والحل مع الرياضيات يعني :(

[Positive]

السلام عليكم
نزلت درجات الرياضيات الدوري الثاني وجبت درجة محبطة نوعا ما :(
ابغى اعرف هل طريقتي غلط ف المذاكرة
والمصادر اللي اذاكر منها ما تكفي ؟
المشكلة اني سالت وحدة تجيب درجات كاملة ماشاء الله
عن المصادر اللي تذاكر منها
بس ما تقول سبحان الله ! أنانية !
والحل ي جماعة ؟؟؟؟
حلمي ادخل طب
ان شاء الله ربي يعطيني على قد نيتي عمري
ما ترك مساعدة احد لما يطلب مني
الله كريم بس

[Yasmina95]

والله يا إيجابية انا خطة ب
وماني عارفة كيف أساعدك لأني لسا ما جربتها

بس ذاكريها من منهج الثانوي و نفس طريقة الثانوي ممكن تستفيدي من ملخصات جمال السعدي تراه مررة كويس

[Mirinoxd]

بس ما تقول سبحان الله ! أنانية !

واو. هذي النوعية موجودة! متى ينقرضون!!
عموما
أنا كمان خطة ب بس زي ما قالت ياسمينا انا قرأت مرا ف تجربة طالب بس مني فاكرة فين الموضوع, انو الدروس ماتخرج عن دروس الثانوي ابدا
فذاكري من كتبك حقت الثانوي واتدربي دايما على حل الأسئلة
ادخلي على المواضيع المميزة للدفعات الي قبل هما حاطين اشياء مرا كتير يعطيهم العافيه نزليها
آخر شي اتمنى باذن الله ان النسب دي السنة تكون أقل بكثر من نسبة السنه الي فاتت عشان تدخلي طب وتقهري البنت الي ماخذه كامل ف موادها :)

[~Me~]

وعليكم السلام

أول شي أنا ولد

تاني شي ما جبت درجات عاليه يعني كنت الدوري الاول جايب 26 والثاني 24 ودا لاني ما كنت اذاكر كويس الا ايام الاختبارات على خفيف كذا ابو الي اشوف صفحه واقوم افرفر في البيت واخش النت فيس تويتر وارجع اشوف صفحه وكذا يعني

بس لما شفت الاسئله تقريباً كلها ما خرجت من الوورك شوب و النماذج القديمه اتوقع لو تركزي عليهم تاخدي الفل مارك بس تذاكريهم زي اسمك على فكره الدوري الثاني شفت النماذج القديمه 6 اسئلة منها كانت بالنصصصصص ما اتغيرت الارقام حتى كلها زي ما هيا

[Yasmina95]

ايوه زي ماقالوا دوري ع نماذج الاسئلة القديمة للأولاد والبنات و خذي أفكار واتدربي عليها و حطي لنفسك مؤقت
مثلا 30 سؤال بساعة او اقل .....

والوورك شوب برضوا حق الأولاد تفيدك ... وقبل الاختبار صل ركعتين لربنا واقرئي فيها سورة الشرح
صدقيني ربنا حيفتح عليكي و ادعي ربنا دايما تدخلي الطب وتقهري دي الناس الأنانية

بالتوفيق حبيبتي إيجابية ^__^

[Positive]

^
الله يعطيكم العافية حبايبي
ف الدوري الثاني ذاكرت الكتاب + الوورك شوك حقت ابو جبل + جمال السعدي + اسئلة السنوات السابقة
ابغى غيرها
بحضر للفاينل من دحين
وشكرا ع الدعوات الجميلة دي رفعتوا معنوياتي :)

[Positive]

المشاركة الأصلية كتبت بواسطة ~me~ وعليكم السلام أول شي أنا ولد تاني شي ما جبت درجات عاليه يعني كنت الدوري الاول جايب 26 والثاني 24 ودا لاني ما كنت اذاكر كويس الا ايام الاختبارات على خفيف كذا ابو الي اشوف صفحه واقوم افرفر في البيت واخش النت فيس تويتر وارجع اشوف صفحه وكذا يعني بس لما شفت الاسئله تقريباً كلها ما خرجت من الوورك شوب و النماذج القديمه اتوقع لو تركزي عليهم تاخدي الفل مارك بس تذاكريهم زي اسمك على فكره الدوري الثاني شفت النماذج القديمه 6 اسئلة منها كانت بالنصصصصص ما اتغيرت الارقام حتى كلها زي ما هيا

أخوي اسئلة الأولاد أسهل بكثير من اسئلة البنات
وكمان اللي ف الوورك شوب اسههههههل من مستوى الاختبار بكثير :)
انا ابغى شي يكون مستواه عالي
عشان لما تجيني اسئلة صعبة حبتين اعرف أحلها

[~Me~]

صح الوورك شوب اسهل من الاختبار بكثير حتى من اختبارنا نحن يعني اسهل سؤال كان زي اصعب شي في الوورك شوب

بس الوورك شوب كان يعطيكي الافكار والطرق لو اتدربتي عليها من النماذج راح تجيبي درجه عاليه

بعدين معقول ذاكرتي الكتاب + الوورك شوك حقت ابو جبل + جمال السعدي + اسئلة السنوات السابقة

وجبتي درجه مو عاجبتك شكلك جبتي 29 وتقولي خبصت زي الدوافير !

بصراحه مدري ايش اقولك اذا ذاكرتي كل ذي الاشياء وتبغي تذاكري زياده !!

ما شاء الله عليكي ... ياخي أبغى اعرف شي انتو البنات كيف تبلعو الكتب وتجلسو عليها

والله ليلة الاختبار اذاكر ( بنص ضمير وإخلاص ) و بدون نفس كمان

ما شاء الله بس

طيب انتي شفتي نموذجنا ؟

[wafa al7arbi]

يب أنا قالولي الوورك شوب مدري شت دي وداكرتها بس كانت مره سهلة مافيها شي معقد . وداكرت الكتاب وحضرت سكاشن ورحت لاستادة سويت اللي عليا واكتر وجبت ف الاختبار 25 صح انها مو داك الشي اللي نازل بس صراحة ماعجبتني لأنها مو قد المداكرة والله .
فأبغى مصادر من جد تخلي الواحد يجيب درجة طفشنا ي خي :(

[Positive]

المشاركة الأصلية كتبت بواسطة ~me~ صح الوورك شوب اسهل من الاختبار بكثير حتى من اختبارنا نحن يعني اسهل سؤال كان زي اصعب شي في الوورك شوب بس الوورك شوب كان يعطيكي الافكار والطرق لو اتدربتي عليها من النماذج راح تجيبي درجه عاليه بعدين معقول ذاكرتي الكتاب + الوورك شوك حقت ابو جبل + جمال السعدي + اسئلة السنوات السابقة وجبتي درجه مو عاجبتك شكلك جبتي 29 وتقولي خبصت زي الدوافير ! بصراحه مدري ايش اقولك اذا ذاكرتي كل ذي الاشياء وتبغي تذاكري زياده !! ما شاء الله عليكي ... ياخي أبغى اعرف شي انتو البنات كيف تبلعو الكتب وتجلسو عليها والله ليلة الاختبار اذاكر ( بنص ضمير وإخلاص ) و بدون نفس كمان ما شاء الله بس طيب انتي شفتي نموذجنا ؟

ههههههههههههههه كذا البنات سبحان الله دوافير
يأكلوا الكتب ماشاء الله
اذا ما شديت حيلي
اعتبر الطب في خبر كان لانه اكثر البنات يبغوا طب الله يستر
لا ما شفت نموذجكم احنا اختبرنا الرياضيات اول يوم يوم الاحد مو دا اللي قبله
اتوقع أنكم اختبرتوا بعدنا
الله يسهل :)