احتاج مساعدتكم - معلومات عن المستقبل الوظيفي للصيدلة -.

[pharm.d .s]

المشاركة الأصلية كتبت بواسطة jomantous بس عندي سؤال فيه ناس عندنا اخذوا رزيدنسي وهم ما معاهم فارم دي؟؟ كيف؟؟ عذرا لصاحب الموضوع

دي عمري ما شفتها ولا اصلا قادرة استوعبهاااا احسها من المستحيلات
كيف واحد يقدر ياخد رزنس بدون فارم دي الفارم دي اساس الكلنيكل لانو في الرزدنس مجرد تطبيق عملي
امكن شيء جديد وانا لسة ما اعرف

[M7mmd]

طيب اختي فارم دي عشان اكون فهمت الموضوع تمام

دحين انا ادرس في عبدالعزيز واتخرج بـ فارم دي واقدر اكمل عشان اوصل للكلينيكل ؟

الفارم هي اساس الاكلينيكل ,, طيب هذا الجزء تمام؟

ولكن قريت في النت انو في السعودية فيه مشكلة في الريزيدينسي , اعتقد اني لازم اخذو من برا؟

وكيف اقدر اوصل للإكلينيكل لو ما خرجت من السعودية؟

اللي عرفتو اني لازم اعادل شهادتي برا واسوي زحمة كدا ؟

---

وفيه مشكلة تانية :d واحد من اقاربي في مصر صيدلي ولكن جاتلو فترة اشتغل زي مندوب تسويق لشركة ادوية

انا خايف من دا الموضوع,, لكن احنا عندنا نظام الفارم دي نخرج منو دكاترة المفروض يعني مرتبة اعلى من الصيدلي صح؟ يعني مرة ما ننحط في اشغال زي كدا؟

يعطيكم العافية جميعاً مررة ما قصرتو :)

شكراً ...

[pharm.d .s]

المشاركة الأصلية كتبت بواسطة m7mmd طيب اختي فارم دي عشان اكون فهمت الموضوع تمام دحين انا ادرس في عبدالعزيز واتخرج بـ فارم دي واقدر اكمل عشان اوصل للكلينيكل ؟ الفارم هي اساس الاكلينيكل ,, طيب هذا الجزء تمام؟ يب ولكن قريت في النت انو في السعودية فيه مشكلة في الريزيدينسي , اعتقد اني لازم اخذو من برا؟ لالالا في برنامج رزدنس في السعودية تبع التخصصات الطبيه بس ما يقبلوا ناس كتير ومافي تخصص على ما اعرف وكيف اقدر اوصل للإكلينيكل لو ما خرجت من السعودية؟ اللي عرفتو اني لازم اعادل شهادتي برا واسوي زحمة كدا ؟ المعادلة مو زحمة هوا اختبار والاختبار انا شفت نموذج على النت ما حسيتوا صعب بصراحة وتعادل سنة الامتياز وبس --- وفيه مشكلة تانية :d واحد من اقاربي في مصر صيدلي ولكن جاتلو فترة اشتغل زي مندوب تسويق لشركة ادوية قصدك على المدكل ريب انا خايف من دا الموضوع,, لكن احنا عندنا نظام الفارم دي نخرج منو دكاترة المفروض يعني مرتبة اعلى من الصيدلي صح؟ يعني مرة ما ننحط في اشغال زي كدا؟ يعطيكم العافية جميعاً مررة ما قصرتو :) شكراً ...

اممممممم
عندك وجة نظر بس الانسان لازم خطوة بخطوة ماراح يحطونك اول ما تتخرج على طول مدير لازم تبدأ بشياء بسيطة الي اعرفوا الي تخرجوا من عندنا واشتغلوا بشركة ادوية اول شيء بدؤا مديكل ريب
بس لو انت مو حابب تشتغل كدا لية تشتغل من اصلوا في شركة ادوية اختار شيء تاني

[دعو]

ياجماااعه إيش يعني رزيدنسي ؟؟

[super mo6awa3]

الرزدنسي معناه لما تتخرجي من الكلية حتكوني صيدلانية عادية على مرتبة صيدلي أول فعشان تترقي وتصيري صيدلانية أخصائية تحتاجي إنك تشتغلي كموظفة (طبعا مبدئيا حتكوني تشتغلي في الصيدلية) في أحد المستشفيات سواء هنا أو برا لمدة سنتين , سنة شغل عام وسنة تتخصصي (في الباطنية أو الجراحة أو مخ وأعصاب أو أطفال ..........أي تخصص تبغيه) بعد هذي السنتين تترقي إلى مرتبة صيدلي أخصائي وبالتالي يصير اسمك clinical pharmacist
هذي السنتين اسمها resedency = زمالة

[دعو]

امااااا يعني راح أشتغل في صيدله ؟؟!!
انا سألت وحده متخرجه من جاامعه الملك عبد العزيز وقالتلي إلي يشتغلوا في صيدلياات هذولا دبلووم

[super mo6awa3]

أكيد لازم تشتغلي في الصيدلية بس فقط لمدة سنتين (أو ثلاثة إذا كنتي بتاخذي الزمالة برا) عشان تترقّي لمرتبة صيدلي أخصائي , مو طول عمرك في الصيدلية زي الدبلوم , وكمان أصلا إنتي لما تتخرجي مح تكوني صيدلانية إكلينيكة كذا علطول , زي طلاب الطب أول ما يتخرجوا ما يسيروا دكاترة علطول (ما يمسكوا عيادة) حيكونوا أول شي مجرد مساعدين زي الممرضات تحت إمرة أحد الأطباء وبعد 4 أو 5 سنوات يسيروا دكاترة ويمسكوا عيادة .. نفس الكلام إحنا ..
فترة وجودك في الصيدلية هذي فترة مؤقتة تعتبر زي كأنها فترة تدريبية عشان تقوي الفارماكولوجي حقك وتسيري مُلِمّة أكثر وخبرتك تتوسع في الأدوية وتعرفي كل مرض إيش يبغالو دوا وليش وإيش يسوي في الجسم ولو كانت مثلا حرمة حامل ينفعلها الدوا ذا ولا لأ ولا لو كان واحد عنده مثلا سكر إيش تعطيه دوا وإذا كان الدوا هذا له آثار جانبية إيش تعطيه معاه عشان يخفف التأثير الجانبي إيش لازم تعطيه بحيث انك لما تترقي لمرتبة صيدلي أخصائي وتسيري صيدلانية إكلينيكية تكوني خــــــــــــلاص متمكنة وجديرة بإنك تتخذي قرار في علاج المرضى لأنو أرواح الناس حتكون بيدك فمو معقول يخلو واحد دوبو متخرج يتخذ قرار في علاج المرضى ,, ,

وترا شغل الصيدلية خصوصا إذا كان صيدلية مستشفى مو مجرد بيع وخلاص لا , فيه ممكن تغيري تراكيز بعض الأدوية وممكن تضيفي محلولين على بعض عشان يعطيكي مركب جديد .. وعلى فكرة لو جاتك وصفة دوا وانتي شايفه انها غلط ممكن يكون لك كلمة انك تغيري الدوا أو انك تعيدي النظر فيه .. يعني كثير من الدكاترة ماهم ملمين بالآار الجانبية حقت الدوا بينما إنتي حتكوني دارسة الشي ذا وعارفته فممكن بعد مناقشة أحد الصيادلة الإكلينيكيين عندك في المستشفى انك تغيري الدوا ^_^

[دعو]

مررره شكرا سووبر مطووع بصرااحه معلوومه جديد أول مرره أدري الكلام هذا حتى حقون الطب ما كنت أدري انوا المتخرجيين من الطب يكونوا مساعدين أول طب بسؤاال دحين لو أخذت الصيدله برا يعني مو في السعوديه نفس الحاال يعني لمن أرجع لازم أشتغل في صيدله

[super mo6awa3]

لا خلاص ما تعتبي الصيدلية .. انتي لما تروحي برا حتروحي بعد التخرج .. ليش؟ عشان تاخذي زمالة .. إيش يعني زمالة؟ يعني تشتغلي ثلاثة سنوات عشان تترقي لدرجة صيدلي أخصائي وبكذا تكوني خلاص تكوني صيدلانية إكلينيكية يعني السنتين هذي يا تاخذيها هنا يا برا .. يعني لو أخذتيها برا حترجعي هنا خلاص تصيري صيدلانية إكلينيكية علطول خلاص تودعي شغل الصيدلية
بس برا حتاخذيها في 3 سنوات بس طبعا أقوى بكثير في الشهادة .. لكن هنا تاخذيها في سنتين
بس برا ليش 3 سنوات ؟؟ عشان لما تتخرجي لازم تعادلي شهادتك بالشهادة الأمريكية وعشان تعادلي الشهادة الأمريكية لازم تشتغلي 1000 ساعة = سنة وبعدها تبدئي في برنامج الزمالة اللي يستمر لمدة سنتين سنة عامة وسنة تتخصصي (باطنية . مخ وأعصاب . قلب .. أي تخصص في الطب تقدري تتخصصي فيه في الصيدلة)

[super mo6awa3]

أهاا معليش دوبي فهمت سؤالك .. لو درستي الصيدلة بكبرها بر قصدك الـ 6 سنوات كلهاا (مو بس الزمالة) برضوا لازم تشتغلي في صيدلية , لأنو زي ما قلتلك ما ينفع يحطوا واحد دوبو متخرج مسؤول عن الخطط العلاجية حقك المرضى , لازم تقعدي في الصيدلية السنتين هذي عشان تصيري مؤهلة إنك تكوني صيدلانية إكلينيكية , بس يفرق انو خلاص شهادتك ما يحتاج تعادليها يسير الرزدنسي بس سنتين