تجربتي : بالتفاصيل التدريب و تصنيف ، هيئة التخصصات الصحية *

[حربيه]

السلام عليكم ورحمة الله وبركاته

فيه موضوع كنت اجهله كثير ومالقيت التفاصيل الصحيحه بخصوصه وصارت معي اخطاء راح اذكرها ،
وهو تصنيف هيئة التخصصات الصحية و رخصة الاخصائي الاجتماعي ..
راح ابدا معاكم خطوة خطوة واتمنى توصل لكم كل المعلومات ..


نبدا ..

المرحلة الاولى :
وهي مرحلة التوجه لهيئة التخصصات الصحية كنت جاهله كثيرر ايش المطلوب مني ف شلت كل شي معاي
طلبوني ورقتين بس

المطلوب : صورة من الوثيقة + صورة من الهوية الوطنية
واخذوها قالوا لي تعالي بكرة وخذي ورقة التدريب ،
رحت اليوم الثاني واخذت الورقة ولله الحمد كان مدة تدريبي 3 اشهر
لاني خريجة جديدة ، يعني كل ماطالت مدة التخرج يطول التدريب
سالتهم ايش الخطوة الثانية

قال : توجهي لمركز التدريب والابتعاث التابع لمستشفى الملك فهد


المرحلة الثانية :
رحت بالورقة لمركز التدريب والابتعاث " جنب السكن الخاص بمستشفى الملك فهد "
سلمتهم الورقة قالوا لي تعالي بعد يومين وخذي الورقة
رحت لهم اعطوني الورقة ووقتها ماحددت مستشفى ف حطوا لي مستشفى العزيزية " الولادة والاطفال "
استغربت من هالشي وقالي روحي للمسؤوله ، رحت لها والحمدلله قالت لي كلام يريحني بأن التدريب تمام هناك
وراح استفيد اكثر عندهم .

سالتهم ايش الخطوة الجاية قالوا توجهي لمستشفى العزيزية وهاتي منهم الموافقه بخصوص تدريبك

المرحلة الثالثة :
رحت لمستشفى العزيزية بنفس اليوم مثل ماقالوا لي والحمدلله وافقوا لي على التدريب لان فيه مدربة فاضيه
قالت لي الموظفه : إذا انتي مستعجله وتبين تدربين بسرعه تعالي بعد بكرة وراح نعطيك نسخه ترجعين بها لمركز التدريب والابتعاث وتكملين اجراءاتك ، " لان ارسال الاصل من المستشفى للمركز تاخذ مدة طويله من اسبوع لاسبوعين "
ف قلت خليني اخلص اوراقي بنفسي ولا انتظر حد .
رحت بعد يومين ف اعطتني الورقة حقت قبول المستشفى " مصورة " وقالت بس تروحين تكملين اوراقك وتسددين
وتعالي بداية الاسبوع بنسخة من إيصال الرسوم وإبدي التدريب

المرحلة الرابعه والاخيرة :
رحت لمركز التدريب والابتعاث معاي الورقة حقت الموافقه ، توقعت لي واعطوني ورقه امر بتسديد الرسوم
رحت للمبنى اللي جنبهم لتسديد الرسوم

ملاحظة : تسديد الرسوم " كل شهر 1000 ريال " فطلبوني المبلغ كاش دفعت 3000 الاف ريال دفعه كامله
قابلت بنات قالوا تقدرين تقسطينها كل شهر 1000 بس ماني متاكدة ولاسالت حد بهالموضوع

سددت الرسوم واعطوني الايصال رجعت للمبنى الاول اخذوا نسخه من الايصال وسوا لي ورقة مباشرة تدريب و وقعتها
وانتهت اموري هنا ..

وبأذن الله راح ابدا تدريبي الاحد الجاي 19/11/1435

الاخطاء اللي صارت معاي :
1- اخذت دورة الانعاش القلبي < وهذي المفروض بعد التدريب
2- سددت رسوم التسجيل والتصنيف < وهذي بعد التدريب قالوا لي احتفظي بالايصال لين يجي وقتها

قبل ماتبدون تسوون اي شي انصحكم بالبحث المكثف والقراءة بالموضوع
واسالوا اهل الخبررة ولابتحوسون مثل حوستي

اتمنى اني قدرت اوصل لكم المعلومات كامله ومفهومة

دعواتكم : لي بالتيسرر والتوفيق والنجاح بمشواري التعليمي ..

اي استفسار او اي شي تشوفونه غامض راسلوني ع الخاص ..

بالتوفيق -)