هل رحت للمسؤول ؟

[بوليمر®]

السلام عليكم ،، وكل عام وانتم بخير


مدخل|

يوم الخميس ذهبت مع الوالدة الله يحفظها لي ويحفظ جميع امهاتكم للمستشفى الألماني في المدينة مراجعة عند دكتور الباطنية عشان تاخذ ادوية للسكر والضغط ومراجعة في نفس الوقت

طبعا الدكتور كان زعلان جدا لأن الوالدة ما بـ تلتزم بالدواء ولا بالنظام اللي عامله لها .. وكل ما قلنا لها شي تقول تعددت الاسباب والموت واحد !!

المهم .. كتب الدكتور الادوية ومنها دواء خاص بالضغط .. رحت للصيدلية واعطاني جميع الادوية ما عدا هذا الدوا .. قالي الله يعينك تشتريه من برا وتجيب لنا فاتورة نعطيك حقك !! قلت له بس هذي مو المره الاولى قبل كذا صارت معايا واضطر اضرب مشوار لأقرب صيدلية وارجع لكم ثاني .. والوالدة اكدت الكلام ان كم مره تصير لما اخويا الثاني يروح معاها.

قلت له فين مدير الصيدلية؟ .. قال مش موجود
طيب من المسؤول عن مدير الصيدلية؟ .. هنا فرصعة عيونه شوي وحس اني جدي .. وقعد يتمتم في الكلام وبالقوة وراني على مكتب المدير الطبي للمستشفى.

رحت لمكتب المدير الطبي ... طبعا ما هو موجود وكان فيه واحد في مكتب السكرتارية وشكله كذا اقل منه بشوي ..

سألته وين المدير؟

قال في اجتماع ..

قالي اقدر اخدمك ..؟

قلت ايه .. اعطيته ورقة العلاج وقلت له هذي تقريبا المره الخامسة نجي للصيدلية وما نلاقي العلاج مرتين معايا وثلاثة مرات مع اخويا .. ايش المشكلة عندكم ؟

قلت له ع العموم المره هذي انا بشتكي للمدير الطبي هنا .. ولو ما لقيت حل بروح اشتكي لمدير المستشفى .. لو ما لقيت حل بشتكي على شركة التأمين والشركة عندنا

طالع فيني وقال مايصير خاطرك الا طيب وصور الورقة حقت الدواء وقال انا ارجع لك .

بالفعل رجعنا البيت واشتريت الدوا .. ونمت وبعد العصر الوالدة تقولي ترا المستشفى اتصلوا ويقولوا انهم جابوا الدوا وكلمها المدير الطبي وجلس يعتذر لها ... لب لب لب

رجعت للمستشفى في الليل عشان كنت لسى باخذ نتيجة تحليل الدم وامر الدكتور عشان اشوفه .. المهم كلمني الدكتور وكان مبسوط وقالي ان المدير الطبي كلمه بخصوص العلاج و و و ...

جلس الدكتور يقولي الله يجزاك بالخير انت اخذت حقك وحق ناس كثير ساكتين .. الصيدلية تقريبا فيها ادويه كثيرة ناقصة وناس كثير مضجرة من دا الشي والمستشفى ماهي سألة عن احد.

انتهى ..
كتبت الكلام اللي فوق بالتفصيل عشان تكون الصورة واضحة



نقاش|وحلول

حاب نتكلم عن مسألة التواصل مع المسؤولين واهميتها وهل هي مجدية ام غير ذلك.. وايش اللي يخلي الواحد يسكت عن حقه !!؟؟

- هل نحن بنتواصل معاهم لأخذ لنا حقوقنا ؟
- هل بـ نختار القنوات الصحيحة للتواصل معاهم ؟
- هل بنتواصل مع المسؤولين تدرجيا ام اننا بنتجاوز بعضهم ونطلع لأعلى الهرم من اول مره؟
- هل بتشتكي للمسؤول عن الشخص المقصر في حقك او انك تشتكي لنفس الشخص ويصبح القاضي والخصم واحد؟

النقاط اعلاه تنطبق في جميع المجالات (دوائر حكومية .. جامعة .. مدرسة .. مستشفى ... إلخ)

ياليت يكون النقاش مدعم بالأمثلة الواقعية وان لا يكون اعرف فلان وصار مع فلان .. يعني شي يكون حصل معاك حتى يكون نقاشنا مبني على شي صحيح.