( uniform )

[LucKy LAD]

نظاميا الاسكرب مطلوب دائما


لكن الحقيقه انهم يتغاضو عنو في كثير اماكن


اما بالنسبه للاب كوت


هوا المهم وبالنسبه لكلاس المعمل فمستحيل تدخلو المعامل بدونو


والاسكرب من رابعه يسير الزامي جدا



المصدر : طلاب MeD08

[Dr~NanoOok]

السكرب بالنسبة للبنات صار الزامي من السنة اللي فاتت
على كل الطالبات لبس السكرب من سنة ثانية إلى سنة سادسة
وفوقه اللاب كوت

وهو مره حلو ولونه قريب من الجينز الغامق حتى ما يفرق كتير
وجدا مريح ومو ماسك وساتر ليكي
لأنه دكاترة رجال يدرسونا لبعض المواد
فأفضل شي ليكِ
وهم عمموا هذا القرار لأنه في بنات تلبس بنطلونات سكيني ومره ضيقة
وتوضح رجولهم ولا يلبسوا بنطلون ستريتش .. وصراحة مره عيب كده

غير انه يريحك من حوسة كل يوم ايش تلبسي تحت اللاب كوت
واذا يوم حبيتي تغيري وتلبسي اي لبس بدل السكرب
مو مشكلة , بس أهم شي ما يكون عندك معمل يومتها

والأحلى بنظري أنه يميز بنات الأسنان من بقية الأقسام
ومعروفين بالسكرب حقنا ^_^

من جد كلية طب الأسنان أروع كلية في الاهتمام بطالباتها ومراعاتهم
عشان كده عملوا النظام دا
والحلو انه في بداية السنة الكلية وفرت السكربات وجابتها لطالباتها
بسعر جدا كويس
لو اشتريتي من بره حتلاقي البنطلون لوحده بـ 160 ريال و البلوزة بـ 100 ريال
<< مو متأكده من الأسعار , لكن لما سألت أول كانوا في دي الحدود
وتلاقوه في محل اسمه Scrub في مركز دانية - شارع حراء
ودا موقعهم: urban scrub
لكن الكلية تبيعها لنا البنطلون + البلوزة بـ 99 ريال بس
وهي من ماركة ممتازة ومعروفة وخاصة بالطب تتحمل الغسيل الدائم والتعقيم



وهذا لون السكرب حقتا (ما أعرف اذا حيغيروه هذه السنة أو لا)





وهذا شكل السكرب كامل , مره حلو =)

[υикиσωи]

^^

يعطيكي العافية يا دكتورة ...=)

[ريوودي]

ماني فاهم شي

<< على بالي راح اجي بثوب وكاب .. لوووول

[ahmad smart]

طيب الاولاد اش يلبسو

انا عجبني اللبس دا
كيف ما ينفع !

[mzat kau]

يعطيكيالعافيه ياااررب =)

[Dr~NanoOok]

بالنسبة للأولاد ما أدري إذا لازم عليهم يلبسوا السكرب

لكن أولاد دفعتنا كانوا يلبسوه وكان لونه أزرق فاتح
ما أدري اذا هم اختاروه من عندهم ولا هو الأساسي
لأني سمعت ان اللون الخاص بطلاب الأسنان هو اللون البيج

وبالنسبة للسكرب اللي حطيت صورته
هذا خاص بالبنات وقصته بس لينا

لكن هناك سكربات خاصة بالأولاد, ولا unisex وتنفع للاتنين يلبسوهم
وتقدر تروح محل scrub اللي قلت عليه
وحتلاقي فيه كل الأنواع

[HaMoDy]

اللون البيج لطلاب البشري 2 و 3 والازرق الفاتح للبشري 4 و 5 و6

الكحلي لنا

[ultraviolet]

شكرا يا nano0ok
جزاك الله خير عالتوضيح الرهيب دا
بس نفسي اعرف ليش الاسنان زيهم موحد و باقي الكليات لأ ؟

[Dr~NanoOok]

المشاركة الأصلية كتبت بواسطة ultraviolet شكرا يا nano0ok جزاك الله خير عالتوضيح الرهيب دا بس نفسي اعرف ليش الاسنان زيهم موحد و باقي الكليات لأ ؟

العفو عزيزتي
وإياكِ يارب تسلمي على الدعوة الحلوة

موبس الأسنان اللي موحّد لبسهم
كل الأقسام لها لون معين للسكرب حقها
لكن كليتنا هي اللي فرضت على كل المراحل لبس السكرب
مو بس السنوات الاكلينيكية اللي بطلعوا المستشفى

والسنة اللي فاتت أغلب الكليات التانية صارت تقلدنا
وبناتها صاروا يلبسوا السكرب من سنة تانية "^^

عندك الألوان زي كده :
الطب البشري - موفي أو ازرق فاتح أو أخضر << هو لكل مرحلة أعتقد لون , لكني بشوفهم بدي الألوان غالبا
التغذية - موفي
الأشعة - رمادي
العلاج الطبيعي - أزرق نيلي
تقنية مختبرات - عودي
التمريض - أبيض

مو متأكده من الألوان بس هذه اللي شفتها عندنا بالجامعة