استفسار بخصوص امتحان مستوى الانقلش لطالبة قدمَت معاملة تحويل لانتظام أمس

[عبير منشي]

السلام عليكم.

امس السبت لما رحت الفيصلية اكمل التحويل والتخصيص في الانقليزي مارضيوا يحولوني بسبب تاريخ شهادتي وطلبوا اكتب معاملة وسألت لو تطوّل الين تطلع نتيجتها قالوا راجعي الاربعاء.

ما قبلوا يكتبوا اسمي مع البنات اللي داخلين انقلش. قالت لي الست الكبيرة اللي لابسة بني (اللي راحو عارفينها) اللي كانت جالسة جنب الاثنين اللي يسجلوا البنات فطاولة لوحدها.. قالت لما تحولي تعالي كملي اجراءاتك بس دحين الافضل تروحي تسددي رسوم انتسابك وتنزلي جدولك!!

حسبى الله ونعم الوكيل عليها. قفلتها فوجهي أو كإنها تهددني انه ماحيكون فيه قبول للبنات اللي شهاداتهم اقدم من خمسة سنين.

المهم يا بنات انا اخذت بكلامهم في العمادة وما طلعت على كلية الانقلش.

ممكن وحدة من اللي رايحين اليوم تسأل لي لو عادي اروح اسجل اسمي مع اللي حيختبروا يوم الثلاثاء احتياطاً عشان لو انقبلت اكون خلاص امتحنت ؟

أم أنهم سيقومون بعمل امتحان خاص للطالبات اللي ينتظروا نتيجة معاملاتهم الأربعاء أو ربما السبت القادم لو العمادة ماشدت حيلها؟!

انا من مكة و مواصلاتي جداً صعبة. ابغى وحدة الله يجزاها خير تسأل لي في قسم الانقلش عند المسئولة عن تسجيل اسماء الطالبات في امتحان المستوى .

قولولها فيه بنات قدموا معاملات تحويل لانتظام ورفضت العمادة تسجل اسماءهم في الانقليزي عادي يجوا يمتحنوا ولاّ تمتحنوهم بعدين لما تطلع نتيجة تحويلهم ؟

تعّبت الأخت رغد مشرفة جنة الحرف هنا و كلفتها تسأل لي كمان . لكن احتياطاً اللي تقدر منكم تسأل يا ليت يا بنات والله :(

ألف شكر ..