ضع أو ضعي نهايه لقصه واقعيه....

[عـــ الملاك ـــيون]

بسم الله الرحمن الرحيم

أول شئ أبطال القصه..
رنا 17 سنه تدرس في أولى ثانوي...................حاليا تحاول تقدم أوراقها في أي جامعه أوكليه أومعهد

رائد 20 سنه يدرس أخر سنه ثانويه تجاريه...........حاليا يحاول يلقى وظيفه

""""""""""""""""""""""""""

رانيا 19سنه ماتحب الدراسه ودايما ترسب علشان كذا هي أولى ثانوي.........حاليا متزوجه

زمرده17سنه صديقة رنا وأكثر وحده تخاف عليها تدرس في أولى ثانوي.........حاليا متزوجه

ملاك 19سنه صديقة رنا "تقول انها تحب رنا وتخاف عليها" تدرس في ثانويه عامه.........حاليا تحاول تدرس في كلية ينبع

رحاب20سنه صديقة رنا وقلبها أبيض تحب السهر والفله مع بنات خالاتها تدرس في ثانويه عامه.........حاليا ماتفكر لا بالدراسه ولا بالشغل..

ام محمد وام عبدالله اخوات رائد..

"""""""""""""""""""""""
نبدأ القصه......

بعد ماكملت رنا السادسه عشر من عمرها عرفتها أعز وحده من صديقاتها على شاب أكبر

منها بثلاث

سنوات ماكان يخطر في بال رنا انها راح تحبه في يوم من الايام..كانت تتكلم معاه بالتليفون

بالساعات

ساعه واثنين وثلاث..

كان دايما يتكلم عن نفسه وأصدقائه...وأنه الولد المدلل عند أهله..وايش أكثر شئ يحبه وأكثر

شئ يكرهه..

وهي تتكلم معاه وكأنه واحد من أهلها..يعرف كل شئ يصير في بيتها..

ولما يقول لها: أحبك..تقول له:أتمنى ماتتطور علاقتنا أكثر من صداقه..لأني أعتبرك أخ

وصديق بس..

طول هالفتره ماكان يحبها..كان حاله زي حال أي شاب يتكلم مع بنت..ياخذمنها اللي يبغاه

ويسيبها..

ويروح يدور على غيرها..

بس هي كانت تحبه..بس ماودها تخسر صديقتها رانيا...."لأن رانيا تحبه"

كانت رنا دايما تساله اذا يحب رانيا والا لا..؟؟ رائد: أحبكم الثنتين..

رنا:بس الانسان له قلب واحد..لازم يكون لشخص واحد..

رائد:انتي ورانيا لكم نفس المكانه..

دايما اذا رد عليها بهذا الرد تسكت..لانها تعرف ماراح تاخذ منه لا حق ولا باطل..

بعد مرور سنه...

كانت رنا مع أمها وصديقاتها وأخواتها وصديقاتهم في البر..

فجاه وبدون مقدمات قالت رنا لأمها انها لازم ترجع البيت..رجعت البيت وقبل ماتغير

ملابسها أو حتى تنزل عبايتها اتصلت عليه..وكالعاده تكلموا كثييييييييييير..وفي نهاية المكالمه

رائد:ادري انك تحبيني..وأنا كمان أحبك..بس ابغى اسمعها منك شخصيا..

ترددت قبل ماتقولها بس.."ابليس شاطر..قدر عليها" خدعها في هذاك اليوم وهي صدقته..

رنا:أحبك...

طوط..طوط..طوط..

قفلت السماعه كانت طايره من الفرحه..وفي نفس الوقت تفكر في رانيا..

ايش راح يصير لو عرفت رانيا بالحب اللي بين حبيبها وأقرب انسانه لها..؟؟؟

كيف راح تتصرف..؟؟؟

مرت الأيام.....

عند اول فرصه قالت لرانيا عن حبها لرائد وانه حتى هو يبادلها نفس الشعور..

رانيا وهي تخفي بداخلها شئ:عادي يا رنا ربي يوفقكم وانشاالله أشوفكم الاثنين على الكوشه

بعد هالموقف بأيام بدأت المشاكل تهل..أول شئ بين رنا ورائد..

كانت رانيا تشعل فتيل المشاكل بينهم..

ولما شافت مافي أمل انهم يفترقوا صارت تتصل على رائد وتقول له:خلينا نرجع لبعض..

ليش نكذب على بعض انا احبك وانت كمان سيب رنا وارجع لي..

بس رائد قدر يوقفها عند حدها..وقال لرنا..:اذا ودك تخسريني كلمي رانيا..وارجعي لها..

واكيد رنا كانت تعشق رائد..وتخاف انها تخسره لأنه صار بالنسبه لها كل حياتها..

كانت دايما تفكر في رانيا وانها كيف تخسر صداقة خمس سنين..

وفي مكالمه من مكالماتهم المعتاده..فتحت رنا مع رائد موضوع رانيا وانها ماتقدر تتخلى

عن العشره اللي بينهم..رفض في البدايه بس في الاخير وافق لما اقنعته رنا ان رانيا راح

تكون صديقه وبس.. ماتدخل نفسها بأي شئ يصير بيننا..

بعد مشاكل رانيا طلعت لهم مشاكل من نوع ثااااااااااااااااااااني...

اماره..أقسام شرطه..مباحث..هيئه.......كل هذا وهم ماتقابلوا..بس مكالمات..

<ماادري لو اتقابلوا ايش صااار..؟؟؟؟؟؟>


رنا منعوها اهلها من كل اصناف المتعه..حطوها على القائمه السودا..الخروج ممنوع..

التليفون ممنوع..الصديقات ممنوع..والتلفزيون ممنوع لوحدها لازم تكون معاها وحده من

أخواتها..حتى الدراسه كانوا بيمنعوها منها..

بعد مشكلة الهيئه باسبوع تجرأت رنا واتصلت على رائد..كانت المكالمه حزينه..

طول المكالمه وهم يبكوا..(ساعدتها وحده من اخواتها..اعطتها جوالها تتكلم منه)

بعدها تأكدت انه يحبها..لانه لو كان يلعب بمشاعرها..كان من اول مشكله نفذ بريشه..

<شباب هالايام..أول ماتصير مشكله قال وانا ايش لي؟؟هي هبله..!!>

وهو كمان تاكد انه يحبها لانه ماقدر يسيبها في مشكله له علاقه فيها..

بعد مرور شهرين..

تواعدوا انهم يتقابلوا بعض..عند أول فرصه ولاول مره من اول ماتعرفوا على بعض

تتلامس ايديهم..لقائهم الاول ماكان طويل..اتصلت عليها اختها قالت لها لازم ترجعي بسرعه

رجعت البيت وهي طايره من الفرحه تحس الارض مو شايلتها..

بعدها بثلاث ايام

تقابلوا مره ثانيه..ماكان الوقت طويل بس اطول من اللي قبله..

مرت الايام وهم يطلعوا من مشكله يطيحوا في ثانيه..

عند بداية العام الدراسي الجديد..

وقفت رنا في وجه الكل..قالت لهم..:دراستي مافي اي احد يقدر يمنعني عنها..

وافقوا بعد مناقشات ومشاورات..

وفي ثاني يوم دراسي..قبل ماتطلع من المدرسه..كانت رنا مع زمرده..

رنا:عندي احساس اني راح أشوف رائد..بس متى وكيف..؟؟ ماأدري..؟؟!!

زمرده مو حابه ان رنا تستمر بعلاقتها مع رائد:لا ياشيخه تفاءلي بخير..

رنا:الحين اقول لك باشوفه تقولي تفاءلي خير..ليش الحين رائد صار شر..؟

زمرده بصوت واطئ: الله يستر..

طلعت رنا من المدرسه..وشافته..احساسها صدق هالمره..كانت سيارته واقفه ورا سيارة

ابوها..ابتسم لها وراح..

وبين كل فتره والثانيه يروح عند مدرستها بس علشان يبتسم لها ويروح..

مرت الايام والاشهر...

ارسلت رانيا رساله لرنا.."رنا أتمنى لك السعاده..رنا صداقتنا انتهت..انا وانت مستحيل

تستمر صداقتنا..انا لقيت صديقه غيرك..دوري على صديقه غيري..انسي رانيا..

لاتتصلي عليا وانا ماراح اتصل عليك.."

انصدمت..بكت..سالتها زمرده..:ايش اللي يبكي أحلى عيون..؟؟

حكت لها قالت..:تبغى تسيبني علشان وحده توها تعرفت عليها..وانا وهي صداقتنا استمرت

تقريبا سته سنوات..

زمرده..:لا تبكي عليها..هي الخسرانه في الاول والاخير..خسرت الصديقه اللي حبتها

و وثقت فيها..وراح يجي يوم تخسر فيه صديقتها الجديده..

سته سنوات ما شفعت لك في استمرار صداقتكم..!! ..لا تبكي عليها

ومنذ ذلك اليوم تعلقت برائد اكثر من قبل..احبته اكثر من قبل..حذفت رانيا من حياتها..

انتهت السنه الدراسيه..نجحت زمرده لكن رنا سقطت في مادة الرياضيات..

طلب منها رائد انها تشد حيلها في اختبارات الدور الثاني..

صارت تذاكر ليل نهار..كله علشان خاطر رائد..استعدت للاختبار..

نجحت..وكانت فرحة رائد فوق الخيال..مو مصدق ان رنا نجحت بس علشانه..

وفي يوم..كانت رنا في عرس تفاجات بصديقتها...رانيا كانت موجوده في العرس..لكنها

مااعطتها اي اهتمام..حاولت عيونها ان تخذلها وتسرق النظرات لها بس رنا بنت قويه قاومت

وطلعت من هالعرس منتصره..تعتبر هالشئ انتصار بالنسبه لها..

قدرت رنا ترجع شئ بسيط من ثقة اهلها..بدات تستغل هالثقه وصارت تكلم رائد على

التليفون..وفي بعض الاحيان يحاولوا يشوفوا بعض ولو ثواني..

صار رائد شئ مقدس في حياة رنا..تعامله كانه واحد مسؤول عنها..تستشيره في شؤونها..

تطلب اذنه قبل ماتساوي اي شئ..لو رفض ماتقدر تناقشه..ولوأمرها تنفذ بسرعه..

كيف؟؟..وهو اللي علمها ابجديات الحب....

بدأت ايام الدراسه..كان رائد يطلب من رنا انها تجتهد..بدات تنفذ..درست واجتهدت في

الشهر الاول..بعدين..

صار شئ ماكان في حساباتهم...

صارت مشكله بين رائد وبين شخص قريب لرنا..كان في شهر رمضان..

كانت المشكله كبيره..ماقدرت رنا تتحمل الكلام اللي سمعته من اهلها..."انتي السبب..

انت اللي لازم تتعاقبي..انتي..انتي..انتي"...

قررت رنا انها تنسحب بهدوء من حياة رائد..بدون علمه بقرارها..لانه ماراح يوافق..

ابتعدت شهر واثنين وبداية الشهر الثالث..قابلت اخت رائد الصغيره في عيد الاضحى

قالت لها:يسلم عليك رائد..ويقول لك كل عام وانتي بخير..

ماتجاوبت مع السلام والتهنئه..واستمرت بغيبتها..في بداية الشهر السادس..ماقدرت تسافر

بدون علمه..اتصلت عليه..

رنا..:الو..السلام عليكم

رائد..:وعليكم السلام..هلا والله..هلا وغلا

رنا..:كيفك..؟؟

رائد..:الحمدلله تمام اذا انتي بخير..خير نبرة صوتك مومطمنتني..؟؟؟

رنا..:لا مافي شئ..بس انا حبيت اقول لك اني مسافره الاسبوع الجاي خمسه ايام..

اخويا بيتزوج وزواجه في........!!!!!

رائد..:تروحي وترجعي بالسلامه يارب..والف مبروك وعقبالك..

رنا بينها وبين نفسها..:انا وانت يارب..

سافرت رنا ورجعت بس مااتجرأت تكلمه غير بعد ثلاثه شهور..

بعدها صاروا يتكلموا مع بعض يوميا..رجعوا لبعض اكثر من قبل..

رائد..:كيف النتيجه..؟؟نجحتي باختبار الثانويه العامه..؟؟!!

رنا..بنبره متردده:انا مادخلت اختبار الثانويه العامه..

رائد..منفعل:ليش...؟

رنا ودموعها على خدها..:بعد ما بعدت عنك..ماقدرت أركز في دراستي..صرت ماأهتم

بالدراسه..كيف بأنجح وأنا ماسمعت كلمات التشجيع اللي اسمعها منك دايما..؟؟

كيف بأنجح وانت مو بجنبي..؟؟

تدري..كنت ادخل الاختبار وانا مو مستعده له..واحيان كثيره اسلم الورقه مثل مااستلمتها..

بيضا..لدرجه..اني مااتذكر شئ من الشرح علشان اكتبه على الورقه..واضطر اني اسلم

الورقه مثل فاضيه الا من اسمي.... ....بكت..

رائد..:خلاص لاتزعلي نفسك..انشا الله تعوضيها السنه الجايه..لاتبكي..اكيد صرتي تعرفي

اني مااحب انك تبكي..

طلبت منه صوره له ليبقى معها دايما وابدا..

وافق..لكن كيف بيوصلها لها..؟

في يوم اتصلت عليها وحده من صديقاتها..وعزمتها على زواج اخوها..

"في هذيك الفتره كانت رنا تتعب كثير في البيت..لان زوجة اخوها واهلها يزوروهم..

وكانت ليل نهار تهتم في البيت علشان يكون مرتب ونظيف.."

راحت زواج اخو صاحبتها..كانت تلبس فستان بسيط جدا جدا..لونه بيج وفيه خطوط بسيطه

وردي..وحذاء بدون كعب..مكياجها كان ناعم..وشعرها القصير كان نصفه نازل على كتوفها

والنصف الثاني ماسكته بدبوس صغير..

قابلت وحده من اخوات رائد..اتصلت عليه من جوال امها..

رنا..:الو...سلام..كيفك..؟؟

رائد..:وعليكم السلام..تمام..ايش صاير..؟؟

رنا..:مايمدي اطول معاك بس انا في عرس وفي وحده من اخواتك..

رائد..:روحي كلميها..قولي لها ابغى اكلمها..

رنا..:لا مااقدر اروح اكلمها..هي وامي في نفس المكان..لو شافتني امي واقفه معاها..

وسالتني ايش باقول لها..؟؟

طلبت من صديقتها انها تكون وسيط بينهم..بس رفضت لان مالها علاقه فيها..

طلعت اخته من القاعه علشان تعدل مكياجها..طلعت رنا وراها..وهي تمشي اتصلت عليه..

وقفت بجنبها..

رنا..:ام محمد..؟؟

ام محمد..:ايوه..!!

حطت رنا الجوال على اذنها..

ام محمد..:مين..؟؟

رنا..:تكلمي وراح تعرفين مين..؟؟

تكلمت شويه وقفلت..اعطت رنا الجوال وصارت تتكلم من جوالها..

لفت رنا تبغى تروح..بس ام محمد قالت لها..:استني شويه..

جلسوا خارج القاعه..وكانت رنا طول الوقت تتلفت..خايفه احد يشوفها ويروح يقول لامها..

بدأت أم محمد تسال..ايش اسمك..؟

رنا بنبره فيها استخفاف وسخريه..:ما قال لك اخوك عن اسمي..؟؟

ام محمد..:لا.. اصلا انا احمد ربي اني اشوفوا في الشهر مره..

رنا..:اسمي رنا..

ام محمد..:رنا..؟!

رنا..:ايوه رنا..رنا نفسها اللي قامت المشاكل كلها بسببها..

ام محمد..:من متى تعرفي رائد..؟

رنا بنفس نبرة السخريه..:ليش ماتساليه..؟؟

ام محمد..:كيف تعرفتي عليه..؟؟

رنا..:اساليه وهو راح يجاوب على كل اسئلتك..

رنا وهي واقفه..:ممكن اروح..؟؟

ام محمد..:لا..راح نطلع انا وانتي للباب الرئيسي وهناك بيكون رائد..

رنا..:لا..مااقدر..كيف لو تشوفني امي..؟؟

اقترحت انها تروح هي وبعدين تلحقها ام محمد..وعند البوابه..دخل ولد صغير كان يلبس

ثوب..

ام محمد..:دخلي يدك في جيبه وخذي اللي في الجيب..

رنا منفعله..:لا..لا مااقدر..

دخلت ام محمد يدها في الجيب وطلعت منديل حطته في شنطة رنا..وراحت تسابق الزمن..

خايفه اي احد يشوفها وهي واقفه مع ام محمد ويروح يقول لامها..

اول ماوصلت البيت كلمت رائد..

رنا..:شكلك في الصوره احلى من قبل..

رائد..:قالوا لي انك نحيفه جدا..

رنا..:ايش قالوا كمان..؟؟

رائد..:قالت لي ام محمد رنا امانه في رقبتك..لو فكرت في يوم انك تاذيها ماراح اسامحك

طول حياتي..

رنا باستغراب..:هي قالت كذا..؟؟!!!!!

رائد..:هي تعرفك..؟؟شافتك قبل كذا..؟؟

رنا..:لا.. رجعت سالت باستغراب..:هي قالت كذا..؟؟

رائد..:تدرين اني عمري ماكذبت عليك..ولا راح اكذب عليك..وقالت كمان..هي تعبانه

لاتاذيها..

مرت هالفتره..وبدات الدراسه..صاروا يتكلموا مع بعض يوميا..لانها قدرت تسترجع ثقة

اهلها وصارت تكلمه من جوال امها..

كان دايم يقول لها ادرسي مزبوط..شدي حيلك..كانت اتصالاتهم قليله لانه مايبغى ياخرها عن

دراستها..

في السنه الجديده تعرفت رنا على صديقات كانوا من احسن الصديقات الى.......

المهم..

صديقاتها..ملاك ورحاب..

ملاك الاقرب لقلب رنا..ماتخفي عنها شئ..عن البيت وعن رائد كمان..

وبحكم دراستهم في مدرسه خاصه..كانت ملاك تجيب جوالها يوميا للمدرسه..

اما رحاب كانت تخاف..كانت تجيب جوالها يوم واحد في الاسبوع..يوم الاثنين..

اليوم اللي يتاخر فيه ابوها..

كانت رنا دايما تكلم رائد عن ملاك ورحاب..وفي يوم طلب رائد انه يكلم وحده منهم..

"ولان رائد من الناس اللي اذا حطوا شئ في بالهم..يعملوه مهما يكلفهم"

طلبت رنا من ملاك انها تكلمه بس ملاك رفضت..بحكم انها مخطوبه لولد عمها..وعمرها

ماتكلمت مع اي شاب حتى "طلال" خطيبها عمرها ما كلمته..

راحت رنا لرحاب..لانها دايما تكلم شباب..بس رحاب رفضت..

رحاب..:مااقدر يا رنا اني اكلمه..

رنا..:طيب فهميني ليش..؟

رحاب..:اعذريني..مااقدر ولا تسالي عن السبب..

اكتفت رنا بالرد..وكلمت رائد..قالت له على اللي صار..

واكتفى رائد بالسكوت..وسكوته يعني يبغى يكلم وحده منهم..

وفي يوم..اتصل رائد على رنا..

رائد..:اتصلت على ملاك..بس اعتذرت..تقول لازمتكون رنا على علم بكل المكالمات..وقبل

كل شئ رضاها..

رنا..:انا موافقه.."لانها تدري رائد اذا حط شئ في باله ماراح يتراجع عنه"

تعرفوا على بعض..وكانت رنا على علم بكل اللي يصير في المكالمات..

بعدها تطور الموضوع لرسايل..

صارت مشاكل بين ملاك واهلها لانهم شكوا في تصرفاتها..وكمان الرسايل اللي على الجوال

وبعد الرسايل مواعيد ولقاءات..قدام المدرسه..بعدها صارت ملاك تعيش عند جدتها..

وصارت تشوفه..شبه يوميا عند بيت جدتها..

في بداية العلاقه بين رائد ورنا..عرف بالصدفه انها دايما تسمي نفسها "ام علي"

صار يقول لها انا "علي" وانتي "ام علي" وكان دايم يناديها امي او ماما

ولما عرفت ملاك بهالشئ..صارت تعتمد توقيعها في الرسايل "ام رائد"

بعدها صارت في اسرار بينهم ماتدري عنها رنا..لدرجه ان ملاك فسخت خطوبتها من طلال

وتطورت العلاقه اكثر من قبل

صارت تسال نفسها..كيف..؟..متى..؟..ليش..؟

متى صار في حب بينهم؟؟..وليش ملاك ورائد؟؟

اسئله تدور في بال رنا..بس مو لاقيه لها اجوبه..فقررت...

اما الارتباط او الفراق

تكلمت مع رائد..

رنا..:رائد اسمعني للنهايه..بعدها لك حرية الاختيار..

رائد..:خير انشا الله..

رنا..:رائد انت تحبني؟؟..تبغاني زوجه لك؟؟..تقدم لاهلي..اطلب يدي للزواج..او لنفترق..

رائد..:تتكلمي بجد..رنا انتي في وعيك..؟؟؟!!

رنا..:ماكنت في وعيي في يوم مثل هاليوم..وعمري ماتكلمت بجديه مثل الحين..

رائد..:راح نبتعد عن بعض..بس..مجرد ايام علشان تهدأ اعصابك ويروح التوتر والقلق اللي

انتي عايشه فيه..

هالفتره عاشتها رنا بنفسيه سيئه..ثانويه عامه ولازم تجيب معدل ممتاز..بس الانسان اللي

كان يشجعها على دراستها تبغى تفترق عنه..

وفي يوم..كانت رنا مع ملاك..

ملاك..:أم رائد في المستشفى..

رنا..:ليش..؟؟خير ايش صاير..؟؟

ملاك..:كانت في مناسبه..وجاتها وحده قالت لها..:ولدك رائد لسه على علاقه برنا...

فارتفع ضغطها..وتغير حالها ونقلوها المستشفى..

في هذا الوقت اخذت رنا قرارها..انها تترك رائد..

قالت في نفسها..:زي ماأرضى انه اي شخص يتسبب بالاذى لامي كمان اكيد في ناس

مايرضوا اني اسبب الاذى لامهاتهم..

قالت لملاك عن قرارها..شجعتها ملاك..قالت لها اطلبي رسايلك وصورك منه علشان

مايعمل لك فيها شئ..

رجعت اتصلت عليه بعد ايام..

رنا بنبره حاده وحازمه..:نفترق وصورتك في عيني حلوه..وصورتي في عينك حلوه..

احس من مانفترق وصورنا مهزوزه..

رائد..:على راحتك..

رنا..:ابغى رسايلي وصوري اللي عندك..والصور المشتركه ياليت تقصها..واللي في

الجوال تمسحها..

رائد..:اللي يريحك..ماراح امنعك

بعد مانطق رائد بهالكلمتين..ورنا تقول..:لو افترقنا بدون مايقول هالكلمتين احسن...

بكلامه اثبت لي انه مايبغاني..ماتمسك فيا..ما ترجاني ابقى معاه..

سأت حالتها..تأخرت دراسيا صارت تغيب عن المدرسه..وحتى لو راحت..طول النهار

تبكي..لدرجه..معظم معلماتها صاروا يقولوا لها صرتي انسانه كيئبه..

وفي يوم رجعت له الرسايل لان كل مايمر الوقت والرسايل عندها تفقد عقلها..

بعدها بايام..اتصلت عليه طلبت منه أي رقم يوصلها لاخته ام محمد..

رائد..:ام محمد ماعندها تليفون خاص فيها..بس خذي رقم ام عبدالله "اخته الثانيه"..

ماكانت تدري رنا ليش اخذت رقم ام عبدالله..؟؟بس ما حست بنفسها الا وهي تكلمها..

اتصلت عليها..ومن اول مكالمه حست رنا من نبرة صوت ام عبدالله انها مو طايقتها..لكن

في المكالمه الثانيه اتفقوا انهم يصيروا صديقات..

وبدات ام عبدالله تسال..:كيف عرفتي رائد..؟؟..من متى..؟؟..من عرفك عليه..؟؟..وو...و..و

سالتها رنا..:ليش رافضين فكرة الارتباط بيني وبين رائد..؟؟

ام عبدالله..:بعد كل المشاكل اللي صارت تسألي ليش نرفض..؟؟

رنا..:بس انا مالي يد باللي صار كله..

ام عبدالله..:احنا مانبغى لاخونا الا انه يعيش مرتاح في حياته.. "الولد الوحيد بين سته بنات"

مانبغاه يعيش في مشاكل طول عمره..المهم تبعدي عنه..

رنا..:انا ورائد انتهت علاقتنا ببعض..من شهر تقريبا..وماابغى ارجع له الا اذا رضيوا اهله

عني.....

تقاطعها ام عبدالله..:الاحسن والافضل تنسي رائد الى الابد..

استمرت المكالمات بين رنا وام عبدالله..لكن دايما تكون المكالمه بعيد عن رائد..ما يتكلموا

عن رائد ابدا لان رنا تبغى تنساه وام عبدالله مو حابه تكون في علاقه بين رنا ورائد..

ماقدرت رنا تبعد اكثر..هي بحاجته الحين اكثر من قبل..ما بقي على امتحانات الثانويه العامه

غير شهر او اقل..اتصلت عليه اعتذرت..توسلت انه يقبل عذرها..شرحت له الاسباب..

امك...اخواتك...ضغط الدراسه...والاهم


مــــــــــــــــــلاك

ابعد عن ملاك علشان نعيش حياتنا..نعيش حبنا..ابعد عنها للابد..

رائد..:مااقدر..مااقدر ابعد عنها..مارح اتركها..هي وقفت بجنبي وفي الوقت نفسه كنتي

تقولي نفترق..انا بدات اتعلق فيها..ماراح اتركها..

رنا بنبره تملاها الحيره..:وانا وحبنا والسنوات الاربعه اللي عشناها مع بعض..؟؟؟؟

رائد..:انتي اللي طلبتي نفترق..انا ماطلبت..وملاك وقفت بجنبي..

رنا..:اولا انت ماتمسكت فيا..وثانيا راح ننهي قصة ملاك..صفحه نشقها من دفتر حياتنا..

رائد..:لا..ملاك راح تبقى....

رنا تقاطعه..:لكن ملاك هي اللي شجعتني اني اطلب رسايلي وصوري..وقالت..:اخاف

يعمل لك شئ فيها..

رائد باستغراب..:ايش ملاك قالت كذا..؟؟؟!!!!!

رنا..:اقسم بربي انها قالت..وعسى اسقط هالسنه لو كنت اكذب عليك..انا ماكان يشغل بالي

غير امك واخواتك وهي اللي شجعتني اطلب الرسايل والصور..وطلبتها..بس ماقدرت

ورجعتها لك..

رائد اطلب اللي تبغاه وانا مستعده الب طلباتك..المهم ماتتركني..انا مااقدر اعيش بدونك..

ارجوك ماتتركني..

رائد..:لو طلبت شئ...

رنا تقاطعه..:راح ألبي فورا..

رائد..:لا تستعجلي..

رنا..:ايش طلبك..؟؟

رائد..:اشوفك..

رنا محتاره..:كيف..؟؟

رائد..:لبي طلبي..

بعده باسبوع تقابلوا..تكلموا مطولا عن المشكله اللي صارت..وعن ملاك..

رنا..:اتمنى ماتتكلم عن ملاك اذا كنت معاك او اكلمك..

رائد..:على امرك..

رجعت البيت وهي بحال احسن احست بسعاده..لكن لازالت ملاك بينهما..

انتهت الدراسه والاختبارات تخرجت رنا وصديقاتها..كانت نسبتها الاعلى بينهم..

كانت نسبتها 85%..وملاك82%..ورحاب80%..

بدات تدريجيا تطلب من رائد انه يترك ملاك..وفي يوم خرجت معاه اعطاها جواله وطلب

منها تقرا الرساله..كانت من ملاك كتبت فيها.."انا مابغى ابعد عنك..لكن اذا انت طلبت ..

لك اللي تامر فيه..بس تاكد انه في وحده اسمها ام رائد راح تحبك طول عمرها.."

في هذاك اليوم تاكدت ان رائد رجع لها مثل ماكان..

رجع يحبها مثل زمان..





والايام تمر وحبهم يكبر بمرور الايام..قدرت رنا ترجع لقلب رائد..وقدرت تبعده عن ملاك..

وتحاول انها ماتكلمه عن اي وحده من صديقاتها علشان مايتعلق بوحده منهم..ماعدا صديقتها

سناء..لانها تدري ماراح تصير اي علاقه بينهم..سناء تكره رائد بالمرررررررررره..

ورائد يبادلها الشعور نفسه..

هاهي بطلة قصتي تحاول الارتباط بحبيبها..وفي كل مكالمه تسأله اذا اهله رضيوا عنها والا

لا...

.......................والحياه مستمره...


عنتر وعبله...
قيس وليلى...
روميو وجولييت...
رائد ورنا...










بعد ماتقروها ابغى تحطوا نهايه للقصه..وتكتبوا ارائكم...
ودمتم لي..

[عـــ الملاك ـــيون]

14مشاهده ومافي ولا رد؟؟؟؟!!!!

شكلي مالي مكان في المنتدى..

نلتقي على خير...

[Jeddah Glamor]

قصه أليمه ..

أنتي تقولي واقعيه ..


عندي نهايتين ..

نهاية الدنيا والواقع ..

تظل حياتهم طلوع ونزول ..

سناء ورائد يحبوا بعض .. وتبدأ تخسر رنا صديقاتها عشان رائد .. اللي هو بدوره يغلط ويحب غيرها ..

أهله ما يرضوا ويقنعونه يتزوج وحده ثانيه غير رنا ..

رنا تصير حياتها جحيم .. وممكن تتزوج واحد ما تبغاه ..




نهاية الأحلام .. والأوهام ..

أهل رائد يرضوا عن رنا .. ويتزوجوا .. برغم المشاكل .. يظل حبهم مثل أول وأقوى ..