تجمع طلاب وطالبات خطه (أ) تحضيري اداري وانساني (دفعه 11 )

[om nomay]

والله جلست اتصفح الكتاب ماني فاهمه كيف بتكون الاسئله

[هلالي و بس]

المشاركة الأصلية كتبت بواسطة والله حالة ! يابناااات رحـــت الجااامعة اليوم .. بأكتـــب لكم كللل شي صار معي من البداية للنهاية .. أوول شي دخلت بتصريح زيارة .. رحت عند المكتب الي عند الباب حق الدخول و قلت لهم بطاقتي تأخرت و جاية اليوم أشوفها قالت بسوي لك تصريح زيارة عشان تشوفينها الحين .. بس التصريح لمدة يوووم واحد بس تسألين عن بطاقتك اليوم و تشوفين وش الأخبار و ترجعين التصريح لنا قلت أوكي وأخذت مني ورقة الإفادة إن أنا منتسبة في الجامعة و رقم الهوية و أعطتني ورقة تصريح ودخلت للجامعة السعيدة .. و كان دخوووول كئيييب بصراحة ×__× حسسسسسست بالجامعة ليين كنت بأبكي لوحدي وأقول أبغى أمي حاسة كل شي جديييد وغير وغريييب .. وأنا لوووحدي وما أعرف شي لأن أختي خلتني من عند البوابة حق الدخول عشان محاضرتها بدأت وأنا تووي أول يوم جامعة وما أعرف شي وماني متعودة أروح أي مكان لوحدي كذا .. طوول عمري أحد معي لاازم موقف جدييد و كان عندي أول محاضرة في مبنى 32 رياضيات .. و أدووور وين مبنى 32 عشان محاضرة الرياضيات و مااالقيته .. و البنات الله يهديهم كل ما سألت وحدة ترميني لمكان من راسها أمشي طوالي و لفي يمين .. والثانية تقول : لالا أمشي يسار و لفي يمين في يمين و اللي تقول روحي للبنك و اللي تقول روحي للعمادة وأمشي في الحرر و الشمس و التعب و يطلع غلط × غلط ويالله ألقى بنت ثانية أسألها وتجيب لي مكان غلط و أضرب مشوااار و ألقاه غلط حااسووني ×_× ومسووين قلك إني نكتة !! كل ما سألت بنات يطالعون لبعض و يقولون " يوووه باين عليها مستجدة " وأنا أوقف أنتظرهم يخلصون سوالفهم عن المستجدات و الصغار ووو إلخ ليين يتكرمون علي بشرح ( غلط ) للمكان .. ليته صحيح كمان المهم لفييييت في الشمس ليين قلت آمين .. و السيارات الصغيرة ذيك زحححمة .. ماني عارفة أسوي زي البنات ألحقها وأجريي و ألحق مكان و كذا أوقف مستحية بس على جنب بعييد أنتظر وحدة تتكرم علي بمكان أو ألقى مكان فاضي من لحاله .. و طبعا ما أحد أعطاني وجه :s أوقف أنتظر وكل البنات يركبون و أنا مستحية أروح معاهم وقفت في الشمس ليين دخت من الحر .. قلت أجل أكمل مشي على رجولي أحسن ومشيييت قعدت ساعة ونص يمكن أدور وأنرمي من مكان لمكاان وأروح و أجي و أقطع شواااارع و ألف لفلفة ليين خلصت المحاضرة ومالحقتها .. لأن وقتها كله ضااع في التدوير عن المبنى بس ..!!! و بعدها كاان فيه محاضرة حاسب .. كمان محاضرة الحاسب راحت علي ..لأني ما أعرف وين مكان مبناها وقلت حرااام أروح ألف كمان في الشمس ويقعدون يرموني من مكاان لمكان والشوارع طويلة و الحر و التعب قمت إضطريت أنتظر أختي تخلص من محاضراتها وتاخذ بريك و تجي تعلمني وين المباني لأنها حافظة الجامعة ما شاء الله طبعا رحت ضربت مشوااار لأختي .. هي في مبنى العلوم .. رحت لها مبنى العلوم بعد حوسة لا تقل عن صحبتها الأولى .. وأخذتني أختي وصارت تمشي معي مبنى مبنى تعلمني أماكن محاضراتي وتعلمني مواقع المباني و أسمائها .. المهم ليين علمتني مبنى مبنى كانت محاضرة الحاسب طارت لأننا ساعة ونص كمان نلف عشان تعلمني المباني .. وكله برضو على رجوولنا .. لأنها تبغى تعلمني المكان بالمشي مو بالسيارات عشان لو أضطريت أمشي و ما قدرت أركب سيارة .. عشان كذا نمشي على رجولنا من مكان لمكااان في الحر و التعب ليين خلصنا كل المباني المهمة و كذا .. هلكنااا المهم علمتني الله يجزاها خير و قالت لي خلاص خلص البريك بأتركك و أروح إذا إنتي الحين تدرين وين مكان محاضراتك قلت بالتوفييق وكان عندي بعدها عربي .. الحمدلله عرفت المكان من أختي ورحت .. برضو طبعا مشي كله على رجولي .. بس كان المشي أهون .. لأني مشيت مشوار واحد بس و إن كان طوييل .. بس أهون من الضياع و اللفلفة .. رحت لها لحقتها بس الدكتورة ما جات و الإنجليزي كان بنفس المبنى ما إضطريت أمشي يعني .. حضرتهاااا ولله الحمد .. والله الحضووور شييييييييييييي :p تستفيدووون والله كثييييييييييييييييييييييييير .. إستفدت بدرجة كبيييرة وتعرفت من أول يوم لي على بنتين .. ربي يسعدهم يااارب حبوبين ما علييكم من كل ذا .. المهم في الموضوع بعد محاضرة الإنجليزي وهي كانت آخر محاضرة شدييت الرحال إلى عمادة القبول و التسجل :p وطبعا ساعة ألف و أدور في الشمس و أقول ويين العمادة تكفووون ياخلق الله وكلهم يرموني من مكان لمكان ×_× كان بيجيني ضربة شمس و الساعة كانت 1 يعني الشمس حااارقة و كالعادة السيارات ماني قادرة و البنات يرموني من مكان لمكان و الشوارع كبيييييرة و الشمس حااارة وألف أدور وين المبنى ولفيييتوبعد طلوع الرووح رحت عمادة القبول و التسجيل و قلت لها تراني منتسبة و بطاقتي متأخرة قالت أستنيها بعد 5 أيام من الـ dhl .. قلت لها تراني من أسبوعين أستنى وما جات !! قالت أجل تعالي نعطيك هي من عندنا .. بس لاازم لما تبدأ الدورة التأهيلية حقتكم يالإنتساب قلت لها ما ينفع آخذها قبل الدورة التأهيلية عشان أحضر مع الإنتظام ؟ قالت لالا ممنوووع بنات الإنتساب يداومون مع الإنتظام << خراااااشة والله العظييم و تعاملها سيييييييييء لأقصى درجة ومكششرة و تطالع بإحتقار و تخلي الوحدة توقف مستحية .. كنت بأبكي من الخجل و أنا واقفة مو عارفة وش أقول لأني خايفة منها وهي مكشرة وتطالع كذا بس أتوقع تعاملها سيء كذا عشان تعامل البنات السيء معاها .. لأني لما قلت لها " جزاك الله خير ماتقصرين " أنصدمت كذا كأنها مستغربة :s المهم بس باين عليها مغرورة و مكشرة و كمان تخرش علي و تقول إنه ممنوع !!! وأساسا بعد ما خرجت من عندها فكرت وقلت إذا نحن سنترا و ما بنداوم أجل متى آخذ بطاقتي؟؟ بس مرررة ما كان فيي أرجع أسألها لأن الشمس صعبة و السيارات قلييل يعني كله على رجولي أقطع شوارع وخلصت من العمادة خلاص بأروح البوابة عشان أروح البيت .. و ثاااني مرة حوووسة كبييرة و لفلفة بالشمس ليين كنت بأدوخ ×_× لأني ما أدري وين البوابة ؟؟ وأسأل البنات " وين البوابة الغربية 1 " وكل وحدة تتفلسف غلط .. من هنا لا من هناك .. وطبعا أنا أمشي كل مشوار يقولونه و ألقاه طلع غلط و أسألأ من جديد و أمشي و يطلع وغلط .. وهكذا ×_× من الهلاااك اللي أنا فيه .. قلت خلاص قررت أركب سيارة .. حتى لو زحمة برضوو بأروح أركب .. خلاص بسوي نفسي مو مستحية و أتشجع .. لقيت سيارة واقفة وعلى حظي فااضية قلت لها وصليني للغربية 1 ؟ قالت لالا مو في طريقي حزنت على نفسي و تفشلت من طريقة ردها قوية و في الوجه كذا .. قلت والله ما أكلم أحد من حقون السيارات مرة ثانية كل المسؤولات كذا يتكلمون بعنف و يفشلون الواحد المهم قررت و كملت مشييي طويييييل لفيت الجامعة عشان ألقى الغربية 1 وصلت أمااكن غريبة حتى خفت منها ×_× أماكن مدري كيف شكلها و شكل البنات أصلا يجيب الربكة و كذا وخفت أسألهم .. قلت أكمل حوستي أحسن وكملت أللف طبعا .. ورجولي منتهية ما تتحرك خلاص :s ويوم لقيتها وشفتها من بعيييد كنت بأبكي من الفرح .. من جد كنت بأبكي .. قلت هيييه أخييرا بأطلع من الجامعة أخيييرا بأطلع من العذااب ها أخييييييرا يااارب بأطلع من المتاهة هذي بأرووح بيتي اللي أنا حافظة كل مكان فيه ما أضيع وسط الغرف <_< وصرت أقول يارب أقدر أوصل لها و ما أموت من الفرح قبل أوصل :p بس وصلت و أنا بالقووووة أمشي كنت أمسك في جدران الممر و أتكي عليها شوي عشان أقدر أكمل مشي بدون دووخة بس و تعب و إستفرااغ و ضربة شمس و رجوولي من كثر اللف خلااص إنعدمت عندي فيها الحين فوق الـ 3 جروح ومسوية لهم دهان عشان يخفوون :s من الساعة 8 من وقت ما دخلت الجامعة لييين الخروج و أنا ألففف بس !!!!! ؟؟؟؟؟ .. ما إرتحت غير ساعة و نص في محاضرة الإنجليزي بسسس و الباقي كللللله لف × لف !!!! يعني أررربــــعة ساعات و نص لففففف .. و في الشمس كمان !!! من جد عذاب وما أفطرت شي لأني لقيت الكافتيريا زحمة وكماان أستحيت أدخل وسط الزحمة كذا و البنات مسويين إزعاج وقلت خلاص مو لازم أفطر .. وكملت كل يومي جوعاانة و ألف تحت الشمس ×_× المهمم وصلت هناك شافتني المراقبة على الباب وأنا مكششرة جدا أبغى أبكي و قالت خلاص سلمي ورقة التصريح عشان وقتها إنتهى << عشان لا أدخل فيها يوم ثاني بالدس و هي مسموح فيها يوم واحد بس سلمتها الورقة .. قالت لي أستني .. وفتحتها شاافت ما بها توقيع قالت أنتي رحتي العمادة ؟ قلت إيوة قالت ليه ما خليتي المسؤولة اللي كلمتيها توقع لك ؟ قلت نسييييت قالت أرجعي للعمادة ما أقدر أطلعك بدون توقيع المسؤولة اللي كلمتيها كنت بأنجن ×_× لا شعوريااا قلت تكفيييييين لا ودموعي خلاص بتنزل ×_× قالت معليش ما اقدر أطلعك .. قلت تكفييين والله تعبانة و ماني قادرة للشمس قالت معليييش الله يسعدك ألحقيهم قبل يقفلون و خذي التوقيع وأترجى فيها و أحاول وأقول رجولي شووووفي تنزف ؟؟ شوفي دايخة و هي مووو راضية أببدا تطلعني وتقول لازم توقعين وأنا خلاص من جد بكيت .. قلت تلقاائي غصب عني قبل أروح " أفففففففف " أستحيت إني قلت لها كذا وهي حررمة كبيرة وتتكلم بذوق .. بس كنت أصلا أبكي شوي وأدوخ من التعب و أترجى فيها وأقول شووفيني دايخة بالقوة أمشي تقول لأ ويعني ما بيموتون على التوقيع ذا والله شفت بنت رمت لها الورقة و قالت لها سووري نسيت أوقع .. ويوم الحرمة قالت أرجعي وقعي .. قالت " وي وي باللهي أرجع كل دااا .. طبعا لا " ورمت الورقة و خرجت .. وطبعا ما يقدرون يمسكونها لأنها عند بوابة خروج أصلا تطلع لأهلها وماأحد يجيبها بس ما قدرت أسوي زيها و قعدت أبكي طبعا لأني بأضرب المشوار كمان مرة رجعت من البوابة وقفت عند الممر ذاك وبكييت ليين شبعت بكااء و البنات رايحين جايين يتفرجون فيني بس كنت منهاارة حاسة أبغى أقعد وأهلي يجيون يشيلوني على البيت على طووول بس من وين لي أهلي الحين وأختي راحت البيت خلاص على أساس إني عارفة أماكن المباني وكذا المهم خلصت بكااء و رحت وضربت مشوااار لييين العمادة .. و في الشمس كله مشي على رجوولي السيارات زحححمة ما ألقى مكان و أستحي أتضارب مع البنات على مكان وكذا وأنا أصلا حلفت ما أكلمهم لأنهم يتكلمون بطريقة تخليني أتفشل وأنجرح .. تخليني أقول ليش تعاملني كذاا وتصرخ بوجهي .. المهم مشييت و أنا مسوية زي الأموات الأحياء .. حتى أسمع البنات يقولون وأنا ماشية " إيش بها ذي " بس بالقوة وصلت العمادة عطيتها الورقة وقعت و ضربت نفس المشوار للبوابة رجووع وأنا أمشي المشوار للبوابة كنت من جد أزحف زي السحلفااة .. وأمشي شوي و أوقف شوي آخذ نفس .. وأتكي على الجداروأدعي طووول الوقت ياارب ما أدووخ وسط البنات وأطيح يااارب أسترررياارب أسترنييي وأشرب موية و أغسل وجهي أبغى أفووق ليين وصلت الباب لقييت زحححححمة في مكان إنتظار السيارات بالقوة لقيت مكان وقفت فيه وأهلي قالوا بيتأخرون شوي بس أنا وأنا واقفة ماقدرت أكمل خلاص وقوف .. كل قواي إنتهت :s طحت بس موطيحة كاملة يعني .. شووي دوخة خفيفة و البنات اللي جنبي شربوني موية و وخروا لي مكان جلست وقعدت يمكن ساعتين ونص أستنى أهلي كمان :s والمشكلة يدق علي أخوي و يهدد " والله لو تطلعين من الجامعة ياويلك خليييك جوى أصحك أشوف طرف عبايتك في الشارع طيب ؟ " أقول حااضر ويرجع يتصل أخوي الثاني " يافلاانة لا تفكرين تجين بتاكسي هاا ترى طريق الجامعة مقطووع وفيه وفيه .. والله لو تطلعين من الجامعة ياويلك أصبري جووى " وشوي يتصل مرة ثانية ويتأكد " هاا إنتي جوى ؟ إيوة شطوورة خليك جوى لا تسوين زي البنات " أقول له ترى دخـــــــت تعااالوا بسسرعة .. يقول وش أسووي طيب ظرووف معلليش شوي و أكون عندك و كذاااب أعرفه يوم يكذب و يقول " خلاص هذاني شووفيني أدق بووري للسيارات عشان يوخرون و أجيك بسرعة " و إلا يكذب ويقول " خلاااص أنا عند الدوار .. لفة وحدة و أكون عندك " وهو أصلا باقي توو جنب البيت يمشي .. وكذا كل شوي يتصلون و يقولون لا تطلعين توقفين مع البنات اللي بالشارع خليك جوى حتى لو زحمة وقعدت أستنى ليين جووا بس ركبت السيارة قلت السلام عليكم كيف الحاال ؟؟ وأسمع يسألني أخوي " هاا كيف أول يووم ؟؟ كيف الجامعة ؟ حلوة ؟ " كنت شبه مغمى عليي أصلا ما رديت عليه و كممملت نوووم من 8 الصباح لـ 4 العصر يمكن كله تعب و حر و لفلفة وبدون ولا فطور ولا شي .. كلها شوية موية بس كان يووم صعـــب جدا كرهت إني تخرجت من الثانوية و قلت وش زينك يامدااارس يازين يوم أمي تجي معي للمدرسة في أول الأيام عشان لا أتوه ولا أضيع وينها الحين .. أصلا لو جات هي بتشرد بنفسها من المتاهة ذي ودي بمدرستي و صحباتي و الفصول والممرات :s أحسن من كل البهذلة هذي إييوة صح و سألت لكم الأستاذة عن الكتب للإنتساب .. قاالت عادي براحتكم إذا تبغون تشترونها أو لأ راجع لكم .. وتقوول : بس لو تبغين رأيي .. أشتريها وذاكري و نمي قدراتك عشان تجيبين معدل لا تنتظرين الدورة التأهيلية ولا شي وذاكري من قبل وسمعت كلامها وبأجيب الكتب بإذن الله من خواارزم وشفت كتب بنات الإنتظام .. كلها النسخة المجددة هوو يوم لا ينسى الحقيقة في تاريخي الجامعي المستقبلي إن شاء الله :p وما قدامي غير أنتظر ليين تطلع بطاقتي عشان أقدر أداوم مع الإنتظام وتووهم اليوم الإنتظام ياخذون أول حصة رياضيات .. بس الإنجليزي ما شاء الله دخلوا اليونيت 4 ما أدري حتى لو حضرنا بيسمحون لنا ندخل معامل الحاسب وإلا لا .. لأننا إنتساب ..ما أدري الأجهزة تكفي أو لأ بس ما يهم الحاسب كثيير هو سهل ما يحتاج شي كله أوفيس و ما أوفيس .. وخبرة مكتسبة أصلا بس الله يهديهم و يرسلون بطايقنا لـ dhl بدري .. عشان نلحق نداوم :s بكرة طبعا ما بروووح .. ما معي بطاقة .. وأساسا حتى لو معي .. بكرة بأرتاح كله من اللي صار لي اليووم بس بروح يوم الإثنين أخرشها و أقول نسيت بطاقتي ويدخلوني <_< ومن بعد يوم الإثنين ما أقدر أداوم إلا يوم تجيني بطاقتي.. يالله الله يعييين و تجي بدري بإذن الله وبسسس خلاص هذي معاناتي كلها حق اليووم وإنطباعي عن الجامعة ملخص : 1 / كبييييييييييييييييرة مرررررررررررة ما شاء الله وتتوووه وفيها أماكن مكسرة مو زينة وطريقها كله إصلاحات يكوزن زحمة الصباح و نحن رايحين 2 / البنات أشكالهم مو حلووة .. مع إن في بنات باين هاديات ولبسهم هادي وعاقلات بس هذولي فئة نادرة و الغالب أنواااااع الميك آآآب و التسريحات و الألوان الغريبة العجييبة مو كأنها دراسة كأنه فرح أو شي كذا..وأنواع الإستعراضات كنت مصدوومة و أطالع بذهوول في وجه كل وحدة تمر قدامي وفمي مفتوح شبرين أقول ياسلام صلصال جد وجه البنت كأنه صلصال ملون من كثر الميك أب و المشكلة كل ما طالعت لوحدة تفكرني معجبة فيها تقعد تتدلع بزيادة في مشيتها و تتكسر و أنا أقول في بالي " يارب يهديك و يشفيك يابنت " 3 / ضايقتني سالفة النظرات الزااايدة .. كل بنت ماشية تطالع للثانية وتشوف وتتفرج في جمال هذي و ملابس هذي ومشية هذي كلللللللللهم ماشيين يتأملون بعض و يستعرضوون .. كل وحدة تستنى اللي يطالع لها .. وطفششششت كل ما قلبت وجهي مكان ألقى وحدة تطالع ؟؟؟ وأصير مرتبكة وماني عارفة وش أسوي صرت حاطة وجهي بالأرض و أمشي بسرعة بأكبر قدر ممكن ما رفعن عيوني لولا بنت 4 / الدكتورات كللللهم عسل ما شاء الله و فيه بنات ماجستير متعاونييين وطيبييييييين مع المستجدات << غير عن اللي يوقفوني نص ساعة قدامهم يتضاحكن ويقولن " وووواااي مستججدة " لا ياشيخة ؟ مستجدة يعني جاية من الفضاء مثلا و إلا وش؟ وكأنها ما قد كانت مستجدة 5 / الحضوور شي جمييييل جدا و الفائدة اللي تجي منه شي لا يوصف 6 / التحويل من إنتساب لإنتظام سهل و مو صعب :p 7 / في ناس من المسؤولات يجرح تعاملهم وبسس هذي كل ما عندي عن يوم السبت .. و بكرة ما بروح أكيييد وأنصح أي بنت ودها تروح تاخذ معها بابتها أو شي كذا كبير عشان لو صار لها زيي :p أنتهى المعروض الملكي :/

الاخت كاتبة قصة حياتها

كم ساعة تكتبين بهذا الرد

قمة الفضااااااوة

[عبدالرحمن الدهمشي]

السلام عليكم ورحمة الله وبركاته
أول شيء أشكر الأخت روح متفائلة والله يجزاها خير
ويوفقها الله في الدنيا والاخره ويرزقها الفردوس الاعلى
وثانيا أشكر جميع أعضاء القروب طلاب وطالبات
على مساعدتهم لأخوانهم وأخواتهم في الله
وجعله الله في ميزان حسناتهم ووفقهم الله دنيا واخره

أنا عندي أسئلة عن برنامج السنترا وأتمنى اللي عنده
الإجابة الأكيدة يجاوب علي
هل البرنامج لازم أسجل فيه وأسجل المحاضرات؟؟
إذا سجلت محاضرة وماحضرت المحاضرة هل فيه عقوبة؟؟
هل أستطيع الدخول بأي وقت فيه محاضرة أو لا؟؟

[صمت و ألم]

عموما كلنا في مركب واحد والامور كلها سهاله ان شاء الله

عندي اقتراح ...

اطرحو كل اسئلتكم واستفساراتكم هنا وانا بكره بجيب لكم الخبر اليقين .....

ومن مصدر المعلومه بمشيئة الله عندي من يخدمني هناك ...

بس لا تتركون شيء انتم محتارين فيه كل الي عندكم اسدحوه هنا وابشرو بالخير

انتظر اسئلتكم ...

[والله حالة !]

هلالي وبس .. أنت إنسان محترم ما شاء الله :)




.

[والله حالة !]

والله جلست اتصفح الكتاب ماني فاهمه كيف بتكون الاسئله

أحضري طيب ؟

أو جيبي مدرسة خصوصية ؟؟

و الأسئلة للإنتساب ترين كلها إختياري مافي ولا سؤال مقالي

[ندى الورد123]

يعني اتوكل على الله واجيب الكتب ولازم من مكتبة الخوارزم ولا عادي من مكتبة جرير ممكن تفوودوني

[SeЙorita]

عموما كلنا في مركب واحد والامور كلها سهاله ان شاء الله عندي اقتراح ... اطرحو كل اسئلتكم واستفساراتكم هنا وانا بكره بجيب لكم الخبر اليقين ..... ومن مصدر المعلومه بمشيئة الله عندي من يخدمني هناك ... بس لا تتركون شيء انتم محتارين فيه كل الي عندكم اسدحوه هنا وابشرو بالخير انتظر اسئلتكم ...

مشكور اخوي بس اذا ماعليك امر
ممكن تسائل عن وضع البنات بعد

[om nomay]

المشاركة الأصلية كتبت بواسطة والله حالة ! أحضري طيب ؟ أو جيبي مدرسة خصوصية ؟؟ و الأسئلة للإنتساب ترين كلها إختياري مافي ولا سؤال مقالي

مرسي ياعسل بس احضر فين والله اني خفت اقرب جنب الجامعه هههههههههههههههه

[SeЙorita]

والله حاله
من هرجك مو رايحه الجامعه الي في الاختبارات اذا الوضع كذا السنتر جنه صراحه
لاشمس ولا بهذله ونحنا المحاضرات في عز الظهر >>ماحبه