شين بين النجوم

[ماسة المنتدى]

حاب أوضح لكم شي قبل لا تدخلون بخضم الأحداث أن الواحد لا حس بنقص بشي يكتب عنه دائمـ(ن) .. مثلـ(ن) النحيف دايم يكتب أنه دب.. والزين دايم يكتب أنه شين عاد أنتم أفهموها ..!!

.
.
.

أول كلمة سمعتها من أمي وععععععععع ، و أول كلمة سمعتها من أبوي من هذا ولده ، وأنا أناظرهم بعيوني وخانقتني العبرة .

طلعت للدنيا وأنا متحطم من الشين اللى فيني ، كنت احلم وأنا ببطن أمي إني اطلع للدنيا وكاميرات التصوير بتجهرني من كثر مايصوروني كنت أحسبني أهبل كنت أحسبني زين كنت أحسبني أطخم ، طلعت شيفه طلعت أحوم التسبد ، قسم بالله يا فيني شين بوجهي ماهوب موجود بوجهه أحد ، خشمي كبير راسي صغير عيوني مغمصه وجهي من جهة دائري ومن جهة طريق خريص <<< حتى ذباتي تحوم التسبد مثل وجهي ، بس كنت عارف انه بيجين يوم وما يصح الااا الصحيح ..!!


كبرت وكبرت براطمي معاي حتى مرات لا رحت اتسوق اركب براطمي بالعربيه ودفها ، قسم بالله لو ادخل بمسابقة اقوى فك أن أغطي على الفك المفترس من كثر مافكوكي معضله من شيل براطمي ، يعني لو تتخيلون المحصله النهائيه لشكلي ر اح تكتشفون معادله من الدرجه الثانيه بأربع مجاهيل يعني مستحيل أحد يحلها .. المجهول الأول شنبي لأنه متغطي بلستك التريله اللى أسمها براطمي . اما المجهول الثاني فهي خدودي لأني إنسان من غير خدود يعني لو تشوفون وجهي من قدام ماراح تشوفون فيني الا خشمي وبراطمي واذا شفتوني من على جنب راح تشوفون خشمي هللى تقول رواق خيمه ماهوب خشم اللعن بو جده من خشم مدري من اللى قايله ان وجهي خيمه وجاي طاق رواقه حولي ، والمجهول الثالثة هو الفلفولتين اللى براسي الصراحه حسوفه اسميها شعر لأنها ماتتصف بالصفات اللى يتصف فيها الشعر حتى اني مانع نفسي من شوفت التلفزيون عشان لا اشوف دعايات الشامبو وتحطم اكثر من ما انا متحطم ، اما المجهول الرابع والآخير مع اني للحين مانيب متأكد ان وجهي بيوقف على اربع مجاهيل لأنها الصراحه قليله بحق وجهي والظاهر انه بيجي يوم بتطلع حبه كبيره تغطي وجهي بكبره ورتاح من الشين اللى فيه ، على العموم بس حبيت اعلمكم ان وجهي كله حبوب غاديـ(ن) وجهي بيت نمل موب وجهه من كثر مالحبوب السود لاعبه فيه ..!!


اتخذت قرار بيني وبين وجهي أني أحرم على نفسي شوفت وجهي ، وروح وكسر كل مرايات البيت حتى مرايات السيارات اللى اركبها كسرتها ، وفي يوم من الأيام وانا نايم بغرفتي على الأرض لأن نومت الأرض صحية ( الااا قول ان ابوك يقول حسوفه بوجهك سرير يالشين ) .. وبعد حلم وردي شفت فيه كل بنات العالم الطخمات جالسات يسولفـ(ن) عند وجهي وينغزون وجهي ويقبصونه ويقولون يوووه ياملح وجهك بعد هالوناسه اللحظيه جاني آلم مفاجئ بوجهي خرب على أحلى لحظات حياتي وبديت اتحسس وجهي ونفسي منسده كني شايل حفايظ جدي وهو مسهلهااا ، حسيت بشي غريب بوجهي الصراحه حسيت بوجهي كنه مبنشر ماهوب مثل اول ضغط الهواا اللى فيه 40 من زود المساحه اللى فيه راجعت نفسي كثير لأني حالف على نفسي اني ما أشوف وجهي بالمرايه أبد ، بس مدري وش الى جاني حزتها وقالي .. روح ياجريح شف وجهك بالمرايه يمكن الله أستجاب دعائك وصرت حلو .. الصراحه انا أستبعدت الفكره وقلت اكيد هذا شرشر ( الشيطان والعياذ بالله من الشيطان الرجيم) يبي يحطمني زياده عشان يوصل للشي اللى يبيه !! ( شكل شرشر ناوي يجرني للرذيله والعياذ بالله ) ..!!


وروح للحمام .. الصراحه اول مادخلت الحمام حسيت بالراحه والطمأنينه .. حتى بديت أغني وجرر الصوت جرر قسم غداا صوتي مغااط ملفوف على رزمة فلوس أمهات خمسميه من كثر الجرجره ( كني أشوف كم واحد فيكم رايح للحمام يجرجر صوته مثلي ينتظر الفلوس ) .. وبعد ماستاسع صدري طلعت من الحمام من غير ما أشوف وجهي .. ويوم تذكرت ورجع ودخل مره ثانيه للحمام وأحاول أمنع نفسي أني ما اخق مع الحمام مره ثانيه وجلس أغني فيه .. وحط يديني الثنتين على راسي واحاول أجبره انه يشوف نفسه بالمرايه لأن وجهي متحطم أكثر مني ومانع نفسه منه ( تسولف على هنود أنت ) .. ويوم حطيت وجهي قدام مرايت الحمام وأنا مغمض عيوني .. بديت أتخيل نفسي حلو ووجهي نسم وراحت الحبوب وطلعت شامه على يمين برطمي الفوقي .. وبديت أتخيل أن وجهي صار يفرز روايح عطور بدل ريحة مبيد الحشرات اللى كان يفرزها .. وبعد أمنيات وتخيلات طارت بمهب الريح اول ما فتحت عيوني وشفت وجهي بعد أنقطاع دام لأكثر من شهور .. قسم طلعت أحووم التسبد صرت أشين من أول .. ويوم خمني التحطم ديورت وعطيت المرايه ظهري وهممتو للخروج من الحمام ( من شافك تقول هممت بيقول ذا طالع من حرب ) ..!!


الا بصوت يناديني ويقول : جريح .. جريحوه .. جراحوه ( مدري وش فيه هالجني مابقى جنسيه مامثلها بأسمي ) .. وأنا اللى أتخزبق بس الحمد لله أني بالحمام لأني من النوع اللى لا تخزبق فلت .. ولتفت على جهة الصوت الا وجهي يكلمني من المرايه .. قسم حسيت ان صواميل جسمي تفككت .. حسيت لحظتها بإحساس مدري هو عاطفي ولا رومنسي ولا فلم هندي .. المهم ماكنت أعرف أخاف عشان كذا كنت مستغرب الأحساس هذا .. ويوم تأكدت أن اللى يكلمني هو وجهي اللى بمرايه .. حطيت رجلي أبي أنحاش .. بس مدري وش فيها رجولي ماقوة تشيلني .. وبدت الدروج تصافق .. وفرشة الأسنان تزحلق بالبانيو .. وكرسي الحمام يلحقني ( شكله حاقد على من كثر ما جلست عليه ) .. ووجهي مازال يردد عبارات غريبه والظاهر انه جالس يتاااغر .. ( والله من الوصاخه بذاا الوجهه ) ..!!


جمعت قواي المتخاذله وقلت لوجهي وش تبي .. رد علي وقال أنا شرشر يالغبي ماعرفتني .. وانا اللى احط يدي على كتفه وأقوله لا والله ماعرفتك ومالقيت تكلمني الا بذا الوجهه الشين ( موب تسنه وجهي ) .. قالي كنت أحسبك متأقلم عليه وجيتك فيه بس تراني أقدر أجيك بالوجهه اللى تبيه .. عاد ناظرته بشافحه وقلت له أحلف .. قالي والله ( لا ويحلف وانا اصدق ) .. قلت له طيب تعالي بوجهه نانسي ( وجهه خاق ومليان سعابيل ) .. عاد رد علي وقال : وليه فيه أحد قالك أني بايع عمري .. مالها داعي بكره شرشر بكبره تصير مكسوره عينه منك يالشين ..!!



بعد سواليف طويله وبعد ما أنهكتني السوالف مع شرشر .. وصل فينا الحال إلى أني أنسدحت بالبانيو وشرشر جلس على الكرسي .. وبديت أسئل شرشر وقوله : طيب حبيبي ياشرشر ( من دريت أنه يقدر يجيني بوجهه نانسي وانا خاقـ(ن) معه ) .. هاللحين لو بقولك أني متعقد من وجهي وودي أغيره تغيره لي .. قالي لا ما أقدر بس أقدر أسوي لك أشياء كثيره .. قلت له أنا ما أبي هالأشياء أبيك تغير وجهي قسم تعبت من الشين اللى فيه أبي أصير مثل باقي الشباب أروح للمجمعات وتصير عندي عشيقه غير بنات الفيديو كليب قسم تعبت وانا اناظر التلفزيون وكل ماطلعت وحده قلت هذي حبيبتي .. عاد رد علي شرشر وقال : عادي يا جراحوه أقدر أخليك تعرف على وحده مثل اللى بالفيديو كليب وخليها تحبك وتصير عشيقها .. عادا انا ماقدرت أمسك نفسي وجلست أضحك ههههههه وقوله أنت شكلك ما شفت وجهي زين .. عاد يرد ويقول أيه على الشين اللى بوجهك اللى تقل بيتزا من غير طماط وكثر زيتون بخليها تحبك ..!!


ويسحبني شرشر من علباي وياخذني معه للمجمع اللى جمب بيتنا وهو يقولي أختر اللى تبي .. وجلست أتلفت وانا مطلع لساني تقل كلب حراسه .. الا وشوف ذيك الطخمه اللى عيونها تسنها بيض نعام وردوفها اللى تسنها بلاط حمام وخصرها مربوط بحزام .. قسم يا مواصفاتها تجيب الجنان .. وانااا اللى اقول لشرشر هذي هي هذي هي الله يلعن شكلك ياشرشر هذي هي .. ولتفت جمبي الا شرشر موب جمبي .. ودوره ولاااه ماسك يد واحد يقوله حط بشنطتها الرقم ( قسم مايوفر ما أمداني لهيت شوي مع جمالها الا نقز يوسوس لواحد ثاني ) .. وسحب شرشر مع أذانيه .. وأشر على ذيك البنت واقوله هذي هي .. عاد يرد على شرشر وهو نافخـ(ن) صدره ومطير حواجبه للسما ويقولي والله انك قنوع مالقيت غير خيشة البصل تخق معهاا .. وانا اقوله ايه اخق معها هو انا شايف شي .. ابيها ياشرشر تكفى وشلون .. قالي عادي روح اوقف جمبها وتنحنح وكلمها بأسلوب .. وأنا اللى تطير عيوني بس كذا ياشرشر وبتخق معي .. قالي أيه وبتخق معك بس الله الله بالذرابه لا تفشلنا ..!!



ونقز لها ووقف جمبها وجلس أتنحنح .. وتنحنح .. وتنحنح .. ألين ما الحريم اللى بالسوق كلهم تغطو يحسبوني بطلع .. وجلس أقولها : هيه أنتي ( والله من الأسلوب ) .. وترد علي وتقولي : تكلمني .. عاد انا قلبي بدااا يخفق وحسيت بشعور نفس الشعور اللى حسيت فيه يوم دخلت للحمام مدري شعور عاطفي ولا رومنسي ولا شي غريب حتى بغيت ابوبز بوسط السوق لحظتها من زود مالأحساس خزبقني .. وقولها أيه اكلمك : يا أحسن سياره ، يا أكبر طياره ، يا حارسة عماره .. وهي اللى تصكني بشنطتها القوتشي الخضرا ( الظاهر انك مغازل وحده بحفر العتش ) .. ورجع لشرشر والشرار طاير من عيوني وقوله تلعب على يالهيس وتقولي رح كلمها شفها ألمختني بشنطتها على خشمي .. عاد سئلني شرشر وقالي وش قلتها .. وقوله أني قلت لها : أنتي أحسن سياره ( قال أيوه ) وأنتي أكبر طياره ( قالي ايه ) وقلت لها انتي حارسة عماره بس .. تفل بوجهي شرشر وهزئني وحسسني إني حشره وقالي هذا كلام تقوله لوحده تبي تغازلها ، هذا كلام ينقال لبياعة فصفص عند ملعب الملز ياحمار .. وانا اللى اتعلق بطرف ثوب شرشر واقوله طيب شفلي وحده ثانيه خلاص بغير أسلوبي وصير أخلاق ..!!



الا وتجيك ذيك الصاروخ اللى تخلي الواحد يسبهه ويمشي وراها غصب الا وأشوف واحد اطخم يلحقها ويغازلها .. الا وروح واسّطره وضربه كفوف بخشمي مع العلم اني كنت جالس اهاوشه وتكلم عليه بس مع الحماس وجهي صار ياخذ يمين ويسار عاد خشمي متبري مني وطويل ومدري الا وهو طايح كفوف بالرجال .. ألين ما طااح الأطخم بساحة المجمع عاد انا ترددت .. أطب فوقه ( ضعت مع الأطخم ) .. ولا أروح ألحق البنت .. بس الحمد لله ماصرت شاذ ورحت ولحقت البنت .. جلست أطاردها .. أطاردها .. ألين ماوقفت جمب زباله وبدت تعاطس ودخلت يدها بشنطتهااا تدور منديل عاد انا لحظتها حسيت بالرجوله وقلت لازم أفزع لها .. بس قبل لا أفزع ألتفت على شرشر وقلت له أفزع .. هز براسه مدري هو موافق ولا لا .. عاد قلت بيني وبين وجهي مابدهاش يا جراحوه افصخ فنيلتك وكتب عليها رقمك وعطهه أياه تمسح فيه خشمهااا .. الا بذاك اللى حط يده على كتفى .. وانا مانيب معبره وقول للبنت دوتس لا تستحين أعتبريني مثل الأطخم اللى قبل شوي .. الا البنت تناظرني وتناظر شعر صدري .. وهي ساكته .. الا ذاك اللى يده على كتفي يلف وجهي ويسطرني بذااك الكف اللى جلس خشمي يدور على وجهي أربع دورات وعيونني جالس تلحق خشمي وتدور معاه .. ويوم أثبتت عيوني وثبت بعدها خشمي الا أشوف أغبرت شرشر في آخر السيب .. واللى ساطرني كف هو واحد من حماة الرذيله رجال الهيئه ..!!


مايستفاد من خشمي : :-

- القناعه كنز(ن) لا يفنى .
- خشمك حصانك ان صنته صانك .
- الجمال جمال الروح حتى لو كان الوجهه بيتزا من غير طماط وكثر زيتون .
- المغازل عيب .
- الله يكثر من أشكال حماة الرذيله ويقلل من أشكال شرشر والولد الأطخم اللى بموضوعي وأنا


منقول

[.,.نيــــــــــــــــــــران.,.]

موضوع فكاهي في داخله بعض العظة:)

شاكرة لك

تحياتي

[ماسة المنتدى]

موضوع فكاهي في داخله بعض العظة:) شاكرة لك تحياتي

ثانكس خيتو
هههههههههههههه
تقبلوا اعتذاري نسيت انزل الترجمه من نجدي للحجازي
ادري مافهمتوا من القصه شي ..............
ههههههههههههههههههههه ...