ملخص لمادة الاحصاء 111 من مجهودي المتواضع

[ابو ليونه]

لو تنقزي شرح للباب السادس بكون لك ممنون اختي فرحه

[أحلآم المهآ]

فـرحـه قلبوو انا معآكي من البدآيه واتمنى تكملي للآخـر,,

الله يسعـدك دنيـآ وآخـره’’

[منوليتآ]

اختي فررررحة ياريت تكملييييي


جد استفدت كثييييييير من شرررررحك الله يسسسسعدك ويفرج هممممممك

بليييييييييييز كملي جميلك

جزاك الله الف خيييييييررررر

[فرحة]

الله يسعدكم ويوفقكم يارب ولا يحرمني منكم
ان شاء الله اليوم راح اشرح الباب الرابع والخامس
وغدا اشرح الباب السادس والسابع
وبكذا نكون ختمنا المنهج لاني من البدايه قلتلكم اني والله العظيم الباب الثامن مني فاهمتو حتي انا نفسي راح اعتمد على شرح اخوي تاورجي في الباب الثامن
اما باقي الابواب ابشرو ما طلبتو شي ان شاء الله اوعدكم يوم الاثنين نختم الماده والشرح بيكون مع حل للاسئله حقت الاختبار الذاتي
وبعد الاختبار لاتنسوني ابغاكم تطمنوني عنكم ايش عملتو

[فرحة]

راح ابدء شرح للباب الرابع
الباب الرابع جدا جدا سهل وسهولتو زي سهوله الباب الثاني للي متابع شرحي وعارف الباب الثاني راح يفهم قصدي

[فرحة]

الباب الرابع

فيه درسين الاول معامل الارتباط

والثاني الانحدار الخطي البسيط

وطبعا في النهاية اسئلة الاختبار الذاتي

طيب بنبد بمعامل الارتباط





معامل الارتباط والذي يرمز له بالرمز r
عباره عن مقياس رقمي يقيس قوة ونوع الارتباط بين متغييرين
حيث تتراوح قيمته بين +1 و -1
هذه جدا مهمه يا جماعه انو دائما اتكررت في اسئله الاختبارات التي بنهايه الكتاب
واسئله الاختبار الذاتي بنهايه الباب الرابع برضو جايبين عنها سؤال


فركزو معايا معامل الارتباط تتراوح قيمته بين
وبيعطيكم اختيارات مثلا -1 و 0 او +1 و 0 او +1 و -1
طبعا الاختيار الثالت الي هو +1 و -1

الله يسعدكم ركزولي عليها لا يخلو اختبار منها





الان بنأخذ اول نوع من معاملات الارتباط
النوع الاول هو معامل الارتباط الخطي ( بيرسون )

ركزو معايا الي بقولو مهم في الاختبارات التي بنهايه الكتاب قالي في سؤال من الاسئله
اذكر رمز معامل الارتباط الخطي لمن

وعملي اختيارات هل هي لبيرسون ام فاي او سبيرمان
هدول كلهم راح ندرسهم بس انا هنا وقفت ماعرفت اجاوب لاني حافظه معامل الارتباط بالارسماء والرموز فقط ما حفظت لمين الخطي ولمين الرتب وهكذا


لذلك احفظو معايا

معامل الارتباط الخطي هو ل ( بيرسون ) رمزه rp معامل الارتباط الخطي دائما يأتي كمي
معامل الارتباط الرتب هو ل ( سبيرمان) رمزه rs معامل الارتباط الرتب يأتي دائما رتب واسماء يعني ترتيبي اسمي ترتيبي معناها الاول الثاني الثالث
اسمي تقديرات جيد ممتاز مقبول


كل هذا راح نفهمو ونشرحو اكثر بالامثله لكن مهم جدا حفظه
لان فعلا في الاسئله جابو سؤال اذكر معامل الارتباط الرتب
طيب اذا انتم مو حافظين يا شاطرين ماهو معامل الرتب ورمزه ولمن معناها ضعنا
عشان كذا اسئله الاختبارات الي بنهايه الكتاب مهمه مرا حاولو تحلوها

[فرحة]

افتحولي كتبكم صفحة 121 اول مثال 4-1
اول مثال بالصفحه

سجلت ست قراءات تقريبيه لحجم الانتاج وحجم صادرات النفط الخام بالمملكه العربيه السعوديه بالمليار برميل خلال عدة سنوات كما يلي




الجول عندكم ماراح اكتبو
راح اشرح على طول اعذروني بس الي الان نظام الجداول في المنتدي مو كويس خربان
ودا الشي مرا متعبني لكن ان شاء الله الشرح بيعوضكم
هو بس حيكتبلكم جدول فيه x و y
زي منتو شايفين طيب انتو ايش تعملو




شايفين الحل حقهم انتو كمان لازم تجيبو قيمة xy وهي عن طريق ضربهم في بعض وننتبه نضرب اول شي ال x في ال y مو تعكسوها
طيب بعدين تربعولي ال x
بعدين تربعولي قيم ال y
جربوها لوحدكم اعملو الجدول لوحدكم وجربوه تاني حلوه لوحدكم


عموما احب اقلكم شي مرا حلو حيفرحكم انا حليت كل اسئله الاختبارات بنهايه الباب والله العظيم عمرو ما جاني سؤال اني انا عمل الجدول علي طول يجيبلي سؤال ويعطيني القيم جاهزه
عموما اتدربو على الجدول عشان ممكن يجيبو لنا مين يعرف





بعد ما عملنا الجدول حددنا القيم التاله وهي مهمه من اجل باقي الحل

قيمة مجموع ال x
قيمة مجموع y
قيمة مجموع xy
قيمة x تربيع
قيمة y تربيع





هذه كلها مهمه
الان تبقت خطوه واحده على نهايه الحل ماهي هي اهم خطوه
القانون ماهو قانون المعامل الخطي الي هو قانون بيرسون
افتحولي اخر صفحة في الكتاب صفحة 281
شفتو القوانين لما تحلو حاولو تنقلو القانون من هذه الصفحه عشان فيها كل القوانين حقت الكتاب كنوع من التدرب لانو بالاختبار راح تجينا ورقه زيها بها كل القوانين الفرق الوحيد انهم هنا كاتبين اسم القانون بالعربي في الاختبار ماراح يكتبو اسم القانون بالعربي لازم نحفظ الرمز


rp هذا القانون نعوض في القانون الناتج يطلع بالضبط 0.65






اخر خطوه هي ايجاد نوع العلاقه نوع العلاقه طرديه متوسطه كيف عرفنا
في جدول صفحة 120" احفظوه زي اسمكم وبعد ما تحفظوه قطعو الورقه 100 حته عشان محدش يشفها معلش اتقمصت دور رأفت الهجان "
نرجع للجدول نشوف الرقم الي طلعلنا في الناتج الرقم هو 0.65
طيب اذن الرقم فين موقعو بالجدول يقول الارقام التي مابين 0.50 و 0.69 اذن رقمي الي طلع بالناتج يقع مابين هذان الرقمان اذن العلاقه طرديه متوسطه
فهمتو اخر خطوه اخر خطوه هي اهم خطوه
لانها تحدد نوع العلاقه بين المتغيرين الي بالمسأله
واخر خطوه اعيد شرحها تاني



نمسك الناتج الي طلع نشوفه موجود بين اي رقمين بالجدول مثلا لو طلع الناتج 0.75 اذن اشوف بالجدول فين هذا الرقم هو يقع بين رقمين هما 0.70 و 0.99 اذن العلاقه ارتباط طردي قوي

فهمتوني يا شطار


احب انبه على شي مرا مهم احيانا الناتج ممكن يطلع معاكم بالاله الحاسبه قريب من هذا الناتج الي هو كاتبو فرق رقم واحد مثلا يطلع الناتج 0.64 وهو في الكتاب يكون الناتج الي في الحل 0.65 معناها الحل صحيح لان الفرق رقم مو مهم ماتفرق اربعه من خمسه فهمتو عليا يعني في الاختيارات الي في ورقه الاختبار دائما حاول اذا مالقيت الرقم الي طلعلك بالاله الحاسبه نفسو بالضبط طلع في الورقه في الاختيارات خذ اقرب ناتج ما تفرق رقم واحد اتمني فهمتو علي

كذا انتهينا من معامل الارتباط الخطي ل بيرسون ورمزه rp
معامل الارتباط الخطي لبيرسون دائما يجيكم كمي شايفين هنا بالجدول ارقام كلها ارقام اكس ارقام واي ارقام
كمي معناها ارقام





انتهي الحل الله يسعدكم الي ما يفهم شي يرجعلي تاني الله يوفقكم انا فاتحه الموضوع عشانكم لانو فيه رساله جاتني من طالبه مكسوفه مني تبغا اعيد شرح شي في الباب الثالث الباب الثالث كلو راح اعيد شرحو بس بعد ما نختم الماده

[فرحة]

الان راح نأخذ مثال على معامل ارتباط الرتب ل سبيرمان رمزه rs
سمي رتب لانه ترتيبي اسمي
لاتأتي به ارقام دائما ترتيبات جيد جيد جدا ممتاز هكذا لذلك سميناه معامل رتب

مهم جدا حفظ كل معامل مااسمه ومارمزه








مثال صفحة 126 رقم 4-5

في دراسة لمعرفه العلاقه بين الحقول المكتشفه وطول الانابيب بالكيلومتر الناقله للنفط الخام بالمملكه العربيه السعوديه خلال عدة سنوات سجلت سبع قراءات علي النحو التالي



يعطيكم طبعا جدول شايفين الجدول مكتوب فيه عدد الحقول (x)
طول الانابيب (y)




االحل :

لازم نعمل جدول نحول الرتب الي ارقام يعني نحول الترتيبات الي ارقام
هي سبعه قراءات

المثال هنا اعطاني وقالي سبع قراءات يعني راح احول الارقام الي سبع ارقام من الواحد الي السبعه وحيكون ابتداء من الاصغر الي الاكبر اشوف اصغر رقم احولو الي واحد وارجه اشوف الي اكبر منو احولو على اثنين واهكذا
اذن اخذ ارقام الاكس الي هي ارقام عدد الحقول
واكتبولي فوق كل رقم من الارقام الرقم الي راح تحولوه





اصغر رقم هو 54 احولو على رقم 1 عشان هو اصغر رقم عندي كل رقم تحولوه اكتبولي في الجدول من فوق حولتوه على ايش بقلم احمر
طيب ايش الرقم الي اكبر منو 55 اذن احولو على رقم 2
ايش الرقم الي اكبر من ال 55 على طول هو رقم 56 احولو على رقم 3
ايش الرقم الي اكبر من 56 هو رقم 61 اذن احولو على رقم 4
ايش الرقم الي اكبر من رقم 61 هو رقم 62 حولولي هو على رقم 5
ايش الرقم الي اكبر من رقم 62 هو رقم 63 حولوه على رقم 6
ايش الرقم الي اكبر من رقم 63 هو رقم 67 حولوه على رقم 7




نروح للجدول الي هو جدول الحل نشوف هو حولي رتب ال x
حولها من رتب الي ارقام بالضبط زي ماحولناها احنا
طيب نفس الطريقه نحول رتب ال y نمسك اصغر رقم ونحولو علي رقم 1 وهكذا حتي اخر رقم في الجدول طبعا من طول الانابيب هذه هي ال y نمسك اصغر رقم نحولو على رقم واحد وهكذا الين ننتهي من الارقام





شايفين خانه ال d التي بالجدول كيف جات
هي عباره عن طرح ال x من ال y هنا احب انبه نطرح بالترتيب ال x من ال y حتي لو كانت ال x اصغر من ال y فنطرح في الطرح العادي مانقدر نطرح 1-2 لا يمكن اما في طرحنا في معامل ارتباط الرتب فكل شي ممكن يصير يعني شوفو جدول الحل عندكم ثاني خانه اكس = 1 و واي =2 وطرحناهم من بعض الناتج هو في خانه ال d الناتج طلع يساوي -1
شفتو احب انبه خانه ال d ايش هي هي عباره عن ناتج طرح اكس ناقص واي
الطرح لازم يكون بالترتيب يعني نطرح اكس ناقص واي حتي لو كانت الاكس اصغر من الواي
طيب اطرحولي كل الجدول الين النهايه عشان تتدربو





طيب الان فيه خانه d تربيه هذي من فين جات ؟
هي عباره عن ال d خانه ال d نمسكها نربعها جربو بالاله الحاسبه بنفسكم عشان تتدربو





الان الخطوه الثانيه هي خطوه التعويض في القانون نكتب قانون سبيرمان ونعوض فيه
طلع الناتج يساوي 0.93
اذن اخر خطوه هي ناخذ الناتج ونشوف ما نوع علاقته
طبعا هذي لازم نحفظ الجدول الي بصفحة 120 عشان نعرف نحدد نوع كل علاقه
هنا الرقم الي بالناج 0.93

والارقام التي تقع بين 70 وبين 99 نوع علاقتها طردي قوي

اذن العلاقه طرديه قويهارتباط طردي قوي

والسلام ختام راح اعطيكم مثال اخر لمعامل الارتابط سبيرمان عشان يتفهم

[فرحة]

مثال 4-6
هذا المثال مرا حلو


عند تقييم مجموعه من الناقدين الرياضيين ..... الخ


شوفو الجدول الي هو كاتبو كاتب ثلاثه خانا ت
الخانه الاولي اللاعب
الخانه الثانيه رتبه التحمل التدريبي
الخانه الثالثه رتبة اللاعب النهائيه





الحل :
هو اعطاني الرتب جاهزه جزاه الله خير يعني ماراح نحول المثال الي قبل دا اعطاني وقالي سبع قراءات يعني راح احول الارقام الي سبع ارقام من الواحد الي السبعه وحيكون ابتداء من الاصغر الي الاكبر اشوف اصغر رقم احولو الي واحد وارجع اشوف الي اكبر منو احولو على اثنين واهكذا
هنا في المثال دا اعطاني الرتب جاهزه وما عليا اذن الا اني
اعمل جدول اكتب فيه ال d وقلنا الدي هي عباره عن اكس ناقص واي
واعمل خانه ال d تربيع وهذه من خانه الدي اربع خانه الدي تعطيني دي تربيع
ارجعو للجدول عشان يكون كلامي مفهوم اوكي





الحل :
اعمل جدول اعمل خانه ال d
قلنا هذه الخانه هي عباره عن اكس ناقص واي
اعمل خانه ثانهي هي خانه ال d تربيع وهذه جدا سهله امسك كل رقم في خانه الدي اربعو واكتب الناتج
سهل الكلام اكيد سهل





طيب اخر خطوه هي القانون اكتب قانون معامل الارتباط الرتب لسبيرمان rs هذا رمزه
قلتلكم هنا ارجعو دائما لصفحة 281 ومن هناك انقلو القوانين بس عشان تتدربو على شكل صفحة القوانين
طيب كتبتو القانون عوضو فيه
بالاله الحاسبه
ثم الناتج يطلعلكم 0.94 اذن العلاقه نوعها طردي قوي
ييس سهل مرا والله الاحصاء بس لازم نركز





طيب هنا ابغا اقول الي ما فهم يكتبلي بالضبط ايش الي ما فهمو وانا اعيد شرح من عيوني
بس لاتنسوني ادعولي دائما ربي يفرج كربتي يارب

[فرحة]

طيب ابغا اعيد مراجعه لكم
معامل الارتباط الخطي يكون دائما كمي
كمي معناها ارقام بما انو اصلا ارقام بي اجيب خانه اكس ضرب واي
ثم خانه ثانيه اسميها اكس تربيه اربع الاكس فيها
وخانه ثالثه اسميها واي اربع الواي فيها
وخانه الاكس والواي تكون من رأس السؤال هو بيعطيكم هي طبعا





طيب بالنسبه لمعامل الارتباط الرتب
بس اعمل خانه اسميها اكس وهي خانه الاكس الي بالجدول واحول فيها خانه الاكس الي بالجدول الي هو معطيني هو من رتب الي ارقام
ثم اعمل خانه اخري اسميها واي احول فيها الرتب التي في الجدول الي هو معطيني هو من رتب الي ارقام
ثم اعمل خانه الدي وهي عباره عن اكس ناقص واي
ثم خانه دي تربيع هي سهله مرا اربع الدي