تقويم الأسنان || orthodontic

[hadeel a]

شكرا يا عسل على الموضوع الحلو معلوماتو حلوه و خفيفه و أحلى شي الفيديو
يعطيكي العافيه

[Dr~NanoOok]

المشاركة الأصلية كتبت بواسطة THE HILL دكتر نانوگ ابدآع زي عآدتگ مآ شآء الله عليگ ^^ ممم انا الحين ف فترة تركيب التقويم " حطت مطاطات زرقآء تعوووور >< " كنت ببطل ساعتها هع المهم جلست ابحث ف النت ع التقويم فلقيت بعض الناس يشتكو من نزول اللثه •• يعني تصير بااينه ¥¥ قالولهم الدكاترة انهم يحتاجو رفع لثه •• كيف يرفعوهاo_0 وانا بصرراااحه خايفه تصيرلي المشااكل دي ؛( ايوا صح يقولو كمان انو لما يطلع لگ ضرس العقل حيحوس كل اسنانك وفكك واللي كانت مركبه تقويم وتعدلت اسنانها ممكن تتخربط بسبب العقل المعفن هذا >< و ترجع تركب من جديد ايوا سؤال اخير انا احس اللي يركبو تقويم بعد ما يفكوه حتتخلل اسنانهم ومع السنين تطيح ^_^ ممكن يصير والا لا ..... يؤ اسئلتي طويله •(

اهليـــــــن بيكِ ^_^
وأسئلي زي ما تحبي ولا يهمك

المطاطات الزرقا هذه أول خطوة قبل وضع التقويم عشان تعمل مسافة بين الأسنان وتسهل دخول "ring" في الأضراس الخلفية عشان يمسك التقويم كله
معليش هي توضع بالبداية لكن بعد يومين يخف

بالنسبة لارتفاع اللثة .. سببها ممكن يكون أن حجم السنّة نفسها صغير ولما يحطوا المربع حق التقويم علي نفس السنة تجي على اللثة فتخليها تتراجع وتبعد عن الجسم الغريب اللي هو مربع التقويم

وغالبا الفم فيواجه التقويم على اساس انه جسم غريب.. فيبدأ يعمل حساسية بسيطة بالبداية
لكن الدكتور ممكن يوقلك على حاجات تحطيها وتعمليها تخفف من دا كله

وهي مشكلة مو شائعة كثير فلا تخافي وإن شاء الله ما تحصل معاكِ
والعلاج حقها .. فأنا لسه ما درسته.. باذن الله حناخده بسنة خامسة
فما اقدر أفيدك فيه للاسف "^^

~

بالنسبة لضرس العقل وتحويسة للأسنان فهذا صحيح
لأنه حيدخل و يدفع الأسنان لقدام عشان ياخد مكانه
لكن لو استمريتِ وحطيتي الريتينر بعدها بفترة حيقلل من أثر السن الجديد
أو انهم يخلعوه ويريحونا منه :p

~

أما خلخلة الأسنان وانها تطيح !!
لا ما تحصل.. لأن تحريك الأسنان مع التقويم يكون مررره بطيئ وما بؤثر قد كده راتباط الأسنان بالفك
لكن لو حصلت مشكلة كبيرة زي حادث أو الدكتور شد عليها مرررررره بقوة لفترة طويله
حيعمل مشاكل بالأربطة حولين الأسنان وتعمل مشاكل فيها


وإن شاء الله تركبي التقويم بالعافية ^^

المشاركة الأصلية كتبت بواسطة hadeel a شكرا يا عسل على الموضوع الحلو معلوماتو حلوه و خفيفه و أحلى شي الفيديو يعطيكي العافيه

العفو عزيزتي ^_^
الحمدلله انه عجبك واستفتدتي منه

[فوبو]

السلام عليكم ورحمة الله وبركاته

عندي استفسار هل لما احد يركب تقويم يخلعو الضرس عشان يثبت التقويم

لان انا ابغى اسوى لكن هذا الشيء مخوفني لان اسناااني غاالية عليا
وجزاك الله كل خير يادكتورة

[مَـزٍآج ..}..]

المشاركة الأصلية كتبت بواسطة فوبو السلام عليكم ورحمة الله وبركاته عندي استفسار هل لما احد يركب تقويم يخلعو الضرس عشان يثبت التقويم لان انا ابغى اسوى لكن هذا الشيء مخوفني لان اسناااني غاالية عليا وجزاك الله كل خير يادكتورة

الخلع مو عشان يثبت التقويم . . مالها علاقه ببعض

الخلع عشان تصير هناك مسآحه في الفكـ و بالتالي الاسنان تتحركـ . .

ومو شرط يكون هناك خلع في التقويم . . على حسب الحاله . . اذا فيه تزاحم في الاسنان

ومافي مساحه راح يخلع . . عمومآ الفراغ حق الخلع راح يتقفل وما تحسي انو انخلع شئ

انا في التقويم حقي خالع اربعه مو واحد

[فوبو]

المشاركة الأصلية كتبت بواسطة مَـزٍآج ..}.. ومو شرط يكون هناك خلع في التقويم . . على حسب الحاله . . اذا فيه تزاحم في الاسنان ومافي مساحه راح يخلع . .

شكرا على الافادة
طيب دكتور اسناني مافي ابدا فراغ المشكلة عندي انه في السن الامامي السفلي <<القواطع

داخل الى جوا وهذا بسبب اني في الاختباارات ما اعرف افكر الا لما احط شيء في فمي

والقلم سببلي هذا انه دخل على جوا مع الرغم اني اسناني كانت طبيعية

وجزاك الله خير

[مَـزٍآج ..}..]

المشاركة الأصلية كتبت بواسطة فوبو شكرا على الافادة طيب دكتور اسناني مافي ابدا فراغ المشكلة عندي انه في السن الامامي السفلي <<القواطع داخل الى جوا وهذا بسبب اني في الاختباارات ما اعرف افكر الا لما احط شيء في فمي والقلم سببلي هذا انه دخل على جوا مع الرغم اني اسناني كانت طبيعية وجزاك الله خير

طيب راجعي اخصائي تقويم . . من كلامك انو المشكله بس في السنتين دي

اتوقع ما تاخد منكـ سته الى تسعه شهور . . واحتمال بدون خلع . .

عادي تقدري توضحي للدكتور انـه ما تبغي خلع . . واذا قدر يلبي طلبك راح يسويه

[لمسه دفى]

طيب ابغى اسالكم ممكن يكون التقويم مو لرص الاسنان يعني للتفريق الاسنان ؟؟

لاني عندي سن مقلوع ومااهتميت فيه وضااق مكانه اقدر اسوي تقويم اوسع مكانه واضيف سن؟

[Dr~NanoOok]

المشاركة الأصلية كتبت بواسطة لمسه دفى طيب ابغى اسالكم ممكن يكون التقويم مو لرص الاسنان يعني للتفريق الاسنان ؟؟ لاني عندي سن مقلوع ومااهتميت فيه وضااق مكانه اقدر اسوي تقويم اوسع مكانه واضيف سن؟

ينفع للتفريق بين الأسنان

واعتقد ما تحتاجي تعملي تقويم كامل اذا كانت المسافة اللي اتقفلت بسيطة
ممكن يحطوا زي هذا الجهاز عشان يوسع مابين الأسنان

هو أصلا عبارة عن جهاز يحافظ على المسافة بين الأسنان عند الأطفال اذا طاحت أسنانهم بدري قبل وقتها

هذا شكلة



أو كامل الى الأسنان الأمامية عشان ياخد دعامة وقوة أكبر في الدفع





وهذه طريقة عمله




الأفضل تسألي الدكتور عن حالتك.. ويشخصها لك لما يشوفها

[محمد عماد]

مشكورة د. نانوك على الموضوع

لكن للأسف في الفترة الاخير اصبح تقويم الأسنان شيء جمالي اكثر من انه علاج ... وصار كأنه موضة خصوصا انو سعره اصبح رخيص ومتوفر في كل مكان
-------------------------------------------------
عندي أسئلة بسيطة ..
اذا شخص ركب تقويم اسنان وقبل فترة انتهاء العلاج خلع التقويم ... هل ترجع اسنانه زي ماكانت ملخبطة ولا تبقى على حالها ؟؟

وهل أسنان الإنسان مثل العظام .. اذا انكسرت ممكن تلتأم بعد فترة ؟؟

وليش بعض الدكاترة يرفض يسوي حشوة دائمة في السن المسوس اذا كان التسويس قريب من العصب ؟؟

وشكرا جزيلا مرة اخرى

موفقة يا دكتورة

[Dr~NanoOok]

المشاركة الأصلية كتبت بواسطة ريال سعودي مشكورة د. نانوك على الموضوع لكن للأسف في الفترة الاخير اصبح تقويم الأسنان شيء جمالي اكثر من انه علاج ... وصار كأنه موضة خصوصا انو سعره اصبح رخيص ومتوفر في كل مكان -------------------------------------------------

العفو أخي

صحيح.. من فترة صار الموضوع موضة ! وأكثر من شخص شفته يصّر على الدكتور انه يعمله التقويم مع ان حالته بسيطة جدا
وكثير بنات شفتهم يعملوا التقويم بغرض النحف وانهم ما ياكلوا كثير !

لكن للاسف ما يعرفوا أنهم اذا عملوه عند شخص غير فاهم في المجال
ممكن يضره بشكل ما يقدر يرحع لحالته الطبيعية .. وبدل ما تصير عملية تجميلية
حتصير عملية تشويهية ! بمشاكل أكبر

عندي أسئلة بسيطة .. اذا شخص ركب تقويم اسنان وقبل فترة انتهاء العلاج خلع التقويم ... هل ترجع اسنانه زي ماكانت ملخبطة ولا تبقى على حالها ؟؟

سواءً فك التقويم قبل انهاء فترة العلاج.. أو حتى بعد ما انتهى منها
وما التزم بلبس التقويم المتحرك "retainer" حترجع الأسنان تتحرك وممكن ترجع لحالتها السابقة وممكن أسوأ كمان !

مثلا
لما نكون ماسكين جسم بواسطة حبل مشدود لفترة طويلة.. وبعدين نترك الحبل ايش حيصير ؟
حيندفع الجسم بشكل أكبر وأسرع

نفس الشي للأسنان .. لبس التقويم المتحرك بعد انهاء فترة العلاج جدااا مهمة
وكثيرين بيهملوها وترجع تتلخط الأسنان من جديد للاسف

وهل أسنان الإنسان مثل العظام .. اذا انكسرت ممكن تلتأم بعد فترة ؟؟

الأسنان مكونه من مادتين أساسيتين .. الطبقة الخارجية وهي الطبقة الصلبة القوية "مينا الأسنان"
لو فقدناها ما تقدر تجدد نفسها من جديد .. عشان كده اللي ينحتوا أسنانهم سواءً بشكل متعمد أو لا
بيخسروا طبقوا المينا للابد
وما يقدروا يعالجوها إلا باضافة طبقة صناعية اللي هي "الفينيير"

أما الطبقة الثانية اللي تكون تحت المينا "dentine" << ما اعرف ترجمتها بالعربي "^^

لها ثلاث أنواع
primary , secendary , tertiary

الأولى والثانية تكون طبيعية "ظاهرة فسيولوجية" تتكون مع الحياة اليومية
لكن أول لما يصير اصابة أو خلل بالسن يتكون النوع الثالث

طبعا كل نوع له خواصه.. وأقلها حيوية هو النوع الثالث لكنه صلب بشكل أكبر عشان يتحمل الصدمة والاصابه للسن

وليش بعض الدكاترة يرفض يسوي حشوة دائمة في السن المسوس اذا كان التسويس قريب من العصب ؟؟

لما يكون التسوس عميق وواصل للعصب تقريبا
حتكون الأسنان حساسة ..

فلازم نعطلها علاج موضعي فوق المنطقة العصب على طول.. عشان السنة تكوّن tertairy dentin اللي ذكرتها قبل شوية

وبكده يحمي العصب بشكل أكبر ..

وغالبا بنحتاج نغيّر المادة هذه اللي حطيناها.. أو اننا نزيلها تماما
واذا حطينا حشوة دائمة ما نقدر نشيلها بسهولة

غير ان الحشوة الدائمة بشبب خواصها الفزيزائية وتمددها وأشياء أخرى
ممكن تؤذي السنة.. وفي الحالة هذه تكون حساسة جدا وما تستحمل
فنعطيها فترة عشان ترتاح "فترة نقاهة" بعدين نرجع نحشيها حشوة دائمة