تجربتي وتجارب دفعة 2014 للبحث والتدريب

[Abrar88]

السلام عليكم ورحمة الله وبركاته
طاب مساءكم أعضاء المنتدى اولا ابارك لكل الناجحين والمتخرجين من طلاب وطالبات والله يديم علينا النجاح دائما
ثانيا كتير منا بيكون متخوف من مادة البحث والتدريب في الترم الاخير فحابة نجمع تجاربنا كخريجين لدفعة 2014 لإفادة غيرنا ومساعدتهم فيها
ابدأ انا بتجربتي :
قسمي؛ تنظيم وتطوير اداري
استاذة البحث: دكتورة أمال عوض
عنوان بحثي: اثر الثقافة التنظيمية على الاداء الوظيفي
مكان تدريبي: ميديكل الخطوط السعودية
تقسيم الدرجات: 70 عالبحث مقسمة على حداثة الموضوع وتنسيق الافكار وعدد المراجع وطريقة كتابة المراجع في الحاشية والمناقشة و30 درجة عالتقرير والتدريب
درجتي:الحمدالله 95
رأيي في الدكتورة:انسانة بشوشة وطيبة طمنتنا عالآخر تتواصل معانا عالايميل وعالواتس اب وفي ساعاتها المكتبية بالرغم انها كانت مرة مضغوطة لأنها كانت ماسكة 3 شعب للتدريب في كل شعبة 40 طالبة غير المواد الي بتعطي محاضرات ليها واختبارات

تفاصيل عن التدريب: في الترم دا فقط التدريب كان اختياري مو اجباري ولقسمنا بس باقي الاقسام كلها كان اجباري، بسبب مشكلة سوها بعض البنات ، وكان قرار جعل التدريب اختياري في صالح بعض البنات في خارج جدة او او لظروف اخرى، انا قررت اتدرب لانو دكتورتنا قالت الي حتدرب حتاخد درجات عالتدريب والتقرير تعملو عن تفاصيل التدريب والي محا تدرب تكتب التقرير بشكل عام عن موضوع التدريب من كتب حديثة
تدريبي كان اغلبو عالكمبيوتر وبالاخص عالوورد والاكسل اكتب تقارير وخطابات واعمل احصائيات كان ممتع فترة اسبوعين وبعدها استلم من مشرفة تدريبي تقييم التدريب في ظرف مغلق واسلمو يوم المناقشة مع البحث والتقرير

تفاصيل كتابة البحث: في البداية اخترنا مواضيع وراسلناها عالايميل وهيا اختارت موضوع من ضمنها وشرطها كان المراجع تكون جديدة من 2010 وفوق بس كان صعب كل المواضيع تكون حديثة فبعض البنات كلموها تتنازل شوية فقررت من 2007 وفوق وتكون متنوعة مابين رسايل ماجستير ودكتوراه وكتب ومجلات علمية ، بالنسبة ليا انا جمعت مراجع من النت ومن الجامعة ومن كتب درسناها من قبل ومن مواقع علمية ورحت مكتبة جرير عشان اجيب كتب حديثة يعني نوعت في المراجع وبعد كتابة البحث ومتابعة محاضرات السنترا وخطة البحث ومشيت على نفس طلبات الدكتورة في منهج البحث واهمية البحث وباقي التفاصيل، مراجعي طلعت 35 مرجع وعدد صفحات بحثي 39صفحة،، مهم جداا حضور محاضرات السنترا لانها توضح كل شي بالتفصيل وبعد الانتهاء نرسل البحث والتقرير على ايميل الدكتورة اذا عجبها تردلنا اطبعي وحددي موعد للمناقشة اذا في تعديل على شي تطلب منك تعدلي وتطبعي التقرير لحال والبحث لحال والتغليف يكون عادي في البلاستيك ماتبغى التغليف الجلد

واخيراا تفاصيل المناقشة: حمدالله مناقشتي كانت سهلة وسريعة سلمتها البحث والتقرير وتقييم التدريب اتصفحت بحثي وسألتني كم سؤال عن اهمية البحث وعدد الرسايل الي كتبتها وكم تعريف من الجزء النظري وفي النهاية قالتي موفقة خلاص استنو الدرجات مع الاختبارات تنزل
والحمدالله بكدا انتهيت من المادة وكل شي بفضل من الله

ياريت كل وحدة تكتب تجربتها لافادة غيرها .... موفقين يارب

[لمار عزوز]

جزاك الله خير أختي بروره ،، ولي عوده أكتب تجربتي واللي كانت مع الدكتورة سحر مهران

[لحن الذكريات]

الله يعطيك العافيه موضوع مفيد وافادني لان السنه الجايه باخد المادة

[الماسي1]

بحث عند الدكتور عدنان بالخيور

رسلت البحث ب الايميل و قلي انتظر النتيجه

و الحمدلله اعطاني 90

صراحه كونت متخوف من الدكتور بسسبب الكلام الي عليه من المنتدى و تعامله مع الطلاب في بعض المواد

بس طلع دكتور ممتاز و يساعد الطلاب الله يعطيه الف عافيه

هذه تجربتي ب التوفيق للجميع

[أزحف وراك]

ممتاز ماشااءالله عطاك 90

اكثر الطلاب والطالبات اخذو مابين 70 الي 85

يارب
اطييح بدكتور يعطينا درجه حلوه

والف مبروك لكل خريج وخريجه وعقبال الماستر

[*sweet smile*]

السلام عليكم
تجربتي كانت مع استاذة سحر مهران
الله يسعدها يا رب
القسم : تنظيم و تطوير اداري
استاذتي : د. سحر مهران
كانت استاذة مقسمة درجات البحث على 70 للبحث و 30 للتدريب و 20 للمناقشة
الاستاذة الله يسعدها كانت طيبة معانا و متعاونة جدا حتى و هي مضغوطة تجاوب على استفساراتنا
البحث :
* ريحتني من ناحية اختيار اي موضوع حتى لو مكرر بس كانت تفضل انوا يكون البحث عن شي غير مألوف او مكرر
* ماهي زي الاستاذات الثانيين لازم على كل جزئية اراجعها لانوا كان همها الاستاذة انوا البحث لما تجي تقرأو تفهم منو عن ايش تتكلمي << يعني مو منقول
* و اعطيها المجال انها تشرحلك كل جزئية اش تبغى منها و بعدين اسأليها
بنات كثير بالسنترا الله يهديهم كل شوي يقاطعوها بالكلام و بالنهاية الاستاذة و البنات يتخلبطوا
التدريب :
كان باي مكان اهم شي انوا مكان حكومي
اهم شي عندها ورقة التقييم توصلها يوم المناقشة
التقرير :
برضو كان عندي الحرية في ترتيبه بس اهم شي تكون فيه كم نقطة حددتها
زي تعريف التدريب و اهميتو و ايجابيات و سلبيات اللي شفتها بمكان التدريب ... الخ
انتوا وقت السنترا او اذا رحتوا لها رح تعرفوها
المناقشة :
* كانت حلوة و بسيطة بس طولت شوي تقريبا ربع ساعة لكن ما حسيت انها ربع ساعة
لانها تبغاكي تشرحي الموضوع مو تسمعيه بالنص
* طبعا اذا شافتك فاهمه موضوعك رح تسألك اكثر عن الموضوع
* برضو ملاحظة جدا هامة : لازم يكون موضوعك مرتبط بمكان التدريب يعني لو انتي تكتبي عن مشكلة رح تسألك هل بالفعل شفتي هاذي المشكلة عندهم و كيف الحلول اللي ممكن تقضي عليها و كذا

التواصل :
الاستاذة ترد على جوالها لكن في ساعاتها المكتبية بس بالايميل ما كانت ترد علي
لانها كانت مشغولة مرا
حتى اتذكرت قالتنا هي تفضل انوا نجيها لمكتبها افضل من انوا نرسلها بالايميل

و الحمد الله الاستاذة اعطتني الدرجة اللي ترضيني
الله يعطيها العافية و يسعدها وين ما كانت يا رب

[orca1]

الله يوفقكم وعقبالناا ياااااارب

[H A N O O]

أول شيء حابة أشكرك يا أبرار على ذا الموضوع اللي راح يفيد غيرنا بشكل كبير

تجربتي مع البحث والتدريب

أخذت المادة مع أستاذة : رغداء الرملي
كانت مره حبوبة ومتعاونة مررره معانا ,, سهلت لها أمر البحث كثير الله يسهل أمرها
طبعا التدريب كان اختياري
وقسمت لناا الدرجات 30 تقرير 70 بحث

أنا تدربت في جمعية خيرية
عشان اكتسب الخبرة وبالفعل كانت اسبوعين جميلة وممتعة جداً

بالنسبة للبحث
الاستاذة ربي يسعدها كانت مسوية لنا الخطة على وورد نمشي عليها
مسوية لنا نموذج للبحث نمشي عليه كأننا نعبي الفراغات بس
+ كانت طالبة مننا 3 رسائل ماجستير ( 2 عربية + 1 سعودية )
+ خطة بحث مقترحة
طلبت مننا المصادر من 2012
+ صور لأغلفة الكتب اللي اقتبسنا منها
وطلبت مننا نجيب البحث والتقرير نسخة ثانية بال usb عشان تتاكد من المصادر

التغليف ماحددت لنا قالت كل وحدة وذوقها

المناقشة كانت شاملة للبحث والتقرير

كان كل شيء واضح وسهل

يعني لا تقلقوا
كل أستاذة ولها أسلوبها
والحمدلله درجتي كانت حلوة
وعلى قد تعبي

والله يوفق الجميع يارب
أتمنى إني أكون أفدتكم ولو بالقليل ... :)

[فراشه ورديه]

السلام عليكم ورحمة الله وبركاته..
أشك الأخت أبرار على حرصها لهذا الموضوع المهم للجميع

تجربتي مع البحث والتدريب

أخذت المادة مع أستاذة : إقبال خاطر
كانت قمة بالذوق والتعامل وسرعة الرد لأي سؤال في البحث سواء عن طريق الأيميل او الواتس اب ,, سهلت لها أمر البحث كثير الله يسهل أمرها
طبعا التدريب كان اختياري
وقسمت لناا الدرجات 30 تقرير 70 بحث

للبحث :
الاستاذة كانت مسوية لنا الخطة على وورد نمشي عليها .
التدريب :
كان على حسب المستطاع (يعني اللي تقدر تدرب وتجيب تقرير عن التدريب اوك عادي اللي ما تقدر تعمل تقرير عن موضوع التدريب بشكل عام )
التقريرالتدريب :
كانت مسويه خطه ورود نمشي عليه مثب البحث
المناقشه كانت سهله مجرد سوالين عن البحث و سوالين عن التقرير

أنصحكم معها تاخذون البحث وتقدر الطالبات خارج مدينة جده مراعاة لضروفهم وغير كذا تحترم وتقدر الطالبه اللي يكون تعاملها راقي ومحترم
مسهله البحث كثير مافيه خاتمه مافيه نتائج تحب البساطه وبشكل مختصر و مفهوم الأهم تكونين فاهمه ايش اللي كاتبته بالبحث

الف شكر أستاذتي اخذت عندها 95

والله يوفق الجميع

[bdabaan]

شمسان حتى الان لم يصد الدرجات