تجارب الطالبات (مواد+ أستاذات)

[smile]

الله يسلمك مرررة تسلمي على ردك على سؤالي خصوصا ني لسة دوبني سجلت في المنتدى :)
وكمان يهمني رايك في د. نهى الشرفا لأن د. مآثر انامجربتها وجزيتي خبرا

[زيـــنـــة]

شوفي يا ستي ، د.نهى صاحبتي أخدت معاها و تقول شرحها جدا رائع ، و أسئلتها غالبا خارج الكتاب ، بس الحمدلله جابت معاها درجة كويسة ، أنا شخصيا ما درستني فـ ما أعرفها بس أثق في كلام صاحبتي و ان شالله الترم الجاي حآخد معاها ،،،

أما د.مآثر نصيحة لا تدرسي معاها ولا شي ، ما تشرح ، هي طيبة و أخلاقها عالية ، لكن الحمدلله أخدت معاها F لأني أفهم و ما أعرف أحفظ ,,,
أصلا كان درس العمر عزيزتي ، أنا شخصيا ما أنصحك في د.مآثر ، لكن إذا حابة تجربي انت وحظك ،،،

أي سؤال أنا تحت أمرك ، نهارك سعيد :)

[an A student]

انا عندي سؤال لاختي زينه وباقي الاخوات اللي اخدو مع أ.سهام... هل الـa عندها ممكن يتاخذ؟ يعني على حسب ماسمعتو من درجات صحباتكم كمان .. لان فيه استاذات زي نهى الشرفا انا ما اخدت معها بس صحباتي و اثق في اجتهادهم نجحو بالستين والسبعين ومافي احد معهم بالشعبه كلها نجح بأكتر من كذا

[Dido]

^^^^^
مافي احد من الاستاذات صعب تاخدي عندها A الا د.مايسة صبيحي!!
سهام فطاني اخدت معاها مادتين كلهاa+ الحمد الله د. نهى اخدت عندها سينتاكس و A+ كمان. مافي شي مستحيل !! الله يوفقك!!

[همسات دافئة]

باااااااااااااك ...

وآسفة على تأخيري ...

انا بتكلم عن اللي درسووني .... معلييش راح اقرقر على راسكم بس اهم شي تستفيدوو ..



د. امل شعيب : هذي الانسانه زي ماقلتو ( ياريت فيه منها اثنين ) انسانه عسل و ذوووق واخلاق وتعامل راقي

تحب طالباتها بشكل كبيير وتساعدهم مره كثيير ابتسامتها ترد الروح وتخليكي تحبي الماده

وتشرح ع الداتا شوو شرح من قلب واذا مافهمتي اساليها ومن جد مافي احد درس معاهاا الا مدح فيها

يعني تحبب الطالبات فيها .. الله يسعدها ياااارب ... وطريقة اسئلتها في الدوريات الاسئله تجي شويه

دقيقه وخصوصا الفراغات تجيبها من وسط السطوور تموت في الفراغات ... وباقي الاختبار essay Q.

بس جزء الاسسي مايجي طويل يعني كله عددي وعرفي وتجيبلك دراسه من الدراسات او العلماء تكتبي عن اعمالهم

يعني مايتعدى 4 او 5 سطووور ... واحيان تجيب فقرات قليله اختياري سهله وواضحه مرره ..

والفاينل تجيبه سهل مررررررررره اسهل من الدوريات بمليوون مرره يعني تضمني درجات كثيره فيه ..

المهم ذاكري كل كلمة حتى اللي بين السطوور وركزي عدل معاها وتضمني الـ A وانتي مغمضه ..

وتراها تهتم بالتحضير مرررره . ولو اتأخرتي 5 دقايق تعتبرك تأخير .. و 3 تأخيرات = غياب

خذو معاها ابلايد و سوسيو



د.مآثر الراوي : برضو ذووق واخلاق وتعامل حلو مع الطالبات ماتعرف تعصب مرره وتراعيكي لو كان عندك اختبار

وتوافق على التأجيل بس بشرط كل الكلاس يتفقوا على يوم محدد واذا اختلف الكلاس ماتأجل وتخلي الاختبار في يومه

تشرح ع الداتا شوو كمان ( بس شرحها مو مرره ترى ) احفظي معاها تمشي ..اما شرح X

منهجها غير كل الاستاذات هوا فيه شي من الصعوبه والتعقيد .. بس مرتب وكله في notes منظمه احسن من د.نهى

وكل شي في النوتس معاه شرحه والمثال حقه .. يعني مررره مرتبه .. مراح تتوهي معاها ..

لكن حتى لو مافهمتي احفظي صم .. تجيبي درجات .. اسئلتها واضحه اغلبها عرفي .. وبرهني .. اوثبتي ..

وتطلب منك تكتبيلها امثله ...وتختبرك في تمارين نحويه يبغالها مخ نظيف وتركييييييييز ..

انا عن نفسي تعبت من التمارين النحويه حقتها اكتر من اختباراتها .. تمارين تشيب الراس صراحه ..

بس اختبار الفاينل جاه اسهل بكثييير من الدوريات والتمارين النحويه برضو جاتنا واضحه وسهله ..

و طبعا كل اللي في المحاضرات احفظيه والطعيه في الورقه حقة الاختبار تجيبي درجاات ..

وانتي مغمضه ... اذا كنتي من النوع اللي يفهم صعب تاخذي A لكن اذا كنتي من النوع اللي يحفظ تاخذي A بسهووله ..

خذوو معاها سنتاكس و سمنار



أ. منى البلوي :شخصيه ماشاء الله عليها وطييبه مرره .. انا مستغربه انها استاذه .. يعني من جد ماشاء الله

عليها كان مفروض يخلوها دكتوره .. شرحها ممتااااااااااااااز بمعنى الكلمه .. حتى لو كنتي سرحانه في الكلاس ..

غصبا عنك تنتبهي معاها من اسلوبها الراقي ..وشرحها المميز ... تشرح من قلب ..

والاشياء اللي تقولها في المحاضره والامثله اكتبيها معاها ..ضرروري ..

ولاتفوتي ولامحاضره لها .. راح تضيعي لو غبتي ... لانك مراح تفهمي .. ( مو دايما تحضر )

اسئلتها حلووة مافيها اسسي Q مرره ماتحبه ... في اللغويات اسئلتها اسهل واوضح ..

لكن في المورفولوجي تعبنا معاها شويه لانه الماده شويه غلسه ...


بس التعاريف تجيبها من وسط السطور .. يعني لاتتركي ولا كلمه في الكتاب + كلامها والامثله اللي تقولها في الكلاس

خذو معاها لغويات ومورفولوجي ..


الباقييين بتكللم عنهم بعديين ان شاء الله ... ومعلييش طولتها وهيا قصيره ..

بس حبيت اوفيكم بكل اللي اعرفه ...

ليا رجعه ... برب ..

[الأمل الجديد]

بسم الله الرحمن الرحيم ...........

انا راح ابدا واكون بعيدة شوي عن المجاملات والتحيز .......
اولا راح ابدأ بالدكتورة غادة واللي طبعا هي مش اساسية بالقسم
أنسانة قمة في الروعة , شرح راقي , معلومة توصل بسرعة , تفهم بشكل رائع , ترسخ المعلومة من أول مرة , انسانة طيوبة وحبوبة , تحاول تبسط المنهج بأسلوبها وخفة دمها ..طبعا هذي من بعد تجربه مادتين مقدمة في الادب و دراما بعد ما فشلت في مقدمة الادب مع الاستاذة ( سهام فطاني ) الله يسامحها .....

ثانيا الاستاذة ( سهام فطاني ) جربت مع هالانسانة 4 مررااات في مادة الاستماع كانت تقريبا احفظي كل حرف في الكتاب ويجيك نفسة , في البداية ما كنت فاهمتها وطبعا رسبت اول مرة , ولكن بعدها الحمد لله .
اخذت معاها ( مقدمة في الادب ) وياااريتني ما اخذت , بصراحة المحاظرة كلها سوااااااااااااليف , واخر 10 دقايق تجي تتكلم في المحاضرة , طبعا نصف البنات يروحون لمحاضراتهم الثانية ويسيبوها تتكلم ..
طبعا ما تشرح شي , واسالتها الفاينل كلها شرح وتطالبك ب eassay .. طيب على اي اساس وانتي ما شرحتي اللي طلبتي , وطبعا كل البنات بيتوجهوا للنت علشان يدورو على اللي يناسبهم ...
وطبعا ما تشوفي ورقتك ابدا ...

ثالثا ( استاذه هيفاء الروقي ) طبعا عطتني مادة أبلايد , هي انسان طيبة وجدية , ولكن هنالك مشكلة , طبعا ما تشرح ولا كلمة كلة عرض بروجكت وما تفهمي ولا كلمة من المحاظرة غير تروحي وتقريئ بنفسك وتفهمي حالك ( اجل استاذة على ايش ) , طبعا اسألتها تقريبا كلها مقالية , من عددي الى عرفي الى انسبي الى اشرحي ... بصراحة كل انواع الاسئلة اللي تخطر في بالك ( طبعا كلها مقالية ) ...

رابعا ( د. صباح صافي ) بصراحة هالانسانة كنت متخوفة منها جدا , اسئلتها تقريبا كلها موضوعية , باستثناء كم سؤال , اخذت معاها مادة الصرف , طبعا اسئلتها ليست مباشرة وانما تحتاج الى تفكيررر عميق والمام بالمنهج كامل فهم وليس حفظ , رائعة في تعاملها مع الطالبة , بصراحة انا نجحت معاها بدرجة سيئة ولكن كانت اخطائي بسيطة وعندما اراجع ورقتي اتفاجئ انني اخترت هذا الجواب وانا اعرف الاجابة الصحيحة , كلمة حق , كانت رائعة هذة الدكتورة في شرحها ومتميزة عن غيرها ممن درسوا هذة المادة ...

وللحديث بقية ............

[زيـــنـــة]

المشاركة الأصلية كتبت بواسطة an A student انا عندي سؤال لاختي زينه وباقي الاخوات اللي اخدو مع أ.سهام... هل الـa عندها ممكن يتاخذ؟ يعني على حسب ماسمعتو من درجات صحباتكم كمان .. لان فيه استاذات زي نهى الشرفا انا ما اخدت معها بس صحباتي و اثق في اجتهادهم نجحو بالستين والسبعين ومافي احد معهم بالشعبه كلها نجح بأكتر من كذا

شوفي حبيبتي ، أ.سهام ماقد أخدت معاها A لكن أعتقد انها تاخد بالدرجة اللي تاخديها في الاختبارين الدورية ، و من هناك تحكم ( على ما سمعت ) على مستواكي و على أساس كدا تاخدي الدرجة النهائية ,,,

بالنسبة لـ د.نهى ، أعرف وحدة أخدت معاها +B ماشاءالله ،،،

[وحي القلم]

اختي ستودينت

انا اعرف بنات معرفة شخصية جدا اخذوا مع سهام اي في الشعر واي مع نهى في السينتاكس

الحلو انهم اثنينهم ما يظلموكي وان كانت سهام تطلب في الفاينل اسيز كويسشنز بس ما تعجبها الاجابات اللي باينة انها حفظ تحب تشوف اسلوب الطالبة ويكون بسيط ومرتب ومدعم بالامثلة والنقد ودايما تقول be critical

[همسات دافئة]

بنااااات خوفتووني من أ.سهام فطاني ...

انا منزلة دحين شعر ونقد ادبي واحتمال كبيريكون معاها ..


ماعندكم فكره عن احد اخذ معاها دي المادتين ..

بلييييو اللي عنده فكره يقوووللي .. ما ابغى اتوررط في الصيف ...

[زيـــنـــة]

أنا أخدت معاها ، ما تخوف ولاشي ، الترم الماضي أخدت معاها مادة الشعر و كانت من أروع الفصول صراحة ، لا تخافي بس انت احضري بانتظام و شدي حيلك و اكتبي معاها الكلام اللي تقولو و ان شالله كل شي تمام ،،،