يوم الاخلاء كشفت لي حقيقة موظفات الأمن !!!

[NOIR]

السلام عليكم

هذي السنة الرابعة لي في الجامعة و كل يوم اسمع قوانين جامعية جديدة تنافي العقل
و المنطق
بس المشكلة مو في القوانين هذي ممكن نعديها و نستحملها 4 سنين
المشكلة في نفس الموظفات الي الجامعة موظفتهم عشان يحرسونا أو يعرفو يتصرفو
لمن تصير مشاكل بالجامعة ..
و من موقف الاخلاء الي صار بيوم الثلاثاء الي فات عرفنا انهم من جممممبها
بس ببدأ من القوانين و بعدين نحكيكم ايش صار بيوم الاخلاء ...

القانون الأول
اخراج البطاقة من حاملة البطاقة
اليوم و انا داخلة البوابة الغربية و بطلع بطاقتي عشان اوريها لموظفات الأمن ( الي سمعت انه جايبينهم من السجون )
و انا بطاقتي حاطتها في (card hold) الي هيا بالعربي الفصحى حاملة بطاقة
تعرفو ايش هو الكارد هولد ؟ صح ؟
هو اختراع عبارة عن بلاستيك تعلقيه حول رقبتك عشان عشان تحطي فيها هويتك !
طيب ...
المفاجأة في الموضوع انهم صارو يطلبو مني اخرج البطاقة من الكارت هولد !!!!!!!!!!!!!

القانون الثاني
ممنوع استخدام فيش الكهربا
هذا القانون لغز صعب و مو عارفين على اي اساس مانعينه
صحبتي جابت لابتوبها و بطارية لابتوبها خلص قامت راحت و شبكته في الكهربا
جات الأمن تقولها ...
ممنوع تستخدمي الكهربا !!
ههههههههه نكتة
و على قولة صحبتي طيب ليش حاطين فيش الكهربا على الجدار ؟ ايش فايدتها ؟ منظر ؟


القانون الثالث
ممنوع خروج الطالبة من الجامعة قبل الساعة 9
انا قعدت افسر القانون هذا قلت يمكن عشان يضيقو على البنات الي يخرجو مع اولاد و يخلوهم ملطوعين ساعة عشان توحشه و يوحشها
و بعد الساعة 9 تنفتح المطاعم و المحلات و يروحو يتمشو مع بعض ..


القانون الرابع
عند الدخول للجامعة و عند( الخروج ) منها ابراز البطاقة الجامعية
اوكي لمن ندخل الجامعة معاهم حق في هذا القانون .. بس لمن نخرج منها بالله من فين اكون جاية ؟! مو من الجامعة


و غيرها من القوانين التي لا تطابق العقل و لا المنطق !!


كذا يا جامعة الملك عبدالعزيز ؟

موظفين ناس اتحدى لو عندهم شهادة روضة و المسمى الوظيفي حقها (موظفة أمن) !
جايبينهم عشان يستقبلونا من عند البوابات و يطفشونا و يخلونا ندخل بوجيه كشرة

عشان يسحبو في جوالاتنا و لابتوباتنا و يصادروها ( أي تعني ياخذوها )
أنا لمن صادرو مني الايفون كنت مقفلة جوالي
و لمن جيت اليوم الثاني اخذه منهم لقيت الجوال مفتوح و البطارية


مخلصة


.. عرفتو ايش كانو يسوو ؟



أنا كنت ساااااكتة على حركاتهم و قوانينهم الهبلة الي كل يوم تطلع بشكل
الين ما جاء يوم الثلاثاء الي فات و صارت حكاية الاخلاء
لو سكتنا عليهم بيجي يوم يا احنا حنضيع او بناتنا في المستقبل الي حيدخلو الجامعة راح يضيعو
أنا ما كنت فيه وقتها بس صحباتي كانو في و حكوني ايش الي صار
بحكيكم و انتو استنتجو على اي أساس مسمينهم (موظفات أمن) ...!!

طبعاً تعرفو بعد حادثة السيل الي صارت في جدة و الناس كلما تشوف غيمة سودا يرتعبو و يخافو
و بيوم الثلوث جات غيمة سودا و على حسب كلام صحبتي تقولي وقتها كانت الساعة 12 الظهر بس الدنيا كأنها بالمغرب
فعملو اخلاء للجامعة و خرجو البنات من كلياتهم و حتى الناس الي كانت تمتحن خرجوهم و سحبو منهم الاوراق
و طبعاً اتوقعو انه راح يكون في ازدحام شدييييد عند البوابات
و كل بنات الجامعة انحشرو في منطقة وحدة و يستنو سياراتهم عشان تاخذهم و يرجعو بيوتهم سالمين

الي صار


كانت الساعة 12 و نص و موظفات الأمن الكرام قاعدين يقولو " يا بنات عجلو سواقينكم" ..
و لمن تأخر الوقت و صارت الساعة 1 و نص أو 2 تغيرت الجملة الى :
"اطلعو برة الجامعة احنا ما نبغى نتحمل مسؤوليتكم" !!!!!!!!!!!!!!!
و طلعو البنات برا الجامعة و جلسو يستنو السواقين
مو مشكلة نموت برة الجامعة بس جوة الجامعة حتكون مسؤولية عليهم

قال أمن قال
.. شكراً يا جامعة الملك عبدالعزيز على توظيف موظفات أمن ما يبغو يتحملو مسؤولية !!
فالحين بس في التطفيش و تطويل اللسان و يستفردو على البنات الضعاف و يخافو من البنات البوية و الشلق
بالله لو جاء السيل و البنات برا
و لا صارت حوادث بسبب الازدحام الشديد و ماتو ناس بسببها
بس الحمدلله ربي ستر

و ما رااااااااااااح اسكت عليهم و اخلي الموضوع يصير نسياً منسيا
لا احد يقولي لا تكبري الموضوع لأنه الموضوع اصلاً كبير !!!!
الكل ساكت و مو راضي يتكلم و المفروض انه نشتكي
لازم صوتنا يوصل للمسؤولين الي فوق و يشوفو حل معاهم

و بس اترك باقي التعليق لكم !!!