حـ/ اللآلات
الى مذكورين :
180,000 حـ/ دائنون ( محلات السلام)
25,000 حـ/ الصندوق
شراء الآلات 180,000 على الحساب والباقي نقدا

هادي حالت الشراء لكن ضرررررررررررورررررررري اول ماتشوفي تكلفة تعرف انو سعر الشراء + التكاليف كاااااااااااااااااااااااااااااملة

في حالة البيع :
بيع بتكلفة الشراء
مثال : باع جزء من الآلات بمبلغ 10,000 ريال نقدا
10,000 من حـ/ الصندوق
10,000 الى حـ/ اللآلات
المبلغ كاااامل مانقص ولا شي زي ما اشتراه زي ما باعو

البيع بسعر السوق :
مثال : باع جزء من الآلات تكلفتها 10,000 ريال بسعر 8000 ريال نقدا
اول شي تكلفه يعني الشراء وكل شي و ايش سار نقص 2000 ريال خساااااره
من مذكورين :
8000 حـ/ الصندوق
2000 حـ/ خسائر بيع اصول
10,000 الى حـ/ الآلات


3- عملية متعلقة بالمسحوبات ::
اول ماتشوفي كلمة سحب صاحب الشركة لحسابه الشخصي، الخاص على طول مسحوبات غير كده لا مو يقولك سحب من الصندوق تحسبيها مسحوبات لا لازم تكون لصاحب الشركة ولحسابو الخاص المسحوبات دائما مدين
اذا سحب صاحب المنشاة نقدا او بضاعة كلها مسحوبات ودايما نقول من حـ/ مسحوبات

4- عمليات متعلقة بالقروض :::
مثال اقترضت المنشأة مبلغ 50,000 من البنك الاهلي بفائدة 10% لمدة 5 سنوات أودع في الصندوق اول شي قال 5 سنوات طويل الاجل ( دائن) 2 شي لا تطلعي في الفائدة ماتخصنا
يسير الحل :
50,000 من حـ/ الصندوق
50,000 الى حـ/ القرض طويل الاجل
سددت المنشأة القرض في نهائة المدة نقدا
كده اتسدد الدين عشان تلغي من الحسابات تعكسي المدين دائن والدائن مدين
يسير الحل
50,000 من حـ/ القرض طويل الاجل
50,000 الى حـ/ الصندوق

5- عمليات متعلقه بالتأمينات:::
اول شي تامين يعني مصروفات والمصروفات دائما مدينة
في نوعين : تامينات مسترة ( ترجع ) زي تامين الفندق ، تأمينات غير مسترة زي تامينات الكوارث
لكن كلها نفس الحل مافي فرق بس تكتبي تامين ايش يعني من حـ/ تامين (....)
لكن تفرق في شي ثاني
التامينات المستردة:: تعتبر من الاصول ( لانها دين مستحق للمشروع ) ( ملك لصاحب المنشأة)
وتظهر في الميزانية مع الاصول..
التأمينات غير المستردة :: ضمن مصروفات وتظهر في قائمة الدخل

[bent oo bas]

هادي الاشياء مررررررررررررررررررررررررررررررررررررررررررررررررر رررررررررررررررررررررة مهم انك تحفظيها عشان تعرفي تحلي السؤال على طول ايش مدين وايش دائن

المدينة دائما ::
الاصول ( سيارات ، آلات ، عقار ، أراضي )
المصروفات
المسحوبات
بنك ( حساب جاري او حساب ايداع )
صندوق
بضاعة
أوراق قبض
أوراق مالية
مدينون
مشتريات
مردودات مبيعات
مسموحات مبيعات
خصم مسموح به
مرتبات
ايجار
فاتورة كهرباء
ديون معدومة
مصاريف نقل ( مشتريات ، مبيعات )
عمولة وكلاء ( الشراء ، البيع)
مصاريف ادارية
مصاريف دعاية واعلان
قسط اهلاك الاصول الثابتة
شهرة المحل/ براءة الاختراع

دائنة دايما ::
رأس المال
الالتزامات / خصوم
الارباح
ايراد أوراق المالية
ايراد عقار
مبيعات
مردودات مشتريات
مسموحات مشتريات
خصم مكتسب
أوراق دفع
دائنون
قرض ( طويل ، قصير الاجل )
مخصصات
مجمعات اهلاك
احتياطيات
بنك سحب على المكشوف

[براهيمو]

ربي يعطيك العافية