مايخص المستجدين..بالنسبة للمواد..حياكم =)

[Alaa Al ghamdi]

السلام عليكم ورحمة الله وبركاته

حبيت انزل الموضوع هذا بناء على طلب عضوة اخت وعزيزة..

عشان الكل يستفيد من تجربة التحضيري اللي مرينا فيها
ومعليش اتاخرت عليكي..


حتكلم بالعامي عشان يوصل بطريقة اسهل..

واللي عندو اي اضافه مهما كانت بسيطه من دفعه 10 يضيفها للفائده..

راح اتكلم عن كل ماده
وكيف طريقة مذاكرتها
وطريقة اختبارها



اول حاجه حتكلم عن خطه أ
لاني بديت فيها
زي ماالكل عارفه هي 5مواد

الاغلبية حيقولو ياحرام بديتو بالخطه الصعبه
بس انا بالنسبة ليا كانت اسهل بكثير من خطه ب

يعني لاتسمعو لاحد..

ماده الثقافه الاسلامية

ممكن تحسوها دسمه شوية

لان المنهج كثير

وغير كذا حتحسو ان الكلام اللي تقولو الدكتورة في المحاضرة غير عن الكتاب وقت المذاكرة
لان الدكتورة مابتمسك الكتاب وتشرح منو
يعني بتتكلم عن الموضوع لكن مو زي النص اللي في الكتاب خطوة بخطوة

انا كنت احضر الثقافه عشان الحضور والغياب
بس وقت المذاكرة
كل شي حيكون واضح في الكتاب

يعني مالها ملخصات ولا تكتبي شرح مع الاستاذه
مايحتاج

ذاكري كل اللي في الكتاب

وشي ثاني وقت المذاكرة مرررررة حيفيدكم
نماذج الاسئلة السابقه

مرة مرة مرة مفيده
عالاقل تاخذي فكرة عن طريقة الاسئلة قبل الاختبار
بعد ماتخلصي مذاكرة الجزئية اللي عليكي
خذي النماذج وحليها
وحتلاقي الاشياء المهمه متكررة في اكثر من نموذج



ووقت الاختبار ووقت حل الاسئلة

اقري السؤال اكثر من مرة
لانو احيانا يجيك سؤال غامض شوية

يعني ركزززي مرة وانتي بتقري السؤال

خصوصا في الاستدلال
لمن تجيك فقرة ويقلك ايش الدليل اللي عليها

حاجه ثانيه في الاستدلال مهمه برضو

احنا ايام الثانوي والمتوسط

كانت الجملة اللي تدل على الاية وااااضحه
اللي ماذاكرت تعرفها
لكن في الثقافه غير
يعني يجبلك الدليل ويقلك مندرج تحت اي موضوع في الكتاب؟


الاسئلة ممكن تحسوها غامضة زي ماقلت

بس اعيد واقول النماذج يابنات مهمه..



ماده الرياضيات

اللي كانت علمي في الثانوي حتشوفها مرة سهله
واللي كانت ادبي
لاتخاف
لانها اساسيات

يعني مرة سهله ان شاء الله عليكم
في المحاضرات ركزو مع الدكتورة
واي فقره ماعرفتوها اسالو على طول

حاجه ثانيه
اذا كان الكلاس كبير وكان في شوشرة تحسي انك ماتقدري تركزي
لاتستحي وقوليلهم يسكتو او قولي للدكتورة

لانو مرة مرة مهم تكوني متابعه معاها

كنت احضر الرياضيات ومااحب اسحب عليه مو عشان الحضور والغياب
بس عشان تعرفي انتي فين واصلة في المنهج
وتكوني متابعه لكل الملاحظات الصغيرة اللي تقولها عن الاختبار
اي شي تقلك ممكن يجيك زيو في الاختبار اكتبيه على طول
وفعلا راح يجي

الرياضيات يطلبو واجبات
عندكم مخطط ماث 111 في خوارزم بريال
اشتروه وحلو الواجبات
خذو دفتر ابو 60 مثلا

كل نهاية اسبوع تلاقي الواجب المحدد مكتوب في المخطط

ونهاية الترم قبل الاختبارات النهائية سلمو الدفتر او الاوراق للاستاذه

يعني في الجامعه ماحتجي الدكتورة تقلك فين الواجب
ماسلمتي الواجب؟ زي المدرسة
هنا بس ممكن تقلك حلي الواجبات وبعد كل نهاية محاضرة تحددها للي ماعندها المخطط
بس ماتجي تطلبها
لكنها مهمه
وترفع كثيييير في الدرجات

يعني لو مثلا ناقصك 3درجات للمتاز
وشافت اسمك وعرفتك انك متابعه المحاضرات ومتابعه معاها ومسلمة الواجبك
ترفعك
انا اترفعت اعتقد 5او6 درجات

يعني مو درجة ولا اثنين

ونفس ماقلت فوق نماذج الاسئلة مررررة مهمه تطلعو عليها
الالة الحاسبة حيقولو ممنوع الكبيرة جيبو البسيطة

طبعا وقت الاختبار جيبي الثنتين احتياط لانهم بعدين يغيرو رايهم
وماتكوني اتورطتي وماجبتي الكبيرة..

اختباراتها سهله
وفي نقطه برضو بقولها

صيغه اساله الاختبارات
غاااالبا تجي
نفس الامثلة المحلولة في الكتاب واحيانا بالنص بعد
قصدي في نفس مستوى الامثلة

مو زي التمارين اللي بعد كل فصل
اللي تحلوها للواجب
اللي حلت الواجب حتشوف كيف التمارين صعبه تقريبا

يعني وقت مذاكرتك للاختبار الدوري مثلا
لاتضيعي وقتك وانتي تحلي التمارين
ركزي عالامثلة
التمارين معقده مايجي زيها في الاختبار

ماده اللغه العربية


انا صراحه ماكنت احبها
بس هيا سهله

لكن ركزي مرة مع الاستاذه وخلي كتابك معاك اي ملاحظه تقولها
او اي معلومه تحسيها ممكن تساعدك انك تفرقي بين الاشياء الصعبه على طول اكتبيها في الكتاب عند الدرس
عشان تساعدك وقت المذاكرة

مذاكرة العربي سهله مرة
والاسئلة تقريبا سهله
يعني اللي فاهمه القاعده مزبوط تقدر تحل

مو تحفظيها وبس
لا لازم تكوني فاهمتها لانو ممكن تشوفي الاسئلة تقولي احنا مااخذنا كذا في المحاضرة؟
انتو مااخذتو كذا لانها تكون تشرح درس وامثلة بسيطه
بس الاختبار يجيك كلو تطبيق عالقاعدات..
وزي ماقلت ارجعو للنماذج
وفي ملخصات وشرح برضو ممكن يفيدكم

والحضور مهم مرة عشان تفهمي
يعني لمن كنت افوت كلاس عربي
احس اني الكلاس اللي بعدو مو فاهمه لانها ماده يبغالها شرح
بعكس الرياضيات

القاعدات موجوده في الكتاب قدامك
والامثله تحتها محلولة ومشروحه


ماده الحاسب

طبعا سهله

لكن اسالتها تلخبط مررررة
يعني لاتستهونو بالماده يابنات

خصوصا الصح والغلط

يعني حتيجي فيها ابسط الاشياء اللي ماتتوقعو انها تجي

يعني مثلا يديك صورة ايقونة
ويقلك لايش
وانتي مريتي عليها في الكتاب بس تشوفي انها مومهمه؟

واختبارات العملي

لازم تتدربو في البيت
اجهزة الجامعه كلهم شغالين عالاوفيس 2003

يعني اللي عندها اوفيس 2007 في البيت تروح وتركب 2003 عشان ماتتلخبط
يعني ممكن تشوفوها حاجه تافقه بس بنات نقصو كثير فوق 10 درجات عشان الشي هذا؟

لازم لازم لازم تتدربو في البيت
يعني مثلا احنا كلنا وقت اختبار العملي حق الوورد
االاغلبية وانا منهم
قلنا سهل مايحتاج اضيع وقتي

بس وقت الاختبار
اول حاجه تحسو بقلق لضيق الوقت
يعني ساعه الاعشر
ثاني حاجه بتطلبك اشياء احنا مانستخدمها عاده في الورد
يعني احنا بنكتب فيه ونلون ونكبر الخط وبس
هي تخليك تحطي صورة ولازم حجم محدد وعرض محدد
وتحفظي الملف بصيغه معينة
فبيضيع عليكي الوقت وانتي تدوري على اماكن الاشياء هذي وغيرها..

ارجعو للنماذج برضو بس ماحسيتها فادتني
يعني على وقت الاختبار احسهم يجددو في حاجه ماكانت موجوده في النماذج

اللي اقدر اقولو لاتستهونو فيها

وركزو في الصح والغلط


ماده الانجليزي

مااقدر افيدكم فيها لان نظامكم تغير
مدري اسالتكم من الكتاب ولا من برا؟

عموما لو من برا الكتاب
ذاكرو القرامر اللي معاكم

والكلمات الجديدة

وبقلكم حاجه
لوكانت الاسئلة من برا الكتاب
ترى القرامر يجي اسهل من اللي تدرسوه
يعني يجي بسيط مرة اشياء كنا ناخذها
زي she
he
is

الاشياء هذي

مايجي في نفس مستوى اللي في الكتاب
هذا من رايي انا مدري عن الباقيين

حيجي في الاختبار
قطعه وعليها اسئلة
اول حاجه اقري على سريع الاسئلة المتعلقة بالقطعه

بعدين اقري القطعه وحلي كل سؤال
اللي ماتعرفيه لاتضيعي وقتك وتحوسي فيه
حطي دائرة عالسؤال
وكملي حلك
وبعد ماتخلصي من الاسئلة كلها ارجعي للورقة وشوفي الدوائر اللي سويتيها للاسئلة اللي ماعرفتيها وفكري فيها وحليها

وحيجي كمان لسيننق

ممكن يعيدو لكم مرتين وممكن لا

اول حاجه قبل مايشغلوه لكم
يعني مثلا بعد 10 دقايق عالاختبار
افتحو صفحه اللسيننق
واقرو الاسئلة مرتين بتركيز
اقرو الاسئلة مع الخيارات حقتها
وارجعو كملو حل
بعدين حتجي الاستاذه حتقول يلا بشغل المسجل اقرو الاسئلة بسرعه وتديكم دقيقه تقرو
ارجعو اقرو مرة ثانيه مع الاختيارات

واذا شغلتو بيصير واضح ان شاء الله
لانك قريتي اكثر من مرة


هذا بالنسبة لخطه أ

خطه ب

ماده الاحصاء

انا اشوف الرياضيات اسهل بس ترى الاحصاء مو صعب
يبغالو تركييييز ولازم لازم ماتفوتو المحاضرات
لانها بتعتمد على بعض
يعني الدرس الجديد يعتمد على اللي قبلو
لو راحت عليكي محاضرة بتحسي انك مو فاهمه
عكس الرياضيات
لمن يجي درس جديد كل شي واضح عندك ولو فاتك كلاس مو مشكلة تقري الدرس وتفهمي

شي ثاني
احيانا الاساذات يدوكم قوانين غير حقت الكتاب تكون اسهل مرة
اكتبيها واحفظيها

ورقة القوانين تجي في الاختبار
بس ترى لو كنتي حافظه كل قانون والله حيكون اسهل لك
لانك بمجرد ماتشوفي السؤال حتعرفي ايش القانون تبعو
عكس لمن تشوفي السؤال
بعدين تقلبي الاوراق الين توصلي لورقة القوانين
وتجلسي تدوري ايت قانون نحل فيه؟

غير كذا قوانين الاستاذات المختصرة ماتكون في الورقة
الورقة يكون فيها قوانين الكتاب
يعني اللي تبغى تحفظها يكون افضل
واذا نسيت شي او شكت باشارة الورقة تكون موجوده

هنا مررررة مهم انكم ترجعوللنماذج القديمة وكلها موجوده هنا في القسم جمعتها لكم

مرة ثانيه اقول لاحد يسحب عالاحصاء
عشان تكوني متابعه مع الشرح ومايفوتك شي

اختبارات الاحصاء يبغالها تفكير شوية في كل سؤال مايكون مباشر يعني زي ماذاكرتيه والارقام تكون كبيرة
بس لاتتوترو حلو برواقه
ودخلو الارقام صح في الاله
بالنسبة للمذاكرة تذاكرو الامثلة اللي معاكم
وحتى التمارين مهمه لانها مو صعبه يعني نقريبا نفس مستوى الامثلة وممكن يجي منها

نهاية كل فصل فيه اختبار ذاتي بشكل خيارات هذا مرة مهم
يعني مو بس تحلي مع الاستاذه وتاشري عالخيار الصح
لا اكتبي شرح كل فقره
عشان وقت المذاكرة مايصعب عليك شي

في حاجه كثير طنشناها اللي هيه الكلام النظري والتعريفات وكذا
قلنا ماحيجي منها شي
لكنها جت
تعريفات وصح وخطا

يعني النظري اقروه بتركيييز لانو يجي منو


ماده مهارات الاتصال
اسهل منها مافي
محاضراتها حلوة وسلسة
واذا قريتي الكتاب مرة واضحه مواضع الاسئلة
ولو رجعتي برضو للنماذج حتشوفي كيف سهولتها
مرة مرة سهله يعني مافي شي اقولو فيها او ملاحظه
بس احفظو كويس وركزو وقت قراية الاسئلة عشان ماتتلخبطو

ماده مهارات تفكير

ماده ثقيلة شوية زي الثقافه

ويبغالها جهد مرة وقت المذاكرة
وطبعا كل واحد ونفسيتو
يمكن في ناس تشوفها سهله
لازم تذاكرو بتركييييز

انا عني كنت احفظ كل كلمة
كل كلمة
يعني مو بس اقرا

صح اني تعبت واجلس بالايام وانا اذاكر الماده لكن في النهاية حليت الحمدالله

اسالتها تجي من بين السطور
مرة مرة ركزو يابنات
واطلعو عالنماذج بعد المذاكرة
اللي شافت انو اكثر من فقرة ماحلتها تعرف انها مو مذاكرة كويس

ركزي مرة في السؤال لاتحلي على طول

اذا جبلك تعريف او معني
افتكري كل الي حفظتيه بخصوص التعريف هذا عشان تتاكدي صح الجواب ولالا

كنا نخرج من الاختبار ماندري حلينا ولا لا
يعني الاغلبية نحل بس ماندري هوا صح ولا غلط
ماكنا نخرج متاكدين مية بالمية
لان الاسئلة غامضة
ولمن تجي الدرجات تكتشفي انك حليتي

والانجليزي زي ماقلت في الخطه السابقه

وانتهينا من مواد الخطتين

وكتبت كل حاجه بالتفصيل الممل
اللي عندو اضافه او استفسار لايتردد الكل موجودين

عذرا عالاطاله
وان شاء الله ماتكونو مليتو من البربرة الزايده =)

[jody 66]

الاء يعطيكي الف عافيه ..

جد ماتقصري .. ويجعلوو ربي في موازين حسنآتك يارب :)

وان شاء الله ربي يوفقك في تخصصك

[فديتني يناسو عليا]

الله يعطييك العاافيه ياارب

كفيتي ووفيتي

والله يوفق الجميييع

[جامعيه18]

يجزااااكي الله كل خير مرة شكرا خيتووو افدتنينا كثييير

بس حابة اسألك وش قصدكـ بــ


عندكم مخطط ماث 111 في خوارزم بريال
اشتروه وحلو الواجبات

[Alaa Al ghamdi]

ويعافيكم يارب

جامعيه

قصدي مخطط لمنهج الماده
يعني كون فيه الامثلة اللي داخلة معاكم في الكتاب
واللي مو مكتوب يعني محذوف


ويكون موجود فيه الواجبات المحدده عليكي
وفيه كمان مخطط للاحصاء


يعني يكون مكتوب فيه الواجبات
يعني مثلا سؤال ١و٢و٣ واجب

و٣و٤و٦و٧ هي الامثلة اللي داخلة معاكم في الدرس هذا

فهمتي ياعسل؟

[jody 66]

أها.

استآذهـ الرياضيات قالت لنآ عليهآآ ,..

[ѕσσмч .●]

..

الله يعطيكِ العآفيه ,

من جد محتاجين مواضيع زي كدا ,

ألف شكر لكِ ,

..

[أحلى زيزو]

يعطيك الف عااااااااااااااااااااااافية الاء المجهود الرائع

ويستأهل التقييم

بس أحب اضيف شي في الأنجليزي

قبل مايشغلو لكم الشريط
بـ 10 دقايق
افتحو صفحه اللسيننق

واقرو الاسئلة بتركيز

وترجمو الكلماااااااااااات اللى تعرفوها بلعربي

وبكذا رح يكون سهل عليكم

والله أنا كنت أسويها وأخذ فيه الدرجة الكااااااااااااملة

[البتول 2010]

جزاك الله خير حبيبتي الاء
والله يسعدك ويوفقك
وانا عارفة انك ما تنسي طلبي
ربي يحقق لك رغبااااااااااااااااااااااااااااتك

[فداك روحي]

مشكوره ياعسل ويعطيك العافيه