عربية الملكة --------> عشان نضال

[Biba]

السلام عليكم ورحمة الله وبركاته

حادخل في الموضوع على طول من دون مقدمات

ايش رأيكم في موضوع عربية الملكة ( سواء كانت عربية أو دولاب أو تبسي أو ......... )
هل هي ضرورية أم مجرد مكملات؟
ما هو متوسط سعر عربية الملكة؟ وهل هو معقول أم مبالغ فيه؟
لماذا تكون العربية مهمة جداً للفتاة... ومجرد ثقل مادي على كاهل الشاب؟
ما الأشياء التي يجب وضعها في عربية الملكة؟
ايش حيكون شعورك إزا خطيبك ما جاب عربية ملكة؟ ------> للبنات
ايش حيكون شعورك لو جاب؟

هادا موضوع حيوي ومهم .... استنبطته من كرسي الاعتراف حق نضال
وحيفيدنا كلنا سواء المتزوج أو الخاطب ... حتى اللي لسا ما جالو نصيب حيستفيد منو يوم من الأيام
فأرجو التفاعل مع الموضوع

[Mr.THAMER]

جيتي على الجرح


بصراحه انا اشوف انها حاجه جداً تافهه

وحاجه مالها داعي

انا عربية الملكه كلفتني 4500 والعطور جاتني هديه

بس انا ابغى اعرفه ايش الفايده منها . . . تكلفه على الفاضي . . لو انها حاجه مفيده احط فيها 10000 مو 4500 . . لكن حاجه فاضيه

قبل الملكه كنت اقول لاهلي ما ابغى اقدم عربيه شوفوا شي ثاني اي حاجه اسويها عربيه ما ابغى اشتري . . . اللين فكرت اجيب حاجه محتلفه اللي هيا

جذع صغير عوده كمبودي . . . واحطها في علبه فخمة ويكون شكلها حلو ونستفيدمنها وغير كذا تغير .. . . اهلى رفضوا وقالوا "ايش يقولوا علينا الناس"

بس رضخت للامر الواقع وجبتها . . . وشوفيها مركونه ولا احد يطالع فيها

وكمان ترا العربيات مبالغ فيها جداً . . . شفت واحده بــ 14000 ريال . . . مين المجنون اللي يحط مبلغ زي هذا في حاجه تافهه

انا بس ابغى اعرف ليه البنات يحبوا عربيه الملكة . . . ايش الهدف منها ؟؟

وابغى اعرف من الانسان التافهه اللي ابتكر هذا الشي


لي رجعه بعد سماع تعليق الاخوه

تحياتي

[نضال]

هيا خير

ترى الموضوع دا مرة فاقع قلبي

شوفي .. عربية الملكه صارت شي في عاداتنا .. يعني لازم يحطوا شي و يقعدوا يجسسوا عليه و يصيحوا .. ما اختلفنا

بس الموضوع بدأ يصير صرفية على الفاضي .. يعني لما احط خمسة الاف في عربيه ارجع بعدها احطها في الصوالين و لا احد يطالع فيها .. بالله مو حرام؟

((هل هي ضرورية أم مجرد مكملات؟))

انا اشوف انها مجرد شكليات .. اجيب عربية شاهي احسن لي




((ما هو متوسط سعر عربية الملكة؟ وهل هو معقول أم مبالغ فيه؟))

صراحة ما عندي فكرة عن متوسط السعر ... انا اعرف انه في حدود الخمسة الاف ريال .. و الشي اللي الناس تعتبره ما يجمل بـ 3 الاف ... بس ايا كان فالمبلغ مبالغ فيه مقارنه بعربية تنحط في الصوالين بعد كدا ..


(( ما الأشياء التي يجب وضعها في عربية الملكة؟))


حلاوة لدو و هريسة و لبنيه .. صراحة ما عندي فكرة


ترى قريب راح اسوي مظاهرة ضد عربية الملكه .. اطلبوا اي شي الا عربية ملكه لا لعربية الملكة

[نضال]

ابو ثامر دولا ما يجوا الا بالعين الحمره

فكرة العودة عجبتني .. شكلي حاسويها

[Mr.THAMER]

يحطوا فيها

سكر نبات . . عطور . . فوفل . . ريالات فضه . . هيل . . عوده(بخور) . . صحن حلوه . . اعتقد خلاص

ومن التقليعات اللي طلعت الان

صورة للعريس << ======= مين زينه التمساح

جوال اخر موديل <<=========== تعرفها اللي حط


بس شفتوا . . . ولا ش فيه فايده غير صحن الحلاوه


يا اخون اللي راح يخطب قريب . . . اهم حاجه تسويها . . . اول مرة ترحلهم بعد الملكه . . . خليها تنزل لك صحن الحلاوه . . . لا اوصيك خلص امها . . .

بالنسبه ليا . . . خليتها تنزلهافي اول مرتين . . . قلتلها لاحد ياكل منه . . . وهيا ما صدقت خبر , , اللين ما خلصته

اذا في تقليعات جديدة هاتوا . .

اخ نضال . . .يا ويل تسويها . . . ياخي انا افكر واتعب وانت تاخذ على الفاضي . . . وكمان حاجه ثانية ....اشتغل عندي شغل الحسد انا اجيب عربيه وانت لا ............ لازم تجيب عربيه



يالله تحياتي

[نضال]

فكرة صحن الحلاوة برضوا حلوة ...

صارت فكرتين .. جذع العود الكمبودي و صحن الحلاوة

بس انا دوبي بديت استوعب ان الشغله فيها عطور .. خليك من الفوفل و ريالات الفضة و شغل الهجص دا ..

بس بجد ما ينفع الواحد يدخل على اهل مرته من غير هدايا !

[Mr.THAMER]

يا نضال

دوبه جا شي في بالي لما قلت ادخل على اهل العروسه ويدي فاضيه

قلت خليني اقولك هوا

احمد ربك على العربيه والشغل اللي فيها ما يكلفك 5 الالف ريال


ياخي انا كل سنه في الصيف يجيني انتداب لابها قي الجنوب

انت هنا تدخل بعربيه ملكه

ياحبيبي هناك حاجه خياليه

تكسي امها بذهب وتكسي ابوها وعمها وخالتها مدري عمتها

وغير انك لما تيجي بس تبغى تخطب 10000ريال هذي بس حق دق الباب

وغير يوم الملكه . . . تجيب اكياس رز وشعير وغير الغنم

والمهر يا حبيبي فوق الميه

"فيه واحد من اللي نعرفهم هناك تعرف كم كان مهر زواجه . . . 250الف ريال " والله انا اتجننت واخذ بنت عمه المشكله

ويا حبيبي غير الذهب . . . فيه حاجه اسمها الرشرش والحزم هذي تكلفك ما بين العشرين والخمسين


مع احترامي لاهل الجنوب . . . وحبي لهم . . . بس حتى الشباب اللي هناك يستنكروا الحاجه هذي . . . بس عادتهم كذا

يعني من جد تجي تتزوج . . . . تاكل هوا

تحياتي

[ليدر أستوديو هبقات]

أيش المشكله في العربيه

يا أخي مادام حاجه تفرح العروسه ... وإنت عندك قدره ماديه .. وما تخالف الشرع أو العادات أو التقاليد .. مو مشكله

أنا عن نفسي لسا مطول .. رغم إني زملائي مخلفين للأسف

لكن عاداتنا صراحة تحتم العربيه

خالتي إتزوجت من 10 سناوت تقريبا

إلى اليوم لمن أدخل بيتها ألقى العربيه في المجلس

ونفس الفكره خالي .. لسا قبل سنه ... لكن عربيته مره فخمه

-------------------------------


يعني أيش المشكله

يا أخي هني عروستك قبل الضرب اللي حيجي ... مو بس إنت تتهنى يا أخي .. خخخخخخخخخخخخخخخخخخخخخخخخ

[maryam]

أشوف مافي ولا بنت علقت على الوضوع ..

انا بالنسبه ليه اكره عربيه الملكه ودايما اشوفها عند قريباتي وأتريق عليهم واجلس اشيل همها اذا جاتلي اش راح اسوي بيها

احس انها كركوبه وتعمل زحمه ما لها داعي في البيت

و أحزن على العريس إلي متكلف فيها

ياريت كل عريس يفكر يبتكر هديه حلوه لزوجة المستقبل بدل التكرار و التقليد الآعمى و كمان مالو داعي

يعني بالله في بنت دي الأيام تاكل فوفل؟؟؟ حتى لو هديه مرة صغيرة بس مررررة معبرة !

ترى في حاجات كتيرة دي الأيام تتعمل في الخطوبة و الملكة و الزواج ..... حاجات تجيب الهم ومالها داعي

يعني مثلا أنتوا يالعرسان تعجبكم حكاية أشربها و تشربني من كاسة عصير<<<..........ما صارت كاسة..... قد البرميل

ولا الورد إلي يترمى على المعازيم من البلكونة

سوري مش ورد .......دي الأيام صار ريالات فضة<<.......... يعني فلس يا عريس

و أستنى على الزفة إلي صارت ساعة زمن على بال ما تمشي خمسين و ستين متر..........على بال ما تتصور و تتبخر و تتمختر

و لا شي تاني .............. المصورة إلي تيجي تقولك أمل كدا و أعمل كدا و ياعروسه أدلعي و ياعريس .....#%$@!&

طيب يالا أرقصوا سلو عشان الصورة تطلع أحلى..

و احنا المعازيم من الساعة سبعة ولا من قبل و احنا نستنى عند الكوافير و اخرتها ساعة في الفرح و نرجع..والله ما راح تخلص اذا من يوم الخطبه الى الفرح عجايب

كثير وكلاااااااااااااااام ... وما خفي كان أعظم ...

بكرة نكمل الهرجة.....( ؛

[NeMo]

اهم شي اهم شي الفوفل دا

لا اله الا الله



اولا ابدأ حديثي بتمنياتي القلبية لكل عروسة وعريس مقبلين على الزواج السعادة والهناء وربي يكتبلهم الخير والبركة في حياتهم القادمة قولوا امين

وعلى قولة القايل(الله يهني سعيد بسعيدة)



شوفوا ياجماعة الخير.........كل شي بالعقل جميل......لو تستنى جمالة الناس وكلامهم وايش حيقولوا وايش حيفعلوا....ماعمرنا حنتزوج ولا حنتنيل


انا عن نفسي مايهمني شكل العربية وسعرها قد ماحيهمني ايش جواتها ............عطور كازنوفا محمود سعيد(يعععععععععععععععععععععععععععععععععععععععععععع عععععععععع) وربي ياويلو اكسرها فوق راسو

يعني في النهاية حتكون دليل جيد على زوق العريس

......والتبسي برضوا جيد


يعني انا لو افكر فيها بعقل شوية........الخمسة الاف دي ولا حتى عشرة, يزودها عالمهر وانا اعرف اتصرف فيها


وفي ناس فنانين ومخهم يخترع اشياء اوريجنال وجديد وان شاء الله خير..........اهم شي المضمون


بعدين ازا العربية مضايقتكم مرة ومكانها مقرف في الصوالين, ياخي بيعوها واستفيدوا من فلوسها واشتروبها مكة للتعمير(اليوم طلع طلعة جبارة ماشاء الله تبارك الله مع انو نزل كمان نزلة جامدة) بس اخبارو كويسة وقدام اخبارو تبشر...........


الزبدة يعني شغلوا مخكم وفكروا حياتكم خمسة عشرة سنين قدام كيف حتكون........حددوا اولوياتكم في الحياة وعلى إثرها حتشوف الدنيا (حلوة)



وسلامتكم