كيفية معرفة الفرق بين المواد الحرة والاختيارية في نظام الخدمات الإلكترونية ( بالصور )

[أبو فاتن]

	السلام عليكم ورحمة الله في البداية كل عام والجميع بألف خير وعيدكم مبارك وعساكم من عوادة يارب قبل أبد في الموضوع حاب أتقدم بالشكر الجزيل لله سبحانه وتعالى ثم لأخي الغالي راؤول ( RAUL 7 ) لأنه أتاح لي إستخدام حسابة في الأوديس عشان أستعين فيه في عملية الشرح والتصوير ( يعني بيني وبينكم هو سلفني الاوديس حقه بس مو ببلاش ,, حسب علي الربع ساعة بـ 10 ريال ذكي الشمري عرف إني ما راح أكمل ساعة ) أمزح يا جماعة الخير لا أحد يصدق بالعكس عطاني حسابة بكل نفس وخاطر طيب ولاهيب غريبة على نسل الشيوخ أبو سعد فجزاه الله عني وعن كل من يستفيد من هالموضوع خير الجزاء في بداية الأمر موضوعنا راح يكون لطيف وخفيف الظل وشحليله <<< حشى صار آدمي مو موضوع وهو عبارة عن شرح سريع لتوضيح الفرق بين المواد الحرة والأختيارية وإثبات وجودها في نظام الخدمات الإلكترونية الـ( odus ) وكيفية التفريق بينهما لأنه بصراحة جتني تساؤلات كثيرة خاصة بهالموضوع وشفت كثير من اخواني وخواتي الطلاب مو مواضحة لهم الصورة بالوجه المطلوب فحبيت إني أقدم ولو شيئ بسيط لأخواني وأساهم على قدر إستطاعتي بأي شيئ أحس إنه بيكون مفيد لمن سيستفيد منه إن شاء الله هذي بعض المشاركات اللي كانت تسأل عن المواد الحرة والاختيارية وآثارتني لطرح هالموضوع ( وإن كان هالموضوع لا يهم الطلاب في المستويات المتقدمة لأنهم عارفينه وأنا عارف إنهم عارفين وشاطرين وممتازين فديت خششهم ,, بس هذا للناس اللي للحين ماهم عارفين وحابين يعرفون ) 8 8 كم راء وعين وفاء فيما بين الأقواس ؟ هههههههههههه إقتباس المشاركات : السلام عليكم ورحمه الله وبركاته افيدونيي الحين في الحذف والاضافه موجودهالمواد الحره والاختياريه ولكن بمسمى ماده حرهكلهااا شلوووووووون؟؟؟ يعني اذا اخترت ماده اختياريه وهو كاتبعليها حره تنزل بالجدول وشوووو؟؟؟؟ السلام عليكم ورحمة الله وبركاته حبيت استفسر على المواد المستوى الخامس عندي مقرر اختياري دخلت على الاضافه والحذف ماحصلت مقرراختياري كلها مقرارات حره مع ان على حسب معلوماتي انها تختلف عنبعض فياليت اهل الخبره يعطونا خبر وتوضيح في هالنقطه في الاوديس هل همواحد او انا ما نزلي مقرر اختياري لسى السلام عليكم ورحمه الله وبركاته كيف اقدر اضيف الموادالحره؟؟؟ المواد الاختياريه عن طرق الاوديس في خانه الحذف والاضافه..اماالمواد الحره؟؟؟ في البداية ضروري الكل يعرف ماذا تعني المواد الحرة والاختيارية ,, وراح نشرحها بشكل سريع وحتكون الأمثلة خاصة بكلية الإدارة والإقتصاد مسار إدارة العمليات والجودة ( بحكم تخصص الرجال اللي سلفنا الأوديس حقه ): المواد الحرة هي عبارة عن : جميع المواد المتاح للطالب / الطالبة أخذها ( بعدد ساعات معين كلاً حسب أنظمة كليته ) خلال مسيرته الدراسية في الجامعة بشرط أن تكون من خارج مساره التخصصي أو من خارج كليته ( يعني ممكن اللي بتخصص العمليات والجودة يأخذ مادة من كلية الآداب والعلوم الإنسانية من قسم علم النفس أو التاريخ أو الإعلام أو حتى من نفس كلية الإدارة والإقتصاد ولكن من مسار آخر غير مساره كالإدارة العامة بشرط أن لا تكون تلك المادة المختارة موجودة لديه في قائمة المواد الأختيارية بالخطة الدراسية الخاصة بنفس القسم .. أتمنى تكون المعلومة وصلت ) أما المواد الاختيارية : فهي تلك المواد التي تكون قد تم تخصيصها وتحديدها للطالب / الطالبة مسبقاً في نهاية الخطة الدراسية كلاً حسب تخصصه ومساره وتكون عبارة عن مجموعة من المواد يتاح للطالب / الطالبة الاختيار فيما بينها بعدد ساعات معينة كل مسار على حسب ما يتم الإتفاق عليه مع كليته ( تذكرت حراج بن قاسم ) وتكون أيضاً هذه المواد إجبارية من نفس الكلية الخاصة بالطالب / الطالبة .. أتمنى تكون وصلت المعلومة ) نأتي الآن لإثبات وجود بعض المواد الحرة والاختيارية مع بعض في نفس قائمة المواد المتاحة للطالب / في نظام الخدمات الالكترونية الـ odus لأن بعض الاخوان الله يهديهم عند الإجابة على تساؤل لأحد الطلاب يقول ( لا .. أنتبه ترى كل المواد اللي بالحذف والإضافة هذي مواد حرة مافيها ولا مادة اختيارية ) وحقيقة هالشي خطأ لأنه فيه مواد حرة واختيارية بالقائمة ولكن يُكتب أمامها جميعاً مادة حرة في هذه الحالة نقول للأخوان اللي يسألون وحابين يعرفون شلون يفرقون بين المواد : أهم ما في الأمر هو رمز ورقم المادة المختارة ( يعني الواحد ضروري يعرف رمز ورقم المادة عشان يقدر يفرق بين الحرة والاختيارية ويحددها في قائمة الحذف والإضافة ) نأتي الآن للشرح ( وأنا داري إن هالمعلومات تعتبر بدائية لدى الكثيرين ولكن في نفس الوقت هناك اخوان لنا مازال يصعب عليهم معرفة الطريقة فـ لهؤلاء أشرح ) من الطبيعي أول شي إنك تمشي 200 على الخط السريع وتروح للحذف والإضافة الخطوة اللي بعدها كذلك معروفة نضغط على الموافقة للإنتقال لعملية الحذف والإضافة بعد كذا إذا كان الجدول فل اوبشن نحذف مادة عشان نظيف المادة اللي نبيها ونعطي الأمر ok وهنا الله يسلمكم مثل ما أنتم شايفين الشرح على الصورة وجود مادتين حرة واختيارية وكلها مكتوب أمامها مواد حرة عشان كذا قلنا ضروري الواحد يعرف رمز ورقم المادة قبل الإختيار بعدين مثل ماهو واضح بعد إنسدال القائمة وتعيين المادة المُختارة نعطي أمر التنفيذ <<< بس هاه ضروري الإختيار يكون مدروس وأفضّل تكون مضاربة سريعة مو إستثمار لتجنب المخاطر على رأس المال اللي هو المعدل وعليكم بالمواد اللي لها مكرر ربحية عالي ههههههههههههه قلبناها بورصة وهذي بعض المواد الحرة ( مكتوب أمامها مواد حرة ) وهذي كذلك بعض المواد الاختيارية ( ومكتوب أمامها أيضاً مواد حرة ) ملاحظة : هناك بعض المواد ليست موجودة بالقائمة وإضافتها تكون بإحدى الطريقتين : إما عن طريق إرسال معاملة إلكترونية بعد تحديد ومعرفة المادة الطلوبة جيداً والطريقة الآخرى هي الذهاب للجامعة وإضافتها عن طريق الشؤون التعليمية هناك أعتذر أشد العذر على الإطالة ولكن أحببت أن تصل المعلومة بشكل أوفى وأوضح هذا وصلى الله وبارك على نبينا محمدٍ وعلى آله وصحبه وسلم تمنياتي لكم بالتوفيق والنجاح ... والله ولي التوفيق

[الدريبي1]

أنت بطـــل
..
.
.

[d7om_1]

وكل عام وأنت بخير يابو فاتن
دائماً تجيب المفيد ولا هي غريبه عليك يا بطل
فعلاً كنا حايرين سابقاً
والحين راح يستفيد الكثير
الله يكتب أجرك
موفقين جميعاً بأذن الله

[d7om_1]

تم تعديل هذه المشاركة لتكرارها نفس المشاركة أعلاه

[عآآآدل]

>> هذآ آلطآآلب دق آيقونة شكرآ خمس مرآآت لإيمآنه آلشديد آن شكرآ وحده مآتكفي بس للآسف مآقبل آلآ وحده
آلله يجزآك خير ويعم بنفعك آرجآء آلبلآد هع

[خلف]

الف شكر اخوي ابو فاتن والشكر موصول للاخ زياد لعطائك ان تستخدم حسابه الشخصي على هذه المعلومات المفيدة..

[NOKIA]

ابو فاتن والله كفيت ووفيت . الله يخلي لك فاتن وامها ولا يحرمكم من بعض . بالعكس ياخي ترى فيه ناس للحين ماتعرف تفرق بين المواد الحره والاختيارية وانا كنت من ضمنهم ابي اضيف ولا اعرف وطالب الله يصلحه صلخني بجواب من راسه . بس يابو فاتن اقتراح بسيط وصراحه اشوف فيك الخير انك تقدر عليه لانك ماشاء الله موضيعك مفيده ويستفيدون منها اغلب الطلبه .

لو تنزل موضوع يكون فيه استيان عن المواد الحره والاختيارية يعني يدخلون ا لطلاب ويختارون من المواد الحرة او الاختيارية الي يشوفونها سهله حسب تجربتهم وتكون اهم شي هالمواد مشتمله على اسماء الاساتذه لان بعض المواد تسهل باستاذها واحيانا تصعب فيه.
صدقني هالموضوع بيخدم كثير. بين فتره وفتره ادخل والقى طالب ومنزل موضوع يبي اسهل المواد الحره او الاختيارية. ويجي كم طالب يردون لكن ياخي ومع احترامي الشديد لهم تكون الردود غير مقنعه.

ماعليش يابو فاتن طلبت منك هالشي وحنا مانعرف بعضنا بس متاكد اننا اخوان..

الي مستغرب منه ان فيه كم موضوع والله تخدم اغلب الطلبه ومع هذا ماشوفها يكون لها تثبيت . الموضوع تلقاه مره بالصفحه الاولى ومرة بالصفحه العشرطعش. لو سمحتوا يامشرفين والله فيه مواضيع تحتاج تثبيت مثل هالموضوع وموضوع الي فيه تحديد المواد الحرة والاختيارية لابو فاتن .
الله يجزاك كل خير يابو فاتن ولا يحرمك الاجر .

[أبو فاتن]

المشاركة الأصلية كتبت بواسطة الدريبي1 أنت بطـــل .. . .

وأنت أسرع واحد بالحارة هههههههههههههههه



أمزح عيوني لا تزعل ترى لك تقدير خاص يالدريبي



شرفني مرورك الله يحفظك

[أبو فاتن]

المشاركة الأصلية كتبت بواسطة d7om_1 وكل عام وأنت بخير يابو فاتن دائماً تجيب المفيد ولا هي غريبه عليك يا بطل فعلاً كنا حايرين سابقاً والحين راح يستفيد الكثير الله يكتب أجرك موفقين جميعاً بأذن الله

هلا وغلا بالذيب أبومشعل هلا براعي النودات << الفعول الطيبة


اللهم آمين ويكتب أجرك بعد ويجزاك كل خير يالغالي

[أبو فاتن]

المشاركة الأصلية كتبت بواسطة عآآآدل >> هذآ آلطآآلب دق آيقونة شكرآ خمس مرآآت لإيمآنه آلشديد آن شكرآ وحده مآتكفي بس للآسف مآقبل آلآ وحده آلله يجزآك خير ويعم بنفعك آرجآء آلبلآد هع

هههههههههههههههههههههههههههههههه

مشاعرك وقلبك الطاهر يكفون عن ألف أيقونة اخوي عادل ,, ربي يسعد قلبك ويحفظك


حلوة يعم بنفعك آرجاء البلاد ,, ذكرتني بحسن كراني هههههههههههههه