مظلومة ومدري وش بيسوون معي

[مظلومة 2013]

بسم الله الرحمن الله

ببداية الموضوع ابي اقول لكل اللي بيقرا موضوعي اللي راح يكذبني ويظن فيني ظن سيء حسبي الله بينه وبينه

انا مظلمومه ومدري ربي كيف قدر لي دي المصيبه و لو مو محتاجه ارائكم ما كان كتبت الموضوع وشهرت بنفسي ظلم

لكن مالي غير اقول (حسبنا الله سيؤتينا الله من فضله انا الى الله راغبون )

قبل ما ابدا بالمشكله حابه اقولكم انا طالبه تعليم عن بعد مستوى اول واجي الجامعه عشان دورة مهارات الحاسب لي اسبوعين وادخل بالبطاقه حقي

مشكلتي كلها صارت بدقيقتين ويمكن اقل

زي كل يوم جيت مع السواق ووصلني لين البوابه (غربيه 2 ) وخرجت والسواق مشي اول ما خرجت تدكرت انو المحفظة حقي واللي فيها البطاقه سبتها بالسيارة رجعت اجري ورى السيارة حق السواق ابي الحقه وركبت سيارة تشبهها

وما انتبهت للرجال ولسى بسال السواق اقوله عم عبدالله وين المحفظة الا رجال الامن مسكوني ومسكوا الرجال ووين بطاقتك انا اناظر بالرجال مو سواقي وابي افهم حق الامن السالفه

اقوله احسبو السواق وابي المحفظة وربي البيت ما اعطانا فرصه للكلام يصرخ ويشتم بنص الشارع ووين رايحه الخروج بعد عشرة ومين دا الرجال

وستدعى الامن حق النساء وجات سحبت شنطتي ومسكت يدي كاني مجرمه وانا احاول افهمها وهي تقولي وين بطاقتك يا طالبه وسحبتني للداخل وفتشت الشنطة وفتشتني ومالقت شيء

وسوت لي ورقه للتوجيه التربوي وكتبت خلوة مع رجل اجنبي بسيارة خاصه وانا اقولها اي خلوة السالفه ثواني والباب حتى ما قفلته وهي تقولي تفاهمي مع الامن

وجاتني حق الامن ودخلتني مكتب حق الامن وحققوا معي

وانا ابكي واقولها ما اعرف الرجال ولا بيني وبينه شيء قامت تقولي تكلمي ولا راح اجيب المعلومات من طرف الرجال لانهم يحققون مع الشاب قلت لها اساليهم وبيقول نفس كلامي لا اعرفه ولا يعرفني

واتصلت وكان الصاعقه علي الولد طلع منتظر خويته ( حسبي الله عليهم) وقال اسمه ومعلوماته وقال لهم اسم البنت ورقمها

وحق الامن قالت شفتي الولد مارح يكذب يبي يسحب نفسو من المشكله وانتي وقعتي وانا انهرت اقولها ما اعرفو ودا مو اسمي ولا رقمي قالت لقيناكي داخل السيارة ولالا قلت لها دخلت قدام الامن وو بسرعه السالفه ثواني وما سمعت مني

ونقلتني لوحده اكبر منها اظنها مديرة الامن وقامت تهزيء فيني وتسبني وما عاد تستحون يا بنات الانتساب وهدا مو حل وانا احلف وابكي وا احد يسمع لي وقالت اعترفي احسن لك ولو طلع كلامكم مطابق لبعض بيكون عقوبتك قليله

وانا ما رضيت قلت لها مظلومة وما سمعو مني وسجلو المحضر بناء على اقوال الولد ونقلوني للتوجيه التربوي وانا بالطريق حق الامن قالت لي يا بنتي محد بيصدقك قولي انو كنتي تعرفي الولد واول مرة تطلعي معو كان بس يبي يشوف

لانو لو جلستي على حالك راح يستدعون الشرطة والهيئه ويفتحون تحقيق والسالفه بتكبر وانا مع الخوف اقتنعت بكلامها

ودخلوني عن الطاغيه ( سميرة قطان ) وربي نظارتها تكفي وكلمتني بكل برود ايش صار قلت لها مظلومة قامت تصارخ وتقولي بسالك مرة وحده وادا قلتي ما صار بتصل بالشرطة قلت لها الولد اعرفه وكان يبي يشوف وجهي عشان يتقدم

وما كنت ناويه اطلع مكان قامت تهزئ فيني وما خلت كلمه ما قالتها واخذت معلوماتي ومن المحضر اخذت معلومات الرجال وقالت لي وقعي وقعت وحطوني برا انتظار

وقتها جاتني السكرتيرة وربي كانت في قمه الاخلاق والحنان قالت يا بنتي الولد نقلوه الشرطه وهو يبي يتحمل كل السالفه وقال انو مالك دخل وانه ضحك عليكي وهو المسؤل وترجى الامن ما يسوون لك شيء

وقالت لي دورة الحاسب انتي محرومه منها ولا عاد تحضري الجامعه الا للاختبار ( انا حسبت الموضوع انتهى هنا وفرحت وقلت لها بس؟ قالت لا قضيتك راح نعرضها على الوكيله وراح تقابليها وراح نسحب بطاقتك ونعطييكي بطاقه زرقا

وما رح نرد بطاقتك لين تنحل مشكلتك قلت لها وكيف بتنحل قالت موضوعك مو هين لازم تحضرين لما تجيبي البطاقه ونتفاهم

وخرجت من الجامعه وانا مو عارفه وش اسوي ولمين اشكي . اهلي مساكين وحاولو ياخذون رقم الوالد ما رضيت واعطيتهم جوال اختي وجوالي

يا اخواني واخواتي والله اني مالي ذنب ومدري وش بيصير بي انا احب الدراسه وعمري ما ظنيت انو بيصير معي كدا دلوني ربي ييسر اموركم وادعولي بالستر انو تنحل سالفتي

اللي قهرني انو محد صدقني الكل اخدني على اني مجرمه واخلاقي سيئه وربي تمنيت تنشق الارض وتبلعني تمنيت اموت

اسفه لانو موضوعي طويل سامحوني وياليت تفيدوني بحالتي وش يصير خصوصا انتي تعليم عن بعد

شكرا