نتائج زيارتنا للجامعة بخصوص ادارة الاعمال !!!!

[! سلطـــان !]

السلام عليكم ورحمة الله وبركاته

اولا اعتذر للجميع عن الخبر السار كما كان يبدو لي ... الي كتبته امس

ولكن الله شاهد علي ان كنت حذفت او اضفت حرف واحد من رد العميد

اذا كان العميد الدكتور عبد الفتاح مشاط يرد علي برد عن طريق الايميل واليوم يرد برد ثاني مختلف ليست مشكلتي !!!

وللتأكيد بعدما شرحت للعميد عبد الفتاح مشاط ملابسات الموضوع بداية من تخصصنا ونهاية

من الرسالة الي طلبوا فيها اعادة طلب التخصص الفوري سألته سؤال وكان باللون الاحمر وبخط عريض هذا هو السؤال :

هل نتجاهل هذه الايقونه ونكتفي بالتخصص الفوري الذي قمنا به في شهر رمضان ؟

لاحضوا ما تحته خط ذكرت له هل نتجاهل الايقونة يعني ايقونة التخصص الفوري الي طلعت مرة ثانية ؟؟ وقلت له نكتفي بالتخصص الفوري الي سبق وحددناه بشهر رمضان وهذي كانت اجابته لم اضيف عليها حرفا واحدا :

نعم ان كنت متخصص فاترك الامر

جيبولي طالب بالابتدائي وخلوه يفسر هذا الكلام ؟؟

عموما هذا الموضوع راح ارسله للدكتور عبد الفتاح مشاط ومستعد اتحمل كل النتائج حتى لو وصلت الفصل من الجامعه مدام معي حق ماراح اتنازل عنه نتبع الطرق القانونية داخل الجامعه واذا ما انصفونا راح انتقل لخارج الجامعه اولها لوزير التعليم العالي ومن بعدها برقية
للملك عبد الله والجرائد ومن بعدها اذا انسدت جميع الابواب مافي قدامي غير ديوان المظالم


+++ نتائج زيارتنا للجامعة +++

رحت للجامعة اليوم من مدينة الطائف وكان بأنتضاري اخوي احلام لا تكتمل جاي من المنطقة الشرقيه ( حددت الاماكن لكي يعلم الدكتور عبد الفتاح بالمعاناه والمشاوير الي نقطعها في سبيل اصرارنا على العلم والتعلم ) وبالاخير كل جهه تقول موب عندنا راجعوا المكان الفلاني

توجهنا لمكتب العميد الدكتور عبد الفتاح مشاط وقابلنا مدير مكتبه ع طول قال روحوا للدكتور

عبد الرحمن اليوبي وكيل الشؤون التعليمية قلت له انا الموضوع وعارفينه ان القسم تم الغائه من قبل كلية الادارة والاقتصاد ولكن اعطوا فرصه لطلاب الانتساب والتعليم عن بعد الدفعه 10 يكملون ادارة اعمال بكلية الاعمال برابغ وتم تسكيننا واختيار التخصص وتفاجأنا برساله تطلب اعادة اختيار التخصص وعند الضغط ع الايقونة !!!!!! ادارة الاعمال الي سبق وتخصصنا فيها تبخرت بقدرة قادر فرجاءا جايين من سفر وتعبانين نبي نقابل العميد نستفسر عن هذي المشكله .

اعطانا ورقة قال اكتبوا المشكله وتعالوا بعد صلاة الظهر كتبت المشكله وسلمته الورقه

وبعد الظهر رجعنا وكان في ازدحام شديد دخل اخوي احلام لا تكتمل وجا السكرتي قال خلاص انتظر دورك مع الدفعه الثانيه ( لانه كان يدخلهم ع دفعات ) كلمته ان خويي دخل وموضوعنا واحد قال خلاص هو يفهمه قلت له في تفاصيل انا مطلع عليها اكثر وسبحان الله حتى السكرتي يكلم من ورى خشمه ... احلام لا تكتمل جا بيطلع عشان يدخل معي قال له السكرتي لو طلعت ماراح ادخلك مره ثانيه المهم دخل وحاول يشرحله وكان رد العميد عندي خبر بالموضوع راجع كلية الادارة والاقتصاد

سبحان الله ان راجعنا كلية الادارة والاقتصاد قالوا راجع القبول والتسجيل ... والقبول والتسجيل يقول راجعوا الادارة والاقتصاد , انا بنفسي ارسلت معاملة الكترونية لكلية الادارة والاقتصاد

وردوا علي برد مختصر الرجاء مراجعة عمادة القبول والتسجيل

بعدين عندي سؤال للدكتور عبد الفتاح الان اذا الموضوع خاص بكلية الادارة والاقتصاد وانت مالك اي علاقة لا من قريب ولا من بعيد , وش تفسيرك لرد سعادتكم على موضوع الاعتراض الي كتب هنا بالمنتدى بقسم الانتساب ؟ وطمنتهم وطمنتنا معهم ان الدفعة العاشرة انتساب + تعليم عن بعد راح يسمح لهم بتخصص ادارة اعمال ولكن في رابغ ؟؟ ليش ما قلت لهم راجعوا كلية الادارة والاقتصاد ,

والا لأن طلاب الانتساب كثر ماشاء الله وطلاب التعليم عن بعد هم الاقلية بالجامعه ؟؟

اذا كنتوا يا دكتور تهتمون بالكم اكثر من الكيف فهذي مشكله , نحن طلاب مثلنا مثل باقي الطلاب ولنا حقوق ويجب احترامنا اولا كبشر واحترامنا ثانيا كطلاب منتسبين لهذه الجامعه .

المهم بعد ها الرد قلت خلاص مالنا الا معالي مدير الجامعه اشار علي اخوي احلام لا تكتمل

نروح لعمادة التعليم عن بعد وفعلا رحنا طلبنا مقابلة عميد التعليم عن بعد الدكتور هشام برديسي رد مدير مكتبه عنده اجتماع طيب متى يخلص قال الله اعلم ساعه .. ساعه ونص ما ادري

رحنا لوكيل العمادة للشؤون التعليميه الدكتور داوود مشاط وكنا بغاية الانفعال كلمناه بالموضوع وقلت له يا دكتور انا سبق وكلمتك وقلت لي انك بالرياض هذي ثاني مره اجي جده ابي حل لو سمحت

رد علي الدكتور ان العمادة مالها اي دخل بالموضوع وانهم طالبوا بتوفير القسم برابغ ولكن كلية الاعمال برابغ خاطبتهم بانهم غير مستعدين وانهم وقعوا بأحراج من الطلاب قلت له يعني من كلامك نحن طلاب التعليم عن بعد لنا حق ووقع الظلم علينا اذا في مشاكل من ناحية توفر الاساتذة او اي مشكلة ثانيه صارت هنا مشكله عامه حلها لازم يكون من هنا بالجامعه لكن تصدرون قرارات والضحية الطالب ؟ هذا الكلام لا يقبله لا منطق ولا دين قال والله ما بيدنا شي راجعوا عمادة القبول والتسجيل وقتها مدري كان ودي اضحك من القهر قلت له يا دكتور تونا جينا من هناك والدكتور عبد الفتاح مشاط قال عندي خبر بالموضوع وحولنا ع كلية الاقتصاد وكلية الاقتصاد سبق وراسلتهم قالوا موضوعكم عند عمادة القبول والتسجيل وش تسمي هذا الشيء ؟؟ كل جهه ترمينا ع الجهه الثانيه وكأن طلاب التعليم عن بعد مسببين عبء ع الجامعة .. اذا كنا مسببين لكم عبء ما كان فكرتوا بهذا النظام بالتعليم ,مع العلم انهم المفروض يهتمون بهذا النظام وطلابه اكثر لانه هو المستقبل العالم الان اصبح يدير كل شيء بالكمبيوتر حتى الي يبي يشرب ببسي عن طريق النت وعادي يجي الببسي يمشي الين عنده لا تسلوني شلون ( تكنلوجيا )

ولكن تكنلوجيا العرب هنا هي انك تتمرمط من مدينة الى مدينة عشان بالاخير كل جهه ترميك ع الجهه الثانيه ويقولون موضوعكم مو عندنا

المهم رحنا لمكتب مدير الجامعة واخذت الخطاب معي الي سبق وكتبناه هنا بالمنتدى واضفت له الارقام الجامعية طلعت تقريبا خمسين رقم مع العلم يا دكتور عبد الفتاح هناك الكثيرمن الي تم الغاء قسم ادارة الاعمال عنهم بعد ما خصصتوهم ما قدرنا نجمع ارقامهم بسبب انهم ما يتواصلون معنا بالمنتدى .

دخلت على المدير وشرحت له الموضوع باختصار بناء ع نصيحة مدير مكتبه قال لا تطول اختصر وقول المفيد افظل لك ... ناظر بالخطاب قرأ شوي وقال :

معك توكيل من الطلاب الي كتبت ارقامهم الجامعية قلت له شلون توكيل يعني اسوي وكالة بالمحكمة ؟ قال لا يكتبون اسمائهم وتواقيعهم قلت له لا ما معي كل طالب بمدينه شلون اجيب تواقيعهم قال اذن خذ الخطاب وتكلم عن نفسك لا تتكلم عن البقيه حاولت افهمه واقوله يا دكتور هذي الارقام هي للطلاب بالمنتدى هم اعطوني ارقامهم بإرادتهم وقال اكتب عن نفسك او جب لي ارقامهم واسمائهم وتواقيعهم

طلعت وخذيت ورقه انا واحلام لا تكتمل وكتبنا ثلاث ارباع المكتوب بالخطاب لان الصفحة ما كانت تكفي كانت عبارة عن نموذج والاسطر فيه محدوده وكتبنا ارقامنا الجامعية واسمائنا وارقام جوالاتنا وخذاها مدير مكتبه وحط عليها ورقة معامله وقال اتصلوا يوم الاثنين او الثلاثاء او تعال مكتبي وابلغك بالنتائج


المهم يا شباب الي ابيه منكم الان اي طالب او طالبه بجده او يقدر يروح جده يكتب الخطاب بأسمة هو لا يكتبه نيابة عن شخص ثاني ويسلمه لمدير مكتب مدير الجامعة

البنات يكلمون اي احد من محارمهم ... ماراح يتاخرون ان شاء الله يقول لمدير المكتب معي خطاب شكوى لمدير الجامعه ويخليه عنده وهو يدخله للمدير ان شاء الله ولو ما يقدر يراجع ياخذ رقم التلفون واذا تبون رقم التلفون عندي

عنوان مكتب مدير الجامعه ما يتوه تروحون لعمادة القبول والتسجيل من جهت الاستاد الرياضي وفي مواقف سيارات ارضيه تدخلون من عندها الين يجيكم على اليمين باب قزاز صغير تدخلون معه وهناك اي موضف يدلكم المكتب بالدور الرابع

انا راح ارفق لكم صيغة الخطاب عدلت عليه بحيث يكون يتكلم عن الطالب او الطالبه

في كلمات باللون الاحمر اذا كنت طالب امسح الي يدل ع المؤنث واذا كنتي طالبه امسحي الي يدل ع المذكروعدلوا ع لون الخط يكون اسود والتاريخ بعد عدلوا عليه واكتب اسمك في بداية الخطاب وبنهايته اسمك والمدينه والرقم الجامعي ورقم الهاتف

همسة اخيرة لسعادة الدكتور عبد الفتاح مشاط ( تخيل معي يا دكتور طالب او طالبه يذوق الامرين من اجل توفير رسوم الدراسة البالغة 4000 ريال وبالنهاية تجبرونة يدخل تخصص ما يبيه او ماراح يبدع فيه المقصود هنا ( ادارة عامة ) بالله عليك اي قهر راح يحس فيه ؟ تخيل بس وسعادتكم كنت طالب مثلنا واكيد كان طموحك واحلامك متعلقة بتخصص معين لو حرمت من هذا التخصص وانت طالب منتظم تاخذ مكافئة كيف راح يكون شعورك ؟؟ فما بالك بطالب وطالبه يدفعون رسوم الدراسه والله اعلم شلون يدبرونها وفوق هذا ينجبر انه يدخل تخصص مايبيه ولا يحقق طموحاته )



اخيرا اعتذر مره ثانيه ان كان حصل مني اي تقصير او كان فهمي لرد عميد القبول والتسجيل خاطئ ولكن امامكم السؤال والاجابه واحكموا انتم ( نقطة على السطر ) .