السنة اللي فاتت ... ايش استفدت منها (سنة ثانية)

[سكر الحياة]

أكتب عن كل ما يدور في خاطرك من مواقف , نصايح , وجهات نظر ....
في بداية كل مرحلة جديدة تبدأ الأسئلة و الاستفسارات و ايش تنصحونا .....الخ
موضوع يحتاجه كل مستجد و مستجدة ......
بدأت سنة جديدة و تم تسكيني في كلية العلوم الطبية التطبيقية قسم التمريض <<< هدفي كان أي تخصص طبي
بدينا ما نعرف بعض ولا عندنا أي حماس تجاه هذا التخصص و السبب كانوا أغلب البنات رافضين دخولهم فيه << تخيلوا دكتورة حسنة سألتنا مين دخلت التمريض برغبتها كان الجواب 3 طالبات من 120 طالبة
مر اسبوع ورا اسبوع كانت الدكتورة تعطي المحاضرة و محد يسالها من فين نجيبها ولا من فين نطبعها << غلطة كبيرة وقعنا فيها الى ان تراكمت المحاضرات علينا و قربت الكويزات و بعدها فوقنا من النومة اللي كنا فيها و روحنا ندور على المحاضرات
مـــاريــــا اسم محد يقدر ينساه من طالبات دفعتنا << اسم راعية المكتبة حق التصوير كنا للأسف الشديد نروح و نيجي على المكتبة ما لا يقل عن 3 مرات يوميا و السبب نصور اوراق المحاضرات المتراكمة لأن ما كان فيه لا تنظيم ولا أي شئ
جا منتصف الفصل الأول اخترنا الليدر حقتنا و اختارت السب ليدر اللي مسئولين عن كل مادة << ترتبنا شوووية بس ما زالت اللخبطة موجودة و السبب كل وحدة نفسي نفسي << نصيحتي خلوكم يد وحدة حصلت لنا مشاكل كثيرة ما بين البنات لكن عدت على خير ولله الحمد وخلي الكلام في بالك حب لأخيك ما تحب لغيرك
انتهى الفصل الأول بكل الفوضى و العشوائية اللي كنا فيها و بدا ترم ثاني اتعرفنا على بعض أكثر
صرت co leader بصراحة على قد المسئولية اللي فيها بس ممتعة للغاية تعرفك باشياء ما كنتي تعرفيها و تبينلك كيف التعامل مع كل دكتورة و تفهمك عقلية كل بنت
بداية الترم الثاني طلبنا من البنات مبلغ مالي على اساس نصور الورق و نجيب طابعة للكلاس لطباعة المحاضرات خلينا كل بنت مسئولة عن حاجة معينة << فيه بنات تدخلوا في شغل غيرهم و حصلت شوية مشاكل فنصيحة كل وحدة تكون مسئولة على شغلها و أي خبر يوصلك تروحي لليدر و تبلغيها و بعدين هي تقول للبنات
انتـــبــهي تتكلمي مع الدكتورة أو مع أي بنت عن امور خاصة بالإختبارات و زي كذا و فيه بنات يسمعوكي لأن الخبر حينتقل للكلاس و هو لسه ما اتأكد <<< ما يحتااج حررريم ما شاء الله
حتحصل مشاكل بالنسبة للحضور و الغياب بس من البداية رتبي أمورك لأنك حتلاقي بنات ما يحضروا الا فين و فين و تشوفي قدام اسمها كللله صح و لو غيبتيها يوم تيجي و تقلك أنا حااااضرة و ما ترحمك << من البداية خليكي مستعدة لكل المواقف
حصلت لنا نقلة نوعية من الفوضى صرنا قمة في الترتيب ولله الحمد بفضل الله ثم بفضل جهود الليدر اللي اتحملتنا ومــا قصررت معانا و بعدين بفضل البنات اللي اشتغلوا معانا الله يعطيهم العافية
بدينا ننزل للمستشفى أيام في غاية الروعة على قد الخوف و الربكة اللي كنا فيها لكن مشي الحال و اتأقلمنا ولله الحمد
في المستشفى تلقي كل شكل و كل نوع من حيث التعامل حتقابلي ناس ما يقصروا معاكي ابدا و حتلقي ناس مطنشيييينك لكن عموما في المستشفى اذا ما حشرتي نفسك و روحتي بنفسك ما حتلاقي أحد يطالع في وجهك
لا تسووا تجمعات مع بعض لأن الشي هذا يضااايق الدكتورة مررة و حاولي تبيني للدكتورة انك جاية تشتغلي مو جاية ونس و بس <<< حصلنا موقف من وحدة الله يهديها شافتنا و راحت تكلم دكتورتنا و تقولها الحقي بناتك حاطين ميك اب و جالسين يهرجوا و يضحكوا ومن هذا الكلام والله العالم احنا ايش كنا نسوي بس ما ادري ايش الناس هاذي , طبعا دكتورتنا صدقتنا لأنها عارفتنا و عارفة تصرفاتنا فانتبهي لسلوكياتك أمام الباقين
اعتبري كل المرضى اللي بتقابليهم مصابين بمرض معدي سواء كان رجل أو امرأة لأنك ما تعرفي ايش معاه << اول يوم في المستشفى و دتني الهيد نيرس لمريض مصاب بمرض معدي الله يشفيه و أنا ما كنت ادري سالتها ايش عنده قالتلي عنده نزيف بالمخ وجالسة توريني ايش المضادات و الادوية اللي بتحطها للمريض فجأة دخلت ممرضة سعودية الله يوفقها يا رب قالتلي المريض ايش عنده !! و قالتلي نصيحة في بالي لمن دحين في المستشفى ما حتلقي أحد ينصحك أقرأي ملف المريض بنفسك و اعتبري كل مريض مصاب بمرض معدي عشان تحمي نفسك
استفدت من الموقف هذا مرررة كثيير
انتهت السنة الدراسية بحفلة خاصة سويناها لليدر اللي ياما و ياما تهزأت عشاننا و جاها كلام بسببنا و انطوت صفحة سنة ثانية تمريض أياام كانت ممتعة و فيها مواااقف كثيرة حصلت لنا استفدنا منها و الأن ننتظر سنة جديدة تحمل مفاجآت عديدة ربي يوفقنا لها و يسهلها يــا رب
أسفة على الإطالة بس اتمنى تكونوا استفدتم و استمتعتم انتظر نصايحكم و مواقفكم ..... و كل عام و انتم بخير

[lovely one]

جزاكي الله خير ان شا الله نستفيد من كل كلمة قلتيها

[Mecooo]

فكرهـ رائعهـ و موضوع جمــــيل الله يعطيكي الف عافيهـ

[Mecooo]

شكرا لكي اختي عـ هذا الموضوع


و حبيت اشارك بيه في تجربتي و مواقفي عشان يستفيدو منها المستجدين ان شاء الله

بالنسبة ليا استفدت منها في اشياء كتيييير
كان في البدايه شي غريب من ناحية الدراسه و الدوام اللي يعتبر طويل و ضغط المواد من ناحية انها كتيره

و من ناحية كانت برضو عندنا في بداية السنه لخبطه في الاوراق جربنا كم شي انو كل اتنين من الدفعه مسؤلين عن ماده و ينزلو شيتاتها اول بــاول ,,
بس كان افضل شي لنا انو جمعنا مبلغ من بنات الكلاس كلو و اعطينها لـ الليدر انو كل ما نزل شيت هيا تاخدو و تصورو و تجيبو تاني يوم او ازا ما قدرت هيا بنفسها تنزل الشيت في المكتبه و تبلغ البنات مـــن جد كانت ليدر رائعهـ بمعنى الكلمه الله يجزيها الف خير عـ كتر ما تعبت معنا و جاها كلام بسببنا ....

اما بالنسبه للمواد التخصص كانت الشيتات غريبه علينا انو من ناحيه انو لازم نفهم ونحفظ و الاختبار يجي جزء منو مقالي لانو اتعودنا في التحضيري عـ اسئلة الاختيار من متعدد ,,,,

و كمنا واجهتنا مشكله في الترم الاول بسبب (الاجازات + 9 مواد ) انو اختبار الميد الاول وراه الميد التاني وراه عـ طول الفاينال ما في فتره راحه بينهم خلتنا نهمل المزاكره اول باول ....

و اكبــر غلطهـ معظمنا غلطها في الترم الاول انو ما اعطينا الـللابات حقها (كل المواد لها لاب عندنا ماعدا البايو كميستري ) ممكن بسبب انها كانت دايمن نهايه الدوام و اعتمدنا انو بس نسمع اللاب و ما نطبق كل شي بـ يدنا و لا نطالع في الشيت الا وقت الاختبار و في ماده فيها كم لاب مالو شيت فـ كان المفروض انو نكتب مع الدكتوره و نضيف عـ الشيت معلومات عشان يسهل علينا بس ما كنا نعرف :p

فلما كان يجي اختبار الفاينل نلاقي نفسنا انو ما في وقت نزاكرو (لانو اللاب يكون دايمن في نفس يوم الاختبار النظري) ومحــنا فاهمين شي في الللاب بس الحمدلله عــدا الترم الاول عـ خير ......


اما بالنسبة للترم التاني كان اسهل بكتير من الترم الاول لانو اتعودنا عـ الشي اللي كان اسمو ( الضغط) و اتغلبنا عليه و سار شي عادي و عرفنا طبيعة كل ماده و كيف طريقه اسئله كل دكتور فــ كل وحده فينا عرفت فين نقاط ضعفها ركزنا عليها و صرنا قروب واحد يدنا في يد بعض نشرح لبعض و ننتبيه في اللاب و نركز عليه و نطبق بنفسنا من جد دفعتنا كنا و ما زلنا زي العيله الوحده

و بالرغم باللي مرينا فيه دي السنه بس من جد اكتشفنا قدراتنا فين ممكن توصل و مافي شي اسمو مستحيل و انو اكتسبنا معلومات كتيرررره رائعه بالرغم انها بس معلومات درسناها في سنه وحده بس
وبالنسبه ليا خرجت منها انو كنت اشوف العلاج الطبيعي شي و بعد ما خلصت شوفتو شي تاني رائع افدت فيه نفسي و عليتي و ان شاء الله افيد فيه المرضى في المستقبل

في النهايه يارب تستفيدو مع كترة كلامي هع
و تقبلو مروري ,,,

[سكر الحياة]

lovely one
الله يوفقكم يــا رب و ان شاء الله ما تغلطوا نفس غلطاتنا
mecooo
جزاكي الله خيـــر على مشاركتك و تجربتك المفيدة ما قصرتــي الله يعطيكي العافية

[AM00NA]

مآشاءالله كفيتي ووفيتي يآدكتورة ..

يعطييك العآفيه وكل عآم وانتو بخيـر

[BdOoOor]

من جد خبراتكم نستفيد ونتعلم منها كثير
الله يعطيكم العافيه

[طالبه حايصه]

سكر حياة ..



اهنييييييك على هالموضوووع .. جد ملخص حلو عن السنه ككل ..

جزيتي خيرا

[weddah]

سكر الحياة مشكورة على الموضوع الحلو والمفيد
ما قصرتي انتي وMecooo يعطيكم العافية

[Dr.Shaikhah]

سكر حيآه

جزآك الله الف خير افدتينآ بتجربتك انتي وميكو

وبإنتظآر البقيه