تجمعنا هنا إن شاء الله بعد الإنتهاء من إختبار ستيب غدا....لنتبادل الآراء

[Anemon]

انا دخلت الاختبار للتجريب
ما ذاكرت شي بس حسيت الاختبار مو مره صعب
يعني في القطع في كلمات كانت مهي مفهومه
اللسيننج كان مو واضح الصوت ومررره سريع

[leenah2010]

الحمد لله اللي كتب لنا دخول الاختبار، وعقبال ما نفرح كلنا بالنجاح..

انطباعاتي عن الاختبار وطريقة الأسئلة:
أولا اختباري كان في قاعة الاحتفالات بأم القرى بمكة، وخلافا للمتوقع كان الوضع
منظم جدا ومريح، وما اشتكينا من زحمة أو عدم تنظيم الحمد لله..
(بس العيب كان في البرد الشديد بالقاعة )

بدأنا بعد ما صلينا المغرب في أماكننا مباشرة، تقريبا على 7:30..
التعليمات كانت واضحة ومدة الاختبار ساعتين ونص..

بعد سرد التعليمات، سمعونا نموذجين للسماعي عشان نتعود عالفكرة وحاطين عليها أسئلة محلولة،
والحمد لله الصوت كان واضح جدا.. بعدها بدأنا الاختبار..

كان مقسم لـ 6 أقسام، كل قسم له لون في ورقة الأسئلة وعمود في ورقة الإجابة وله وقت محدد من 24-27 دقيقة..
بعد الانتهاء من كل قسم لا يسمح بالعودة له مجددا، وقبل الانتقال منه بـ 5 دقائق
والبدء بالتالي ينبهونا عشان نستعد..

بدأنا بالسماعي، 25 دقيقة نحل فيها 35 سؤال على تسجيلات متنوعة، بعد سماع التسجيل
نسمع كل سؤال على حده ونجاوب عليه في ورقة الإجابة ثم السؤال اللي بعده وهكذا..
بالنسبة لي في أشياء كثيرة طارت مني في السماعي لأني تشتت بين السماع والإجابة
ولأن الأكسنت الأمريكي سريع جدا، لكن مواضيع الحوارات كانت سهلة..
هذا بالنسبة للقسم الأول..

بقية الأقسام الخمسة كان كل منها يجمع بين القرامر والريدنغ وتحليل الكتابة..
عدد الفقرات في كل قسم إما 20 أو 21..
قطع الريدينغ مستواها من متوسط إلى صعب شوي، والمواضيع شملت (حسب فهمي):

- أسطورة أميرة هنغارية وقصة الأرض الملحية في هنغاريا
- ابن سينا
- انقراض الحيوانات
- أعظم الاكتشافات (النار، العجلة، الكتابة) - fire, wheel, writing
- اختلاف البشر وطبائعهم حول العالم
- الفرق الدقيق بين تعريف (الاتصال، اللغة، الكلام) - communication, language, speech


وغيرها من القطع المتفاوتة في الطول..

القرامر ما كان شامل أبدا، ركز بس على مواضيع معينة لكنه سهل جدا، ومثله تحليل الكتابة..
والحمد لله كانت تجربة حلوة ومتعبة شوي لكنها تركت أثر طيب بنفسي..
وننتظر النتايج المفرحة للجميع إن شاء الله..


أغرب سؤال صادفني:
أعطونا 5 مسميات لمهن طبية (اختصاصات)، أسمائها غريبة الصراحة
أذكر منها الطبيب النفسي physiatrist، وطبيب عيون، والبقية الله أعلم..
المهم 4 فقرات جت على هذه النقطة!!
كل مسمى وش مهنته، طبعا هذي سويتها حقرا بقرا..
الصح عندي هو طبيب العيون، الله يخلي له عيونه..

[بنت جدة المنكوبة]

المشاركة الأصلية كتبت بواسطة د. كنوز حطيت form الاختيار كان form مو for لا أحد يشيل هم يعني أنا دخلت بدون استعداد جيد في البداية كنت متحمسة و درست شوي من يوم ما سجلت لكن بعد كذا انشغلت و عطل لاب توبي و دخلت الاختبار بدون استعداد والحمدلله يعتبر جيد يااارب يوفق الجميع

خطأ الجواب وأنا غلطت كمان
لأن هادا في درس ال المضارع التام
التصريف الثالث للفعل +have/has
وأحد دلائله for

[بنت جدة المنكوبة]

المشاركة الأصلية كتبت بواسطة leenah2010 بالعكس!! تخيلي لو كان الريدنغ ورا بعض!! <<كان أقلعت من مكاني بنت جدة.. سؤال الدكاترة الخمسة، اللي يقولك إذا بتفصلي نظارات تروحي لأي دكتور؟ وإذا ولدك عورته أسنانه تروحي لمين؟ وإذا تبغين نصيحة؟...... مني فاكرة إلا طبيب الأمراض النفسية physiatrist

أخخخخخخ
أظن من الأسئلة إلي جاوبتها شختك بختك
في سؤال كمان أفتكروا
إنو الكبار في السن يحبوا الأطعمة التقليدية وماعرف إيش ومكتوب في أخر الجملة now returning
احترت بين فقرتين
نسيت الأجوبة إيش هي بس في حاجة فيها في الجواب again
هادي الي اخترتها

في كمان سؤال في القواعد he is a shopkaper الحمد لله طلعت صحيحة


خلاص ربي الي كاتبلنا هو فيلو خير ........تخيلوا البنات إلي كانو في القاعة عرفوا إنو مسجلة في المنتدى ههههههههه ضحكوا لمن عرفوني


وجلسنا ندور على الأخت لينا

[أ.أم سارة]

الاختبار كان متوسط الصعوبة بس اذا قارناه بالاختبار الاول فالنسبة لي اصعب خصوصا بالريدنق..

الله يوفق الجميع

[قمر خالد]

السلام عليكم

اجل الحمد لله ان الاختبار حقي انلغى من عندهم

لاني ما احب اتحطم واجيب درجه اقل من المطلوبه .. لاني الحمد لله ما قيد دخلت بشي الا جبت منه اللي ابغاه

لكن من كلامكم عن الاختبار لو اختبرت كان ما جبت الدرجه المطلوبه

وانا اساسا سجلت بدوره اللغه

الحين بسألكم .. اقدر ارجع المبلغ من موقع قياس بما انهم هم اللي لغو الاختبار مو انا؟؟

[عنفوان الصبا]

لا يا قمورة ما يرجعون لك المبلغ لو تطيري
بس سمعت أنك ممكن تدخلي فيه أي اختبار ثاني <<<<< سمعت ماني متأكدة ؟

بالنسبة للاختبار
جاتني ضحكة في القاعة ما عرفت وين أصرفها ههههههههه

السماعي والقرامر كانوا حلوين نوعاً ما والصعوبة كانت في الريدنق

وبالرغم من صعوبة الاختبار أنا ما ندمت أني دخلت لأنه علمني اشياء كثيييييييرة

على العموم
يارب كلكم تنجحوا وتجيبوا درجات عالية

ودي للجميع

[itx005]

السلام عليكم رو رحمة الله،،،
الحمدلله على كل حال بالنسبة للاختبار كان زي ما هو متوقع ما في جديد و ما عندي أكثر من اللي قالوه الأخوان والأخوات.
بس عندي شوية كلام في نفسي لازم أقوله ، انا للأسف غلطت واخترت اني اختبر في مكة في جامعة أم القرى اللي انا لما اتخرجت من الثانوية شردت منها وسجلت في جدة من سمعتها طبعاً الوضع انا ما أقدر أقول غير إننا كنا إحنا الطلاب زي كأننا في سوق السمك بعد صلاة الجمعة ناس ماهي لاقيه أسمائها وناس مهو مسجلين ودخلوهم والمسؤلين ينفخوا ويطردوا و يقولوا دا شغلنا واحنا عارفينوا(عزت عليا نفسي) وأنواع المضاربات و الهمجية و ماهم عارفين انوا جميع الموجودين ماهم من الشارع وانهم أولاد ناس ، ولا عشان الاختبار الزامي خلاص تصير المعاملة دنيئة لأبعد درجة مدري ليش، يعني لو كنا جايين نختبر ببلاش مدري ايش كان راح يكون وضعنا دخلنا.
الاختبار الساعة 9 ومن 6 انا واللي معايا واقفين بالله يأية نفس وبأية طريقة أدخل الاختبار طيب انا يمكن ربنا وفقني ومشي حالي غير و غيري أيش سوى؟ خرجنا الساعة 12 انا ولله الحمد بيتي قريب بس في ناس جايين من قرى و ضاربين مشوار و عندهم أشغال تاني يوم كيف رايحين يسوو؟

المفروض يكون فيه استبيان عن كل مركز للطلاب يوضع بموقع قياس عشان المركز يعرف أداء اللجان وايش بتسوي....

(متى استعبدتم الناس وقد ولدتهم أمهاتهم أحرار)

[عنفوان الصبا]

المشاركة الأصلية كتبت بواسطة itx005 السلام عليكم رو رحمة الله،،، الحمدلله على كل حال بالنسبة للاختبار كان زي ما هو متوقع ما في جديد و ما عندي أكثر من اللي قالوه الأخوان والأخوات. بس عندي شوية كلام في نفسي لازم أقوله ، انا للأسف غلطت واخترت اني اختبر في مكة في جامعة أم القرى اللي انا لما اتخرجت من الثانوية شردت منها وسجلت في جدة من سمعتها طبعاً الوضع انا ما أقدر أقول غير إننا كنا إحنا الطلاب زي كأننا في سوق السمك بعد صلاة الجمعة ناس ماهي لاقيه أسمائها وناس مهو مسجلين ودخلوهم والمسؤلين ينفخوا ويطردوا و يقولوا دا شغلنا واحنا عارفينوا(عزت عليا نفسي) وأنواع المضاربات و الهمجية و ماهم عارفين انوا جميع الموجودين ماهم من الشارع وانهم أولاد ناس ، ولا عشان الاختبار الزامي خلاص تصير المعاملة دنيئة لأبعد درجة مدري ليش، يعني لو كنا جايين نختبر ببلاش مدري ايش كان راح يكون وضعنا دخلنا. الاختبار الساعة 9 ومن 6 انا واللي معايا واقفين بالله يأية نفس وبأية طريقة أدخل الاختبار طيب انا يمكن ربنا وفقني ومشي حالي غير و غيري أيش سوى؟ خرجنا الساعة 12 انا ولله الحمد بيتي قريب بس في ناس جايين من قرى و ضاربين مشوار و عندهم أشغال تاني يوم كيف رايحين يسوو؟ المفروض يكون فيه استبيان عن كل مركز للطلاب يوضع بموقع قياس عشان المركز يعرف أداء اللجان وايش بتسوي.... (متى استعبدتم الناس وقد ولدتهم أمهاتهم أحرار)

والله أني حاسة بموجة الغضب إللي داخلك
فعلا إلى متى وبعض المراكز قائمة على الهمجية ؟

هو بالنسبة لهم روتين فقط
وما يعرفوا أنه بالنسبة لنا مستقبل

يعني ضروري يكون في أفضل الأماكن وعلى مستوى عالي من التنظيم

بس لاتزعل نفسك ياخوي
وسع صدرك

إن شاء الله تكون نتيجتك حلوة وتنسيك كل إللي صار
وأملي أن الأوضاع تتغير في كل المراكز للافضل ,,



دمت هادئاً

[seasilence]

أنا اختبرته كانت تجربة حلوة
المفروض اجيب فوق 83 الله يوفقكم و يوفقني و نجيب كلنا الدرجات الي نتمناها
بس ال listening سويت تناحة فيه مع انه كان سهل
دخلت متأخر و ما كنت اعرف انه اذا خلصنا من القسم ما عاد نرجع له
جالسه احل بهدوء على ورقة الأسئلة و ما كنت احبر على ورقة الإجابة
على بالي اذا خلصت اقدر انقل الإجابات
و المراقبات الله يسامحهم ربشوني
جات وحده فهمتني انه ما اقدر ارجع
انا اتوترت و ما عاد سرت اسمع شي من الربشة
خبصت في الـ listening مع انه سهل
يا بنات على طول حبروا على ورقة الأسئلة لا تسووا زيي
و الله قهر بس الحمدلله على كل حال
بالنسبة للأسئلة الباقية الحمدلله ماهي صعبة جدا و لا سهلة جدا
وسط
ترى اختبرت في مكة
و بالتوفيق للي اختبارهم اليوم