قررت الأنسحاب من الجامعة ,, ابغى مشورتكم ضرووووري

[badr almazmomi]

السلام عليكم و رحمة الله و بركاته

كل عام و انتو بخير يا اخواني و اتمنى انكم بأفضل صحة و عافية ..


بأختصار :انا قبل بداية الدراسة كنت جدا متحمس للجامعة و للدراسة
و للاسف مع بداية الدوام تغير هذا الحماس من ايجابي الى سلبي بسبب ظروف شخصية
و تعامل جميع الدكاترة اللي عندي معي و مع ظروفي جدا جدا جدا سيئ ما عدا البروفيسور حمزة ابو جبل الله يجزاه خير

و لذلك استخرت الله و قررت انسحب من الجامعة .. و بحكم مجال والدي التجاري و حبي الشديد للتجارة و لدي خبرة سابقة فيها
اود العمل في هذا المجال ,, مع العلم بأن المشروع و رأس المال متوفر و بس ناقص شخص متفرغ ..
و اقدم على الجامعة السنة القادمة ان شاء الله .

انا حاليا متردد جدا من هذه الخطوة

و بغى مشورتكم و رايكم كأخوة لي

الله يجزاكم خير ,, و شكراً مقدماً

[muzn]

وعليكم السلام
بدر انا ابدا ما أأيد انك تسيب الجامعة والدراسة، هيا سنة وتعدي حاول تشد حيلك والدراسة والعلم هوا اللي حيفيدك في النهاية، مو بس من ناحية الفلوس، تفكيرك حيتغير وتخليك انسان ارقى، دا من وجة نظري طبعا والله يخترلك الخير يارب

[Nada.ir]

السﻻم عليكم اخوي..بصراحة انا انصحك تكمل دراستك ﻻنو مهما يكن شهادتك الي بتنفعك وما تعرف الظروف والله يوفقك
وعلى المعاملة طبيعي حتﻻقي فرق ﻻنو يختلف من دكتور لدكتور و اكيد في الحياة حتقابل ناس طريقة تعاملهم تختلف فأبدا ﻻتحبط نفسك من اول فرصة و لسا قدامك السنة كاملة وبأذن الله حتوصل للي تبغاه وكمان تفرح والديك بالشهادة و انت متخرج من الجامعة و رافع راسهم بالشهادة و ديكا الساعة روح ساعد بابتك و فرحو وفي نهاية الكﻻم انصحك ﻻتسحب كمل ومعليش استحمل دا مستقبلك واوصل لهدفك الي تبغاه و اعمل المستحيل عشانو
وسوري طولت بالكﻻم و الله يوفقك و يختارلك الي فيه الخير

[M!ss.R!ma]

.
.
.
وعليكم السلام ورحمة الله وبركاتهـ
شوف يا أخ بدر ,,
أول شيء .. ترددكـ ونظرتكـ السلبيهـ للجامعة تراها شيء جدددددا طبيعي كونكـ طالب {فالسنة التحضيريه ~..ـ
ومستحيل تلاقي أحد ماقد مر فيها (م س ت ح ي ل) ..!!
بس المهم هنا إيش الخطوة اللي بعدها ؟!!
-> هل رح تستلم وتقرر الإنسحاب
-> وإلا تتخطى ذي المشكلة وتكمل

بعدين بما إنكـ من عشااق التجارة ,, أعتبر التحضيري كأنها صفقة تجارية :
* رأس المال "الدرجات" فلازم تحافظ عليها ..
* صاحب المصلحة "الطالب" اللي هو أنت ..
* التجار "الدكاترة" اللي رح تتعامل معاهم عشان تنول مرادكـ..

قد شفت أحد فالتجارة يوقف مصلحتهـ عشان والله ـالتجار أخلاقهم بطالهـ وإلا التعامل معاهم صعب !!
لا .. رح يفكرون كيف يتعاملون معاهم أو يتحايلون عليهم عشان يكسبونهم فصفهم
فالزبدة .. راجع حساباتكـ ولااا تسحب
هي لا يغركم الخطاب الفلسفي اللي فوق ترا صاحبتهـ قد بكت شهرين عشان نفس الهرجهـ وربكم ستر

[حيــــــاة]

كنظرة للموضوع بشكل عام " لاتسحب "
فإن جات عالكركبة والدراسه والصعوبه ودرجاتك الي مو مرضيتك في الدوري الاول فهذا كله مو مشكله ..
اذا كانت مشكلتك بس في الدراسة ..
ترا كلنا نمر بهذه الحاله وكانت الامتحانات مفاجئة لنا ..
اما عن الدكاترة ..
فطبيعي تلقى الي بتجاوب معك ويقدرك والي لا ..
والجامعه 50%فقط عالدكتور .. بس ال 50% الثانية عليك انت ..
بجهدك وسعيك واجتهادك تقدر تستعيض عن دكتورك وتفهم مع نفسك او تحضر اكسترا لدكتور ثاني او تاخذ خصوصي وتستعين بالملخصات ..
دام عندك هدف وعندك حلم وعندك طموح ..
معناته مافي قوة عالارض تمنعك من انك توصل للي تبغى .. بس حاول واصبر ..
+
حتى لو المال موجود والشغل موجود .. شهادتك شيئ اكثر اهمية ...
اقلها هالسنة بس عديها وبعدها لم تتخصص اصلا في الشيئ الي تبغاه وتحبه تلقائيا بتبدع فيه ومابتحس بالضياع الي انت فيه الحين ..

بس من ناحية ثانية ..
لو مشكلتك مو دراسية ومو بس لخبطة دراسة ..

انما تمر بضروف مانعه تقدمك ودرجاتك مو مرضيتك وماهي زي مستواك الي عهدته وماراح تدخلك التخصص الي تباه .. وبتكون زي الي يروح ويجي ويتعب ويبذل جهد هالفاضي دام في شيئ مانعك فعلا ..
ففي هذه الحاله اسحب ..
وابدأ السنة الجاية بقوة فعلية عشان تكمل في الشيئ الي تباه ..

مهما انبسطت وابدعت في العمل نصيييحة .. لاتفوت الدراسه ابد .. الشهاده سلاح في هالزمن ..
عالاقل يكون معك بكالريوس ..

...
هذه مشورتي وكمان حاول مع نفسك عالاقل لنهاية هالترم وشوف وضعك كيف يكون ولا تستعجل ..

ولاتنسى تستخير ..

والله يكتب لك الخير وين ماكاان ..

مووووفق : )

[semao]

صل ع النبي
وانعل الشيطان
وشد على نفسك
هيا كذا السنة التحضيرية
لو بطلت راح يكوون مستقبلك في خطر
عكس اذا كملت واخذت لك شهادة
تفتح لك جميع ابواب الوظائف

[ميثان حلقي]

السلام عليكم أخي العزيز

محى أكثر عليك كلام لكن باختصار

(( لا تسحب حتى لو نيتك ترجع مرة ثانية ))

مستواي في التحضيري كان مرة سيء و ما كان عندي منهج رسمي اذاكر منه

لكن الحمدلله تعدل حالي كثير

الجامعة راح تفيدك من ناحية شهادة علمية و راح يرتقي فكرك و راح تفيدك أكثر مما تتوقع , التحضيري تجربة عيشها و استفيد منها

و اكرر لا تسحب

ميثان

[OMAR MOHAMMED 02]

يا عمي دزها لا تسحب هذا انا نفس الشي بس الشهادة مهمه لا تقول مهما طلعت ومهما صعدة الشهادة لا غنى عنها .. للحين ما مسكت ولا كتاب ولكن عندي امل اني امشي وانجح اعقلها وتوكل ...

[badr almazmomi]

شكراً لكم ,, و الله يوفقكم و يسهل طريقكم و يسعدكم يا رب

و الله ما ادري .. ممكن اداوم الاسبوع الاول و اخذ وقت افكر لكن فيه مشكلة من اسباب كرهي للجامعة دكتور الانقلش
الله لا يوفقه ولا يرزقه ( انا اسميه سباك , لأن حرام يكون دكتور )..
لأن غيابي كثير قال لي بالحرف الواحد : انتا جاك حرمان ولا اقدر اساعدك
و كمان جبتلو تقارير طبية ( من مستشفى حكومي ) تثبت حالتي و رفضها رحت لإدارة معهد اللغة و قالوا : اذا دكتورك رفضها احنا ايش نسوي ؟!!!!

و برضوا الاختبار الدوري للفيزياء ما حضرته و كنت تعبان رحت ثاني يوم قالوا مستحيل نختبرك مرة ثانية
يعني هذي مادتين راحت و انا خايف اتعب و اداوم و اخر شي حرمان في الانقلش و رسوب في الفيزياء !!!


انا اللي حارق دمي مافي احد يتفهم حالتي .. لكن الله كريم

[BroOoOo]

المشاركة الأصلية كتبت بواسطة m!ss.r!ma . . . وعليكم السلام ورحمة الله وبركاتهـ شوف يا أخ بدر ,, أول شيء .. ترددكـ ونظرتكـ السلبيهـ للجامعة تراها شيء جدددددا طبيعي كونكـ طالب {فالسنة التحضيريه ~..ـ ومستحيل تلاقي أحد ماقد مر فيها (م س ت ح ي ل) ..!! بس المهم هنا إيش الخطوة اللي بعدها ؟!! -> هل رح تستلم وتقرر الإنسحاب -> وإلا تتخطى ذي المشكلة وتكمل بعدين بما إنكـ من عشااق التجارة ,, أعتبر التحضيري كأنها صفقة تجارية : * رأس المال "الدرجات" فلازم تحافظ عليها .. * صاحب المصلحة "الطالب" اللي هو أنت .. * التجار "الدكاترة" اللي رح تتعامل معاهم عشان تنول مرادكـ.. قد شفت أحد فالتجارة يوقف مصلحتهـ عشان والله ـالتجار أخلاقهم بطالهـ وإلا التعامل معاهم صعب !! لا .. رح يفكرون كيف يتعاملون معاهم أو يتحايلون عليهم عشان يكسبونهم فصفهم فالزبدة .. راجع حساباتكـ ولااا تسحب هي لا يغركم الخطاب الفلسفي اللي فوق ترا صاحبتهـ قد بكت شهرين عشان نفس الهرجهـ وربكم ستر

اهنيكي ع آلرد
م اقدر اضيف شي بعدك