Lesson 1 : CPR For Adults

[Dr.Passed]

السلام عليكم ورحمه الله وبركاته

كيف حالكم طيبين ان شــــــــــــــــــــــــــــــالله...؟

حبيت اقدملكم فكره شي بسيط عن درس في ال CPR ان شالله الم بالمهم بحيث تخشو الدوره و انتو عندكم فكره سابقه بأهم المعلومات الي لازم تكونو عارفينها

هوا لسا في مواضيع تانيه ( اذا عجبكم دا و حسيتو انكم استفدتو ممكن نكمل باقي مواضيع ال CPR)

طبعا اعذروني احيانا عندي غلطات املائيه ححاول اني اوضح الكلام و اختصر الكلام و اديكم المختصر المفيد ( ان شالله التزم بالكلمه دي) ..

اول شي لازم نعرفو انو CPR تعني Cardiopulmonary Resuscitation اي انعاش قلبي رئوي

ابا اعرض عليكم فيديو تشوفو قبل ما نشرح و نخش في الكلام بس ابا اديكم معلومه صغيره و شويه مفردات...اوكي؟

المعلومه الصغيره:

غالبا في الكبار ال Cardiac Arrest الي هوا التوقف القلبي بيكون بسبب ال arrhythmia الي هيا اضطراب في نبضات القلب او عدم انتظام ضربات القلب

و غالبا في البزوره ال Cardiac Arrest الي هوا التوقف القلبي بيكون بسبب ال Respiratory Arrest الي هوا توقف التنفس

المفردات ( عشان نبدأ بعدها نشوف الفيديو)

Victim = ضحيه
Rescuer = منقذ الضحيه
AED = مانع الرجفان
Compressions = ضغطات الصدر
Breaths = نفس
Cycle = دوره

ملاحظه/
One cycle is : 2 breaths and 30 compressions

اليكم الفيديو ( شوفو كامل لوسمحتو عشان نبدأ نفهم..)
وبعدها حشرحلكم صفه ال CPR ونتصور مع بعض سيناريو وحديكم الزبده في CPR ال adults

اتفضلو اتفرجو دحين..

لوسمحتو استنو لحد يرد الان على الموضوع لسا ما خلصت حانزلو دفعات و اقلكم لمن اخلص ( بليز لحد يرد و يقطع الموضوع الان ) استنو ..

انزلكم الباقي دحين ان شالله

[Dr.Passed]

الان بعد ماشفنا الفيديو نبغى نجي نتكلم عن صفه ال:

Breaths
Compressions

اولا : Breaths



في حاجه اسمها head-tilt-chin-lift

نضع يد على جبهه الضحيه لنرفع بها الرأس الى الخلف وبالتالي نفتح مجرى الهواء..
عشان ندي نفس...لازم نسد الانف ( بنفس اليد الي على الجبهه الي استخدمناها لنفتح مجرى الهواء)

اليد التانيه.. حنمسك فيها منطقه الذقن من الاسفل كما في الصوره ونرفع بيها الذقن على فوق عشان ننتبه لايكون في انسداد او لا سمح الله يكون اللسان ساد مجرى الهواء

ملاحظه: ما نضط بالقوه على منطقه اسفل الذقن عشان ممكن بالحركه دي نسد مجرى الهواء برضو




_________________________


ثانيا : Compressions

شوفو كيف نحدد مكان الضغطه الصدريه ( بين الحملتين) احنا كمان مانبغى نكسر عضمه الصدر انتبهو بليز...

بالزبط التطبيق زي الصوره


الضغطه لازم الكوعين و احنا بندي الضغطه يكونو سيدا ...مانتنيهم عشان برضو عضمه الصدر مانكسرها...ننتهي من مشكله و نخش في مشكله الضغطه يجب ان تكون قويه وسريعه...طبعا يجب ان تكون الضحيه على سطح مستوي صلب عشان وقت الضغطه مايطير و يسير ينط ...يعني فوق سرير ماينفع ....لازم سطح صلب ومستوي تماما

لمن نعطي الضغطات نستنى بين كل ضغطه و التانيه انو الصدر يرجع لوضعو الطبيعي ( لكن بسرعه) يعني اول مايرجع نضرب على تحت يرجع نضرب تاني على تحت....وهكذا




ملاحظه/ لاحظو كيف اليد و الاصابع لمن ندي compression





يتبع...لحد يرد لسا

[Dr.Passed]

الان شخص لقينا مغمى عليه في الارض ماندري اشبو ( ركزو حاحطلكم سيناريو تجاوبو عليه بعد كده)

كيف نتصرف؟

ركزو الخطوات ( بالترتييييييييب) بي ايه؟ ....بالترتييييب..!! بي ايه مره تانيه؟ " بالترتيب"

اتصرف كالاتي :

Check for Response*
لازم تتكلمو معا يا جماعه ...اضربو ( مو بالقوه تنهو حياته بشويس يعني )
شوفو في استجابه و لا لأ

طيب نفرض انو مافي استجابه؟؟ ايش نعمل؟ نطلب المساعده

بعدين نجي بسرعه نفتحلو مجرى الهواء ( زي ما اتعلمنا) ونشوف في البني ادم دا بيتنفس..البني ادم بيتنفس ولا لأ..؟ كيف حنشوف طيب؟ حنحط خدنا على منطقه الانف و الفم وفي نفس الوقت نطالع في الصدر...هل بيطلع و ينزل و لا لأ...! ( طبعا لمده 5-10 ثواني نتحقق من التنفس)

الادمي مابيتنفس...!

مالعمل الان!!

نعطي 2 breaths

بعدها...نروح بسرعه نتحقق من النبض....طيب مافي نبض ( ايش نسوي؟) نبدأ CPR على طول بسرعه و من دون توقف ( الا في اربعه حالات حنذكرها ) و حنذكر معاها متى نعرف انو الضحيه خلاص في السليم و نقدر نحطها في وضعيه الافاقه

___________________________________

قبل ما اطرق لي هادي الحالات ووضعيه الافاقه حنعمل تلخيص سريع للكلام ( الغير مختصر الي دوبنا قلنا)

Check for response ---> no response*
Call for help*
Open airway*
Check for breathing 5-10 secs..no breathing? give 2 breaths *
Check for pulse for 5-10 secs
No pulse? Start CPR - 2 breaths & 30 compressions.....do not stop


لحد يرد لسا

باقيلنا الحالات الاربعه الي تخلينا نوقف ندي cycles وخلاص نوقف على كدا CPR
وباقيلنا سيناريو انتو حتحلو

استنو لا تردو..

[Dr.Passed]

?When Do We Stop CPR




اربعه من الاشياء دي اذا حصلت ...نوقف ال CPR

AED is here

If you are toooooooooooo exhausted

Sign of Life

Advanced Life Support Team or Code Blue Team is here

_________________________________________

[COLOR="Orange"]شوفو ال recovery position[/COLOR عشان حنذكرو بعد شويه]


Sign of Life

الان نبدأ نلاحظ الشفايف حمرت..الضحيه كحت ...اتحركت و لا اتغير لونها
( ممكن يحصل sign of life وننخدع وتطلع الضحيه لسا تحتاج CPR رجعت تاني)

عموما..

لمن نشوف sign of life نعمل الاتي..


Check for pulse...( there is no pulse) ---> continue CPR
If there is pulse...we check for breathing ( there is breathing) ---> put in recovery position



If there is ( no breathing) ----> give only 1 breath every 5-10 secs for 2 mins

Then again we check for pulse ( no pulse) begin CPR again


ملاحظه/ لمن نجي نسوي CPR ابدا مانحرك الضحيه من مكانها الا اذا كان مكانها خطر...زي في نص الشارع مثلا لكن ابدا ابدا غير كده الضحيه ماتتحرك من مكانها



والله بقي السيناريو بس ...عشان الي يحب يشارك ويجاوب عليه

لحد يرد

[Dr.Passed]

سيناريو



نتخيل انو واحد راح يطلب البيك و فجأه وهوا خارج يبغى يركب السياره الي اصلا مالقيلها موقف و كان مكانها قريب من الشارع..وهوا يبغى يركب السياره فجأه طاح من طوله و طارت صحون البيك و اصبحت تحلق في السماء


ايش التصرف السليم الان عشان ننقذ المصاب؟




شكرا لكم


اتفضلو ايش مو مفهوم...كيف اقدر اساعد اكتر...في اسئله اي حاجه انا موجوده

خلاص ممكن تتفضلو الان

[Tec General]

حاخذ صحون البيك واتصل على الاسعاف

حشيك على النبض والتنفس
وغالبا حيحتاج اسويله سي بي ار

اسويله ياه لين يقوم او يودع

[Dr.MEEM]

ماشاء الله درس حلو مرا ومتكامل من كل النواحي :)
وحلو شرحك وتنسيقك ربي يحفظك
الله يعطيك العافية ويارب في موازين حسناتك !


بالنسبة للسيناريو لما قلتي البيك وطارت الصحون ضحكت خيالك واسع ماشاء الله
اول شي حاخذ هذا الشخص وابعده عن الشارع واحطه في مكان امن وسطحه صلب << رصيف مثلا صح ؟
بعدين اتكلم معاه اساله اعطيه كف خفيف اي شي
اذا مافي استجابة اطلب المساعدة واحط يدي على الجبهه وارجع راسه لورا واليد الثانية اسفل الذقن واشوف يتنفس او لا
اقرب خدي من الانف والفم واطالع في الصدر اشوف فيه حركة او لا !
اذا مايتنفس اسد انفه باليد الي كانت على راسه واعطيه 2 breaths واشوف اذا في نبض او لا
اذا مافي نبض ابدا الـ CPR
( two breaths and 30 compressions )
لين مايتحرك الشخص او يكح او اي حاقه قميلة اشوف النفس والنبض
اذا مافي نبض اكمل CPR
اذا في نبض ونفس احط الشخص في وضعية recovery position
اذا كان في نبض والشخص مايتنفس اعطيه one breath كل 5-10 ثواني
والحمدلله على سلامته

وش رايك فيني دكتورة صح اجاباتي ولا لا ؟
اذا صح اعطيني الشهادة ماابغى احضر الدورة
شكرا حبيبتي مرا ماقصرتي معانا الله يجزاك كل الخير ويريح بالك

[Abdullah Al-juhani]

وعليكم السلام ورحمة الله وبركاته

أبداً ما أتوقعت الموضوع يكون بالوضوح والسهولة هذه
شكراً لكِ د. باسد ومنتظرين الدروس الأخرى

أول شيء بالنسبة لصاحبنا اللي طاح في الشارع
أشيله وأحطه على الرصيف عشان أبعده من الشارع
أحاول أكلمه عشان أشوف هل هو حي أو فاقد الوعي أو مافي نفس
إذا مافي نفس أطلب المساعدة من أي أحد في الشارع أخليه يدق على الطوارئ
وبسرعة أبدأ أعمله cpr .. حسب الخطوات اللي ذكرتيها آنفاً

أستفدت كثييير والله ، شكراً مرة ثانية

[اجواني]

الله يعطيك ْـي العافيه دكتورة باسيد الصراحة مجهود اكثر من رائع أنتو الصراحة قدوتنا
ميد 11 الصراحة كلكم زي العسل

[Dr.Passed]

المشاركة الأصلية كتبت بواسطة tec general حاخذ صحون البيك واتصل على الاسعاف حشيك على النبض والتنفس وغالبا حيحتاج اسويله سي بي ار اسويله ياه لين يقوم او يودع

طيب .. حأحاول ما احكم على إجابتك كتير بس...كم رقم الإسعاف الي حدق عليه ؟