آرائكم بخصوص معهد دايركت انجليش

[الحجازي]

السلام عليكم ورحمة الله وبركاته ..

اخواني ارغب في التسجيل في معهد لتعلم اللغة الإنجليزية...لأن كما تعلمون نحن طلاب الإنتساب لانجد الفرصة لنمارس اللغة وتطبيق مهاراتها في ظل انعدام التواصل بيننا وبين المحاضرين في جامعتنا العزيزة، ففكرت في اخذ كورسات على يد متحدثين اصليين ومتقنين ووجدت الفرصة في معهد دايركت انجليش حيث ان سمعته متميزة وقرأت في كذا موقع أنه الأفضل
المهم توجهت لمقر المعهد لآخذ فكرة عن العروض لديهم ، وعمل اختبار لتحديد مستوى..
وقررت أن أتوكل على الله وآخذ دورة مكونة من 6 فصول مكثفة وأحصل على ( الشهادة الشاملة) وبحسب كلام المسوؤل في المعهد فالشهادة معتمدة من وزارة التربية والتعليم..

سؤالي لكم أخواني: هل هناك من سبق وان درس في المعهد وتحصل على شهادة منه ؟ وبم تنصحوني؟...

أرجو الإفادة لفائدة الجميع ، ولكم جزيل الشكر..

[الحجازي]

هههههه ثاني موضوع واستفسار على التوالي، لم اتحصل فيه على اي رد او استجابة...

يمكن لو غيرت المعرف من الحجازي إلى الشمالي أو إلى الجنوبي ، كان اختلف الوضع
ان شاء الله اكون مخطيء..

الله يوفق الجميع على كل حال....

[~ Sasy]

^
بصرآحة أنآ مآ قد جربته ~
بس خلآل بحثي في قوقل .. لقيت إنو جيد و الكل يمدحو ~

عالعموم اللغه بأي حآل من الأحوآل تحتآج إلي الممآرسة و تطوير الذآت ( يعني لو كنت تروح عشرين معهد و إنتآ مآ تطور نفسك و تمآرس إلي تعلمتو و تقوي نفسك من خلآل قرآه كتب و هيك مرآح تمشي )

توكل على الله و سجل ~
وإذآ تبغى معلومآت زيآده أكتب في قوقل " دآيركت إنجليش " و شوف رأي إلي كآنو يدرسو هنآك ~
موفق بإذن الله =)

[سعادة الطالبه الشاطره]

المشاركة الأصلية كتبت بواسطة الحجازي يمكن لو غيرت المعرف من الحجازي إلى الشمالي أو إلى الجنوبي ، كان اختلف الوضع ان شاء الله اكون مخطيء.. ..

طبعا مخطي .,,
سبحان الله معقول لسا في ناس يفكروا بهذه الطريقه .!!!

[yousef1]

وعليكم السلام ورحمة الله وبركاته

اخي الكريم

مناهج دايركت انجلش رائعه ولكن يبقى تطوير اللغه يحتاج الى مجهود منك اكثر

وان كنت ارشح لك موقع انجلش تاون

English Town

وان كنت لم اجربه

وتمنياتي لك كل التوفيق

[السعيد 2009]

وفقك الله ادخل المعهد ويمكن تنفعك في التعيين اذا رغبت بالتدريس كخبره

[saadoony]

أنا خريج معهد دايركت إنجلش عام 2007 فرع السويدي والذي أستفدت منه الفائده الكبيره رغم غياباتي المتكرره المهم الذي أذكره أنهم يختبرون لغتك وبعدها يحددون مستواك لكن نصيحتي أبدأ معهم من المستوى الأول لكي تستفيد وتحسب لك كشهادة دبلوم المهم هم يعطون خمس حصص موزعه على أيام الأسبوع واللي هي القواعد والقراءة والمحادثه والإستماع وأخيراً الكتابه واللي ماهم مركزين عليها كثير المهم لا تفوت لا محاضره خصوصاً حصة اللاب (الإستماع) لأن جزء كبير من الإختبار يأتي منها وأنا من الناس اللي ما حضرت ولا حصه من اللاب وتحسفت لأن وقتها كان فيه إبتعاث للمتفوقين من الـ 95 وفوق كذلك لا أنسى أن سبب تطور لغتي هو كادر المعلمين وأفضلهم الملاح كمدرس للماده الأساسيه أما المحادثه كان فيه جنوب أفريقي و باكستاني وبريطاني أسمه يعقوب على مدار الست مستويات وفي النهايه أقول لكـ دش وأنت مغمض وأي إستفسار أنا تحت أمركـ.

[saadoony]

المشاركة الأصلية كتبت بواسطة الحجازي هههههه ثاني موضوع واستفسار على التوالي، لم اتحصل فيه على اي رد او استجابة... يمكن لو غيرت المعرف من الحجازي إلى الشمالي أو إلى الجنوبي ، كان اختلف الوضع ان شاء الله اكون مخطيء.. الله يوفق الجميع على كل حال....

أخوي كلامكـ هذا يعور القلب ما يصلح ياخي كلنا لبعض وبعضنا للكل اللهـ يوفقكـ دنيا وآخره

[[:مريــم:]]

انا اتذكر درست قبل كم سنة في british council جداا ممتاز

بس غالي شويتين الكورس الواحد ب 2000 تقريبا

وقبله تحديد للمستوى 150

المناهج من oxford ع ما اعتقد <<< نااسيههه

بالنسبة للبنات بس قسم الاولاد الله اعللم

عموما british council يعتبر الافضل في جده من خلال بحثي بقووقل

مووفقين باذن الله

[asim]

المعذرة أخي الحجازي للتأخر في الرد
أنا أخذت في هذا المعهد ثلاثة مستويات ( 6 شهور ) وأخذت الشهادة بتقدير ممتاز وأنا مستواي الحقيقي متدني للغاية
وأكثر المواد هنا في الجامعة يا الله بالستين أعديها .
طريقتهم تعتمد على تعليم نفسك بنفسك
يعطونك سيدي فيه مقاطع فيديو تشاهدها على جهازك في البيت
وحصة معمل على الكمبيوتر عندهم تشاهد فيها نفس المقاطع
وحصة مع المعلم يشغل لك نفس المقاطع .
وحصة المحادثة ما تستفيد منها لأنها جماعية والأقل حياء ما يترك للمتعلم مجال .
وفي الأخير ادفع وخذ شهادة بدون فائدة .

العجيب أنني انشغلت عنهم بعد تخرجي من عندهم ظناً مني أن تخرجي يعني الحصول على الشهادة
وقلت الشهادة إذا فضيت مريت وأخذتها من عندهم
وبعد شهور مريتهم وقلت أنا تخرجت من عندكم قبل كذا شهر ولكن ما أخذت شهادتي والآن أريدها
فاخذوا في التحقيق معي , من الذي درسك وفي أي غرفة وكم جبت في الاختبار ومين كان مدير الفرع ومن هذا القبيل
قلت يا جماعة المفروض كل شيء مسجل عندكم اسمي فلان ودفعت مبلغ 6000 ومعي الفواتير اعطوني شهادتي
قالوا خلاص راجعنا بعد شهر لأن الشهادة تذهب إلى الرياض وتوقع من هناك ولابد من التأكد ( طبعاً أنا في الجنوب )
وخرجت من عندهم وبعد حوالي شهرين رجعت لهم فأعادوا علي نفس التحقيقات وقد تغير موظف خدمة العملاء واصبح أكثر جهلاً المهم سجلوا اسمي وجوالي من جديد وقالوا اسبوعين وراجعنا وبعد فترة اتصلوا بي واعطوني تلك الشهادة نجاح بنسبة 87% التقدير ممتاز ,, والدعوة لعب في لعب .
نصيحتي لا تدفع فلوسك إلا فيما يفيدك .