صح النوم ،،،

[تلميذ منتسب]

.



.



.






تعوّدنا على حمل الجمايل والزعل واللوم

ولا نرفض عتب غالي ولا نزعل من جداله


تمنّينا نحوز أغلى مكانه في وجيه القوم

ونعيش الخوّه بوقتٍ يضد رجاله . رجاله


تعلّمنا من الدنيا وزدنا للعلوم اعلوم

وسقنا للدروب قلوب رجليّه وخيّاله


وقفنا للزمن وقفة شجاعه والقروم قروم

الين ان صار واحدنا بديل اقواله .. افعاله


الى منّه خذا ، ياخذ مثل ماياخذ المحروم

والى منّه عطا ، يعطي ولو من لقمة اعياله


ولا بتنا ولو باتت رحايلنا بدون عزوم

نساوم للفخر بأرضه ولو بأي من اشكاله


ولا عفنا ولو شفنا على باب النهار سموم

ولا خفنا ولو طفنا بمخراجه ومدخاله


واذا شفنا عناقيد العنب فوق الشجر ملموم

نهز غصون عنقوده واذا ماطاح نرقا له


نصبّر بعضنا بالكذب الابيض والهدف معدوم

ونقول انّا وصلنا له لو انّا ما وصلنا له


وانا واحد من اصغرهم طموح وللطموح رسوم

على وجهي مثل قولة بغى شيٍٍ ولا ناله


عطيت ولا رضيت آخذ من سلوم البخيل سلوم

ولا عمري رضيت اقعد على قلب العرب عاله


ولا ارضى بالفخر فزعه جواسيس وكلام رخوم

ولا عمري حنيت الوجد بعد المجد لحثاله


غناي الله .. وانا رجلٍ عزيز مقدّرٍ محشوم

قنوعٍ بالقدر وان قلت : فال الله ولا فاله


بسيطٍ يرمي حموله على متن الجبال هموم

بوقتٍ للأسف عيّت تطيق همومه جباله


بوقتٍ نزّل خشوم ورفّع من رداه خشوم

وخلّى قيمة الرجال بين الناس برياله


صحيت وقلت للنايم بعد ماقام .. صح النوم

زمانك ماعطاك إلاّ صوره وحطام تمثاله


سنين اطالع البارق واقول ان المطر محتوم

وهو ما مد لي كفه وانا ما طلت همّاله


أرد اكذب على نفسي واقول ان النخل مفطوم

وهو ما بالنخل عذقٍٍ عطش ماذاق شلاّله


وانا مابي من البارق هماليل ومطر وغيوم

ولو ذقت العطش بعيون طرقيّة ورحّاله


تعلمت الصبر من كنت طفلٍ بالمهد مزموم

إلين ان صرت رجلٍ لا انتخوا به طوّح اعقاله


وانا ما احلف بعد عمرٍ طويل بدفنة المرحوم

بقول : الله ، ولا غير الله الرحمن نلجى له


ومثل ما بالمطر خوّه الي من هلّ كوم وكوم

انا قلبي بعد يقدر يدك البيد بلحاله


واذا اسمي واصل الدنيا قبل لا القى الحياه بيوم

ابتكرها وانا اسمي يضرب التاريخ بامثاله


واذا ربعي وهم ربعي تناسوا حقي المهضوم

بعيش اشره على قلبي قبل لا ارثي على حاله


واذا كفي طعن كفي براس الخنجر المسموم

بعرف ان النصيب اقرب من الرجال لظلاله


مدام ان الزمن خلّى الشجاع بوقتنا مهزوم

اجل خلّو ضعيف النفس يقصر شرّه أشواله



.



.



للشاعر / حامد زيد