فضلا لا امرا الاجابة على اسالتي لاستفيد انا والغير

[حاير بديرتي]

بسم الله الرحمن الرحيم

السلام عليكم ورحمة الله وبركاته
بمناسبة ان هذي اول مشاركة لي بهذا المنتدى الجميل والمنظم هو واعضائه الكرام ............امسي عليكم بالخير

عندي كم سؤال بخصوص /فرع جامعة الملك عبد العزيز برابغ , فارجوا منكم فضلا لا امرا الاجابة عليها لتعم الفائدة للجميع ويكتب الله لنا ولكم الاجر .

أولا :كم النسبة المطلوبة بالتحضيري لدخول كلية الطب ؟ واذا كانت تتغير من سنة لاخرى كم هي اخر نسبة وقفت عندها السنتين الي فاتت ؟؟

ثانيا :هل تفرق الدراسة بفرع جامعة الملك عبدالعزيز برابغ عن الجامعة الأم بجدة ؟ من حيث ( الشهادة وقوتها - الاختبارات ووضع الاسئلة )

ثالثا :هل من الممكن بعد انهاء سنوات الدراسة ان اتم سنة الامتياز بمدينة انا اختارها ام اجبارية من الجامعة يتم اختيارها لي ؟

حبيت اسالكم بما انكم اهل الخبرة عن هذي الاسئلة واتمنى منكم الرد الوافي والكافي , واعذروني اذا اطلت معاكم واخذت من وقتكم الثمين .

هذا واسأل الله لي ولكم بدوام التوفيق والنجاح .........

[بشائر الفرح =)]

أهلاً وعليكم السلام ورحمة الله وبركاته

حياك الله

أولاً بالنسبه لفرع رابغ .. فأفضل من سيجيبك هم طلاب الطب اللي يدرسوا ف رابغ حالياً
وبالنسبه لآخر نسبه قبلوها ف رابغ فممكن تلاقيها ف قسم التحضيري نسب كل الأفرع موجوده ف جدول واحد
بعد إتمام التحضيري
المعروف إن النسبه بتزيد كل سنه .. فأنت حاول دايماً إنك تكون أعلى من نسب السنوات اللي فاتت عشان تكون ف السليم

وبالنسبة لقوة الشهاده وكذا هي نفسها شهاده اللي يدرس ف الفرع الأساسي نفسها للي يدرس ف الشمال ما تختلف لإنكم كلكم خريجين جامعه وحده
الإختبارات ووضع الأسئله ممكن يختلف بحسب الدكاتره الموجودين اللي ماسكين القسم ومسؤولين عنه بس ماعندي خلفيه كامله عن هذا الموضوع

اللي أعرفه بالنسبه لسنة الإمتياز إنك حر فيها بنسبة 90% تأخذها ف المستشفى اللي تبغاها وف المكان اللي تبغاه كمان
سمعت إنه في شهر أو شهرين ملزم تأخذهم ف المستشفى الجامعي بس برضوا ماني متأكده من هذه المعلومه
بس بشكل عام سنة الإمتياز ما إنت مجبور تأخذها كلها ف مكان واحد تقدر تتحكم فيها زي مايناسبك ويناسب ظروفك ورغبتك أولاً وأخيراً

بالعكس أهلاً وسهلاً
إسأل ولا تتردد
إن شاء الله أكون أفدتك و بالتوفيق يارب

[Yasmina95]

المشاركة الأصلية كتبت بواسطة حاير بديرتي بسم الله الرحمن الرحيم السلام عليكم ورحمة الله وبركاته بمناسبة ان هذي اول مشاركة لي بهذا المنتدى الجميل والمنظم هو واعضائه الكرام ............امسي عليكم بالخير عندي كم سؤال بخصوص /فرع جامعة الملك عبد العزيز برابغ , فارجوا منكم فضلا لا امرا الاجابة عليها لتعم الفائدة للجميع ويكتب الله لنا ولكم الاجر . أولا :كم النسبة المطلوبة بالتحضيري لدخول كلية الطب ؟ واذا كانت تتغير من سنة لاخرى كم هي اخر نسبة وقفت عندها السنتين الي فاتت ؟؟ ثانيا :هل تفرق الدراسة بفرع جامعة الملك عبدالعزيز برابغ عن الجامعة الأم بجدة ؟ من حيث ( الشهادة وقوتها - الاختبارات ووضع الاسئلة ) ثالثا :هل من الممكن بعد انهاء سنوات الدراسة ان اتم سنة الامتياز بمدينة انا اختارها ام اجبارية من الجامعة يتم اختيارها لي ؟ حبيت اسالكم بما انكم اهل الخبرة عن هذي الاسئلة واتمنى منكم الرد الوافي والكافي , واعذروني اذا اطلت معاكم واخذت من وقتكم الثمين . هذا واسأل الله لي ولكم بدوام التوفيق والنجاح .........

النسبة المطلوبة لكلية الطب تختلف من سنة لسنة على حسب شطارة الدفعة ، العام الانتظام وقف على 97.08 و الموازي وقف على 94.778

اذا درستي بفرع رابغ مارح تفرق اذا درستيها بجدة ، اهم شيء نفس الجامعة وخلاص

و بالنسبة للامتياز تقدري تختاري بأي مدينة يعني اختياري

[حاير بديرتي]

يعطيكم العافية وماقصرتوا ....... كفيتوا ووفيتوا

لكن عندي سؤال بسيط هل الدراسة برابغ اسهل من جدة لاني انا مو من سكان رابغ وح اسكن فيها او بجدة يعني ماتفرق عندي بس بغيت الافضل.
ولكم جزيل الشكر

[AoDi]

ما في طب للبنات برابغ.. صحيح؟


اما الاولاد..؟؟؟؟

[بشائر الفرح =)]

^

إذا ماعندك مشكله ف جده أو رابغ
فالأفضل جده طبعاً

لكن من ناحية السهوله أو الصعوبه ما أعرف
ف كل الأحوال الطب صعب ويحتاج تعب وإجتهاد ف أي مكان تكون فيه

وبالنسبه للطالبات مافي طب ف رابغ
بس الأولاد اللي عندهم

[حاير بديرتي]

يعطيكم العافية وجعل ربي يكتبها لكم بميزان حسناتكم

لكن ,... عندي سؤال اخير :

- هل يتم اختيار تخصص الطب قبل دراسة التحضيرية ام بعدها, بمعنى آخر ( هل ادرس سنة تحضيرية خاصه بالطب أو سنة تحضيرية عامة ) ؟

[Maisoe]

المشاركة الأصلية كتبت بواسطة حاير بديرتي يعطيكم العافية وجعل ربي يكتبها لكم بميزان حسناتكم لكن ,... عندي سؤال اخير : - هل يتم اختيار تخصص الطب قبل دراسة التحضيرية ام بعدها, بمعنى آخر ( هل ادرس سنة تحضيرية خاصه بالطب أو سنة تحضيرية عامة ) ؟

- لا تدرس سنة تحضيرية عامة .
وبالتوفيق