بخصوص الماستر للأجانب وشرط اللغة والدورة البديلة

[فتاة العصر]

السلام عليكم اخواتي

انا اليوم روحت الجامعة عند استاذة بسمة الموجودة في صالة القبول والتسجيل بعمادة الدراسات العليا
ومرة مرة كانت ذوق معايا وجدا انسانة محترمة وقولتلها استاذة بسمة والله احترنا في الدرجة للأجانب
قالتلي الدرجة زي ماهيا نازلة في النت 83 للأجانب بالستيب و5 بالنسبة لأيلتس و500 توفل هذا بالنسبة للماستر
قولتلها طب يقولوا هذا نسبة اللي جايين من برا او المبتعثين قالتلي لاء
وقالتلي لازم تحققي شرط اللغة قبل ماتقدمي لأن مافي للأجانب قبول مشروط ولادورة بديلة لازم تكوني محققة الدرجة قبل ماتقدمي
واذا قدمتي هتلاقي استمارة تقديم جديدة تقدري من خلالها تقدمي على البرنامجين العام والخاص مع بعض
لكن لو جبتي نسبة اقل من المطلوبة تصيري تسجلي ماستر خاص لأنو ساعتها هيتحسبلك نسبة وجود مش اكثر لكن طبعا ماهتاخدي 10 بالمية كاملة ...

وبالنسبة لإختبارات القدرات لكلية العلوم قالتلي العلوم مو مطلوب منهم قدرات في الماستر ،، مطلوب فقط منهم في الدكتوراه وكل واحدة تراجع قسمها افضل في علوم ...

اظن بعد كده مااعتقد فيه مجال للشك ،، ،انا عن نفسي بروح اسجل في اختبار الايلتس في المجلس الثقافي وبشد حيلي وعاد الله يعين
تحياتي

[عماد الحسن]

ماشاء الله تبارك الله عليكم .. درجات عالية وامتياز مع مرتبة الشرف ، ولغات فرنسية وغيرها، الله يحفظكم ويزيدكم من نعيمه، المفروض كل هذه الأمور تزيد فرص قبولكم في الماجستير وهذا فخر لجامعتنا بوجود هذه الكفاءات المميزة بها، عموماً أنصحكم بدخول اختبار القدرات في شهر 4 لأنه لا يمكن تقديم الماجستير بدونه إلا كلية العلوم واحتمال في المستقبل يطلبوها للتقديم.
وبالنسبة للتوفل أو الكفايات فأنتم قدمتوا اللي عليكم والتوفيق من الله، وللفائدة ممكن إعادة الاختبار في المرة القادمة لرفع الدرجة أتمنى الجامعة تتفاعل معاكم ويطلبوا درجة معقولة، علماً بأن الخطاب المكتوب تأجل تقديمه للأسبوع القادم بسبب ظروف الاختبارات هذا الأسبوع.. الله يكتب اللي فيه الخير لنا ولكم وللمسلمين.

أشكر أختكم http://www.skaau.com/vb/member.php?u=72526 لهذا التقرير المفصل ونأمل منكم المزيد في المستقبل.

[طموح حالمة]

فتاه العصر الله يوفقك وجزااااااك الله خير والله يريح بالك

متى اختبار الايلتس؟؟ وفين؟؟ وبكم؟؟ هل هو نفس فكرة الاستيب؟؟

[reham ahmad]

المشاركة الأصلية كتبت بواسطة طموح حالمة قسم الفيزياء وانتي؟؟؟

انا كنت حابة ما جستير تقنية انسجة بس قالولي ما ينفع لانو كلية طبية

فغيرت والان باذن الله ناوية عماجستير احياء بس خايفة كتير انو ما انقبل

بس ان شاء الله الي كاتبو ربك بصير

[reham ahmad]

يا رب تيجيبي العلامة المطلوبة يا اخت فتاة العصر

وان شاء الله راح يفيدك الانجليزي

ان متفائلة انك راح تنقبلي باذن الله

[فتاة العصر]

مرة مرة شكرا وفعلا حمستوني اني اتقدم
وشكرا للأخ عماد على تفاعله معنا وانا فعلا اختبترت القدرات وحصلت على نتيجة المتوسط ولله الحمد ...
وينطبق عليا المثل سبع صنايع والبخت ضايع

وللأخت طموح انا بختبر عن طريق المجلس البريطاني ولهم موقع على النت اكتبي في جوجل المجلس الثقافي البريطاني بيطلعلك الموقع بالعربي وروحي عند امتحانات الايلتس هطلعلك المواعيد والرسوم وكل شيء علشان بصراحة مااعرف اضع روابط هنا

وهو بيكون كذا مرة خلال ا لشهر الواحد والنتيجة بتطلع بعد 14 يوم ورسومه 850 ريال ،، وبتروحي نفس المركز بالرياض او جدة وتعبي استمارة وتيجي صورة من اقامتك وجواز سفرك وصورتين شخصية وتدفعي الفلوس كاش ويعطوكي وصل وتيجي يوم الاختبار
وهو غير الستيب شوية ويبغاله بصراحة مجهوود اكثر لكن اسمع ان الناس انبسطوا منه كثيييييييييير
هو فيه استماع وقراءاة وقواعد وكتابة ومحادثة

وللاخت ريهام مرة مرة شكرا على دعوتكي حمستني كثير الله يعطيكي العافية

تحياتي

[طموح حالمة]

الله يوفقكم اخواتي رهام واخت فتاه العصروييسرلنا يااااارب

فتاه العصر
اتريه الشغله فيها كتابة << ماني لهالدرجة في الانجلش
وكمان واحد يحادثني << هئ هئ ياااربي خفت و اتحطمت


طيب ممكن تجاوبوني

لمن يفتح التقديم شهر 3 مااقدم بدرجتي القديمة؟؟؟؟؟؟
لازم اختبر شهر 4 وعلى بال ماتطلع النتيجة مايكون قفل التسجيل ؟؟؟؟؟؟؟

والمصيبة لو ماجبت الدرجة<< فاولي خيررر ياشيخة
آآآآآآآه صرت مرابطة علنت شكلها عيوني بتروح فيها

الله يوفقنا ويكتبلنا الخير


تصدقو ماكنت اعرف هذي الشروط كلها على بالي عااااااادي زي البكالوريس بسهوله<<لا والاخت كانت حاطة في بالها قبول مشروط تهئ تهئ

[فتاة العصر]

دموعك غالية اخت طموح

والكتابة مو زي اللي في تصورك ،، انا نزلت موضوع متكامل بيشرح كيفية الاختبار ياريت تقرايه

وطالما اختربتي كفايات اللي كان في شهر 12 خلاص قدمي بيه بس انا فهمت انك ماجبتي الدرجة وعلى قولتلك اخاف تختبري اللي في شهر 4 ويتاخروا في النتائج ويورح عليكي

احس اضمنلك تشدي حيلك معايا وندخل الايلتس سوا بس اقراي الموضوع واعطيني رايك بعدها


تحياتي

[غدا نلتقي]

شكرا فتاة العصر الله يوفقك ويوفقنا معك ..
والله شكلي حتى أنا حادخل الايلتس..

أما لو أكتب لكم قصة حياتي مع التعليم....لكن ربنا يوفقنا لمافيه خير لنا أولاً وآخراً..

[ryhanah]

مشكووورين للمعلومات
ا
انا ما ني حابة احطم اوا اياس حدا
لكن صدقا صدقا اختبار الايلتس كتير صعب انا حاولت بس اخد الدورة قالولي لازم تقدمي اختبار مستوى
طلع مستواي رقم 3 وما ينفع تدخلي الدورة تخيلوووو ما رضيو يقبلوني بالدورة وانا دافعه فلوس فما بالكم كم حاجيب بالاختبار

لكن اختبار الانجليزي الاستيب كتييير اسهل منو وبصراحة هو تبع مستوانا الي درسناه هنا بالسعودية مو الايلتس مفروض تبع المبتعثين

على كل بنات انتو كمان سجلو باالستيب وان شاء الله يضل التسجيل مفتوح لشهر 4 عشان نقدم بس لازم حدا يتاكد من معلومة لايمتى راح يضل التسجيل مفتوح تبع الاجانب