نبذة عن المواد والخطة الدراسة لـ سنة ثانية طب أسنان ,,

[Dr~NanoOok]

السلام عليكم ورحمة الله ,,

اهلا بدكاترة الأسنان واهلا بيكم في عالم طب الأسنان الجميل
باذن الله حتنبسطوا مره فمن جد طب الأسنان جدا ممتع -اذا حبيتوه من قلب-

وعارفة انكم قد ايش متحمسين لبداية الدراسة
وتدخلوا في جو الطب وكل شي
لاحقين باذن الله , والأيام الحلوة جايتكم ^^

هذه خطة السنة اللي فاتت وإن شاء الله خطتكم ما حتفرق كتير وحيضيفوا لكم مادة المصطلحات الطبية

حتندرسوا هذه السنة 5 مواد طب بشري + مادة تخصص حقت الأسنان

يعني ما حتحسوا انكم صرتوا أسنان من جد إلا لما تصيروا سنة ثالثة وتكون أغلب المواد حقتنا أسنانية

~

مادة التخصص هي


Dental Anatomy & Occlusion
تشريح الأسنان و اللإطباق

عليها ساعتين فقط من ضمنها العملي

النظري:

مره حلوة ومره سهله , حتدرسوا بالبداية مقدمة عن الأسنان وخصائصها و كمان عن الفك
بعدين حتدرسوا كل سنّة في الفم 32 عند البالغين و 28 عن الأطفال
من كل الجهات حقتها وايش المميز فيها

~

العملي:

جدا ممتع في الترم الأول حتمسكوا قوالب شمع wax
وحتعملوا منها مجسمات لأسنان وتخلوا كأنها حقيقية
مره مهم دا الشي يساعد على صقل مهاراتكم اليدوية و التعرف بالتفصيل على الأسنان اللي بتعملوها
وبالترم الثاني حتاخدوا مجسم للفكين كلها وحتكملوا كذا سنّة هم كاسرينها

المعامل مره ممتعة وتعلمك الصبر والدقة في العمل والتفاصيل

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~

Anatomy
التشريح

عليها 5 ساعات من ضمنها العملي

النظري:
بالبداية حتاخدوا جسم الانسان بصفة عامة وحتدرسوا أهم الحركات وأسمائها والعظام والعضلات
بعدين حتاخدوا كل جزئية لوحدها , وتاخدوا الشرايين والأوردة والأعصاب والعضلات ....الخ
يعني مثلا منطقة الصدر ومافيها من الرئتين و القلب والقصبة الهوائية

لكن على نهاية الترم الأول وبداية الترم الثاني
حتتعمقوا في الـ head & neck وحتاخدوا كل شي فيه
لأنه هذا اللي يهمنا أكثر شي في طب الأسنان وهو جدا مهم

بعدها حتاخدوا النيورو اناتومي وهو خاص بالاعصاب و الدماغ


~


العملي:

حتروحوا المشرحة وتشوفوا كل اللي درستوه في المحاضرات
جداااااا ممتع ويركز المعلومة وما تنسوها
حتى اختباراتها تكون مره حلوة

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~

Histology
علم الأنسجة
&
Embryology
علم الأجنة

المادتين اختبارهم مع بعض وساعاتهم كمان
وعليها ساعتين من ضمنها العملي

النظري:
مادتين سهلين يعتمدوا على الحفظ والربط
الامبريولوجي حلو يعرفك مراحل تطور الجنين وقتها من جد تتعجبي لدقة خلق الله تعالى

~

العملي:
الهيستولوجي يعتمد على الشرائح تحت المجهر ورسمها
و الامبريولوجي فقط الرسومات

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~

Physilogy
علم وظائف الأعضاء

عليها 4 ساعات من ضمنها العملي

النظري:

صراحة تعتبر هذه أجمل وأمتع مواد البشري
تعتمد على الفهم أكتر من الحفظ وتساعد عليه
تتكلم عن وظائف جسم الانسان وكيف تعمل كل واحدة بالتفصيل
حتاخدوا جهاز جهاز من أجهزة الجسم

~

العملي:

حلو وسهل وحتاخدوا فيه أشياء أساسية في الطب
زي قياس ضغط الدم و سماع دقات القلب بالسماعة وتحديد فصائل الدم
وتخطيط القلب و سرعة التنفس
جدا ممتعة

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~

Biochemistry
الكيمياء الحيوية السريرية

عليها 4 ساعات من ضمنها العملي

النظري:
مادة دسمة تتكلم عن كل المكونات بالجسم من حيث تركيبها
زي الكربوهيدرات و الدهون والبروتينات وتأثيرها على الجسم والوظائف الحيوية
هي تقريبا أصعب مواد سنة ثانية وكثيرين ما يحبوها
لكن شدوا حيلكم وحالوا تستمتعوا بيها

~

العملي:
تقريبا زي معمل الكيميا إلا اننا بعد كل تجربه لازم نقيس حاجة عن طريق جهاز ضوئي

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~

هذه هي مواد سنة ثانية , غير المواد العامة زي الثقافة الاسلامية والعربي ومهارات الاتصال
سهله باذن الله لكن تعتبر دسمة فلازم تشدوا حيلكم
مع ان الاغلبية يسموها سنة الفلة << بالنسبة لسنة ثالثة أسنان
لكن لا تستهينوا بيها واعملوا أحسن ما عندكم

وإن شاء الله اذا في أي شي تاني عندي راح أضيفه
وأي استفسار عن المواد , فأنا موجودة

=)