Walking away from the sun :: SoulTalk

[Daniaa.]

مره مو حلو كدا...لمن يكون في ناس تحبك وتبغى تكون معاك.. بس انت للأسف ما تبادلهم نفس الاحساس
بس عشان لا تكسر بنفسهم تتضطر انك تقعد معاهم.. بس جوت نفسك كدا ما تبغى

ولأني أؤمن بمقولة " ماتَفعل يُفعل بك ولو بعد حين" بشدة ..
احاول بقد ما اقدر انو انتبه لتصرفاتي مع الناس.. وانو قبل ما اجي اعمل شي اقيسو على نفسي واشوف ردة فعلي ايش حتكون .
فما ادري ازا المقولة دي تنطبق عالكلام اللي فوق...
بس مره حاسة بالزنب وتأنيب الضمير.. ودايما ماتجيني افكار ازا في ناس بيحسوا كدا ناحيتي ولا لأ .

[Daniaa.]

انا اعرف انو الواحد ينام عشان يريح جسمو ودماغو .. و انو المفروض اول ما الواحد يحط راسو عالمخدة.. يوقف عن التفكير .

بس بعض الناس لأ...اول ما يجو يحطوا راسهم..تبدأ الافكار سواء الجيدة او السيئة تنهال عليهم من كل حدب و صوب .. مدري من فين.
يعني وقت ما يكون من جد محتاج الفكره دي.. ماتجي ابدا..
بس اول ما يجي يبى ينام .. تولع اللمبة ..



ياريت لو يكون في زر.. وقت ما يكون الواحد طفشان او تعبان ومايبى يفكر يعمل لمخو شت داون
خصوصا وقت النوم... اللي هوا اهم حاجة في الحياة

[Daniaa.]

أفتكرت حاجة تانية برضو تقهرني في ردود بعض الاعضاء
انو في نهاية كل رد يكتبو ... يقولك بالتوفيق او موفق. ويحط السمايلي فيس دا :] او ولد عمو
ولو رد عليه صاحب الموضوع بسؤال مسلا.. داكا يرد عليه تاني ويرجع يكتبلك بالتوفيق

انا عارفة انو كل واحد حر باللي يكتبو وانو انا مالي دخل.. بس مرره اتنرفز لمن اقرا الكلمة ديك..


ليش ما يكون لكل واحد طريقة كلامو الخاصه بيه .. يشكر بالطريقة اللي يحبها ويدعي برضو بالطريقة اللي يحبها.
الكلمات المنتشرة في المنتديات دي زي "مشكور, يسلمو, ودي موفق, و الخ من الكلمات اللي زي كدا ..."
يعني عشان كم واحد سار يكتبها ويرد بيها لازم الكل يسوي زيو ؟!؟

[Daniaa.]

الكلام هنا جدا ممتع ..
تقول اللي تبغاه في الوقت اللي تبغاه وتخرج كل اللي في نفسك .. محد يقدر يحشر نفسو ولا يقلك تلت التلاتة كم

[Daniaa.]

- كيــــفك يا قمر
- حبيبتي ناولييني ..مدري ايش
-وحشتيني يا عسل
-يا قلبو.. الخ الخ

مني فاااهمة !!!

مره شي ينرفز لمن تكوني مع وحده وكل كلامها بالطريقة دي... نمك ومجاملات مالها داعي
واللي ينرفز اكتر واكتر.. لمن تكون في سنك .. وازا مو صحبتك كمان x_x

لو كانت حرمة كبيرة ما بينك وبينها شي ..ابله ولا دكتورة مسلا.. طلبت من حاجة تقولك يا حبيبتي .
عادي تحسسك انك زي بنتها وبالعكس تنبسطي لمن تسويلها اللي طلبتو منك .. بدل ما تقولك يا بنت ولا يا طالبة كأنك جاية مدري من فين

اما لمن تكون وحدة زيك.. وتجي تقولك يا حلوه ويا قمر ..ايش لو داعي الكلام دا يعني
بالزات الكلمتين دول...احسها زي كانها بتتريق .
لو ما تعرفيني وتبي تسألي عن شي قولي لو سمحتي بلاش يا حلوه دي !!

[Daniaa.]

لمن يكون الواحد زعلان, مبسوط, ولا متضايق من حاجة..سبحان الله لمن تشوفو يبان في وجهو على طول..
بس انا السنة اللي فاتت اكتشفت انو اقدر اعرف نفسية الواحد من كلامو.. مو قصدي لمن اكلمو فيس تو فيس.. لا لمن اكلمو عالمسن.
مدري هيا قفت ولا اغلبية الناس تقدر تفرق برضو ..



حقول اسم كم عضو واللي لاحظتو من طريقة كلامو.. واللي يشوف اسمو يرسلي ويقولي ازا توقعي كان صح ولا لأ

عموريAHLI : لمن يجي يكتب يكون مكشر.. واحيانا احسو يرد من طرف خشمو ..
حتى لمن يجي ينكت ولا يتريق.. مافي اي تعابير او حتى ابتسامة صغيرة على وجهو.
بيوكيميائية ^_^ : من كلامها يبان عليها انها وحدة طيوبة وقلبها ابيض . بس انها جدية شوية..ولمن تجي تمزح وتنكت..احس برضو ما في اي تعابير على وجهها .
سكووت: دمها خفيف.. صح انو اغلب ردودها اللي قريتها فيها ترقيه و مزح ..بس جواتها كدا احس دمها محروق.. وفي حاجات مضايقها .
lady-fano-bird: لزيزه يناسو عليها ..احسها مهويه شوية..
ǁ غــلأآإ ، رٍوٍحــي ǁ : البت دي مدري كيف...احسها مع ناس وناس...يعني ناس تمزح وتنكت معاهم, ناس ترد عليهم من طرف خشمها , وناس تكون معاهم عادي
Life as Game : لزيز ومره احب اقرا مشاركاتو .. بس احسو لمن يجي يكتب يكون منفعل بزيادة واحيانا معصب ..اليي يخلي فيها شوية وقاحة
Butterfly Hope: مره يا ناسو.. دايمنها مبتسمة و مبسوطة.
miss you : كان يكتب اسألتو وهوا طفشااان ونفسو يلطش احد .

بس هادا اللي افتكرو... ولحد يزعل . وعلى كلمة من طرف خشمو معليش بس ما اعرف اي تعبير تاني بنفس المعنى


" امكن اللي كتبتو يكون تحليل شخصية على نفسية مدري ..مشو حالكم بس "

[Daniaa.]

ماروكو الحلقة الاولى Part 1

ماروكو الحلقة الاولى Part 2

مشاهدة ممتعة

[Daniaa.]

كتبت تعليق بسيط على ماروكو.. وزبطو ونسقتو ..
.. قعدت متنحه شويه..قريت الكلام اللي كتبتو كزا مره و بعدها قررت اني ما اعتمد المشاركة
والسبب .. ما ادري

[Daniaa.]

أحب الرسم ..اعشقو بمعنى اصح...
واتمنى اتمنى اني اتقنو... انا عندي القدرة على الرسم لكني لسا مبتدئه..
وعشان اسير متقنة له..لازم ارسم وارسم وارسم .. وادرب يدي كتييييير...
بس في مشكلة...انو الرسم مرتبط بحالتي المزاجية..
يعني مو في اي وقت اجي امسك المرسام وابدأ ارسم تزبوط معايا الرسمه
و نادرا ما اكون في المزاج المناسب للرسم ..

في بداية الصيف دخلت دورة الوان زيتية .. عملت لوحتيين بس لسا محتاجة لبعض التعديلات ..اللي ما ادري متى حسويها.. -_-
احتاج اللون الابيض عشان اسوي التعديلات دي بس مافيا انزل المكتبة اجيبو ..او حتى اطلب من احد يجيبو ليا على طريقو.. اخ بس فيا كسل مو طبيعي

قريب ضربت غرفتي بويا .. وطلبت تكون البويا ساده "لون بس" على اساس اني ارسم عالجدار ..
مر لين دحين تلاته شهور وداخلين في الرابع وانا ... و السبب يعود الى ...



متعبٌ انت يا مزاجي ..

[Daniaa.]

يــاانها لزيزة هادي الشروق