سكن الطالبات في جده - أعطونا تجاربكم

[Raw Ali]

السلام عليكم..

لقيت مواضيع بنفس العنوان لكن كلها قديمة وما تنفع

االموضوع إني من منتسبي الرياض، وموظفة كمان - زي أغلبكم- وفي كل مرة تكون عندي أزمة سكن..
ادري ان اختبارات الإنتساب فتحت في الرياض، لكن بحكم إني اشتغل 11 شهر في السنة، فإسبوعين الإختبارات الي كل ترم هي فرصتي الوحيدة إني اخذ أجازة من الدوام.. ولو قعدتها في الرياض بيجيني انهيار عصبي

المهم، في كل ترم كنت اسكن عند اختي لأنها من سكان جده وبيتها تقريبا قريب من الجامعة.. السنة التحضيرية كانت كويسة لأن اختباراتنا كانت بدري ويصادف ان عيالها لسى يداوموا.. اما السنة الثانية فكانت نوع من انواع العذاب لأن اختباراتنا صادفت أول يوم في أجازتهم.. بحكم ان وقت مذاكرتي الصباح.. فأنا اوافق وقت قومتهم.. وبما أن الداده حقتهم راحت في نفس اليوم الي وصلت فيه فتحولت مذاكرتي الى بيبي سيتينق.. وسالفة اني اقعد في مكان بدون ازعاجهم كان خيار غير متاح..

الترم هذا دورت في كل المواضيع عن السكن.. ولقيت الكل كاتب عن نفس البنايات.. اغلب الارقام الي لقيتها ما كان لها شغل بالموضوع، وبعضها مقفل وبعضها مفصول!!

في اللحظة الأخيرة ولمن وصلت مطار جده ارسلتلي وحدة رقم سكن البتول - والمعروف أيضا بريمية- والحمدلله ردت علي صاحبة السكن وقالت فيه غرفة فضيت في نفس اليوم..
طبعا لمن سويت بحث شيكت على الخدمات وشفت الصور الي في المواضيع وكانت جميله.. لكن الواقع المرير بان لحظة وصولي للسكن وبعد فوات الأوان..

وكإنسانة تعتبر إجازة الإمتحانات فترة ترفيهية.. هذي تعليقاتي:
أولا: وصف السكن الموضح كان "شارع التحلية".. لكن لمن ما لقيته وكلمتها طلع "تقاطع الروضة والمكرونة"
ثانيا: المبنى قديم جدا.. الشارع الجانبي الي فيه المدخل مخيف في الليل.. في الفجرية تصحى على صوت تريلات الموية لأن محطة التعبئة أظن هي الي مقابلة السكن.. يعني مهما كان الجو حلو لا تفتح الشباك
ثالثا: لمن دخلت اكتشفت ان الصور كانت فوتوشوب.. يعني ما تشبه ولا شي من الواقع
رابعا: من ضمن الخدمات الي قريت عن توفرها الواي فاي.. لكن ما كان يوصل غرفتي، لازم اتصرمح الين السيب عشان اشبك " الحمدلله الراوتر حقي كان معي"
خامسا: خدمة التوصيل من والى الجامعة كانت كذبة ابريل.. مشواري اليومي للجامعة بس كان يكلف 50 ريال تقريبا غير المشاوير الجانبية "طفروني التكاسي"
سادسا: الساعه 11:30 يتقفل الباب.. وما تقدر تطلب أي شي.. يعني لا تروح عليك نومة وتكمل الليل جوعان "صارت لي كم مرة"
سابعا: الحمام المشترك سبب لي أزمة خيالية خصوصا انه ما يتنظف يوميا "قلوب مكسورة"
ثامنا: انا سكنت فترة الامتحانات بس، لكن دفعوني حق شهر

المهم انها كانت تجربة وما رح اندم عليها، لأني الين ما وصلت المطار وانا مقتنعة اني لازم اسكن لحالي هالمرة بعيد عن الازعاج والنشاطات العائلية.. مرت علي كم ساعة في هدوء وسكينة والحمدلله درجاتي كانت جميلة
ومن باب الأمانة السكن يمشي الحال لكني أحتاج مكان أفضل منه
حكيت تجربتي لأكثر من سبب..

1- أحتاج اعرف إذا فيه اسكان طالبات جديدة.. جميلة.. مواقعها جيدة.. وخدماتها ممتازة
2- أحتاج كمان أعرف إذا فيه في جده شركات توصيل مثل بلوكونيكت في الرياض
3- في حال مالقيت الأشياء هذي.. فالحل الثاني اني استأجر شقة..

قبل فترة كلمتني وحده من هنا وقالتلي إنها بتستأجر شقة وتحتاج أحد معاها.. بس نظرا لظروف الطفرة قلتلها ما اقدر يمكن بوقت ثاني..
وبما أني نسيت اسمها.. فحابة أعرف إذا فيه أي وحدة راح تختبر في جده الترم الجاي وحابه تتشارك معي السكن

الي مهتمة بالموضوع تتواصل معي لأني من الحين قاعده أدور وراح احجز أول ما ألقى